 |
ປະຈຸບັນ ຫວຽດນາມ ແມ່ນສະມາຊິກ ທີ່ມີຄວາມຕັ້ງໜ້າເຂົ້າຮ່ວມສ້າງ ວິໄສທັດ ຂອງປະຊາຄົມ ອາຊຽນ 2025, ດ້ວຍເປົ້າໝາຍເຊື່ອມຕໍ່ ອາຊຽນ ເລິກເຊິ່ງແລະກວ້າງຂວາງຕື່ມ, ການເຄື່ອນໄຫວ ບົນພື້ນຖານ ກົດໝາຍ ແລະ ເອົາປະຊາຊົນເປັນສູນກາງ.
ອີງຕາມ ກະຊວງການຕ່າງປະເທດ ຫວຽດນາມ, ໃນຕໍ່ໜ້າ ຫວຽດນາມ ຕ້ອງກຳໄດ້ 03 ເປົ້າໝາຍໃຫຍ່ຄື:
ໜຶ່ງ, ອາຊຽນ - ທັງ ການຮ່ວມມືຫຼາຍຝ່າຍ ແລະ ການພົວພັນສອງຝ່າຍ - ແມ່ນມີຄວາມໝາຍຍຸດທະສາດ ຍ້ອນມັນຕິດພັນໂດຍກົງເຖິງສະພາບຄວາມໝັ້ນຄົງ ແລະ ການພັດທະນາ ຂອງປະເທດຫວຽດນາມ; ເປັນສະຖານທີ່ທີ່ເໝາະສົມ ກັບທ່າແຮງ ແລະ ກຳລັງແຮງ ຂອງ ຫວຽດນາມ, ເປັນປັດໃຈສຳຄັນເພື່ອໃຫ້ຫວຽດນາມເປີດກ້ວາງ ການພົວພັນ ກັບພາຍນອກ ແລະ ເຊື່ອມໂຍງ ກັບ ສາກົນ. (ອາຊຽນ ແມ່ນເສົາຫຼັກ ແລະ ເປັນບຸລິມະສິດສຳຄັນໜື່ງໃນນະໂຍບາຍການຕ່າງປະເທດ ຂອງ ຫວຽດນາມ). ສະແນວນັ້ນ, ຫວຽດນາມ ຈະສືບຕໍ່ຜັນຂະຫຍາຍບັນດາມາດຕະການ-ການພົວພັນມິດຕະພາບ ແລະ ການຮ່ວມມືຮອບດ້ານ, ເປັນຈິງ ກັບບັນດາປະເທດອາຊຽນ ແບບສອງຝ່າຍ ແລະ ຫຼາຍຝ່າຍ.
ສອງ, ເປົ້າໝາຍລວມ ຂອງຫວຽດນາມ ເມື່ອເຂົ້າຮ່ວມ ອາຊຽນ ແມ່ນການປະກອບສ່ວນສ້າງສະພາບແວດລ້ອມໃນພາກພື້ນ ແຫ່ງສັນຕິພາບ, ມີຄວາມສະຫງົບ ແລະ ອຳນວຍຄວາມສະດວກຕື່ມອີກ ເພື່ອຊ່ວຍອັນເປັນພື້ນຖານ ໃຫ້ແກ່ພາລະກິດການສ້າງສາ ແລະ ປົກປັກຮັກສາປະເທດຊາດ; ສ້າງເງື່ອນໄຂສະດວກໃຫ້ແກ່ການຜັນຂະຫຍາຍ ແຜນນະໂຍບາຍເຊື່ອມໂຍງສາກົນ ແລະ ຊຸກຍູ້ການພົວພັນກັບບັນດາຄູ່ຮ່ວມມືພາຍນອກ, ໂດຍສະເພາະບັນດາປະເທດມະຫາອຳນາດ. ຍ້ອນແນວນັ້ນ, ຫວຽດນາມ ຈະສືບຕໍ່ເຂົ້າຮ່ວມ ອາຊຽນ ດ້ວຍທິດນຳຄື: “ເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບສູງ” ແຕ່ຕ້ອງເສີມຂະຫຍາຍບົດບາດສຳຄັນຕົ້ນຕໍ, ປະກອບສ່ວນເປັນແກນຫຼັກ, ອອກໜ້າໃນບັນດາບັນຫາທີ່ ຫວຽດນາມ ມີຜົນປະໂຫຍດ ແລະ ມີທີ່ແຮງ, ສະເໜີແນວຄວາມຄິດລິເລີ່ມ ແລະ ໂຄງການທີ່ມີປະສິດທິຜົນ; ຢຶດໜັ້ນຫຼັກກາານ, ແຕ່ຕ້ອງມີພິບໄຫວ ດ້ານມາດຕະການ ແລະ ວິທີຈັດຕັ້ງປະຕິບັດທີ່ເໝາະສົມ ເພື່ອຮັບປະກັນຄວາມເປັນເອກກະພາບ ໃນອາຊຽນ.
