ນະຄອນເກີນເທີ ຈູດທຽນສົດຸດີ ແລະ ຮັກສານຄຸນຄ່າ "ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ"

ຕອນຄ່ຳວັນທີ 26 ກໍລະກົດ, ຢູ່ສຸສານວິລະຊົນນັກຮົບຜູ້ເສຍສະລະຊີວິດເພື່ອຊາດ ນະຄອນເກີນເທີ, ຄະນະຊາວໜຸ່ມນະຄອນເກີນເທີ ຮ່ວມກັບຄະນະບໍລິຫານສູນກາງພຸດທະສາສະໜາຫວຽດນາມ ນະຄອນເກີນເທີ ໄດ້ຈັດພິທີຈູດທຽນສົດຸດີບັນດາວິລະຊົນນັກຮົບຜູ້ເສຍສະລະຊີວິດເພື່ອຊາດ ເນື່ອງໃນໂອກາດຄົບຮອບ 79 ປີ ວັນທະຫານພິການ ແລະ ນັກຮົບຜູ້ເສຍສະລະຊີວິດເພື່ອຊາດ (27/7/1947 – 27/7/2026) ພາຍໃຕ້ຫົວຂໍ້ “ສືບຕາມຮອຍຕີນຂອງວິລະຊົນ – ສືບຕໍ່ບົດເພງແຫ່ງວິລະກຳ.”

ບັນດາການສະແດງສິລະປະອັນພິເສດ ໃນພິທີຈູດທຽນສົດຸດີບັນດາວິລະຊົນນັກຮົບຜູ້ເສຍສະລະຊີວິດເພື່ອຊາດ ເນື່ອງໃນໂອກາດຄົບຮອບ 79 ປີ ວັນທະຫານພິການ ແລະ ນັກຮົບຜູ້ເສຍສະລະຊີວິດເພື່ອຊາດ. (ພາບ: MT)

ທ່າມກາງບັນຍາກາດອັນເຄັ່ງຂຶມ, ບັນດາຜູ້ແທນ, ສະມາຊິກຊາວໜຸ່ມ, ຊາວໜຸ່ມ ແລະ ປະຊາຊົນ ໄດ້ຮ່ວມກັນຖະຫວາຍທູບທຽນ, ຢືນສະຫງົບໄວ້ອາໄລ ແລະ ຈູດທຽນສົດຸດີໄວ້ເທິງແຕ່ລະຫຼຸມຝັງສົບຂອງວິລະຊົນນັກຮົບຜູ້ເສຍສະລະຊີວິດເພື່ອຊາດ. ກິດຈະກຳດັ່ງກ່າວ ສະແດງອອກເຖິງຄວາມເຄົາລົບນັບຖື ແລະ ຄວາມສຳນຶກບຸນຄຸນ ຕໍ່ບັນດາວິລະຊົນນັກຮົບຜູ້ເສຍສະລະຊີວິດເພື່ອຊາດ, ແມ່ວິລະຊົນຫວຽດນາມ, ທະຫານພິການ, ທະຫານເຈັບປ່ວຍ, ຄອບຄົວວິລະຊົນນັກຮົບຜູ້ເສຍສະລະຊີວິດເພື່ອຊາດ ແລະ ຜູ້ທີ່ມີຄຸນງາມຄວາມດີຕໍ່ການປະຕິວັດ; ພ້ອມທັງເຜີຍແຜ່ຢ່າງເລິກເຊິ່ງຄຸນຄ່າແຫ່ງປະເພນີ “ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ” ແລະ “ຕອບແທນບຸນຄຸນ” ຂອງຊາດ.

ກ່າວຄຳປາໄສໃນພິທີ, ປະທານຄະນະປະຊາຊົນນະຄອນເກີນເທີ ທ່ານ ເຈືອງແກ໋ງຕວຽນ ໄດ້ຢືນຢັນວ່າ ປະຫວັດສາດຂອງຊາດຫວຽດນາມ ເປັນມະຫາກາບອັນເປັນນິລັນດອນ ທີ່ຖືກຂຽນຂຶ້ນດ້ວຍຄວາມຮັກຊາດ, ເຈດຈຳນົງອັນແນ່ວແນ່ ແລະ ການເສຍສະລະອັນສູງສົ່ງຂອງຄົນຫຼາຍຮຸ່ນ. ເລືອດເນື້ອ ແລະ ກະດູກຂອງບັນດາວິລະຊົນນັກຮົບຜູ້ເສຍສະລະຊີວິດເພື່ອຊາດ, ທະຫານພິການ, ທະຫານເຈັບປ່ວຍ ແລະ ຜູ້ທີ່ມີຄຸນງາມຄວາມດີຕໍ່ຊາດ ໄດ້ສ້າງຮາກຖານໃຫ້ແກ່ເອກະລາດ, ຄວາມເປັນເອກະພາບ ແລະ ສັນຕິພາບ ເພື່ອໃຫ້ປະເທດຊາດມີການພັດທະນາດັ່ງໃນປັດຈຸບັນ.

