ບັນດາຜູ້ແທນຍົກຈອກອວຍພອນປີໃໝ່ທີ່ງານພົບປະ
ງານພົບປະໃນຄໍ່າຄືນຂອງວັນທີ 25 ເດືອນມັງກອນ ປີ 2019 ກໍ່ຖືເປັນໂອກາດທີ່ໄດ້ສະແດງຄວາມຂອບອົບຂອບໃຈຕໍ່ຄວາມເອົາໃຈໃສ່, ຄວາມຊ່ວຍເຫຼືອ, ການສ້າງເງື່ອນໄຂອັນສະດວກຂອງພັກ ແລະ ລັດ, ການຮ່ວມມື, ຄວາມສະຫນັບສະຫນູນ ແລະ ມີປະສິດທິຜົນຂອງບັນດາຄະນະ, ກະຊວງ, ຂະແຫນງການ, ອົງການສູນກາງ, ບັນດາທ້ອງຖິ່ນ ແລະ ຄູ່ຮ່ວມງານສາກົນຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ຄະນະກໍາມະທິການວຽກງານກ່ຽວກັບບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດ.
ເຂົ້າຮ່ວມງານດັ່ງກ່າວໂດຍມີທ່ານ Jorge Rondon Uzcategui, ເອກອັກຄະລັກຖະທູດສາທາລະນະໂບລິວາ ເວເນຊູເອລາ ປະຈໍາຫວຽດນາມ - ຫົວໜ້າຄະນະຜູ້ຕາງໜ້າການຕ່າງປະເທດປະຈໍາຫວຽດນາມ; ທ່ານ ນາງ Sharon Kane, ຜູ້ຕາງໜ້າອົງການຈັດຕັ້ງ Plan International ປະຈໍາຫວຽດນາມ ແລະ ບັນດາຜູ້ຕາງໜ້າຄະນະການພົວພັນການຕ່າງປະເທດ, ບັນດາທ່ານເອກອັກຄະລັກຖະທູດ, ຜູ້ຕາງໜ້າອົງການຮ່ວມມືພັດທະນາ ແລະ ສະຖານກົງສຸນຂອງບັນດາປະເທດ, ຜູ້ຕາງຫນ້າອົງການຈັດຕັ້ງສາກົນ ແລະ ບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດ.
ທ່ານ ນາງ ຫງວຽນ ເຟືອງ ງາ ປະທານສະຫະພັນກ່າວຄໍາເຫັນທີ່ງານພົບປະ
ກ່າວຄໍາເຫັນທີ່ງານດັ່ງກ່າວ, ທ່ານ ນາງ ຫງວຽນ ເຟືອງ ງາ, ປະທານສະຫະພັນໄດ້ສະແດງຄວາມຂອບອົກຂອບໃຈຢ່າງເລີກເຊິ່ງຕໍ່ບັນດາທ່ານເອກອັກຄະລັກຖະທູດ, ອຸປະທູດແຫ່ງບັນດາປະເທດ, ຜູ້ຕາງໜ້າຂອງບັນດາອົງການຈັດຕັ້ງສາກົນ ແລະ ວົງຄະນະຍາດບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດປະຈໍາຫວຽດນາມທີ່ໄດ້ມີຄວາມມິດຕະພາບ, ການສະໜັບສະໜຸນຢ່າງລໍ້າຄ່າ, ການຮ່ວມມືຢ່າງມີປະສິດທິຜົນຕໍ່ກັບປະຊາຊົນຫວຽດນາມ ກໍ່ຄື ການເປັນຄູ່ຮ່ວມງານທີ່ໄວ້ວາງໃຈໄດ້ກັບສະຫະພັນມິດຕະພາບ ແລະ ຄະນະກໍາມະທິການວຽກງານກ່ຽວກັບບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດ.
ທ່ານ ຈີ້ງ ດິ່ງ ຢູ້ງ ຮອງນາຍົກລັດຖະມົນຕີ ສສ ຫວຽດນາມກ່າວຄໍາເຫັນທີ່ງານພົບປະ
ກ່າວຄໍາເຫັນທີ່ງານດັ່ງກ່າວ, ທ່ານ ຈີ້ງ ດິ່ງ ຢູ້ງ ຮອງນາຍົກລັດຖະມົນຕີ ສສ ຫວຽດນາມໄດ້ຢືນຢັນວ່າ: "ພັກ ແລະ ລັດ ສສ ຫວຽດນາມ ຖືເປັນສໍາຄັນກ່ຽວກັບວຽກງານພົວພັນການຕ່າງປະເທດດ້ານປະຊາຊົນ ແລະ ບົດບາດຂອງບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານ. ຍິ່ງກວ່ານັ້ນ, ວຽກງານພົວພັນການຕ່າງປະເທດດ້ານປະຊາຊົນແມ່ນປັດໃຈອັນສໍາຄັນໃນການຊຸກຍູ້ການຮ່ວມມື ແລະ ຄວາມໄວ້ວາງໃຈລະຫວ່າງບັນດາປະເທດ ແລະ ປະຊາຊົນ. ການແລກປ່ຽນ, ການປະສານສົມທົບລະຫວ່າງອົງການຈັດຕັ້ງດ້ານສັງຄົມຂອງບັນດາປະເທດທີ່ເປັນພື້ນຖານເພື່ອໃຫ້ການພົວພັນລະຫວ່າງບັນດາປະເທດທີ່ຈະໄດ້ເຂົ້າໄປໃນຄວາມເລິກ, ຄວາມຫມັ້ນຄົງ ແລະ ຄວາມຍືນຍົງ”. ທ່ານ ຈີ້ງ ດິ່ງ ຢູ້ງ ກໍ່ໄດ້ເນັ້ນໜັກຕື່ມອີກວ່າ: “ພວກຂ້າພະເຈົ້າກໍ່ໄດ້ຮູ້ໄດ້ເຫັນກ່ຽວກັບໜ້າທີ່ວຽກງານຂອງພວກເຈົ້າຢູ່ຕາມເຂດຫ່າງໄກສອກຫລີກຂອງຫວຽດນາມ, ເພື່ອຮ່ວມແຮງຮ່ວມໃຈກັບພວກຂ້າພະເຈົ້າໃນການເຮັດໃຫ້ຊີວິດຂອງປະຊາຊົນຜູ້ທີ່ທຸກຍາກທີ່ສຸດໃຫ້ມີຄວາມຫມັ້ນຄົງ ແລະ ສ້າງວຽກເຮັດງານທໍາໃຫ້ປະຊາຊົນຜູ້ທີ່ມີຄວາມຫຍຸ້ງຍາກທີ່ສຸດ, ສ່ວນຫຼາຍລ້ວນແຕ່ແມ່ນປະຊາຊົນຜູ້ດ້ອຍໂອກາດ...ເພື່ອບໍ່ມີໃຜໄດ້ຖືກປະໄວ້ທາງຫລັງ”.
