 |
ພາບປະກອບ
ສານອວຍພອນຂອງຄະນະກຳມະການສູນກາງພັກປະຊາຊົນປະຕິວັດລາວໄດ້ລະບຸວ່າ: ການກຳເນີດຂອງພັກກອມມູນິດຫວຽດນາມໃນວັນທີ 3 ເດືອນກຸມພາປີ 1930, ໄດ້ຮັບການສ້າງຕັ້ງ ໂດຍປະທານ ໂຮ່ຈີມິນ, ແມ່ນບາດກ້າວສຳຄັນຂອງການປະຕິວັດຫວຽດນາມ. ໃນ 90 ປີທີ່ຜ່ານມາ, ພັກກອມມູນິດຫວຽດນາມໄດ້ຈັດຕັ້ງ ແລະ ນຳພາທຸກໄຊຊະນະຂອງການປະຕິວັດຫວຽດນາມໂດຍຜ່ານການກຳນົດແນວທາງນະໂຍບາຍທີ່ຖືກຕ້ອງ, ສະຕິປັນຍາ, ຄວາມອົດທົນ. ພັກປະຊາຊົນປະຕິວັດລາວ ແລະ ປະຊາຊົນລາວບັນດາເຜົ່າ ຕີລາຄາສູງ ແລະ ອວຍພອນບັນດາຜົນງານແລະ ໄຊຊະນະໃຫຍ່ຫຼວງ ທີ່ພັກກອມມູນິດຫວຽດນາມ ແລະ ປະຊາຊົນຫວຽດນາມ ບັນລຸໄດ້.
ພັກປະຊາຊົນກຳປູເຈຍເຊື່ອໝັ້ນຢ່າງໜັກແໜ້ນວ່າ, ພາຍໃຕ້ການນຳພາທີ່ຖືກຕ້ອງຂອງພັກກອມມູນິດຫວຽດນາມໂດຍທ່ານເລຂາທິການໃຫຍ່, ປະທານປະເທດ ຫງວຽນຟູຈ້ອງ, ປະຊາຊົນຫວຽດນາມຈະສືບຕໍ່ຍາດໄດ້ໝາກຜົນໃຫຍ່ຫຼວງກວ່າອີກໃນການປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກ.
ພັກກອມມູນິດຈີນຖືສຳຄັນໃນການພັດທະນາສາຍພົວພັນມິດຕະພາບ ແລະ ການຮ່ວມມືກັບພັກກອມມູນິດຫວຽດນາມ, ພ້ອມແລ້ວທີ່ຈະເຂົ້າຮ່ວມກັບພັກກອມມູນິດຫວຽດນາມໃນການເພີ່ມທະວີການແລກປ່ຽນຍຸດທະສາດ, ສົ່ງເສີມຄວາມໄວ້ເນື້ອເຊື່ອໃຈດ້ານການເມືອງ, ລົງເລິກໃນການແລກປ່ຽນທິດສະດີ ແລະ ປະສົບການຕົວຈິງກ່ຽວກັບການກໍ່ສ້າງພັກ, ການຄຸ້ມຄອງປະເທດ, ການຮຽນຮູ້ເຊິ່ງກັນ ແລະ ກັນ...
