ບັນດາຫຼັງຄາເຮືອນທີ່ກັບຄືນມາ ພາຍຫຼັງໄພທຳມະຊາດ

	ສີດຜ່ອນການຄຸ້ມຄອງກຳປັ່ນຫາປາ, ດົ່ງທັບ (Đồng Tháp) ສະກັດກັ້ນການລະເມີດ IUU ແຕ່ຕົ້ນທາງ
	ຫວຽດນາມ - ອິນເດຍ: ບັນດາບາດກ້າວບຸກທະລຸໃນບັນດາເສົາຄ້ຳແຫ່ງການຮ່ວມມື

ໃນຊ່ວງເວລານີ້, ຄອບຄົວຂອງທ່ານ ເຈິ່ນວັນຄ້ານ (Trần Văn Khánh) (ອາຍຸ 75 ປີ, ຢູ່ບ້ານ ຝູຫຶວ (Phú Hữu), ຕາແສງ ຮວາທິ້ງ (Hòa Thịnh)) ໄດ້ເຮັດໃຫ້ຊີວິດການເປັນຢູ່ມີຄວາມສະຖຽນລະພາບ ຢູ່ໃນເຮືອນຫຼັງໃໝ່ທີ່ໄດ້ຮັບການປຸກສ້າງຄືນໃໝ່ ພາຍຫຼັງເຫດການນ້ຳຖ້ວມໃຫຍ່ໃນທ້າຍປີຜ່ານມາ. ອຸປະກອນເຄື່ອງໃຊ້ໃນຊີວິດປະຈຳວັນທີ່ຈຳເປັນຫຼາຍຢ່າງ ເຊັ່ນ: ເຕົາກາສ, ຕູ້ເຢັນ, ໂຕະຕັ່ງ… ກໍໄດ້ຮັບການຊື້ຫາສ້ອມແຊມມາໃໝ່.

ພຽງແຕ່ບໍ່ກີ່ເດືອນກ່ອນໜ້ານີ້, ສະຖານທີ່ແຫ່ງນີ້ຍັງເຕັມໄປດ້ວຍຂີ້ຕົມ ແລະ ເສດດິນຈີ່ຫີນ ພາຍຫຼັງເຫດການນ້ຳຖ້ວມໃຫຍ່ໃນທ້າຍເດືອນພະຈິກ 2025. ທ່ານ ຄ້ານ ເລົ່າວ່າ, ໃນຕອນບ່າຍມື້ນັ້ນ ນ້ຳຈາກແມ່ນ້ຳໄດ້ຂຶ້ນສູງຢ່າງໄວວາ, ໄຫຼຊຸເຫຍື່ອເຂົ້າມາໃນເຮືອນ ທ່າມກາງສຽງລົມພັດແຮງ ແລະ ສຽງຄື້ນທີ່ມາກະທົບໃສ່ຝາເຮືອນຢ່າງຕໍ່ເນື່ອງ. "ຍັງບໍ່ທັນຕັ້ງຕົວໄດ້ ເຮືອນກໍສັ່ນສະເທືອນຢ່າງແຮງແລ້ວພັງທະລາຍລົງ. ພຽງແຕ່ບໍ່ກີ່ນາທີເທົ່ານັ້ນ… ທຸກຢ່າງກໍສູນເສຍໄປໝົດ", ທ່ານເລົ່າຄືນ. ເຄື່ອງຂອງທີ່ສະສົມມາຫຼາຍປີ ແລະ ເງິນຄຳທີ່ທ້ອນຫອມໄວ້ ລ້ວນແຕ່ຖືກນ້ຳຖ້ວມພັດໄປໝົດ. "ແມ່ນແຕ່ແທ່ນບູຊາບັນພະບຸລຸດ ກໍຍັງເອົາອອກມາບໍ່ທັນ", ທ່ານກ່າວ.

ທ່ານ ເຈິ່ນວັນຄ້ານ (Trần Văn Khánh) (ຜູ້ທີ 4 ຈາກເບື້ອງຂວາ) ໃນພິທີເປີດນຳໃຊ້ ແລະ ມອບ-ຮັບເຮືອນ ໃນ "ບັ້ນຮົບກວາງຈຸງ (Quang Trung)” ໃຫ້ແກ່ບັນດາຄອບຄົວທີ່ມີເຮືອນຖືກພັງທະລາຍ ຍ້ອນຝົນຕົກ ແລະ ນ້ຳຖ້ວມ, ວັນທີ 04/01/2026.

