 |
ພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືໃນການຄົ້ນຄວ້າ ແລະ ພັດທະນາເຕັກໂນໂລຊີດີຈິຕ໋ອນ.
ຮ່ວມລົງນາມຂອງທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕ໋ອນ, ທ່ານ ປອ ຄໍາເພັດ ວົງດາລາ, ຫົວໜ້າກົມແຜນການ ແລະ ການຮ່ວມມື ແລະ ທ່ານ Takeo MIYAKE, ຮອງປະທານບໍລິສັດ ບໍລິສັດ Ryobi System ຈຳກັດ ໃຫ້ກຽດເຂົ້າຮ່ວມມີທ່ານ ບໍ່ວຽງຄໍາ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ Takeshi HIKIHARA, ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ ພ້ອມດ້ວຍຄະນະນໍາກະຊວງ ສະຖານທູດ ແລະ ພະນັກງານວິຊາການສອງຝ່າຍ.
ການຮ່ວມດັ່ງກ່າວ ສອງຝ່າຍແມ່ນຈະຮ່ວມກັນ ສຶກສາຄວາມເປັນໄປໄດ້ ໂດຍຈະມີການລົງສໍາຫຼວດເພື່ອເກັບກໍາຂໍ້ມູນ ກ່ຽວກັບສະພາບການນໍາໃຊ້ ແລະ ຄວາມຕ້ອງໃນການນໍາໃຊ້ ລະບົບເຕັກໂນໂລຊີດີຈິຕ໋ອນ ຢູ່ຂະແໜງການຕ່າງໆ ໂດຍຈະສຸມໃສ່ໃນການຄົ້ນຄວ້າ ພັດທະນາ ແລະ ນໍາໃຊ້ລະບົບເຕັກໂນໂລຊີເຂົ້າໃນການຄຸ້ມຄອງ ບໍລິຫານ ແລະ ບໍລິການລັດ ແບບທັນສະໄໝ ຫຼື ເອີ້ນວ່າ “Digital government platform” ເຊິ່ງຈະມີການສຶກສາເພື່ອພັດທະນາລະບົບຊອບແວຣ (software) ແອັບພິເຄຊັນ (application) ໃຫ້ແກ່ອົງການຈັດຕັ້ງຕ່າງໆທັງພາກລັດ ແລະ ເອກະຊົນ ເພື່ອຍົກສູງປະສິດທິພາບຂອງການບໍລິຫານສັງຄົມ ໃຫ້ມີຄວາມທັນສະໄໝ ວ່ອງໄວ ໂປ່ງໃສ ແລະ ມີຄວາມປອດໄພສູງ ເປັນຕົ້ນ: ລະບົບຄຸ້ມຄອງ-ບໍລິການທາງດ້ານສາທາລະນະສຸກ, ລະບົບສະຫວັດດີການສັງຄົມ ລະບົບຄຸ້ມຄອງທີ່ດິນ, ລະບົບຄຸ້ມຄອງພາຫະນະ, ການຂົນສົ່ງ, ການຈາລາຈອນ ແລະ ອື່ນໆ ທີ່ເຫັນວ່າມີຄວາມຈໍາເປັນສໍາລັບການເປັນທັນສະໄໝ ແນໃສ່ປະກອບສ່ວນເຂົ້າໃນການຫັນເປັນອຸດສາຫະກໍາ ແລະ ທັນສະໄໝ ທັງເປັນການຊຸກຍູ້-ສົ່ງເສີມ ໃຫ້ມີການນໍາໃຊ້ລະບົບເຕັກໂນໂລຊີດີຈິຕ໋ອນ ເຂົ້າໃນລະບົບການຜະລິດ ເພື່ອຫຼຸດຜ່ອນຕົ້ນທຶນ, ສ້າງມູນຄ່າເພີ່ມໃຫ້ແກ່ຜະລິດຕະພັນ ແລະ ການບໍລິການ ເພື່ອພັດທະນາເສດຖະກິດດິຈິຕ໋ອນ ຂອງ ສປປ ລາວ.（ແຫຼ່ງຂໍ້ມູນ： ໜັງສືພິມ ວິທະຍາສາດ ແລະ ພັດທະນາ）