ໃນໂທລະເລກອວຍພອນສົ່ງເຖິງທ່ານ ຫງວຽນຝູຈ້ອງ, ທ່ານ Raul Castro ເລຂາທິການຜູ້ທີໜຶ່ງຄະນະບໍລິຫານງານສູນກາງພັກກອມມູນິດກູບາ ໄດ້ຂຽນວ່າ: ພວກຂ້າພະເຈົ້າຂໍຢັ້ງຢືນຄືນໃໝ່ຄຳໝັ້ນສັນຍາຂອງຜູ້ບັນຊາການປະຕິວັດກູບາ, Fidel Castro Ruz, ກ່ຽວກັບສາຍໃຈອ້າຍນ້ອງສະເໝີຕົ້ນສະເໝີປາຍທີ່ມີຕໍ່ພັກກອມມູນິດ, ຕໍ່ປະເທດສັງຄົມນິຍົມຫວຽດນາມ, ຜູ້ສືບທອດມໍລະດົກອັນເປັນກຽດສະຫງ່າຂອງປະທານໂຮ່ຈີມິນ. ປີ 2020, ພວກເຮົາຈະສະເຫຼີມ ສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ, ເຫດການທີ່ເປັນສັນຍາລັກແຫ່ງນໍ້າໃຈມິດຕະພາບຢ່າງເລິກເຊິ່ງ, ແບບຢ່າງຂອງເຈດຈໍານົງແຫ່ງຄວາມສາມັກຄີຕໍ່ໜ້າບັນດາສິ່ງທ້າທາຍ ເຊິ່ງໂລກພວມວາງອອກໃນປະຈຸບັນ.
ໃນໂທລະເລກອວຍພອນສົ່ງເຖິງທ່ານ ຫງວຽນຝູຈ້ອງ, ທ່ານ Kim Jong-un ປະທານພັກແຮງງານ ສປປ ເກົາຫຼີ ໄດ້ຂຽນວ່າ: ພວກຂ້າພະເຈົ້າມີຄວາມປິຕິຊົມຊື່ນຕໍ່ບັນດາຜົນງານອັນໃຫຍ່ຫຼວງເຊິ່ງພັກກອມມູນິດຫວຽດນາມ ໄດ້ ແລະພວມບັນລຸໄດ້ໃນພາລະກິດສ້າງສາລັດສັງຄົມນິຍົມທີ່ວັດທະນາຖາວອນ ແລະສິວິໄລຖືກຕາມຄວາມຫວັງຂອງປະທານໂຮ່ຈີມິນ - ຜູ້ສ້າງຕັ້ງພັກ. ຂ້າພະເຈົ້າເຊື່ອໝັ້ນວ່າ, ສາຍພົວພັນມິດຕະພາບ ແລະການຮ່ວມມືທີ່ເປັນມູນເຊື້ອລະຫວ່າງສອງພັກຈະໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງໃນການຕໍ່ສູ້ລວມ ເພື່ອແນໃສ່ປົກປັກຮັກສາ ແລະປະຕິບັດສໍາເລັດພາລະກິດສັງຄົມນິຍົມ.
ນັບແຕ່ວັນສ້າງຕັ້ງຂຶ້ນເມື່ອປີ 1930 ມາຮອດປະຈຸບັນ, ຍາມໃດ, ພັກກອມມູນິດຫວຽດນາມ ກໍ່ເຂົ້າໃຈແຈ້ງຕໍ່ຄວາມມຸ່ງຫວັງຂອງປະຊາຊົນກ່ຽວກັບປະເທດຊາດທີ່ມີຄວາມເປັນເອກະລາດ, ເສລີພາບ, ປະຊາຊົນມີຄວາມອີ່ມໜຳສຳລານ ແລະ ຜາສຸກ. ແນວທາງຂອງພັກ ໄດ້ຕອບສະໜອງຄວາມຮຽກຮ້ອງຕ້ອງການພາວະວິໄສຂອງປະເທດຊາດ ແລະ ຄວາມມຸ່ງຫວັງຂອງປະຊາຊົນ ດ້ວຍແນວຄິດຕົ້ນຕໍແມ່ນເອກະລາດແຫ່ງຊາດ ແລະ ລັດທິສັງຄົມນິຍົມ. ຍ້ອນແນວທາງທີ່ຖືກຕ້ອງ, ພ້ອມກັບການເສຍສະຫຼະຊີວິດສູ້ຊົນຂອງພະນັກງານ, ສະມາຊິກພັກ, ພັກກອມມູນິດຫວຽດນາມ ຈຶ່ງໄດ້ເຕົ້າໂຮມ, ເສີມຂະຫຍາຍກຳລັງແຮງແຫ່ງຄວາມສາມັກຄີທົ່ວປວງຊົນທັງຊາດ.
（ໄຊພອນ）