ສາມ, ຫວຽດນາມ ຕ້ອງກະກຽມພາຍໃນໃຫ້ດີຂື້ນຕື່ມ, ເປັນຕົ້ນແມ່ນ ຍົກສູງຄວາມຮັບຮູ້ ກ່ຽວກັບ ອາຊຽນ ກໍ່ຄື ຄວາມສຳຄັນຂອງ ຫວຽດນາມ ເຂົ້າຮ່ວມການຮ່ວມມື ອາຊຽນ ເພື່ອໃຫ້ມີຄວາມສົນໃຈ ແລະ ລົງທຶນແຫຼ່ງກຳລັງອັນເໝາະສົມ; ເປັນເຈົ້າການ ໃນການນຳສະເໜີແນວຄິດລິເລີ່ມ, ໂຄງການ ທີ່ມີມູນຄ່າຫຼາຍ ແລະ ມີປະສິດທິຜົນ; ເພີ່ມທະວີຂື້ນຕື່ມ ໃນການປະສານສົມທົບ ຢ່າງແໜ້ນແຟ້ນ ລະຫວ່າງ ບັນດາກະຊວງ, ຂະແໜງ ເຂົ້າຮ່ວມການເຮ່ວມມື ກັບ ອາຊຽນ; ມີການທົບທວນຄືນຢ່າງເປັນປົກກະຕິ, ປັບປຸງບັນດາຂໍ້ກຳນົດພາຍໃນ ເພື່ອອຳນວຍຄວາມສະດວກໃຫ້ແກ່ການປະຕິບັດ ບັນດາ ສົນທິສັນຍາ ອາຊຽນ.
ຫວຽດນາມ ເຂົ້າເປັນສະມາຊິກ ອາຊຽນ ຢ່າງເປັນທາງການໃນວັນທີ 28 ກໍລະກົດ 1995, ໃນກອງປະຊຸມ ລັດຖະມົນຕີ ຕ່າງປະເທດ ອາຊຽນ ຄັ້ງທີ 28 (AMM-28) ທີ່ປະເທດ ບຣູໄນ. ເຖິງຢ່າງໃດກໍ່ຕາມ, ໃນຂັ້ນຕອນການເຂົ້າຮ່ວມ ອາຊຽນ ຂອງ ຫວຽດນາມ ໄດ້ຮັບການເລີ່ມຕົ້ນມາກ່ອນແລ້ວ. ຫວຽດນາມຍາມໃດກໍ່ມີບົດບາດ ແກນຫັຼກໃນວຽກງານການກຳນົດ ເປົ້າໝາຍ, ທິດທາງການພັດທະນາ ແລະ ການກໍ່ສ້າງບັນດານະໂຍບາຍໃຫຍ່ ຂອງ ອາຊຽນ, ເປັນຕົ້ນແມ່ນ ວິໄສທັດ 2020 ແລະ ບັນດາແຜນການ-ການຜັນຂະຫຍາຍ ວິໄສທັດ, ກົດບັດຂອງອາຊຽນ, ແຜນງານການສ້າງຕັ້ງປະຊາຄົມ ອາຊຽນ ໃນປີ 2015 ແລະ ຫຼາຍໆສົນທິສັນຍາ ທີ່ສຳຄັນອື່ນໆ, ໃນນັ້ນ ມີການເຊື່ອມຕໍ່ ແລະ ການຫຼຸດຊ່ອງຫວ່າງ ຂອງການພັດທະນາ. ຫວຽດນາມ ກໍ່ໄດ້ຕັ້ງໜ້າເຂົ້າຮ່ວມ ໃນການສ້າງ ວິໄສທັດ ຂອງປະຊາຄົມອາຊຽນ ປີ 2015, ດ້ວຍເປົ້າໝາຍ ເຮັດໃຫ້ການເຊື່ອຕໍ່ ອາຊຽນ ເລິກເຊິ່ງ-ກວ້າງຂວາງຂື້ນ ແລະ ມີບົດບາດສຳຄັນກວ່າເກົ່າໃນພາກພື້ນ. ຫວຽດນາມ ກໍ່ໄດ້ປະສົບຜົນສຳເລັດຢ່າງຈົບງາມ ຕໍ່ໜ້າທີ່ຮັບຜິດຊອບຂອງຕົນໃນຖານະເປັນປະເທດສະມາຊິກ ໂດຍຜ່ານການ ເປັນ ປະທານ ອາຊຽນ ແລະ ເປັນເຈົ້າພາບ ກອງປະຊຸມໃຫຍ່ໆຄັ້ງ.
（ຫັດທະບູນ）
