ບັນດາທ້ອງຖິ່ນຕ່າງໆຂອງ ຫວຽດນາມ ກໍ່ຜັນຂະຫຍາຍບັນດາມາດຕະການປ້ອງກັນ, ຕ້ານເຊື້ອພະຍາດປອດອັກເສບໂດຍໄວຣັດ ໂກໂຣນາ ສາຍພັນໃໝ່ກໍ່ຂຶ້ນໂດຍໄວ

ພາບປະກອບ

ຫວຽດນາມ ພວມຄວບຄຸມເຊື້ອພະຍາດປອດອັກເສບໂດຍໄວຣັດ ໂກໂຣນາ ສາຍພັນໃໝ່ກໍ່ຂຶ້ນເປັນຢ່າງດີ, ນັ້ນແມ່ນຄຳຢັ້ງຢືນຂອງທ່ານຮອງນາຍົກລັດຖະມົນຕີ ຫວຽດນາມ ຫວູດຶກດາມ ທີ່ກອງປະຊຸມກັບບັນດາກະຊວງ, ຂະແໜງການກ່ຽວກັບວຽກງານການປ້ອງກັນ, ສະກັດກັ້ນ, ປິ່ນປົວເຊື້ອພະຍາດປອດອັກເສບໂດຍໄວຣັດ ໂກໂຣນາ ສາຍພັນໃໝ່(nCoV) ກໍ່ຂຶ້ນ ໃນຕອນແລງວັນທີ 28 ມັງກອນ ຢູ່ ຮ່າໂນ້ຍ. ທີ່ກອງປະຊຸມ, ທ່ານຮອງນາຍົກລັດຖະມົນຕີ ຫວູດຶກດາມ ໄດ້ຮຽກຮ້ອງໃຫ້ກະຊວງສາທາລະນະສຸກ ຫວຽດນາມ ສ້າງຕັ້ງ 40 ທິມງານເຄື່ອນທີ່ໂດຍໄວ ເພື່ອສາມາດແຍກຕົວຜູ້ຖືກສົງໄສວ່າ ໄດ້ຕິດໄວຣັດ ໂກໂຣນາ ອອກຢູ່ຕ່າງຫາກ ແລະ ປິ່ນປົວຢູ່ກັບທີ່. ທ່ານຮອງນາຍົກລັດຖະມົນຕີກໍ່ຮຽກຮ້ອງໃຫ້ບັນດາໂຮງໝໍຂັ້ນສູນກາງ, ຂັ້ນແຂວງສ້າງຕັ້ງທິມງານເຄື່ອນທີ່ໂດຍໄວ ເພື່ອຮັບມືຕໍ່ເຊື້ອພະຍາດໃນບໍລິເວນ.

ສະພາບການໂລກລະບາດປອດອັກເສບ ຍ້ອນເຊື້ອໄວຣັດສາຍພັນໃໝ່ ໂຄໂຣນາ (2019 – nCoV) ຢູ່ຈີນ ສືບຕໍ່ມີການຜັນແປຢ່າງສັບສົນ ແລະ ຮ້າຍແຮງທີ່ສຸດ, ໄລ່ມາຮອດຕອນເຊົ້າວັນທີ 29 ມັງກອນ, ຈໍານວນຜູ້ເສຍຊີວິດຍ້ອນໂລກລະບາດດັ່ງກ່າວ ໄດ້ເພີ່ມຂຶ້ນເປັນ 132 ຄົນແລ້ວ, ຜູ້ຕິດພະຍາດໃນທົ່ວປະເທດຈີນ ແມ່ນ ເກືອບ 6.000 ຄົນ. ຕົວເລກດັ່ງກ່າວ ໄດ້ລື່ນກາຍຈໍານວນຜູ້ຕິດພະຍາດປອດອັກເສບ ຍ້ອນເຊື້ອໄວຣັດ SARS ທີ່ລະບາດໃນຊຸມປີ 2002 – 2003. ຕໍ່ໜ້າສະພາບການດັ່ງກ່າວ, ຈີນ ໄດ້ອະນຸຍາດໃຫ້ ອົງການອະນາໄມໂລກ (WHO) ແຕ່ງຕັ້ງນັກຊ່ຽວຊານໄປຍັງປະເທດນີ້ ເພື່ອຊອກຮູ້ກ່ຽວກັບຈຸລະໂລກເຊື້ອໄວຣັດ ສາຍພັນໃໝ່ໂຄໂຣນາ ແລະ ແນະນໍາໂລກຮັບມືກັບໂລກລະບາດດັ່ງກ່າວ.

