ທີ່ການຕ້ອນຮັບ, ທ່ານ ຫງວຽນຊວນຟຸກ ຊີ້ແຈ້ງວ່າ ທຸກໆປີ, ຫວຽດນາມ ລ້ວນແຕ່ບຸລິມະສິດທຶນຊ່ວຍເຫຼືອຫຼ້າ ODA ໃຫ້ແກ່ລາວ, ໃນນັ້ນມີ 5 ໂຄງການໄດ້ຮັບການເປີດນໍາໃຊ້, ມີບາງໂຄງການອື່ນພວມໄດ້ຮັບການແກ້ໄຂຄວາມຫຍຸ້ງຍາກ ແລະຍູ້ແຮງຄວາມຄືບໜ້າ. ທ່ານ ຫງວຽນຊວນຟຸກ ໃຫ້ຮູ້ວ່າ ບັນດາກະຊວງ, ຂະແໜງການ, ທ້ອງຖິ່ນເປັນຕົ້ນແມ່ນບັນດາທ້ອງຖິ່ນທີ່ມີເສັ້ນຊາຍແດນຕິດກັບປະເທດລາວ ລ້ວນແຕ່ເພີ່ມທະວີການຮ່ວມມື.
ຕາງໜ້າພັກ, ລັດ ແລະປະຊາຊົນລາວ, ທ່ານ ສອນໄຊ ສີພັນດອນ ໄດ້ສະແດງຄວາມຂອບອົກຂອບໃຈພັກ, ລັດ ແລະປະຊາຊົນຫວຽດນາມ ຍາມໃດກໍ່ຊ່ວຍເຫຼືອປະຊາຊົນລາວ ຢ່າງທັນການ ແລະມີປະສິດທິຜົນ. ໃນໄລຍະຈະມາເຖິງ, ທ່ານ ສອນໄຊ ສີພັນດອນ ຢັ້ງຢືນວ່າ ຈະສືບຕໍ່ຊີ້ນຳບັນດາກະຊວງ, ຂະແໜງການທີ່ກ່ຽວຂ້ອງຂອງຝ່າຍລາວ ເພື່ອສ້າງສຳເລັດບັນດາເອກະສານ, ລະບຽບການເພື່ອຊຸກຍູ້ບັນດາໂຄງການຮ່ວມມືລະຫວ່າງສອງປະເທດໂດຍໄວ; ເຊື່ອໝັ້ນວ່າ ກອງປະຊຸມຄັ້ງທີ 42 ຄະນະກໍາມະການລະຫວ່າງລັດຖະບານຫວຽດນາມ-ລາວ (UBLCP), ສອງຝ່າຍຈະໄດ້ລົງນາມ ແລະແລກປ່ຽນເອກະສານຮ່ວມມືໃນບັນດາຂົງເຂດສໍາຄັນຫຼາຍສະບັບ.
 |
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ຕ້ອນຮັບທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນລາວ. (ພາບ: TXVN)
ທ່ານ ສອນໄຊ ສີພັນດອນ ສະແດງຄວາມຂອບອົກຂອບໃຈທ່ານ ຫງວຽນຊວນຟຸກ ທີ່ໄດ້ຈັດສົ່ງກຸ່ມຊ່ຽວຊານໄປໃຫ້ຄຳປຶກສານະໂຍບາຍມະຫາພາກໃຫ້ແກ່ລາວ. ບັນດາຄໍາປຶກສາເຫຼົ່ານີ້ໄດ້ຮັບການພິຈາລະນາ ແລະໝູນໃຊ້ຈາກຝ່າຍລາວ.
ທ່ານ ຫງວຽນຊວນຟຸກ ເນັ້ນໜັກວ່າ ປີ 2020 ແມ່ນປີບານພັບ, ມີຄວາມສໍາຄັນຕໍ່ສອງປະເທດທັງດ້ານການພົວພັນພາຍໃນ ແລະການພົວພັນຕ່າງປະເທດ, ທ່ານ ຫງວຽນຊວນຟຸກ ສະເໜີວ່າ ຈຸດສຸມໃນຕໍ່ໜ້າແມ່ນກະຊວງແຜນການ ແລະການລົງທຶນຂອງສອງປະເທດຈົ່ງກະກຽມເນື້ອໃນ ແລະຮັບໃຊ້ນາຍົກລັດຖະມົນຕີສອງທ່ານເຂົ້າຮ່ວມການພົບປະປະຈໍາປີລະຫວ່າງການນໍາຂັ້ນສູງສອງປະເທດ ແລະເປັນປະທານຮ່ວມກອງປະຊຸມຄັ້ງທີ 42 ຄະນະກໍາມະການລະຫວ່າງລັດຖະບານຫວຽດນາມ-ລາວ ປີ 2020; ຕັ້ງໜ້າກະກຽມແຜນການຮ່ວມມືໃຫ້ 5 ປີຈະມາເຖິງ.
（ຄຳຮຸ່ງ）
