 |
ກອງປະຊຸມພົບປະລະຫວ່າງຄະນະຜູ້ແທນເມືອງສີໂຄດຕະບອງ ນະຄອນຫຼວງວຽງຈັນ (ນວ) ແລະ ຄະນະຜູ້ແທນເມືອງ 5 ນະຄອນໂຮ່ຈີມິງ ສສ ຫວຽດນາມ.
ທ່ານນາງ ພູວຽງ ແກ້ວວົງວິຈິດ ກ່າວວ່າ: ການພົບປະເຮັດວຽກຮ່ວມກັນຄັ້ງນີ້ ແມ່ນບົນພື້ນຖານຜັນຂະຫຍາຍຈິດໃຈຊີ້ນຳຂອງການນຳ ນວ ແລະ ໂຮ່ຈີມິງ ໃນໂອກາດຄະນະຜູ້ແທນຂັ້ນສູງນະຄອນໂຮ່ຈີມິງ ເດີນທາງມາຢ້ຽມຢາມ ແລະ ເຮັດວຽກຢູ່ ນວ ໃນຕົ້ນປີ 2018 ເພື່ອຊຸກຍູ້ສາຍພົວພັນມິດຕະພາບ ແລະ ການຮ່ວມມືລະຫວ່າງ 2 ເມືອງ ທັງເປັນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ອັນມີມູນເຊື້ອໃຫ້ນັບມື້ອຸດົມສົມບູນຂຶ້ນ.
ເມືອງສີໂຄດຕະບອງ ມີເນື້ອທີ່ 144 ກິໂລຕາແມັດ ແບ່ງເປັນເຂດຕົວເມືອງ 75% ເຂດຊານເມືອງ 25% ມີ 60 ບ້ານ ໃນນີ້ 19 ບ້ານ ເປັນບ້ານທີ່ມີຊາຍແດນຕິດກັບຣາຊະອານາຈັກໄທ ຍາວ 28 ກິໂລແມັດ ພົນລະເມືອງ 123.590 ຄົນ 24.244 ຄອບຄົວ ປະຊາຊົນມີມູນເຊື້ອສາມັກຄີ ດຸໝັ່ນ ມີຄວາມສະດວກ ແລະ ເງື່ອນໄຂອຳນວຍດ້ານເສດຖະກິດ-ສັງຄົມ ມີພື້ນຖານໂຄງລ່າງສະດວກ ມີແຫຼ່ງທ່ອງທ່ຽວປະຫວັດສາດ-ທຳມະຊາດ ແລະ ວັດທະນະທຳ ເປັນບ່ອນດຶງດູດນັກທ່ອງທ່ຽວເຂົ້າມາທ່ຽວຊົມ ມີດ່ານປະເພນີ ເປັນດ່ານຊາຍແດນສ້າງເງື່ອນໄຂການໄປ-ມາຫາສູ່ຂອງປະຊາຊົນ ລາວ-ໄທ ສະເລ່ຍການເຂົ້າ-ອອກຜ່ານດ່ານ 1.000 ຄົນຕໍ່ເດືອນ ປີຜ່ານມາມີການແຈ້ງເຂົ້າ 8.655 ຄົນ ແຈ້ງອອກ 4.756 ຄົນ ເສດຖະກິດຂອງເມືອງສືບຕໍ່ມີການຂະຫຍາຍຕົວຢ່າງຕັ້ງໜ້າ ລວມຍອດຜະລິດຕະພັນພາຍໃນ (GDP) ບັນລຸ 4.170,6 ຕື້ກີບ ສະເລ່ຍຕໍ່ 33 ລ້ານກວ່າກີບຕໍ່ຄົນຕໍ່ປີ.
（ແຫຼ່ງຂໍ້ມູນ： vientianemai.net）
