 |
ບັນດາຜູ້ແທນເຂົ້າຮ່ວມກອງປະຊຸມ.(ພາບ:ຂປລ)
ທັງນີ້, ກໍເພື່ອປຶກສາຫາລື ແລກປ່ຽນບົດຮຽນວິທີການ, ກົນໄກການຜັນຂະຫຍາຍຍຸດທະສາດປະຕິຮູບສາທາລະນະສຸກ ໃນໄລຍະ II ເຂົ້າໃນວຽກງານຕົວຈິງ ເພື່ອຊອກໃຫ້ໄດ້ດ້ານດີ, ດ້ານອ່ອນ, ສິ່ງທ້າທາຍໃນໄລຍະຜ່ານມາ ພ້ອມທັງສະເໜີວິທີການ, ມາດຕະການຕໍ່ໜ້າ ເພື່ອໃຫ້ການຜັນຂະຫຍາຍຍຸດທະສາດປະຕິຮູບສາທາລະນະສຸກໃນອະນາຄົດໃຫ້ດີກວ່າເກົ່າ, ສາມາດຊຸກຍູ້ການຈັດຕັ້ງປະຕິບັດແຜນພັດທະນາສາທາລະນະສຸກ ໃນແຕ່ລະໄລຍະ ໃຫ້ບັນລຸຕາມຄາດໝາຍທີ່ວາງໄວ້.
ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ກ່າວວ່າ: ກະຊວງສາທາລະນະສຸກ ໄດ້ເລີ່ມຈັດຕັ້ງປະຕິບັດຍຸດທະສາດປະຕິຮູບສາທາລະນະສຸກມາແຕ່ປີ 2013 ໂດຍແບ່ງອອກເປັນ 3 ໄລຍະ ທີ່ມີຈຸດປະສົງ ໃນແຕ່ລະໄລຍະຕ່າງກັນ. ຈາກການປະຕິບັດຍຸດທະສາດປະຕິຮູບສາທາລະນະສຸກໃນໄລຍະ I (2013-2015) ພວກເຮົາສາມາດຊຸກແຮງການຈັດຕັ້ງປະຕິບັດແຜນພັດທະນາສາທາລະນະສຸກ 5 ປີ ຄັ້ງທີ VII ທີ່ຜ່ານມາສາມາດບັນລຸໄດ້ຫລາຍຄາດໝາຍ MDGs.
ປັດຈຸບັນ, ກະຊວງສາທາລະນະສຸກກຳລັງປະຕິບັດຍຸດທະສາດປະຕິຮູບສາທາລະນະສຸກ ໄລຍະ II (2016-2020) ໂດຍມີຈຸດປະສົງ ເລັ່ງໃສ່ການປັບປຸງຄຸນນະພາບຂອງການບໍລິການ ໃຫ້ມີຄຸນນະພາບ ແລະ ປັບປຸງ, ຂະຫຍາຍປະກັນສຸຂະພາບແຫ່ງຊາດ ເພື່ອໃຫ້ປະຊາກອນສ່ວນຫລາຍ ໄດ້ເຂົ້າເຖິງການບໍລິການຮັກສາສຸຂະພາບ ດ້ວຍຫລັກປະກັນສຸຂະພາບທົ່ວປວງຊົນ,ພ້ອມທັງກະກຽມປັບປຸງຍຸດທະສາດປະຕິຮູບສາທາລະນະສຸກ ໄລຍະທີ III ທີ່ມີຈຸດປະສົງ ເລັ່ງໃສ່ການບັນລຸການປົກຄຸມການບໍລິການຮັກສາສຸຂະພາບດ້ວຍຫລັກປະກັນສຸຂະພາບທົ່ວປວງຊົນຢ່າງສົມບູນ.
ໃນປີ 2018 ຜ່ານມາກະຊວງສາທາລະນະສຸກພາຍໃຕ້ທຶນສະໜັບສະໜູນຂອງທະນາຄານພັດທະນາອາຊີ ໄດ້ອະນຸມັດງົບປະມານຈຳນວນໜຶ່ງໃຫ້ແຂວງ ອຸດົມໄຊ, ຫລວງພະບາງ, ສະຫວັນນະເຂດ ແລະ ແຂວງຈຳປາສັກ ເຮັດທົດລອງການຜັນຂະຫຍາຍຍຸດທະສາດ ປະຕິຮູບສາທາລະນະສຸກ ແລະ ວຽກງານສາມສ້າງຢູ່ຂັ້ນແຂວງ ໂດຍສຸມໃສ່ວຽກງານການບໍລິຫານຄຸ້ມຄອງ ແລະ ການປັບປຸງຄຸນນະພາບ ຂອງການບໍລິການດ້ານສາທາລະນະສຸກ.
ທ່ານ ດຣ. ພູທອນ ເມືອງປາກ ກ່າວຕື່ມວ່າ: ການຈັດຕັ້ງປະຕິບັດວຽກງານດັ່ງກ່າວ, ຢູ່ສູນກາງ ແລະ ທ້ອງຖິ່ນ ມີຄວາມເຂົ້າໃຈບໍ່ເປັນເອກະພາບກັນ ກ່ຽວກັບການສ້າງແຜນຕາມປົກກະຕິ ແລະ ຍຸດທະສາດປະຕິຮູບສາທາລະນະສຸກ ເຮັດໃຫ້ເກີດຄວາມສັບສົນໃນພາກປະຕິບັດ ໂດຍສະເພາະໃນການສ້າງໂຄງການ, ກິດຈະກຳ ແລະ ການຈັດສັນງົບປະມານ. ນອກຈາກນີ້, ການລົງຕິດຕາມກວດ ກາຊຸກຍູ້ ແລະ ປະເມີນຜົນຂອງສູນກາງ ຕໍ່ກັບການຜັນຂະຫຍາຍຍຸດທະສາດ ການປະຕິຮູບສາທາ ລະນະສຸກ ແລະ ວຽກງານສາມສ້າງຢູ່ຂັ້ນທ້ອງຖິ່ນ ຍັງບໍ່ທັນເປັນລະບົບຕໍ່ເນື່ອງ ເຮັດໃຫ້ການຈັດຕັ້ງປະຕິບັດຢູ່ບັນດາແຂວງ ແລະ ເມືອງ ຍັງບໍ່ທັນເປັນຂະບວນຟົດຟື້ນ ແລະ ມີຜົນສຳເລັດດີເທົ່າທີ່ຄວນ.
（ແຫຼ່ງຂໍ້ມູນ： ຂປລ）