ສິ່ງທີ່ທ່ານ ຄ້ານ (Khánh) ກັງວົນທີ່ສຸດພາຍຫຼັງນ້ຳຖ້ວມ ແມ່ນບໍ່ຮູ້ຈະໄປເອົາເງິນມາຈາກໃສເພື່ອປຸກເຮືອຄືນໃໝ່ ໃນທ່າມກາງທີ່ສຸຂະພາບກໍອ່ອນເພຍ ແລະ ຊີວິດການເປັນຢູ່ກໍມີຄວາມຫຍຸ້ງຍາກຫຼາຍຢູ່ແລ້ວ. ມີບາງຊ່ວງເວລາ, ຄອບຄົວຂອງທ່ານໄດ້ຄິດເຖິງຂັ້ນວ່າຈະໄປຂໍອາໄສຢູ່ເຮືອນຄົນອື່ນໃຫ້ຜ່ານພົ້ນຊ່ວງບຸນເຕັດໄປກ່ອນ.

ພາຍຫຼັງ "ບັ້ນຮົບກວາງຈຸງ (Quang Trung)” ໄດ້ຮັບການປຸກລະດົມ, ກຳລັງທະຫານໄດ້ລົງມືກໍ່ສ້າງໂດຍກົງ, ອຳນາດການປົກຄອງທ້ອງຖິ່ນຊ່ວຍເຫຼືອໃນການກວດກາ, ຈັດສັນພື້ນທີ່ກໍ່ສ້າງ, ແລະ ແຫຼ່ງທຶນຕ່າງໆໃນສັງຄົມກໍໄດ້ຮັບການລະດົມເພື່ອຊື້ວັດສະດຸ ແລະ ປຸກເຮືອນຄືນໃໝ່ໃຫ້ແກ່ປະຊາຊົນ.

ເດືອນປາຍຕໍ່ມາ, ເຮືອນຫຼັງໃໝ່ຂອງຄອບຄົວທ່ານ ຄ້ານ ກໍໄດ້ສຳເລັດລົງ. ໃນໂອກາດບຸນເຕັດ ປີມະເມຍ 2026, ຄອບຄົວຂອງທ່ານໄດ້ຍ້າຍເຂົ້າຢູ່ເຮືອນໃໝ່ທັນເວລາ, ໄດ້ຫໍ່ເຂົ້າຕົ້ມ, ຈັດແຈງແທ່ນບູຊາບັນພະບຸລຸດ ແລະ ສະເຫຼີມສະຫຼອງປີໃໝ່ຢ່າງມີຄວາມສຸກ.

ບັນດາເຮືອນຫຼັງໃໝ່ທີ່ໄດ້ຮັບການກໍ່ສ້າງຢ່າງແໜ້ນໜາ ຢູ່ຕາແສງ ຮວາທິ້ງ (Hòa Thịnh), ແຂວງ ດັກລັກ (Đắk Lắk).

ຕາມທ່ານ ເລຈີຮ່ວາຍ (Lê Chí Hoại), ປະທານຄະນະກຳມະການປະຊາຊົນຕາແສງ ຮວາທິ້ງ (Hòa Thịnh) ໃຫ້ຮູ້ວ່າ, ເຫດການນ້ຳຖ້ວມໃນທ້າຍປີ 2025 ໄດ້ເຮັດໃຫ້ເຮືອນ 28 ຫຼັງໃນພື້ນທີ່ຖືກພັງທະລາຍທັງໝົດ ຫຼື ຖືກນ້ຳພັດໄປ. ເຮືອນທີ່ກໍ່ສ້າງໃໝ່ມີງົບປະມານປະມານ 170 ລ້ານດົ່ງຕໍ່ຫຼັງ, ໃນນັ້ນ ລັດຖະບານຊ່ວຍເຫຼືອ 60 ລ້ານດົ່ງ, ສ່ວນທີ່ເຫຼືອແມ່ນລະດົມມາຈາກຫຼາຍແຫຼ່ງທຶນໃນສັງຄົມ.

