ເພີ່ມທະວີຄວາມເຂົ້າໃຈ, ການພັດທະນາການພົວພັນຫວຽດນາມ - ຣູມານີ ໃຫ້ເໝາະສົມກັບຄວາມສາມາດບົ່ມຊ້ອນ
 |
| ກອງປະຊຸມແບ່ງປັນຂໍ້ມູນກ່ຽວກັບ ຣູມານີ ຈັດຕັ້ງໂດຍ VUFO ສົມທົບກັບສະມາຄົມມິດຕະພາບ ຫວຽດນາມ - ຣູມານີ ແລະ ສະຖານທູດ ຣູມານີ ປະຈຳ ຫວຽດນາມ ໃນວັນທີ 3 ເມສາ ຢູ່ ຮ່າໂນ້ຍ. (ພາບ: Dinh Hoa) |
ເຂົ້າຮ່ວມກອງປະຊຸມແບ່ງປັນຂໍ້ມູນ, ຝ່າຍຫວຽດນາມ ມີທ່ານ ຫງວຽນຫງອກຮຸ່ງ, ຮອງປະທານສະຫະພັນອົງການມິດຕະພາບຫວຽດນາມ; ທ່ານ ໂຮ່ກວາງເລີ້ຍ, ປະທານສະມາຄົມມິດຕະພາບ ຫວຽດນາມ - ຣູມານີ, ຜູ້ຕາງໜ້າບັນດາກະຊວງ, ຄະນະ, ຂະແໜງການ, , ສະຖາບັນຄົ້ນຄວ້າ, ມະຫາວິທະຍາໄລ, ພະນັກງານຂອງສະຫະພັນບັນດາອົງການມິດຕະພາບ ຫວຽດນາມ, ສະມາຊິກສະມາຄົມມິດຕະພາບ ຫວຽດນາມ - ຣູມານີ.
ຝ່າຍ ຣູມານີ, ມີທ່ານນາງ ເອກອັກຄະລັດຖະທູດ ຣູມານີ ປະຈຳ ຫວຽດນາມ Cristina Romila ແລະ ບັນດາພະນັກງານສະຖານທູດ.
ແບ່ງປັນຂໍ້ມູນ, ເພີ່ມທະວີຄວາມເຂົ້າໃຈເຊິ່ງກັນ ແລະ ກັນ
ກ່າວຄຳປາໄສທີ່ກອງປະຊຸມແບ່ງປັນ, ທ່ານ ຫງວຽນຫງອກຮຸ່ງ, ຮອງປະທານສະຫະພັນບັນດາອົງການມິດຕະພາບຫວຽດນາມ (VUFO) ໃຫ້ຮູ້ວ່າ: ຫວຽດນາມ - ຣູມານີ ມີປະຫວັດສາດມິດຕະພາບ, ການຮ່ວມມືທີ່ມີມາແຕ່ດົນນານ. ຣູມານີແມ່ນໜຶ່ງໃນ 10 ປະເທດທຳອິດສ້າງຕັ້ງການພົວພັນທາງການທູດກັບຫວຽດນາມ (3 ກຸມພາ 1950).
75 ປີທີ່ຜ່ານມາ, ການພົວພັນລະຫວ່າງຫວຽດນາມ - ຣູມານີ ໄດ້ຮັບການຮັກສາໄວ້ເນື້ອເຊື່ອໃຈ, ບຳລຸງສ້າງ ແລະ ພັດທະນາຢ່າງບໍ່ຢຸດຢັ້ງ ໂດຍການນຳຂອງພັກ, ລັດ ແລະ ປະຊາຊົນສອງປະເທດ. ຣູມານີ ໄດ້ໃຫ້ຄວາມຮູ້ສຶກອັນລ້ຳຄ່າ, ການໜູນຊ່ວຍດ້ານວັດຖຸ ແລະ ຈິດໃຈໃຫ້ແກ່ຫວຽດນາມ ໃນການຕໍ່ສູ້ເພື່ອເອກະລາດ, ເສລີພາບ ແລະ ການທ້ອນໂຮມປະເທດຊາດ. ພະນັກງານຫວຽດນາມ ນັບພັນຄົນໄດ້ຮັບການຝຶກອົບຮົມຢູ່ ຣູມານີ, ຫຼາຍຄົນຕໍ່ມາໄດ້ກາຍມາເປັນຜູ້ນໍາສຳຄັນຂອງພັກ, ລັດ, ປະກອບສ່ວນສຳຄັນເຂົ້າໃນພາລະກິດສ້າງສາ ແລະ ປ້ອງກັນຊາດ.