ບັນດາຜູ້ແທນເຂົ້າຮ່ວມລາຍການ. (ພາບ: MT)

ຕາມທ່ານ ເຈືອງແກ໋ງຕວຽນ ແລ້ວ, ການລະນຶກຄົບຮອບ 79 ປີ ວັນທະຫານພິການ ແລະ ນັກຮົບຜູ້ເສຍສະລະຊີວິດເພື່ອຊາດ ບໍ່ພຽງແຕ່ເປັນໂອກາດເພື່ອລະນຶກເຖິງຜູ້ທີ່ໄດ້ສະຫຼະຊີວິດເພື່ອເອກະລາດ ແລະ ເສລີພາບຂອງປະເທດຊາດເທົ່ານັ້ນ, ແຕ່ຍັງເປັນການເຕືອນໃຫ້ແຕ່ລະຄົນ ຕະໜັກເຖິງຄວາມຮັບຜິດຊອບໃນການຮັກສາ ແລະ ສືບສານບັນດາຄຸນຄ່າ ທີ່ຄົນຮຸ່ນກ່ອນໄດ້ແລກມາດ້ວຍໄວໜຸ່ມ ແລະ ເລືອດເນື້ອ.

ເປັນຕາສັງເກດວ່າ, ການນຳນະຄອນ ໄດ້ຕີລາຄາສູງຕໍ່ຄວາມໝາຍຂອງ “ຂະບວນການ 500 ວັນ ແລະ 500 ຄືນ ເລັ່ງລັດການຄົ້ນຫາ, ຮວບຮວມ ແລະ ກຳນົດຕົວຕົນຂອງອັດຖິວິລະຊົນນັກຮົບຜູ້ເສຍສະລະຊີວິດເພື່ອຊາດ ທີ່ຍັງຂາດຂໍ້ມູນ” ຊຶ່ງກຳລັງດຳເນີນຢູ່ທົ່ວປະເທດ. ມາຮອດປະຈຸບັນ, ອັດຖິຂອງວິລະຊົນນັກຮົບຜູ້ເສຍສະລະຊີວິດເພື່ອຊາດ ຫຼາຍກວ່າ 1.400 ອັດຖິ ໄດ້ຖືກຄົ້ນຫາ ແລະ ຮວບຮວມ, ນຳມາເຊິ່ງຄວາມຫວັງໃຫ້ແກ່ຫຼາຍຄອບຄົວ ໃນການຕາມຫາຍາດພີ່ນ້ອງ ແລະ ປະກອບສ່ວນປະຕິບັດຄຸນຄ່າແຫ່ງຄວາມສຳນຶກບຸນຄຸນຂອງຊາດໃຫ້ສົມບູນຍິ່ງຂຶ້ນ.

ການນຳນະຄອນເກີນເທີ ມອບຂອງຂວັນໃຫ້ແກ່ບັນດານັກຮົບເກົ່າ. (ພາບ: MT)

ອ້າງອີງຄຳສັ່ງສອນຂອງປະທານ ໂຮ່ຈີມິນ ກ່ຽວກັບຄວາມຮັບຜິດຊອບໃນການດູແລທະຫານພິການ, ທະຫານເຈັບປ່ວຍ, ຄອບຄົວວິລະຊົນນັກຮົບຜູ້ເສຍສະລະຊີວິດເພື່ອຊາດ ແລະ ຜູ້ທີ່ມີຄຸນງາມຄວາມດີຕໍ່ການປະຕິວັດ, ປະທານຄະນະປະຊາຊົນນະຄອນເກີນເທີ ເຫັນວ່າ ນີ້ບໍ່ແມ່ນພຽງແຕ່ຄວາມຮູ້ສຶກ ຫຼື ນ້ຳໃຈເທົ່ານັ້ນ, ແຕ່ຍັງເປັນຄວາມຮັບຜິດຊອບທາງການເມືອງຂອງທັງລະບົບການເມືອງ ແລະ ສັງຄົມທັງໝົດ.

