 |
ກອງປະຊຸມລັດຖະບານສະໄໝສາມັນປະຈຳເດືອນມັງກອນ 2019
ກອງປະຊຸມຄັ້ງນີ້ໄດ້ສຸມໃສ່ພິຈາລະນາ ແລະ ປະກອບຄຳເຫັນໃສ່ 5 ເອກະສານສຳຄັນຄື: ຮ່າງແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກຳຮອດປີ 2025 ບົດລາຍງານກ່ຽວກັບແຜນພັດທະນາທົ່ວເຂດພູພຽງບໍລະເວນ ບົດລາຍງານກ່ຽວກັບຜົນການຄົ້ນຄວ້າ ແລະ ກວດກາຕີລາຄາກ່ຽວກັບການປະເມີນຜົນກະທົບດ້ານສິ່ງແວດລ້ອມ ແລະ ສັງຄົມ ຈາກໂຄງການກໍ່ສ້າງເຂື່ອນໄຟຟ້ານ້ຳໂມ້ ແລະ ນ້ຳມີລີ້ ຮ່າງດຳລັດວ່າດ້ວຍການແຂ່ງຂັນ ແລະ ຍ້ອງຍໍ ແລະ ຮ່າງດຳລັດວ່າດ້ວຍກົງຈັກການຈັດຕັ້ງຂອງລັດ.
ກອງປະຊຸມໄດ້ພິຈາລະນາຮັບຮອງຮ່າງແຜນພັດທະນາອຸດສາຫະກຳປຸງແຕ່ງ ແລະ ຫັດຖະກຳ ຮອດປີ 2025 ແລະ ໄດ້ຊີ້ນຳໃຫ້ພາກສ່ວນທີ່ກ່ຽວຂ້ອງນຳໄປປັບປຸງຕາມການປະກອບຄຳເຫັນຂອງສະມາຊິກລັດຖະບານເປັນຕົ້ນການວາງແຜນຍຸດທະສາດ ແລະ ແຜນພັດທະນາດັ່ງກ່າວ ໃຫ້ແຍກອອກເປັນແຜນຈັດຕັ້ງປະຕິບັດ 2 ປີ ເພື່ອເປັນພື້ນຖານໃຫ້ການຈັດຕັ້ງປະຕິບັດແຜນການໃນ 5 ປີ ຕໍ່ໜ້າ, ໃນນີ້, ໃຫ້ເອົາໃຈໃສ່ຈັດລຽງບຸລິມະສິດຄັກແນ່ເອົາໃຈໃສ່ປັບປຸງວຽກງານການຂຸດຄົ້ນແຮ່ທາດໃຫ້ເຂົ້າສູ່ການປຸງແຕ່ງຕິດພັນກັບການຊອກຕະຫຼາດທີ່ໝັ້ນຄົງເອົາໃຈໃສ່ຕໍ່ການຜະລິດສິນຄ້າທີ່ເປັນທ່າແຮງ ໂດຍການວາງນະໂຍບາຍຊຸກຍູ້ສົ່ງເສີມກຳນົດກົນໄກສ້າງສິ່ງອຳນວຍຄວາມສະດວກ ແລະ ເຮັດໃຫ້ເປັນໂຄງການລະອຽດເພື່ອດຶງດູດໃຫ້ເອກະຊົນ ແລະ ນັກລົງທຶນຕ່າງປະເທດເຂົ້າມາລົງທຶນສໍາຄັນແມ່ນໃຫ້ເອົາໃຈໃສ່ຊຸກຍູ້, ສົ່ງເສີມບັນດາວິສາຫະກິດຂະໜາດນ້ອຍ ແລະ ຂະໜາດກາງ ໃຫ້ມີການຂະຫຍາຍຕົວຫຼາຍຂຶ້ນພິຈາລະນາຮັບຮອງເອົາບົດລາຍງານກ່ຽວກັບແຜນພັດທະນາທົ່ວເຂດພູພຽງບໍລະເວນ ແລະ ໄດ້ຊີ້ນຳໃຫ້ພາກສ່ວນກ່ຽວຂ້ອງນຳໄປປັບປຸງຕາມຄຳເຫັນຂອງສະມາຊິກລັດຖະບານກ່ອນນຳສະເໜີຂໍທິດຊີ້ນຳຈາກກອງປະຊຸມກົມການເມືອງສູນກາງພັກ.
ສ່ວນບົດລາຍງານກ່ຽວກັບຜົນການຄົ້ນຄວ້າ ແລະ ກວດກາຕີລາຄາກ່ຽວກັບການປະເມີນຜົນກະທົບດ້ານສິ່ງແວດລ້ອມ ແລະ ສັງຄົມ ຈາກໂຄງການກໍ່ສ້າງເຂື່ອນໄຟຟ້ານ້ຳໂມ້ ແລະ ນ້ຳມີລີ້ ມອບໃຫ້ກະຊວງພະລັງງານ ແລະ ບໍ່ແຮ່ ສົມທົບກັບກະຊວງແຜນການ ແລະ ການລົງທຶນ ແລະ ພາກສ່ວນກ່ຽວຂ້ອງນຳໄປສຶກສາຄົ້ນຄວ້າສຳຫຼວດລະອຽດແລ້ວນຳມາລາຍງານຄືນໃຫ້ລັດຖະບານສຳລັບຮ່າງດຳລັດວ່າດ້ວຍກົງຈັກການຈັດຕັ້ງຂອງລັດໄດ້ຊີ້ນຳໃຫ້ພາກສ່ວນກ່ຽວຂ້ອງນຳໄປຄົ້ນຄວ້າຄືນຕາມການປະກອບຄຳເຫັນຂອງສະມາຊິກລັດຖະບານ.
（ແຫຼ່ງຂໍ້ມູນ： vientianemai.net）