ໃນໄລຍະໂລກລະບາດໂຄວິດ-19, ເຖິງວ່າຈະປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ ຣູມານີ ໄດ້ໜູນຊ່ວຍໃຫ້ປະຊາຊົນຫວຽດນາມ ດ້ວຍວັກຊີນ 300.000 ໂດລາ, ປະກອບສ່ວນຊ່ວຍໃຫ້ຫວຽດນາມ ຜ່ານຜ່າໂລກລະບາດ.
ເສີມຂະຫຍາຍພື້ນຖານອັນດີງາມນັ້ນ, ໃນຊຸມປີມໍ່ໆມານີ້, ການພົວພັນລະຫວ່າງສອງປະເທດສືບຕໍ່ໄດ້ຮັບຄວາມເອົາໃຈໃສ່ຢ່າງເລິກເຊິ່ງ ແລະ ມີບາດກ້າວພັດທະນາຢ່າງຕັ້ງໜ້າ.
 |
| ທ່ານ ຫງວຽນຫງອກຮຸ່ງ, ຮອງປະທານ VUFO ກ່າວຄຳປາໄສທີ່ເຫດການ. (ພາບ: Dinh Hoa) |
ໃນສະພາບການປ່ຽນແປງຂອງສາກົນຢ່າງວ່ອງໄວ, ບໍ່ສາມາດຄາດຄະເນໄດ້ ແລະ ສັບສົນ, ການແລກປ່ຽນຂໍ້ມູນຂ່າວສານ ແລະ ການລົງເລິກຄວາມເຂົ້າໃຈເຊິ່ງກັນ ແລະ ກັນນັບມື້ນັບສຳຄັນ ແລະ ຮີບດ່ວນ. ຜ່ານນັ້ນ, ສອງຝ່າຍສືບຕໍ່ເພີ່ມທະວີຄວາມສາມັກຄີ, ເພີ່ມທະວີຄວາມໄວ້ເນື້ອເຊື່ອໃຈ, ພ້ອມກັນຜ່ານຜ່າສິ່ງທ້າທາຍ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຮ່ວມຂອງພາກພື້ນ ແລະ ໃນໂລກ.
ຜ່ານກອງປະຊຸມແບ່ງປັນຂໍ້ມູນ, VUFO ສືບຕໍ່ປັບປຸງການພົວພັນຮ່ວມມືກັບສະມາຄົມມິດຕະພາບ ຫວຽດນາມ - ຣູມານີ ແລະ ສະຖານທູດ ຣູມານີ ປະຈຳ ຮ່າໂນ້ຍ, ໃນນັ້ນໄດ້ເຜີຍແຜ່ນ້ຳໃຈມິດຕະພາບ ແລະ ຄວາມຮັກແພງທີ່ມີຕໍ່ປະເທດ ແລະ ປະຊາຊົນ ຣູມານີ ຈາກລຸ້ນກ່ອນເຖິງລຸ້ນໜຸ່ມ.
ການພົບປະແລກປ່ຽນປະຊາຊົນ - ເປັນເສົາຄ້ຳສຳຄັນຂອງການພົວພັນຫວຽດນາມ - ຣູມານີ
ທ່ານນາງ ເອກອັກຄະລັດຖະທູດ ຣູມານີ ປະຈຳ ຫວຽດນາມ Cristina Romila ໄດ້ສະເໜີສະພາບລວມຂອງການພັດທະນາ, ການເມືອງ, ເສດຖະກິດ, ບຸລິມະສິດນະໂຍບາຍການຕ່າງປະເທດຂອງ ຣູມານີ ແລະ ບັນດາຈຸດໝາຍຕົ້ນຕໍຂອງການພົວພັນ ຣູມານີ - ຫວຽດນາມ.