ຕາມທ່ານແລ້ວ, ຄວາມສຳນຶກບຸນຄຸນຄວນສະແດງອອກຜ່ານການກະທຳທີ່ເປັນຮູບປະທຳ ເຊັ່ນ: ປະຕິບັດບັນດາລະບອບ ແລະ ນະໂຍບາຍພິເສດສຳລັບຜູ້ທີ່ມີຄຸນງາມຄວາມດີຕໍ່ຊາດ ຢ່າງຄົບຖ້ວນ ແລະ ທັນການ; ດູແລຊີວິດການເປັນຢູ່ທັງດ້ານວັດຖຸ ແລະ ຈິດໃຈ ຂອງບັນດາຄອບຄົວນະໂຍບາຍໃຫ້ດີຍິ່ງຂຶ້ນ; ອະນຸລັກ ແລະ ບູລະນະບັນດາອະນຸສອນ ແລະ ສະຖານທີ່ລະນຶກເຖິງວິລະຊົນນັກຮົບຜູ້ເສຍສະລະຊີວິດເພື່ອຊາດ; ສຶກສາອົບຮົມປະເພນີການປະຕິວັດໃຫ້ແກ່ຄົນຮຸ່ນໃໝ່; ພ້ອມທັງສືບຕໍ່ຈັດຕັ້ງປະຕິບັດ “ຂະບວນການ 500 ວັນ ແລະ 500 ຄືນ” ໃຫ້ບັນລຸຜົນຢ່າງມີປະສິດທິຜົນ, ປະກອບສ່ວນນຳບັນດາວິລະຊົນນັກຮົບຜູ້ເສຍສະລະຊີວິດເພື່ອຊາດ ກັບຄືນສູ່ຊື່ສຽງ, ພູມລຳເນົາ ແລະ ຄອບຄົວຂອງຕົນ.

ການນຳນະຄອນເກີນເທີ ມອບທຶນການສຶກສາໃຫ້ແກ່ນັກຮຽນ. (ພາບ: MT)

ໃນຫຼາຍປີຜ່ານມາ, ນະຄອນເກີນເທີ ໄດ້ເອົາໃຈໃສ່ປະຕິບັດບັນດານະໂຍບາຍສຳລັບຜູ້ທີ່ມີຄຸນງາມຄວາມດີຕໍ່ຊາດຢ່າງຄົບຖ້ວນ; ລະດົມຫຼາຍແຫຼ່ງກຳລັງເພື່ອດູແລທີ່ຢູ່ອາໄສ, ສຸຂະພາບ ແລະ ຊີວິດການເປັນຢູ່ຂອງບັນດາຄອບຄົວນະໂຍບາຍ, ພ້ອມທັງຈັດຕັ້ງຂະບວນການ “ຕອບແທນບຸນຄຸນ” ຢ່າງກວ້າງຂວາງ ສ້າງຜົນກະທົບແຜ່ຂະຫຍາຍຢ່າງເຂັ້ມແຂງໃນສັງຄົມ.

ນອກຈາກນັ້ນ, ຊາວໜຸ່ມນະຄອນເກີນເທີ ຍັງສືບຕໍ່ສະແດງບົດບາດອັນຕັ້ງໜ້າ ຜ່ານຫຼາຍກິດຈະກຳທີ່ເປັນຮູບປະທຳ ເຊັ່ນ: ຈູດທຽນສົດຸດີ, ດູແລສຸສານວິລະຊົນນັກຮົບຜູ້ເສຍສະລະຊີວິດເພື່ອຊາດ, ດູແລແມ່ວິລະຊົນຫວຽດນາມ, ຢ້ຽມຢາມຄອບຄົວນະໂຍບາຍ ແລະ ການເດີນທາງຫວນຄືນສູ່ແຫຼ່ງກຳເນີດການປະຕິວັດ. ກິດຈະກຳເຫຼົ່ານີ້ ໄດ້ປະກອບສ່ວນສຶກສາອົບຮົມປະເພນີການປະຕິວັດ, ປູກຝັງອຸດົມການການດຳລົງຊີວິດອັນດີງາມ ແລະ ຄວາມຮັບຜິດຊອບໃນຖານະພົນລະເມືອງໃຫ້ແກ່ຄົນຮຸ່ນໃໝ່.

ສົ່ງສານເຖິງບັນດາສະມາຊິກຊາວໜຸ່ມ ແລະ ຊາວໜຸ່ມຂອງນະຄອນ, ປະທານຄະນະປະຊາຊົນນະຄອນເກີນເທີ ຫວັງວ່າ ຄົນຮຸ່ນໃໝ່ຈະສືບຕໍ່ບຳລຸງສ້າງອຸດົມການການປະຕິວັດ, ບໍ່ຢຸດຢັ້ງການຮຽນຮູ້, ຍົກສູງລະດັບຄວາມຮູ້, ກຳແໜ້ນວິທະຍາສາດ-ເຕັກໂນໂລຊີ, ການຫັນເປັນດິຈິຕອນ, ເຮັດວຽກຢ່າງສ້າງສັນ, ປະກອບທຸລະກິດ ແລະ ສ້າງອາຊີບ ເພື່ອປະກອບສ່ວນກໍ່ສ້າງນະຄອນເກີນເທີ ໃຫ້ກາຍເປັນສູນກາງຂັບເຄື່ອນຂອງເຂດທົ່ງພຽງແມ່ນ້ຳຂອງ.

