ໃນວັນທີ 7 ມັງກອນ 2020 ນີ້, ຄະນະນຳວິທະຍາຄານປ້ອງກັນຊາດ ໄກສອນ ພົມວິຫານ, ເຊິ່ງນຳໂດຍ ທ່ານ ພົນຕີ ຄຳຫຼ້າ ພັນໄຊຍະສຸກ, ກຳມະການຄະນະພັກກະຊວງປ້ອງກັນປະເທດ, ເລຂາຄະນະພັກ, ຫົວໜ້າການເມືອງຄະນະນຳວິທະຍາຄານປ້ອງກັນຊາດ ພ້ອມດ້ວຍຄະນະໄດ້ໃຫ້ການຕ້ອນຮັບຄະນະຜູ້ແທນວິທະຍາຄານປ້ອງກັນຊາດກອງທັບປະຊາຊົນ ຫວຽດນາມ ໄດ້ເດີນທາງມາຢ້ຽມຢາມ ແລະ ຮ່ວມເຮັດວຽກຢູ່ວິທະຍາຄານປ້ອງກັນຊາດ ໄກສອນ ພົມວິຫານ. ວິທະຍາຄານປ້ອງກັນຊາດກອງທັບປະຊາຊົນ ຫວຽດນາມ ເຊິ່ງນຳໂດຍ ທ່ານ ພົນຈັດຕະວາຮອງ ສາດສະດາຈານ, ປະລິນຍາເອກ ຟານແອງຫວຽດ, ຮອງອຳນວຍການວິທະຍາຄານປ້ອງກັນຊາດ ກອງທັບປະຊາຊົນຫວຽດນາມ.

ທ່ານ ພົນຕີ ຄຳຫຼ້າ ພັນໄຊຍະສຸກ ແລະ ທ່ານ ພົນຈັດຕະວາ ຟານແອງຫວຽດ ໃນການຕ້ອນຮັບ. (ພາບ: hvlq.vn)

ທ່ານ ພົນຕີ ຄຳຫຼ້າ ພັນໄຊຍະສຸກ ກໍໄດ້ໃຫ້ການຕ້ອນຮັບຢ່າງອົບອຸ່ນ ແລະ ເປັນກັນເອງ, ພ້ອມທັງຕີລາຄາສູງຕໍ່ການມາຢ້ຽມຢາມ ແລະ ຮ່ວມເຮັດວຽກໃນຄັ້ງນີ້ເຊິ່ງຍັງເປັນການປະກອບສ່ວນອັນສຳຄັນ ເຂົ້າໃນການຮັດແໜັນສາຍພົວພັນການຮ່ວມມື ລາວ-ຫວຽດນາມ, ຫວຽດນາມ- ລາວ ທີ່ມີການຮ່ວມມືກັນມາແຕ່ດົນນານ, ໃຫ້ມີການຂະຫຍາຍຕົວ ແລະ ມີປະສິດທິຜົນສູງໃນການຮ່ວມມືເຊິ່ງກັນ ແລະ ກັນໃຫ້ ແຕກດອກອອກຜົນ ຂຶ້ນເລື້ອຍໆ.

ພ້ອມດຽວກັນນີ້, ກໍໄດ້ກ່າວອວຍພອນ ແລະ ກ່າວຂອບໃຈຕໍ່ຄະນະຜູ້ແທນວິທະຍາຄານປ້ອງກັນຊາດ ສສ ຫວຽດນາມ ທີ່ໄດ້ມາຢ້ຽມຢາມ, ແລກປ່ຽນບົດຮຽນຢູ່ ສປປ ລາວ ເວົ້າລວມ, ເວົ້າສະເພາະກໍແມ່ນ ກັບວິທະຍາຄານປ້ອງກັນຊາດ ໄກສອນ ພົມວິຫານ, ເຊິ່ງມັນສະແດງໃຫ້ເຫັນເຖິງສາຍພົວພັນການຮ່ວມມືອັນແໜ້ນແຟ້ນ, ທັງຍັງເປັນການປະກອບສ່ວນອັນສຳຄັນ, ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຊ່ວຍເຫຼືອແບບພິເສດໃນຕໍ່ໜ້າຂອງສອງຊາດ - ສອງກອງທັບ ລາວ-ຫວຽດນາມ ໃຫ້ເກີດດອກອອກຜົນຂຶ້ນເລື້ອຍໆ.

（ຄຳຮຸ່ງ）