 |
| ທ່ານນາງ ເອກອັກຄະລັດຖະທູດ ຣູມານີ ປະຈຳ ຫວຽດນາມ Cristina Romila ກ່າວຄຳປາໄສທີ່ເຫດການ. (ພາບ: Dinh Hoa) |
ທ່ານນາງເອກອັກຄະລັດຖະທູດ ກ່າວຄຳປາໄສວ່າ ການພົວພັນສອງຝ່າຍລະຫວ່າງ ຣູມານີ-ຫວຽດນາມ ໄດ້ຮັບການສ້າງຕັ້ງຂຶ້ນບົນພື້ນຖານການເຄົາລົບນັບຖື, ຄວາມໄວ້ເນື້ອເຊື່ອໃຈ, ມິດຕະພາບໃນສະພາບປະຫວັດສາດຂອງຫວຽດນາມ ໃນສົງຄາມຕໍ່ສູ້ເພື່ອເອກະລາດ ແລະ ທ້ອນໂຮມປະເທດຊາດ. ສາຍພົວພັນມິດຕະພາບທີ່ເປັນມູນເຊື້ອອັນຍາວນານລະຫວ່າງສອງປະເທດໄດ້ຮັບການຢັ້ງຢືນຄືນໃໝ່ຢ່າງບໍ່ຢຸດຢັ້ງ ແລະ ສືບຕໍ່ພັດທະນາໃນຊຸມປີມໍ່ໆມານີ້ ຍ້ອນຄວາມມານະພະຍາຍາມລວມຂອງລັດຖະບານ ແລະ ຄວາມສາມັກຄີຂອງປະຊາຊົນສອງປະເທດ. ຣູມານີ ສະໜັບສະໜູນການຮ່ວມມື 2 ຝ່າຍລະຫວ່າງ ຫວຽດນາມ ແລະ ສະຫະພາບເອີລົບ.
ທ່ານນາງເອກອັກຄະລັດຖະທູດ Cristina Romila ໃຫ້ຮູ້ວ່າ: ການພົບປະແລກປ່ຽນປະຊາຊົນແມ່ນໜຶ່ງໃນບັນດາເສົາຄ້ຳສຳຄັນທີ່ສຸດຂອງການພົວພັນ ຫວຽດນາມ - ຣູມານີ. ເຕັກໂນໂລຢີດິຈິຕອນເປີດກາລະໂອກາດບໍ່ຈໍາກັດສໍາລັບການຮ່ວມມືສອງຝ່າຍໃນດ້ານເສດຖະກິດ, ແຮງງານ, ວັດທະນະທໍາແລະການສຶກສາ. ສະຖານທູດ ຣູມານີ ຕັ້ງໜ້າຊຸກຍູ້ການເຄື່ອນໄຫວພົບປະແລກປ່ຽນລະຫວ່າງ 2 ປະເທດຢ່າງຕັ້ງໜ້າ ແລະ ແທດຈິງ.
ໃນ 3 ປີຜ່ານມາ, ມີຜູ້ແທນ, ນັກຮຽນຮູ້, ນັກສິລະປິນ ແລະ ນັກທຸລະກິດ ຣູມານີ 300 ກວ່າຄົນມາຢ້ຽມຢາມ ຫວຽດນາມ, ເຮັດໃຫ້ສະຖານທູດ ຣູມານີ ແມ່ນໜຶ່ງໃນບັນດາສະຖານທູດເອີລົບ ທີ່ມີການເຄື່ອນໄຫວທີ່ສຸດໃນຂົງເຂດນີ້.
ປີ 2023, ນັກສິລະປິນກວ່າ 100 ຄົນຂອງວົງດົນຕີປະສານສຽງ ຣູມານີ ໄດ້ສະອແດງຢູ່ນະຄອນ ດ່າລາດ, ດຶງດູດຜູ້ຊົມກ່ວາ 30.000 ຄົນ. ບັນດາພື້ນຖານສຶກສາມະຫາວິທະຍາໄລລະຫວ່າງສອງປະເທດ ກໍ່ຊຸກຍູ້ການຮ່ວມມືຢ່າງຕັ້ງໜ້າ. ໃນ 3 ປີຜ່ານມາ, ຄະນະຜູ້ແທນນັກຮຽນຮູ້ໄດ້ໄປ ຮ່າໂນ້ຍ ແລະ ເຂົ້າຮ່ວມການເຈລະຈາກັບບັນດາຄູ່ຮ່ວມມືຫວຽດນາມ.
