 |
ຂະແຫນງສັດສິນໃນນໍ້າວາງເປົ້າຫມາຍສົ່ງອອກບັນລຸ 10 ຕື້ໂດລາສະຫະລັດໃນປີ 2019
ນີ້ແມ່ນຂໍ້ມູນທີ່ໄດ້ຮັບຮູ້ໃນກອງປະຊຸມກ່ຽວກັບການຈັດຕັ້ງປະຕິບັດແຜນການສົ່ງອອກສັດສິນໃນນໍ້າ ປີ 2019 ໂດຍສະມາຄົມປຸງແຕ່ງ ແລະ ສົ່ງອອກສັດສິນໃນນໍ້າຫວຽດນາມ (VASEP) ຈັດຂຶ້ນທີ່ນະຄອນໂຮ່ຈີມິນ ໃນເມື່ອວັນທີ 16 ເດືອນກຸມພາ. ປີ 2018 ຍັງເປັນປີທີ່ຂະແໜງການດ້ານການຂຸດຄົ້ນ ແລະ ປຸງແຕ່ງສັດສິນໃນນໍ້າປະເຊີນໜ້າກັບອຸປະສັກຫຼາຍຢ່າງໃນການເພີ່ມມູນຄ່າສົ່ງອອກ. ຢ່າງໃດກໍ່ຕາມ, ໃນປີ 2019, ຄາດຄະເນວ່າຂະແຫນງສັດສິນໃນນໍ້າຈະມີໂອກາດຈໍານວນຫຼາຍໃນການຂະຫຍາຍຕົວ.
ນອກຈາກນັ້ນ, ນັບຕັ້ງແຕ່ຕົ້ນປີ 2019 ເປັນຕົ້ນມາ, ສັນຍາຄູ່ຮ່ວມມືຮອບດ້ານ ແລະ ຄວາມກ້າວໜ້າລະຫວ່າງປາຊີຟິກ(CPTPP) ມີຜົນບັງຄັບນໍາໃຊ້ຢ່າງເປັນທາງການສໍາລັບຫວຽດນາມ. ດັ່ງນັ້ນ, ເກືອບທັງຫມົດຂອງການສົ່ງອອກສິນຄ້າຂອງຫວຽດນາມ, ລວມທັງສັດສິນໃນນໍ້າທີ່ນໍາເຂົ້າບັນດາປະເທດສະມາຊິກ CPTPP ຈະຖືກຍົກເລີກພາສີອາກອນນໍາເຂົ້າທັງຫມົດ. ນອກຈາກນັ້ນ, ສັນຍາການຄ້າເສລີຫວຽດນາມ - ສະຫະພາບເອີຣົບ (EVFTA) ຍັງໄດ້ຮັບການຊຸກຍູ້ຢ່າງຕັ້ງໜ້າໂດຍປະເທດສະມາຊິກເພື່ອຈັດຕັ້ງປະຕິບັດໃນໄວໆນີ້.
ແຫຼ່ງວັດຖຸດິບທີ່ໄດ້ຮັບການຕີລາຄາເປັນທ່າແຮງອັນໃຫຍ່ຫຼວງສໍາລັບວິສາຫະກິດເວົ້າລວມ, ໂດຍສະເພາະແມ່ນວິສາຫະກິດປຸງແຕ່ງ, ສົ່ງອອກຜະລິດຕະພັນສັດສິນໃນນໍ້າ. ເຖິງຢ່າງໃດກໍ່ຕາມ, ການຮັກສາວັດຖຸດິບຂອງວິສາຫະກິດຫວຽດນາມໃນປະຈຸບັນແມ່ນຍັງບໍ່ທັນໄດ້ດີເນື່ອງຈາກຜົນກະທົບຂອງການປ່ຽນແປງດິນຟ້າອາກາດ, ພະຍາດລະບາດທີ່ບໍ່ສາມາດຄວບຄຸມໄດ້ເຊິ່ງເຮັດໃຫ້ຂາດແຫຼ່ງວັດຖຸດິບ. ການປຸງແຕ່ງຕ້ອງມີການປ່ຽນແປງດ້ານເຕັກໂນໂລຢີ, ການຄຸ້ມຄອງເພື່ອຫຼຸດຜ່ອນຄ່າໃຊ້ຈ່າຍ ແລະ ຂະຫຍາຍລະບົບຕ່ອງໂສ້ມູນຄ່າ. ສໍາລັບອົງການຈັດຕັ້ງທາງດ້ານການຕະຫຼາດ, ນອກຈາກການຮັກສາຕະຫຼາດແບບດັ້ງເດີມແລ້ວ, ບັນດາວິສາຫະກິດ ແລະ ສະມາຄົມກໍ່ຕ້ອງມີການຂະຫຍາຍການດ້ານການສົ່ງອອກໄປສູ່ຕະຫຼາດທີ່ມີທ່າແຮງໃຫມ່.
ຄຽງຄູ່ກັນນັ້ນ, ຕ້ອງສຸມໃສ່ການຂຸດຄົ້ນຕະຫລາດພາຍໃນປະເທດຢ່າງມີປະສິດທິຜົນເພາະວ່າຕະຫລາດພາຍໃນປະເທດເປັນຕະຫຼາດໃຫຍ່ທີ່ມີເກືອບ 100 ລ້ານຄົນ ແລະ ບັນລຸ 15 ລ້ານເທື່ອຄົນນັກທ່ອງທ່ຽວຕ່າງປະເທດໃນແຕ່ລະປີ. ນອກຈາກນັ້ນ, ບັນດາວິສາຫະກິດຕ້ອງເພີ່ມທະວີໃນການການເຊື່ອມຕໍ່ຕາມສາຍຜະລິດຕະພັນ ແລະ ເຊື່ອມຕໍ່ກັບຊາວກະສິກອນ, ຊາວປະມົງເພື່ອແກ້ໄຂບັນຫາກ່ຽວກັບດ້ານປະລິມານ, ຄຸນນະພາບຂອງແຫຼ່ງວັດຖຸດິບເພື່ອຕອບສະຫນອງເປົ້າຫມາຍການພັດທະນາແບບຍືນຍົງຂອງຂະແຫນງການສັດສິນໃນນໍ້າເວົ້າສະເພາະ ແລະ ກະສິກໍາຂອງຫວຽດນາມເວົ້າລວມ.
（ໄຊພອນ）
