 |
ທ່ານ ຫງວຽນກວກຢູງ, ຮອງລັດຖະມົນຕີກະຊວງການຕ່າງປະເທດ ເປັນປະທານກອງປະຊຸມຂ່າວກ່ຽວກັບປີເປັນປະທານອາຊຽນ 2020 ຂອງຫວຽດນາມ. (ພາບ: TTXVN)
ທ່ານ ຫງວຽນກວກຢູງ ໃຫ້ຮູ້ວ່າ ຫວຽດນາມ ໄດ້ສໍາເລັດແຜນຮ່າງສັງລວມ ແລະໄດ້ຍື່ນສະເໜີຕໍ່ກົມການເມືອງ, ນາຍົກລັດຖະມົນຕີ ອະນຸມັດຜ່ານ. ຫວຽດນາມ ໄດ້ກໍານົດຫົວຂໍ້: “ສະໜິດຕິດພັນ ແລະເປັນເຈົ້າການໃນການປັບຕົວ” ກໍ່ຄືບັນດາຈຸດສຸມ, ບຸລິມະສິດ, ຂໍ້ລິເລີ່ມໃຫ້ປີເປັນປະທານ. ຫົວຂໍ້ທັງມີລັກສະນະສືບຕໍ່ກັບຫົວຂໍ້ຂອງປີອາຊຽນຕ່າງໆກ່ອນໜ້ານັ້ນ ແລະໄດ້ຮັບການສະໜັບສະໜູນຈາກບັນດາປະເທດສະມາຊິກອາຊຽນ ແລະໄດ້ຮັບຄວາມເຫັນດີເຫັນພ້ອມ, ການສະໜັບສະໜູນຈາກບັນດາປະເທດຄູ່ຮ່ວມມືຂອງອາຊຽນ. ຫວຽດນາມ ໄດ້ສ້າງແຜນການໂຄສະນາແບບສັງລວມ ແລະລະອຽດ, ລວມມີບັນດາກິດຈະກໍາວັດທະນະທໍາ, ສິລະປະ ແລະການທ່ອງທ່ຽວ, ເພື່ອແນໃສ່ໂຄສະນາເຜີຍແຜ່ຮູບພາບກ່ຽວກັບປະເທດຊາດ ແລະຊາວຫວຽດນາມ ຕໍ່ເພື່ອນມິດອາຊຽນ ແລະສາກົນ. ວຽກງານພິທີການ, ພະລາທິການ, ຮັບປະກັນຄວາມສະຫງົບ-ສາທາລະນະສຸກ ໄດ້ຮັບການຜັນຂະຫຍາຍຢ່າງຮອບດ້ານ, ລອບຄອບຖີ່ຖ້ວນ.
ພາຍໃຕ້ຫົວຂໍ້: “ສະໜິດຕິດພັນ ແລະເປັນເຈົ້າການຮັບມື”, ຫວຽດນາມ ຈະຊຸກຍູ້ 5 ບຸລິມະສິດ: ທີໜຶ່ງແມ່ນຄວາມສາມັກຄີ ແລະຄວາມເປັນເອກະພາບ; ທີສອງແມ່ນ: ຜົນປະໂຫຍດດ້ານເສດຖະກິດ; ທີສາມແມ່ນມູນຄ່າລວມ; ທີສີ່ແມ່ນການພົວພັນຄູ່ຮ່ວມມື; ທີຫ້າແມ່ນກໍາລັງຄວາມສາມາດກ່ຽວກັບລະບອບລະບຽບການ. ຫວຽດນາມ ຈະມານະພະຍາຍາມຊຸກຍູ້ບັນດາຈຸດຄ້າຍຄືກັນກ່ຽວກັບຜົນປະໂຫຍດດ້ານເສດຖະກິດລະຫວ່າງບັນດາປະເທດສະມາຊິກຂອງອາຊຽນ, ຄື: ເພີ່ມທະວີການຮ່ວມສໍາພັນດ້ານເສດຖະກິດ, ການແລກປ່ຽນດ້ານການລົງທຶນ ແລະການຄ້າພາຍໃນ, ປ່ຽນແປງໃໝ່ຫົວຄິດປະດິດສ້າງ, ກໍ່ສ້າງຊັບພະຍາກອນມະນຸດໃຫ້ມີຄຸນນະພາບສູງ ແລະກຳແໜ້ນບັນດາກາລະໂອກາດຂອງການປະຕະວັດອຸດສາຫະກໍາ ຄັ້ງທີ 4. ວິວັດທະນາການກໍ່ສ້າງປະຊາຄົມອາຊຽນ ບໍ່ອາດຂາດໄດ້ການສະໜັບສະໜູນ ແລະການປະກອບສ່ວນຈາກບັນດາປະເທດຄູ່ຮ່ວມມື, ບັນດາອົງການຈັດຕັ້ງໃນພາກພື້ນ ແລະສາກົນ. ຫວຽດນາມ ຕ້ອງຍູ້ແຮງບັນດາກົນໄກ ເຊິ່ງອາຊຽນກໍ່ສ້າງ ກໍ່ຄືຊັກຈູງ, ພ້ອມກັນນັ້ນຊຸກຍູ້ການພົວພັນຄູ່ຮ່ວມມືເພື່ອສັນຕິພາບ ແລະການພັດທະນາແບບຍືນຍົງກັບປະເທດຕ່າງໆໃນໂລກ.
（ໄຊພອນ）