ມີບໍລິສັດຫວຽດນາມ ຫຼາຍແຫ່ງໄດ້ເປີດສຳນັກງານຜູ້ຕາງໜ້າ ແລະ ພື້ນຖານຜະລິດຢູ່ ຣູມານີ. ຄົນງານຫວຽດນາມ ໄດ້ ແລະ ພວມປະກອບສ່ວນຢ່າງຕັ້ງໜ້າເຂົ້າໃນການພັດທະນາບັນດາໂຄງການກໍ່ສ້າງພື້ນຖານໂຄງລ່າງໃຫຍ່ຢູ່ ຣູມານີ.ສອງປະເທດມີຄວາມສົນໃຈຮ່ວມໃນດ້ານເຕັກໂນໂລຢີຂໍ້ມູນຂ່າວສານ, ເສດຖະກິດດີຈີຕອນ, ພະລັງງານສີຂຽວ. ນີ້ແມ່ນສະຖານທີ່ສຳລັບການຜັນຂະຫຍາຍບັນດາຂົງເຂດຮ່ວມມື.
ເປີດກວ້າງການຮ່ວມມືໃນຂົງເຂດໃໝ່
ຕາມທ່ານ ໂຮ່ກວາງເລີ້ຍ ແລ້ວ, ປະທານສະມາຄົມມິດຕະພາບຫວຽດນາມ - ຣູມານີ, ເຖິງວ່າການຮ່ວມມືລະຫວ່າງສອງປະເທດບັນລຸໄດ້ຫຼາຍໝາກຜົນກໍ່ຕາມ, ແຕ່ໝາກຜົນການພົວພັນດ້ານເສດຖະກິດ - ການຄ້າຍັງບໍ່ທັນສົມກັບຄວາມສາມາດບົ່ມຊ້ອນ.
“ເມື່ອ ຫວຽດນາມ ກຳນົດການຮ່ວມມືດ້ານເສດຖະກິດ - ການຄ້າ - ການລົງທຶນເປັນເສົາຄ້ຳໃນການພົວພັນສອງຝ່າຍ, 2 ປະເທດຕ້ອງມີບັນດາມາດຕະການຢ່າງຕັ້ງໜ້າ ແລະ ຂະຫຍັນຂັນເຄື່ອນກວ່າອີກ ເພື່ອຊຸກຍູ້ບັນດາກົນໄກຮ່ວມມືທີ່ມີຢູ່ແລ້ວ, ຊຸກຍູ້ວິສາຫະກິດຂອງສອງປະເທດສືບຕໍ່ປະຕິບັດສັນຍາການຄ້າເສລີ ຫວຽດນາມ - ເອີຣົບ (EVFTA) ຢ່າງຄົບຖ້ວນ ແລະ ມີປະສິດທິຜົນ”.
ຄຽງຄູ່ກັບການສືບຕໍ່ເສີມຂະຫຍາຍການເຄື່ອນໄຫວຂອງຄະນະກຳມາທິການລະຫວ່າງລັດຖະບານແລ້ວ, ຍັງຕ້ອງໄດ້ຈັດຕັ້ງກອງປະຊຸມສຳມະນາ, ພົບປະສັງສັນກັບປະຊາຄົມວິສາຫະກິດຂອງສອງປະເທດຕື່ມອີກ ເພື່ອຮຽນຮູ້ກ່ຽວກັບສະພາບແວດລ້ອມແຫ່ງການລົງທຶນ ແລະ ຄວາມຕ້ອງການຂອງຕະຫຼາດ ເພື່ອໃຫ້ສອງຝ່າຍສາມາດສົ່ງອອກສິນຄ້າ, ຜະລິດຕະພັນຢ່າງມີຈຸດແຂງ.
 |
| ທ່ານ ໂຮ່ກວາງເລີ້ຍ, ປະທານສະມາຄົມມິດຕະພາບຫວຽດນາມ - ຣູມານີ ກ່າວຄຳປາໄສທີ່ເຫດການ. (ພາບ: Dinh Hoa) |
“ຕ້ອງມານະພະຍາຍາມກວ່າອີກເພື່ອໃຫ້ ຫວຽດນາມ ກາຍເປັນ “ປະຕູ” ເພື່ອໃຫ້ສິນຄ້າ ຣູມານີ ເຂົ້າເຖິງທ້ອງຕະຫຼາດ ຫວຽດນາມ ແລະ ອາຊຽນ, ຍັງ ຣູມານີ ກາຍເປັນ “ປະຕູ” ຂອງ ຫວຽດນາມ ໄປ ເອີລົບ ໃນສະພາບທີ່ ຣູມານີ ເຂົ້າຮ່ວມເຂດ Schengen. ນອກຈາກຊຸກຍູ້ການຮ່ວມມືໃນຂົງເຂດດັ້ງເດີມ, 2 ປະເທດສາມາດເປີດກວ້າງການຮ່ວມມືໃນຂົງເຂດໃໝ່ຄື: ເຕັກໂນໂລຢີຂໍ້ມູນຂ່າວສານ, ນະວັດຕະກຳ, ການຫັນເປັນດີຈີຕອນ, ເສດຖະກິດຫັນເປັນສີຂຽວ, ເສດຖະກິດ ໝູນວຽນ…”, ທ່ານ ໂຮ່ກວາງເລີ້ຍ ກ່າວວ່າ.