ເພື່ອຮັບປະກັນຄວາມປອດໄພໃນໄລຍະຍາວໃຫ້ແກ່ປະຊາຊົນໃນເຂດທີ່ໄດ້ຮັບຜົນກະທົບຈາກໄພທຳມະຊາດເປັນປະຈຳ, ພະແນກກໍ່ສ້າງແຂວງ ດັກລັກ (Đắk Lắk) ໄດ້ອອກແບບເຮືອນກັນນ້ຳຖ້ວມ 3 ແບບ ທີ່ມີເນື້ອທີ່ປະມານ 44 ຕາແມັດ. ເຮືອນທຸກຫຼັງລ້ວນແຕ່ມີພື້ນເຮືອນກັນນ້ຳຖ້ວມທີ່ຍົກສູງກວ່າລະດັບນ້ຳແຕ່ 0,2 ຫາ 0,5 ແມັດ. ຫຼາຍຫຼັງຍັງໄດ້ມີການຈັດສັນຊັ້ນລອຍເພື່ອຫຼົບໄພນ້ຳຖ້ວມ ເພື່ອໃຫ້ປະຊາຊົນຍົກຍ້າຍຊັບສິນໃນເວລາຈຳເປັນ.

ເມື່ອມີທີ່ຢູູ່ອາໄສໃໝ່, ຫຼາຍຄອບຄົວໄດ້ນຳໃຊ້ເງິນຊ່ວຍເຫຼືອເພື່ອຊື້ອຸປະກອນເຄື່ອງໃຊ້ໃນຊີວິດປະຈຳວັນ, ສ້ອມແປງສະຖານທີ່ສັກກາລະບູຊາ ແລະ ເຮັດໃຫ້ຊີວິດການເປັນຢູ່ມີຄວາມສະຖຽນລະພາບພາຍຫຼັງໄພທຳມະຊາດ.

ເພື່ອໃຫ້ເຮືອນເຫຼົ່ານັ້ນສາມາດກໍ່ສ້າງໃຫ້ສຳເລັດໃນໄລຍະເວລາພຽງແຕ່ເດືອນປາຍ, ການກວດກາຄວາມເສຍຫາຍ, ການລະດົມການຊ່ວຍເຫຼືອ ແລະ ການແບ່ງປັນຊັບພະຍາກອນແມ່ນໄດ້ຜັນຂະຫຍາຍເກືອບຈະພ້ອມໆກັນຕັ້ງແຕ່ຂັ້ນຮາກຖານ. ໃນກອງປະຊຸມສະຫຼຸບ "ບັ້ນຮົບກວາງຈຸງ (Quang Trung)" ເມື່ອເດືອນມັງກອນ 2026, ການນຳຄະນະກຳມະການສູນກາງແນວໂຮມປະເທດຊາດ ຫວຽດນາມ ໃຫ້ຮູ້ວ່າ, ທັນທີທີ່ບັ້ນຮົບໄດ້ຮັບການປຸກລະດົມ, ແນວໂຮມປະເທດຊາດ ຫວຽດນາມ ໄດ້ຊີ້ນຳ ແລະ ປະສານສົມທົບກັບບັນດາອົງການຈັດຕັ້ງການເມືອງ-ສັງຄົມ ແລະ ອົງການຈັດຕັ້ງມະຫາຊົນ ເພື່ອສ້າງຕັ້ງບັນດາໜ່ວຍສະມັກໃຈຊ່ວຍເຫຼືອປະຊາຊົນໃນການຍົກຍ້າຍ, ສ້ອມແປງ ແລະ ກໍ່ສ້າງທີ່ຢູ່ອາໄສ, ພ້ອມທັງຊ່ວຍເຫຼືອບັນດາກຳລັງທີ່ເຂົ້າຮ່ວມໃນບັ້ນຮົບ.