ວັນທີ 28 ມັງກອນ, ຕໍ່ໜ້າສະພາບການສັບສົນຂອງໂລກລະບາດອັກເສບປອດ ຍ້ອນເຊື້ອໄວຣັດສາຍພັນໃໝ່ ໂຄໂຣນາ ກໍ່ຂຶ້ນ ຢູ່ ອູຄານ, ປະເທດຈີນນັ້ນ, ອາເມລິກາ ໄດ້ຍົກລະດັບການກ່າວເຕືອນເມື່ອໄປທ່ອງທ່ຽວຢູ່ປະເທດຈີນ ຂຶ້ນເປັນລະດັບທີ 3, ເຊິ່ງເປັນລະດັບສູງສຸດ, ກ່າວເຕືອນປະຊາຊົນທຸກຄົນ ຄວນຈໍາກັດການໄປທ່ຽວປະເທດຈີນ. ກະຊວງການຕ່າງປະເທດ ອາເມລິກາ ໄດ້ຮຽກຮ້ອງໃຫ້ພະນັກງານການທູດຂອງປະເທດນີ້ ທີ່ພວມປະຈໍາການຢູ່ເມືອງ ອູຄານ, ແຂວງ ຫູເປິ໋ຍ ກັບເມືອປະເທດ. ອາເມລິກາ ກໍຈະສົ່ງເຮືອບິນໄປຮັບພົນລະເມືອງຈາກ ອູຄານກັບເມືອປະເທດໃນວັນທີ 29 ມັງກອນ. ຄືກັນກັບ ອາເມລິກາ, ວັນທີ 28 ມັງກອນ, ການາດາ ກໍກ່າວເຕືອນພົນລະເມືອງ ຫຼີກລ້ຽງການໄປທ່ຽວຢູ່ແຂວງ ຫູເປິ໋ຍ ແລະ ຍາມໃດກໍຕ້ອງມີສະຕິລະວັງຕົວຢ່າງສູງ ຕໍ່ໂລກລະບາດດັ່ງກ່າວ.

ໃນຂະນະນັ້ນ, ຕອນຄໍ່າວັນທີ 27 ມັງກອນ, ອົງການສາທາລະນະສຸກ Bayern ຂອງ ເຢຍລະມັນ ໄດ້ຢັ້ງຢືນວ່າ ປະກົດມີກໍລະນີທໍາອິດຢູ່ ເຢຍລະມັນ ຕິດໂລກລະບາດອັກເສບປອດຍ້ອນເຊື້ອໄວຣັດ ສາຍພັນໃໝ່ ໂຄໂຣນາ ແລະ ລັດຖະບານຂອງປະເທດນີ້ ພວມຊັ່ງຊາຕໍ່ເລື່ອງຍົກຍ້າຍພົນລະເມືອງຂອງປະເທດນີ້ ທີ່ພວມເຮັດວຽກຢູ່ນະຄອນ ອູຄານ, ແຂວງ ຫູເປີ໋ຍ. ສ່ວນຢູ່ ຍີ່ປຸ່ນ, ອໍານາດການປົກຄອງ ໄດ້ຕົກລົງ ນໍາພະຍາດອັກເສບປອດ ຍ້ອນເຊື້ອໄວຣັດ ສາຍພັນໃໝ່ໂຄໂຣນາ ນີ້ ໃສ່ບັນຊີລາຍຊື່ບັນດາພະຍາດຕິດແປດອັນຕະລາຍຊະນິດພິເສດ. ຕາມຂໍ້ຕົກລົງດັ່ງກ່າວແລ້ວ, ຜູ້ຄົນທີ່ຕິດພະຍາດດັ່ງກ່າວ ຕ້ອງເຂົ້າໂຮງໝໍ ແລະ ຫ້າມໄປເຮັດວຽກ.

（ໄຊພອນ）