ໃນຂົງເຂດການສຶກສາ, ມະຫາວິທະຍາໄລທັງສອງຝ່າຍຕ້ອງເພີ່ມທະວີການພົວພັນໂດຍກົງ, ສ້າງບັນດາໂຄງການຮ່ວມມືສະເພາະ, ໃນນັ້ນມີການແລກປ່ຽນຄູສອນ, ຄົ້ນຄວ້າວິທະຍາສາດ ແລະ ໄດ້ຮັບການຝຶກຝົນຫຼໍ່ຫຼອມນັກຮຽນໃນຂະແໜງການທີ່ແຕ່ລະຝ່າຍມີທ່າແຮງ.
ກ່ຽວກັບການພົບປະແລກປ່ຽນວັດທະນະທຳ, ສິລະປະ ແລະ ການທ່ອງທ່ຽວ, ຄະນະສິລະປະຂອງ 2 ປະເທດຕ້ອງສືບຕໍ່ຈັດຕັ້ງບັນດາລາຍການທ່ອງທ່ຽວໃໝ່, ໃນນັ້ນນັກສິລະປິນ ຣູມານີ ສາມາດເຂົ້າຮ່ວມງານບຸນຢູ່ຫຼາຍພາກພື້ນຂອງ ຫວຽດນາມ, ພິເສດແມ່ນງານບຸນ ເຫ້ວ. ບັນດາອົງການທ່ອງທ່ຽວຕ້ອງມີການເຊື່ອມໂຍງຢ່າງໃກ້ຊິດເພື່ອຊຸກຍູ້ການທ່ອງທ່ຽວທີ່ດຶງດູດໃຈ.
ກ່ຽວກັບການຮ່ວມມືດ້ານແຮງງານ, ຄຽງຄູ່ກັບການສືບຕໍ່ຮ່ວມມືຮັບໃຊ້ຄົນງານໃໝ່, ຄວນມີມາດຕະການຄຸ້ມຄອງໃຫ້ຄົນງານຫວຽດນາມ ທີ່ພວມເຮັດວຽກຢູ່ ຣູມານີ ໃຫ້ດີກ່ວາອີກ ເພື່ອໃຫ້ຄົນງານ ຫວຽດນາມ ປະຕິບັດກົດໝາຍ Romania - ຫວຽດນາມ, ປະກອບສ່ວນຢ່າງຕັ້ງໜ້າເຂົ້າໃນພື້ນຖານເສດຖະກິດ ຣູມານີ, ເສີມຂະຫຍາຍພາບພົດຂອງປະເທດ ແລະ ປະຊາຊົນ ຫວຽດນາມ ເພື່ອໃຫ້ຊາວຫວຽດນາມ ຢູ່ ຣູມານີ ແຕ່ລະຄົນແມ່ນ “ເອກອັກຄະລັດຖະທູດ” ມິດຕະພາບ.
ຕາມທ່ານ ໂຮ່ກວາງເລີ້ຍ ແລ້ວ, ໃນຊຸມປີມໍ່ໆມານີ້, ສະມາຄົມມິດຕະພາບ ຫວຽດນາມ - ຣູມານີ ໄດ້ຕັ້ງໜ້າເປັນຂົວຕໍ່ຊຸກຍູ້ເສດຖະກິດ, ການຄ້າ, ການສຶກສາ, ວັດທະນະທຳ, ທ່ອງທ່ຽວ, ໜູນຊ່ວຍການພົບປະແລກປ່ຽນແຮງງານ, ປະກອບສ່ວນຊຸກຍູ້ການພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງສອງປະເທດ. ສະມາຄົມຮ່ວມມືຢ່າງຕັ້ງໜ້າກັບບັນດາຄູ່ຮ່ວມມືຢູ່ ຣູມານີ, ໂດຍສະເພາະແມ່ນສະມາຄົມມິດຕະພາບ ຣູມານີ - ຫວຽດນາມ ໂດຍທ່ານ Mihai Condescu ເປັນປະທານ. ຢ່າງໃດກໍ່ຕາມ, ສະມາຊິກສ່ວນຫຼາຍແມ່ນຜູ້ສູງອາຍຸ. ສະມາຄົມຫວັງວ່າຈະໄດ້ຮັບສະມາຊິກຊາວໜຸ່ມຕື່ມອີກ, ປະກອບສ່ວນເຂົ້າໃນການພັດທະນາສາຍພົວພັນມິດຕະພາບຫວຽດນາມ - ຣູມານີ ໃຫ້ນັບມື້ນັບໝັ້ນຄົງ.
