ເຂົ້າຮ່ວມພິທີ, ມີບັນດາສະຫາຍທີ່ຕາງໜ້າໃຫ້ບັນດາກະຊວງ, ຄະນະ, ຂະແໜງການ ແລະ ອົງການຂັ້ນສູນກາງ; ບັນດາແຂວງ, ນະຄອນ, ບັນດາອົງການເສດຖະກິດ - ສັງຄົມ, ສະມາຄົມມິດຕະພາບ, ວິສາຫະກິດຫວຽດນາມ ຫຼາຍແຫ່ງ ແລະ ຜູ້ແທນປະມານ 1.000 ຄົນຂອງຄະນະຜູ້ແທນເສດຖະກິດ, ວັດທະນະທຳ ແລະ ທ່ອງທ່ຽວຍີ່ປຸ່ນ. ກ່າວຄຳເຫັນໃນພິທີແຫ່ງການແລກປ່ຽນ, ທ່ານ ນາຍົກລັດຖະມົນຕີ ຫງວຽນຊວນຟຸກ ໄດ້ຊີ້ແຈ້ງທິດທາງໃຫຍ່ຫຼາຍຢ່າງ ເພື່ອໃຫ້ສອງຝ່າຍສົມທົບກັນ, ສົ່ງເສີມບັນດາຄວາມສາມາດບົ່ມຊ້ອນທີ່ໃຫຍ່ຫຼວງຄື: ລັດຖະບານ ແລະ ປະຊາຊົນຫວຽດນາມ ຍາມໃດກໍ່ຖືຍີ່ປຸ່ນ ເປັນຄູ່ຮ່ວມມືທີ່ໜ້າເຊື່ອຖື, ຄູ່ຮ່ວມມືທີ່ສຳຄັນ ໃນໄລຍະຍາວນານ. ຍີ່ປຸ່ນ ກໍ່ຖືວ່າ ຫວຽດນາມແມ່ນຄູ່ຮ່ວມມືຍຸດທະສາດແຖວໜ້າໃນພາກພື້ນ. ຫວຽດນາມ ແມ່ນປະເທດປະສານງານການພົວພັນອາຊຽນ - ຍີ່ປຸ່ນໄລຍະ 2018-2021, ປະທານອາຊຽນ 2020 ແລະສະມາຊິກບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ອາຍຸການ 2020-2021. “ພວກເຮົາຈົ່ງ ຍົກການພົວພັນຫວຽດນາມ - ຍີ່ປຸ່ນຂຶ້ນສູ່ລະດັບໃໝ່” ທ່ານນາຍົກລັດຖະມົນຕີ ເນັ້ນໜັກ.
ທ່ານ ຫງວຽນຊວນຟຸກ ແລະ ທ່ານ Nikai Toshihiro ທີ່ພິທີການພົບປະແລກປ່ຽນລະຫວ່າງຫວຽດນາມ - ຍີ່ປຸ່ນ. (ພາບ: nhandan.com.vn)
ໃນພິທີແລກປ່ຽນ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານເລຂາທິການໃຫຍ່ Nikai Toshihiro ໄດ້ປະຕິບັດພິທີປູກຕົ້ນດອກບົວ Oga, ເປັນສັກຂີພິຍານພິທີມອບປື້ມພາສາຍີ່ປຸ່ນ ໃຫ້ແກ່ບາງໂຮງຮຽນຢູ່ເຂດພາກກາງ... ກ່ອນໜ້ານັ້ນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຕ້ອນຮັບ ທ່ານເລຂາທິການໃຫຍ່ພັກປະຊາທິປະໄຕເສລີຍີ່ປຸ່ນ, ປະທານສະຫະພັນຜູ້ແທນລາຊະດອນມິດຕະພາບ ຍີ່ປຸ່ນ - ຫວຽດນາມ, ທ່ານ Nikai Toshihiro ແລະ ຄະນະຜູ້ແທນແລກປ່ຽນກ່ຽວກັບດ້ານເສດຖະກິດ, ວັດທະນະທຳ ແລະ ທ່ອງທ່ຽວຍີ່ປຸ່ນ. ທີ່ການພົບປະ, ສອງຝ່າຍໄດ້ເຫັນດີຊຸກຍູ້ການພົວພັນແລກປ່ຽນ, ຕິດຕໍ່ພົວພັນລະຫວ່າງການນຳທຸກຂັ້ນ, ພິເສດແມ່ນລະດັບສູງ ແລະ ການພົບປະແລກປ່ຽນລະຫວ່າງບັນດາທ້ອງຖິ່ນ ແລະ ປະຊາຊົນແລກປ່ຽນກັນຢ່າງເລື້ອຍໆ; ສືບຕໍ່ຊຸກຍູ້ການຮ່ວມມືລົງທຶນ, ການຄ້າ, ແຮງງານ ແລະ ການທ່ອງທ່ຽວ… ສອງຝ່າຍກໍ່ເຫັນດີເພີ່ມທະວີການຮ່ວມມືໃນບັນດາເວທີປາໄສຫຼາຍຝ່າຍ, ກໍ່ຄືບັນດາບັນຫາສາກົນ ແລະ ພາກພື້ນທີ່ມີຄວາມສົນໃຈ, ພິເສດແມ່ນໃນສະພາບການທີ່ ຫວຽດນາມ ເປັນຜູ້ປະສານງານການພົວພັນອາຊຽນ - ຍີ່ປຸ່ນ ໃນໄລຍະ 2018 - ປີ 2021, ປະທານອາຊຽນ 2020 ແລະ ເປັນສະມາຊິກບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ອາຍຸການ 2020-2021.
（ຄຳຮຸ່ງ）