ຄຽງຂ້າງນັ້ນ, ຄະນະປະຈຳຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ຊີ້ນຳແນວໂຮມບັນດາແຂວງ, ໂດຍສະເພາະແມ່ນບັນດາແຂວງທີ່ໄດ້ຮັບຜົນກະທົບໜັກໜ່ວງຈາກພາຍຸ ແລະ ນ້ຳຖ້ວມ, ໃຫ້ຮີບຮ້ອນປະສານສົມທົບກັບອຳນາດການປົກຄອງ ແລະ ຂະແໜງການທີ່ກ່ຽວຂ້ອງໃນທ້ອງຖິ່ນ ເພື່ອກວດກາ ແລະ ເກັບກຳສະຖິຕິທີ່ຊັດເຈນຂອງແຕ່ລະຄອບຄົວທີ່ມີເຮືອນຖືກເປ່ເພ ຫຼື ພັງທະລາຍ; ປະຕິບັດໜ້າທີ່ຕິດຕາມກວດກາໃນວິວັດທະນາການກໍ່ສ້າງ ແລະ ສ້ອມແປງທີ່ຢູ່ອາໄສໃຫ້ແກ່ປະຊາຊົນໃຫ້ເປັນຢ່າງດີ; ພ້ອມທັງເປັນເຈົ້າການໃນການປຸກລະດົມ, ຮັບ ແລະ ແບ່ງປັນແຫຼ່ງທຶນຊ່ວຍເຫຼືອ ໂດຍຮັບປະກັນຄວາມໂປ່ງໃສ ແລະ ຖືກຕ້ອງຕາມເປົ້າໝາຍ.

ຕັ້ງແຕ່ວັນທີ 21 ພະຈິກ 2025 ຫາວັນທີ 10 ມັງກອນ 2026, ຜ່ານຄະນະປຸກລະດົມການຊ່ວຍເຫຼືອສູນກາງ, ແນວໂຮມປະເທດຊາດ ໄດ້ຮັບເງິນບໍລິຈາກກວ່າ 700 ຕື້ດົ່ງ ເພື່ອຊ່ວຍເຫຼືອພໍ່ແມ່ປະຊາຊົນພາກກາງ ແລະ ເຂດພູດອຍພາກກາງ (Tây Nguyên) ໃນການຟື້ນຟູຜົນກະທົບຈາກພາຍຸ ແລະ ນ້ຳຖ້ວມ. ແຫຼ່ງທຶນນີ້ໄດ້ຖືກແບ່ງປັນໄປຍັງບັນດາທ້ອງຖິ່ນເພື່ອຊ່ວຍເຫຼືອໃນການປຸກເຮືອໃໝ່, ສ້ອມແປງທີ່ຢູ່ອາໄສ ແລະ ເຮັດໃຫ້ຊີວິດການເປັນຢູ່ຂອງປະຊາຊົນໃນເຂດທີ່ໄດ້ຮັບຄວາມເສຍຫາຍມີຄວາມສະຖຽນລະພາບ.

ຕາມແນວໂຮມປະເທດຊາດ ຫວຽດນາມ ແລ້ວ, ການກວດກາ ແລະ ສົມທຽບລາຍຊື່ການຊ່ວຍເຫຼືອແມ່ນໄດ້ດຳເນີນໄປພ້ອມໆກັນ ເພື່ອຫຼຸດຜ່ອນສະພາບການຊ່ວຍເຫຼືອທີ່ຊ້ຳຊ້ອນ ຫຼື ຕົກເຮ່ຍບັນດາຄອບຄົວທີ່ພົບຄວາມຫຍຸ້ງຍາກ.

ທ່ານນາງ ຮ່າທິຫງາ (Hà Thị Nga), ກຳມະການສູນກາງພັກ, ຮອງປະທານ - ເລຂາທິການໃຫຍ່ ຄະນະກຳມະການສູນກາງແນວໂຮມປະເທດຊາດ ຫວຽດນາມ ຢ້ຽມຢາມ ແລະ ມອບຂອງຂວັນບຸນເຕັດ ຢູ່ຕາແສງ ເຈົາເກວ້ (Châu Quế) (ແຂວງ ລາວກາຍ - Lào Cai) ເນື່ອງໃນໂອກາດບຸນເຕັດ ປີມະເມຍ 2026.

ວຽກງານການເບິ່ງແຍງສະຫວັດດີການສັງຄົມຂອງແນວໂຮມປະເທດຊາດ ຫວຽດນາມ ຍັງໄດ້ຮັບການຜັນຂະຫຍາຍຢ່າງເປັນປະຈຳ ຜ່ານຫຼາຍການເຄື່ອນໄຫວທີ່ມຸ່ງເນັ້ນໃສ່ຄົນທຸກຍາກ, ຜູ້ດ້ອຍໂອກາດ ແລະ ຜູ້ທີ່ມີສະພາບການເປັນຢູ່ທີ່ຫຍຸ້ງຍາກ.

