ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບເອກອັກຄະລັດຖະທູດອັງກິດ

ທ່ານນາຍົກລັດຖະມົນຕີ ຫງວຽນຊວນຟຸກ ຕີລາຄາສູງຕໍ່ບັນດາການປະກອບສ່ວນຢ່າງຕັ້ງໜ້າ ແລະມີປະສິດທິຜົນຂອງເອກອັກຄະລັດຖະທູດໃນການຫັນ ແລະຜັນຂະຫຍາຍບັນດາມາດຕະການຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດເປັນລະອຽດ. ຕາມທ່ານນາຍົກລັດຖະມົນຕີ ແລ້ວ, ໃນໄລຍະຜ່ານມາ, ການພົວພັນຮ່ວມມື ຫວຽດນາມ-ອັງກິດ ສືບຕໍ່ພັດທະນາຢ່າງເລິກເຊິ່ງກວ້າງຂວາງ, ມີປະສິດທິຜົນໃນຫຼາຍຂົງເຂດ.

ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຕ້ອນຮັບທ່ານ Giles Lever ເອກອັກຄະລັດຖະທູດ ອັງກິດ. (ພາບ: vov.vn)

ທ່ານ Giles Lever ສະແດງຄວາມປິຕິຊົມຊື່ນຕໍ່ໝາກຜົນແຫ່ງການຮ່ວມມືລະຫວ່າງສອງຝ່າຍໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ຮັບມືກັບບັນດາສິ່ງທ້າທາຍທົ່ວໂລກ ຄື ການປ່ຽນແປງຂອງດິນຟ້າອາກາດ, ການຄ້າຂາຍສັດປ່າ. ພ້ອມທັງ, ເນັ້ນໜັກວ່າ ການສຶກສາບໍາລຸງສ້າງແມ່ນຂົງເຂດບູລິມະສິດໃນການຮ່ວມມື, ທ່ານ Giles Lever ໃຫ້ຮູ້ວ່າ, ອັງກິດ ຈະເພີ່ມຈຳນວນທຶນການສຶກສາໃຫ້ນັກຮຽນຫວຽດນາມ. ທ່ານ Giles Lever ໃຫ້ຮູ້ວ່າ, ອັງກິດ ສະໜັບສະໜູນເລື່ອງຮັບປະກັນຄວາມໝັ້ນຄົງ, ຄວາມເສລີໃນການເດີນທະເລ, ການບິນຢູ່ທະເລຕາເວັນອອກ, ເຄົາລົບສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982.

ຂອບໃຈຕໍ່ອາລົມຈິດອັນດີງາມເຊິ່ງທ່ານເອກອັກຄະລັດຖະທູດສະຫງວນໃຫ້ຫວຽດນາມ, ທ່ານນາຍົກລັດຖະມົນຕີ ຫງວຽນຊວນຟຸກ ຖືວ່າ, ສອງຝ່າຍຄວນສືບຕໍ່ເສີມຂະຫຍາຍບັນດາໝາກຜົນທີ່ບັນລຸໄດ້ ແລະສູ້ຊົນຍົກການພົວພັນເສດຖະກິດສອງຝ່າຍຂຶ້ນໃຫ້ສົມກັບຂອບເຂດຄູ່ຮ່ວມມືຍຸດທະສາດ ແລະຄວາມສາມາດບົ່ມຊ້ອນຮ່ວມມືຂອງສອງປະເທດ.

ປີ 2018, ສອງປະເທດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ. ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີສອງປະເທດຄວນເພີ່ມທະວີບັນດາການເຄື່ອນໄຫວພົບປະແລກປ່ຽນ, ປະກອບສ່ວນເພີ່ມທະວີນໍ້າໃຈມິດຕະພາບ ແລະຄວາມເຂົ້າອົກເຂົ້າໃຈເຊິ່ງກັນ ແລະກັນລະຫວ່າງສອງຊາດ.

（ແຫຼ່ງ​ຂໍ້​ມູນ​： ກປ.ອອນໄລ）