 |
ນາງ ເກດມະນີ ວົງປະເສີດ ຄອງຕຳແໜ່ງນາງສາວນະຄອນຫຼວງ
ກິດຈະກຳການຄັດເລືອກນາງສາວນະຄອນຫຼວງ ປະຈຳປີ 2019 ສຳເລັດໃນວັນທີ 6 ເມສາ 2019 ຈັດຂຶ້ນທີ່ໂຮງແຮມແລນມາກ ນະຄອນຫຼວງວຽງຈັນ ມີທ່ານ ສາລີ ນັນທະວົງ ຫົວໜ້າຂະແໜງວັດທະນະທຳ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ທ່ານນາງ ອໍລະໄທ ສັນຕິຄົງຄາ ຜູ້ອຳນວຍການບໍລິສັດ ກຣິດຕິພົງ ກຣຸບ ຈຳກັດ ທ່ານນາງ ນິສຸດາ ວົງປະເສີດ ນາງສາວນະຄອນຫຼວງວຽງຈັນ ປີ 2018 ບັນດາຄະນະກໍາມະການ ຜູ້ຕາງໜ້າອົງການຈັດຕັ້ງມະຫາຊົນຈາກພະແນກການກ່ຽວຂ້ອງ ແລະ ຜູ້ໃຫ້ການສະໜັບສະໜູນງານເຂົ້າຮ່ວມ.
ເຊິ່ງກິດຈະກຳດັ່ງກ່າວ ເປັນການຮ່ວມມືລະຫວ່າງພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອງຫຼວງວຽງຈັນ ແລະ ບໍລິສັດ ກຣິດຕະພົງ ກຣຸບ ຈຳກັດ ພາຍໃຕ້ຄຳຂວັນ “ສົ່ງເສີມມໍລະດົກວັດທະນະທຳ ນຳຄຸນຄ່າສູ່ແມ່ຍິງລາວ” ແລະ ຜ່ານການຄັດເລືອກຮອບສຸດທ້າຍເຫັນວ່າ ນາງສາວໝາຍເລກ MVT15 ນາງ ເກດມະນີ ວົງປະເສີດ ສາມາດຄອງໄດ້ຕຳແໜ່ງນາງສາວນະຄອນຫຼວງວຽງຈັນ ປີ 2019 ໄດ້ຄອງມົງກຸດເພັດຈາກຮ້ານຄຳພູວົງ ມູນຄ່າ 80 ລ້ານກີບ ເງິນລາງວັນ 20 ລ້ານກີບ ພ້ອມສາຍສະພາຍ ແລະ ລາງວັນອື່ນໆ ເຊິ່ງນາງສາວນະຄອນຫຼວງ ຍັງຈະໄດ້ເປັນຕົວແທນສາວລາວໄປຮ່ວມຄັດເລືອກເວທີລະດັບສາກົນຄື: ມິສໄຊນິສອິນເຕີເນເຊິນແນວ ທີ່ຮົງກົງ ສປ ຈີນ.
ຮອງອັນດັບໜຶ່ງ MVT08 ນາງ ຄຳຫຼ້າ ຈັນທະລັງສີ ໄດ້ຮັບມຸງກຸດເພັດ ມູນຄ່າ 40 ລ້ານກີບ ເງິນລາງວັນ 10 ລ້ານກີບ ພ້ອມສາຍສະພາຍ ແລະ ລາງວັນອື່ນໆ ແລະ ຈະໄດ້ເປັນຕົວແທນໄປຮ່ວມຄັດເລືອກເວທີ ມິສ ເອເຊຍ ປາຊິຟິກ ທີ່ປະເທດຟີລິບປິນ ລະຫວ່າງເດືອນຕຸລານີ້ ຮອງອັນດັບສອງ MVT01 ນາງ ນິກສະຢາ ໄຊສົມພູ ໄດ້ຮັບມຸງກຸດເພັດ ມູນຄ່າ 40 ລ້ານກີບ ເງິນລາງວັນ 5 ລ້ານກີບ ພ້ອມສາຍສະພາຍ ແລະ ລາງວັນອື່ນໆ ສ່ວນລາງວັນຮອງອັນດັບທີ 3 ທີ 4 ປະກອບມີ 4 ນາງສາວຄື: MVT06 ນາງ ສົ້ມທອງ ວົງສະໝອນ MVT04 ນາງ ນ້ຳຝົນ ພູມານິວົງ MVT17 ນາງ ສິງທອງ ເລົ່າບຸນແພງທະໝັ້ນ ແລະ MVT14 ນາງ ເມລາລີ ພັນທະວົງ ໄດ້ຮັບເງິນລາງວັນ 3 ລ້ານກີບ ແລະ ຂອງລາງວັນອື່ນໆ.
ນອກນັ້ນ ຍັງມີລາງວັນພິເສດອີກຫຼາຍລາງວັນຄື: ລາງວັນສະເໜຍິງລາວ ແລະ ລາງວັນ ນາງສາວຜິວງາມໜ້າໃສ ໄດ້ແກ່ MVT15 ນາງ ເກດມະນີ ວົງປະເສີດ ລາງວັນນາງສາວໜ້າອ່ອນກວ່າໄວ MVT08 ນາງ ຄຳຫຼ້າ ຈັນທະລັງສີ ລາງວັນນາງສາວຂວັນໃຈມິດຕະພາບ MVT01 ນາງ ນິກສະຢາ ໄຊສົມພູ ລາງວັນນາງສາວຂວັນໃຈມວນຊົນ MVT01 ນາງ ນິກສະຢາ ໄຊສົມພູ ລາງວັນນາງສາວຂວັນໃຈຊ່າງພາບ MVT19 ນາງ ຕຳບຸ້ຍ ພານພູວົງ ແລະ ລາງວັນ ນາງສາວບຸກຄະລິກກະພາບດີ MVT16 ນາງ ພຸດອານົງ ສີດາຄຳ.
（ແຫຼ່ງຂໍ້ມູນ： vientianemai.net）