“ທຸກການກະທຳທີ່ດີເພື່ອສັງຄົມ, ທຸກຄວາມຄິດລິເລີ່ມໃນການຮຽນ, ການເຮັດວຽກ ແລະ ການປະຕິບັດໜ້າທີ່ ລ້ວນແຕ່ເປັນການສຳນຶກບຸນຄຸນທີ່ມີຄວາມໝາຍ ແລະ ເປັນຮູບປະທຳທີ່ສຸດ ຕໍ່ບັນດາວິລະຊົນນັກຮົບຜູ້ເສຍສະລະຊີວິດເພື່ອຊາດ,” ທ່ານ ເຈືອງແກ໋ງຕວຽນ ໄດ້ເນັ້ນໜັກ.

ປິດທ້າຍຄຳປາໄສ, ການນຳນະຄອນເກີນເທີ ໄດ້ຢືນຢັນວ່າ ນະຄອນຈະສືບຕໍ່ຈັດສັນແຫຼ່ງກຳລັງເປັນບຸລິມະສິດ ເພື່ອປະຕິບັດບັນດາລະບອບ ແລະ ນະໂຍບາຍສຳລັບຜູ້ທີ່ມີຄຸນງາມຄວາມດີຕໍ່ຊາດ ຢ່າງຄົບຖ້ວນ ແລະ ທັນການ; ພ້ອມທັງລະດົມພະລັງຂອງທັງລະບົບການເມືອງ ແລະ ສັງຄົມ ເພື່ອໃຫ້ຂະບວນການ “ຕອບແທນບຸນຄຸນ” ນັບມື້ນັບແຜ່ຂະຫຍາຍຢ່າງກວ້າງຂວາງ, ເປັນຮູບປະທຳ ແລະ ມີປະສິດທິຜົນ. ພ້ອມກັນນັ້ນ ໄດ້ຮຽກຮ້ອງໃຫ້ທຸກຂັ້ນ, ທຸກຂະແໜງ ແລະ ຊາວໜຸ່ມຂອງນະຄອນ ສືບຕໍ່ສົ່ງເສີມປະເພນີຮັກຊາດ, ຫັນຄວາມສຳນຶກບຸນຄຸນໃຫ້ເປັນແຮງຈູງໃຈໃນການອຸທິດຕົນ, ປະກອບສ່ວນກໍ່ສ້າງນະຄອນເກີນເທີ ໃຫ້ພັດທະນາຢ່າງວ່ອງໄວ, ຍືນຍົງ, ສີວິໄລ, ທັນສະໄໝ ແລະ ອຸດົມດ້ວຍເອກະລັກ.

ການບໍລິໂພກສີຂຽວຊຸກຍູ້ການພັດທະນາແບບຍືນຍົງຢູ່ນະຄອນໂຮ່ຈີມິນ ຍສໝ - ນະຄອນໂຮ່ຈີມິນກຳລັງຜັນຂະຫຍາຍບັນດາມາດຕະການຢ່າງຮອບດ້ານ ເພື່ອສ້າງຕ່ອງໂສ້ການສະໜອງແບບຍືນຍົງ, ຊຸກຍູ້ການຜະລິດສະອາດ ແລະ ເສດຖະກິດໝູນວຽນ. ນີ້ຖືກຖືວ່າເປັນແຮງຂັບເຄື່ອນສຳຄັນ ທີ່ຊ່ວຍນຳຜະລິດຕະພັນສີຂຽວເຂົ້າໃກ້ຜູ້ບໍລິໂພກຫຼາຍຂຶ້ນ, ພ້ອມທັງເພີ່ມຂີດຄວາມສາມາດແຂ່ງຂັນໃຫ້ແກ່ວິສາຫະກິດທ້ອງຖິ່ນ.

ການຕ່າງປະເທດຫວຽດນາມ: ທ່າທີໃໝ່, ຖານະໃໝ່ ຍສໝ - ກອງປະຊຸມໃຫຍ່ພັກຄັ້ງທີ XIV ໄດ້ກຳນົດຢ່າງຈະແຈ້ງເຖິງຄວາມຮຽກຮ້ອງໃນການຍົກລະດັບວຽກງານການຕ່າງປະເທດ, ສ້າງການທູດທີ່ຮອບດ້ານ, ທັນສະໄໝ, ມີຄວາມສຳຄັນ, ດຳເນີນເປັນປົກກະຕິ, ເປັນຝ່າຍລິເລີ່ມສ້າງສັນ, ປະກອບສ່ວນ ແລະ ຄ່ອຍໆກຳນົດຮູບແບບສະພາບແວດລ້ອມສາກົນ ເພື່ອຜົນປະໂຫຍດຂອງຊາດ ແລະ ປະຊາຊາດ.