ທ່ານ Jorge Rondon Uzcategui ຫົວຫນ້າຄະນະຜູ້ຕາງຫນ້າການຕ່າງປະເທດປະຈໍາຫວຽດນາມກ່າວຄໍາເຫັນທີ່ງານພົບປະ
ທ່ານ Jorge Rondon Uzcategui, ຫົວຫນ້າຄະນະຜູ້ຕາງຫນ້າການຕ່າງປະເທດປະຈໍາຫວຽດນາມໄດ້ສະແດງຄວາມຊົມເຊີຍຢ່າງອົບອຸ່ນຕໍ່ຜົນສໍາເລັດໃນຫຼາຍດ້ານທີ່ຫວຽດນາມໄດ້ຍາດມາໄດ້ໃນໄລຍະໜຶ່ງປີຜ່ານມາ ກໍ່ຄື ໄດ້ບັນລຸຜົນສໍາເລັດໃນນະໂຍບາຍດ້ານການຕ່າງປະເທດ. ທ່ານ Jorge Rondon Uzcategui ຍັງກ່າວວ່າ: “ຫວັງວ່າວົງຄະນະຍາດສາກົນຈະຮ່ວມຈິດຮ່ວມໃຈດ້ວຍຄວາມຫົວຄິດປະດິດສ້າງ ແລະ ຄວາມສາໝັກໃຈໃນການແກ້ໄຂເປັນຢ່າງດີກ່ຽວກັບບັນດາບັນຫາດ້ານການເມືອງ, ສັງຄົມ, ເສດຖະກິດ ແລະ ສະພາບແວດລ້ອມທີ່ກໍາລັງສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ. ປີ 2019 ຈະເປັນປີແຫ່ງຄວາມສຸກ, ປະສົມກົມກຽວ, ສະບາຍໃຈ ແລະ ເປັນປີແຫ່ງການປຶກສາຫາລື, ສ້າງສິດຜົນປະໂຫຍດມາໃຫ້ແກ່ທຸກປະເທດ”.
ປີ 2018 ຜ່ານມາ, ສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ຄະນະກໍາມະທິການວຽກງານກ່ຽວກັບບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດທີ່ໄດ້ບັນລຸຜົນສໍາເລັດຫຼາຍຢ່າງໃນຂົງເຂດສັນຕິພາບ, ຄວາມສາມັກຄີ, ມິດຕະພາບ, ການຮ່ວມມືດ້ານປະຊາຊົນ ແລະ ວຽກງານອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດ. ກ່ຽວກັບການຈັດຕັ້ງການເຄື່ອນໄຫວຂອງສະຫະພັນແມ່ນໄດ້ສຸມໃສ່ໃນການການພັດທະນາດ້ານສັງຄົມ, ມີຈຸດສຸມ ແລະ ຈຸດປະສານງານ; ວຽກງານຂົນຂວາຍການສະຫນັບສະຫນູນບໍ່ຂຶ້ນກັບລັດຖະບານຕ່າງປະເທດທີ່ຍັງໄດ້ຮັບການສືບຕໍ່ປະຕິບັດຢ່າງມີປະສິດທິຜົນ. ນີ້ແມ່ນຜົນໄດ້ຮັບຈາກຄວາມພະຍາຍາມຢ່າງຈິງຈັງ ແລະ ຄວາມຄິດສ້າງສັນ, ການຕັດສິນໃຈໃນການແກ້ໄຂຄວາມຫຍຸ້ງຍາກຂອງຜູ້ທີ່ເຮັດໜ້າທີ່ວຽກງານການພົວພັນການຕ່າງປະເທດດ້ານປະຊາຊົນ ແລະ ຫມູ່ເພື່ອນຫຼາຍຄົນ, ຄູ່ຮ່ວມງານຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມທັງຢູ່ພາຍໃນປະເທດ ແລະ ຢູ່ຕ່າງປະເທດ.
ບັນດາຜົນສໍາເລັດດັ່ງກ່າວໄດ້ປະກອບສ່ວນຢ່າງຕັ້ງຫນ້າເຂົ້າໃນການປະຕິບັດນະໂຍບາຍຂອງພັກ, ລັດ ແລະລັດຖະບານຫວຽດນາມໃນການເພີ່ມພູນຄູນສ້າງ ແລະ ພັດທະນາຄວາມມິດຕະພາບ, ຄວາມເຂົ້າໃຈກັນລະຫວ່າງປະຊາຊົນ ສສ ຫວຽດນາມ ແລະ ປະຊາຊົນຂອງບັນດາປະເທດໃນທົ່ວໂລກ.
（ໄຊພອນ）