ທີ່ເຫດການ, ບັນດາຜູ້ແທນໄດ້ແບ່ງປັນຄວາມຮູ້ສຶກ ແລະ ຄວາມຊົງຈຳກັບປະເທດ ແລະ ປະຊາຊົນ ຣູມານີ. ບັນດາຜູ້ແທນໄດ້ຕັ້ງຄຳຖາມກ່ຽວກັບສະພາບການ, ນະໂຍບາຍຂອງ ຣູມານີ, ຄວາມສາມາດບົ່ມຊ້ອນພັດທະນາການພົວພັນ ຫວຽດນາມ - ຣູມານີ ກັບທ່ານນາງເອກອັກຄະລັດຖະທູດ Cristina Romila.
ກ່າວຄຳປາໄສສະຫຼຸບ, ທ່ານ ຫງວຽນຫງອກຮຸ່ງ, ຮອງປະທານ VUFO ຢືນຢັນວ່າ VUFO ພ້ອມແລ້ວທີ່ຈະເປັນເຈົ້າພາບ, ສະໜັບສະໜູນ ແລະ ເຂົ້າຮ່ວມບັນດາການເຄື່ອນໄຫວສືບຕໍ່ຊຸກຍູ້ການພົວພັນ ຫວຽດນາມ - ຣູມານີ ກ່ຽວກັບສາຍພົວພັນປະຊາຊົນກັບສະມາຄົມມິດຕະພາບ ຫວຽດນາມ - ຣູມານີ, ສະຖານທູດ ຣູມານີ ປະຈຳ ຫວຽດນາມ ແລະ ບັນດາຄູ່ຮ່ວມມື ຣູມານີ, ເພີ່ມທະວີຄວາມເຂົ້າອົກເຂົ້າໃຈ ແລະ ການເຊື່ອມຕໍ່ລະຫວ່າງປະຊາຊົນ 2 ປະເທດ.
 | ຕ້ອງເພີ່ມທະວີຄວາມເຂົ້າໃຈເຊິ່ງກັນ ແລະ ກັນລະຫວ່າງລຸ້ນໜຸ່ມຫວຽດນາມ ແລະ ມົງໂກລີ ຍສໝ - ນີ້ແມ່ນເນື້ອໃນຂອງການພົບປະແລກປ່ຽນລະຫວ່າງທ່ານ ຟານແອງເຊີນ, ປະທານສະຫະພັນບັນດາອົງການມິດຕະພາບ ຫວຽດນາມ (VUFO) ແລະ ທ່ານ Jigjee Sereejav, ເອກອັກຄະລັດຖະທູດວິສາມັນຜູ້ມີອຳນາດເຕັມ ມົງໂກນ ປະຈຳ ຫວຽດນາມ, ໃນວັນທີ 24 ຕຸລາ ຢູ່ ຮ່າໂນ້ຍ. |
 | ຍສໝ - ວັນທີ 4 ມິຖຸນາ, ໃນຂອບເຂດການຜັນຂະຫຍາຍບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງກະຊວງແຮງງານ ແລະ ສະຫວັດດິການສັງຄົມ ລາວ ແລະ ອົງການປະກັນສັງຄົມ ຫວຽດນາມ, ຄະນະປະຕິບັດງານຂອງອົງການປະກັນສັງຄົມ ຫວຽດນາມ, ໂດຍທ່ານຮອງຜູ້ອຳນວຍການໃຫຍ່ ຈຸ່ແມ້ງຊິງ ເປັນຫົວໜ້າໄດ້ໄປຢ້ຽມຢາມ ແລະ ເຮັດວຽກກັບອົງການປະກັນສັງຄົມແຫ່ງຊາດ ລາວ (LSSO). |
ມີງດຶກ