ເນື່ອງໃນໂອກາດບຸນເຕັດ ປີມະເມຍ 2026, ຄະນະປະຈຳຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ຜັນຂະຫຍາຍໂຄງການຢ້ຽມຢາມ ແລະ ມອບຂອງຂວັນໃຫ້ແກ່ຄົນທຸກຍາກ, ຜູ້ທີ່ມີສະພາບການເປັນຢູ່ທີ່ຫຍຸ້ງຍາກ ຢູ່ຫຼາຍທ້ອງຖິ່ນ ດ້ວຍຈຳນວນຂອງຂວັນປະມານ 30,000 ຊຸດ.

ຕາມທ່ານ ກາວຊວນທ້າວ (Cao Xuân Thạo), ກຳມະການຄະນະປະທານ, ຫົວໜ້າກົມວຽກງານສັງຄົມ ຂອງອົງການຄະນະກຳມະການສູນກາງແນວໂຮມປະເທດຊາດ ຫວຽດນາມ ໃຫ້ຮູ້ວ່າ: ໃນສະພາບການທີ່ໄພທຳມະຊາດນັບມື້ນັບສັບສົນ, ວຽກງານສະຫວັດດີການສັງຄົມໄດ້ວາງຄວາມຕ້ອງການທີ່ວ່າ ຕ້ອງມີລັກສະນະຕົວຈິງ, ມີປະສິດທິຜົນ ແລະ ສາມາດ “ວັດແທກ” ໄດ້. ແນວໂຮມພວມຄົ້ນຄວ້າສ້າງ ແລະ ເປີດນຳໃຊ້ແຜນທີ່ດິຈິຕອນ ກ່ຽວກັບບັນຫາຊີວິດການເປັນຢູ່ຂອງປະຊາຊົນ ເພື່ອອັບເດດຄວາມຕ້ອງການດ້ານການຊ່ວຍເຫຼືອ ແລະ ຄວາມສ່ຽງໃນແຕ່ລະທ້ອງຖິ່ນ, ເຊິ່ງຜ່ານນັ້ນຈະຊ່ວຍໃຫ້ການຮຽກຮ້ອງ ແລະ ການປະສານງານຊ່ວຍເຫຼືອມີຄວາມວ່ອງໄວຂຶ້ນ ເມື່ອເກີດສະຖານະການສຸກເສີນ.

ຫວຽດນາມ ຢືນຢັນເຖິງຈິດໃຈເປັນເຈົ້າການ, ຄວາມຮັບຜິດຊອບ ແລະ ການສ້າງສັນ ຍສໝ - ຕາມລາຍງານຂອງນັກຂ່າວພິເສດສຳນັກຂ່າວສານ ຫວຽດນາມ, ໃນຄືນວັນທີ 8 ພຶດສະພາ, ທ່ານນາຍົກລັດຖະມົນຕີ ເລມິງຮຶງ (Lê Minh Hưng) ແລະ ຄະນະຜູ້ແທນຂັ້ນສູງ ຫວຽດນາມ ໄດ້ເດີນທາງເຖິງ ຮ່າໂນ້ຍ, ສິ້ນສຸດການໄປເຂົ້າຮ່ວມກອງປະຊຸມສຸດຍອດອາຊຽນ (ASEAN) ຄັ້ງທີ 48 ຢູ່ທີ່ Cebu, ຟີລິບປິນ ໃນວັນທີ ...

ຫວຽດນາມ ສະເໜີບັນດາບຸລິມະສິດໃນການຮັບມືກັບວິກິດການ ຢູ່ກອງປະຊຸມສຸດຍອດອາຊຽນ ຄັ້ງທີ 48 ຍສໝ - ບັນດາຂໍ້ສະເໜີຂອງ ຫວຽດນາມ ກ່ຽວກັບການເພີ່ມທະວີຄວາມສາມາດໃນການເພິ່ງຕົນເອງ, ຄວາມໝັ້ນຄົງດ້ານພະລັງງານ ແລະ ການຍົກສູງຂີດຄວາມສາມາດໃນການປັບຕົວຂອງພາກພື້ນ ໄດ້ຮັບການຕ້ອນຮັບ ແລະ ຕີລາຄາສູງຈາກບັນດາຜູ້ນຳອາຊຽນ (ASEAN) ທັງທາງດ້ານເນື້ອໃນ ແລະ ຄວາມເໝາະສົມກັບສະພາບການ.