ຫ້ອງຮຽນພາສາຫວຽດນາມ ຢູ່ Östergötland: ສືບທອດ​ສີສັນຫວຽດນາມ ຢູ່ດິນແດນ ຊູແອດ

	ຫ້ອງຮຽນເພື່ອປົກປັກຮັກສາພາສາບ້ານເກີດເມືອງນອນຢູ່ ຊູແອດ
	ດານັງ: ຫ້ອງຮຽນພາສາຫວຽດນາມ ສຳລັບບັນດານັກສຶກສາລາວ ແລະ ໄທ ຢູ່ວັດຕາມບາວ

ການເດີນທາງເຜີຍແຜ່ໄຟແຫ່ງຄວາມຮັກພາສາຫວຽດນາມ

ໃນຕອນບ່າຍລະດູໃບໄມ້ຫຼົ່ນຢູ່ນະຄອນ Linköping, ເຂດ Östergötland, ລົມໄດ້ພັດຄ່ອຍໆຜ່ານປ່ອງຢ້ຽມຫ້ອງຮຽນຢູ່ໂຮງຮຽນມັດທະຍົມຕອນຕົ້ນ Elsa Brandstrom. ທ່າມກາງພື້ນທີ່ອັນສະຫງົບງຽບ, ສຽງ​ຂອງ​ອາຈານ Sally ດັງ​ອອກ​ມາ​ຢ່າງ​ອົບ​ອຸ່ນ, ອ່ອນ​ໂຍນ​ແຕ່​ເຕັມໄປດ້ວຍຄວາມ​ຕັດ​ສິນ​ໃຈ. ອ້ອມ​ຮອບ​ອາຈານແມ່ນ​ໄວ​ໜຸ່ມທີ່ມີເຊື້ອຊາດຫວຽດນາມ, ສຸມ​ໃສ່ຟັງ​ຄຳສອນແຕ່ລະຄຳ, ພະຍາຍາມອອກສຽງພາສາຫວຽດນາມແຕ່ລະສັບໃຫ້ຖືກຕ້ອງ.

ຮູບພາບຂອງເດັກນ້ອຍໄດ້ແນະນຳຢ່າງເຊື່ອໝັ້ນຕົນເອງກ່ຽວກັບບ້ານເກີດເມືອງນອນຂອງພໍ່ແມ່ດ້ວຍຄວາມພາກພູມໃຈເປັນຫຼັກຖານສະແດງເຖິງຜົນຂອງຄວາມພະຍາຍາມຢ່າງບໍ່ຢຸດຢັ້ງຂອງນາງຊາລີຕະຫຼອດ 8 ປີຜ່ານມາ. ສຳລັບອາຈານແລ້ວ, ຫ້ອງ​ຮຽນ​ນີ້​ບໍ່​ພຽງ​ແຕ່​ສອນ​ພາສາ​ເທົ່າ​ນັ້ນ, ຫາກ​ຍັງ​ແມ່ນ​ບ່ອນ​ບຳລຸງ​ສ້າງ​ຄວາມ​ຮັກ​ແພງ ​ແລະ ຄວາມ​ພາກພູມ​ໃຈ​ກ່ຽວກັບ​ກົກເຄົ້າເຫງົ້າກໍ, ຊ່ວຍ​ໃຫ້​ເດັກ​ນ້ອຍ​ໄດ້​ດູດ​ຊຶມ​ຄຸນຄ່າ​ຂອງພາສາ​ຫວຽດນາມ ​ຢ່າງ​ເລິກ​ເຊິ່ງ​ກວ່າ​ຜ່ານ​ບັນດາ​ບົດຮຽນ​ທີ່​ເຕັ້ມໄປດ້ວຍ​ວັດທະນະທຳ​ຂອງ​ຊາດ.

ກ່ອນ​ນີ້ 8 ປີ, ​ໃນ​ຂະ​ນະ​ທີ່​ເປັນຜູ້ຈັດການຮ້ານ​ອາ​ຫານ​ຫວຽດ​ນາມ ຢູ່ ຊູແອດ, ອາຈານ Sally ໄດ້​ຮັບ​ຮູ້ເຖິງ​ຄວາມ​ສຳ​ຄັນ​ຂອງ​ການ​ປົກ​ປັກ​ຮັກ​ສາ​ພາ​ສາ ແລະ ວັດ​ທະ​ນະ​ທຳ​ໃຫ້​ແກ່​ລຸ້ນ​ໜຸ່ມທີ່ມີເຊື້ອຊາດຫວຽດນາມ. ເຖິງ​ແມ່ນ​ວ່າ​ເຮັດທຸລະ​ກິດ ​ບໍ່​ຄ່ອຍ​ມີ​ເວລາ, ​ແຕ່​ອາຈານ​ຍັງ​ຕັ້ງ​ໃຈ​ຈະ​ເປີດ​ຫ້ອງ​ຮຽນ​ພາສາ​ຫວຽດນາມ ​ໃຫ້​ແກ່​ເດັກນ້ອຍ​ຫວຽດນາມ ຢູ່ Östergötland. “ພາສາຫວຽດ​ນາມ ແມ່ນເຊືອກເຊື່ອມຕໍ່ອັນດຽວ​ລະ​ຫວ່າງ​ເດັກ​ນ້ອຍກັບກົກເຄົ້າເຫວົ້າກໍ. ຖ້າໃຫ້ປ່ອຍມັນສູນຫາຍໄປ, ພວກເຮົາຈະສູນເສຍຫຼາຍກວ່າພາສາ” ອາຈານແບ່ງປັນ.

ຢູ່ ຊູແອດ, ເດັກນ້ອຍມີສິດທີ່ຈະຮຽນພາສາແມ່ເປັນເວລາ 30 ຫາ 60 ນາທີທຸກໆມື້ຫຼັງຈາກຊົ່ວໂມງຮຽນຫຼັກ. ສິ່ງນີ້ສ້າງເງື່ອນໄຂເພື່ອໃຫ້ເດັກນ້ອຍສາມາດຮັກສາທັກສະທາງດ້ານພາສາ ແລະ ຕິດພັນທາງດ້ານວັດທະນະທໍາ. ດ້ວຍ​ການ​ໜູນ​ຊ່ວຍ​ຈາກ​ທ່ານ ເລ​ເຊີນ​ຮ່າ, ປະ​ທານ​ສະ​ຫະ​ພັນ​ສະ​ມາ​ຄົມຊາວ ຫວຽດ​ນາມ ປະຈຳ ຊູແອດ, ອາຈານ Sally ໄດ້​ເປີດ​ຫ້ອງ​ຮຽນ​ຢູ່​ໂຮງ​ຮຽນມັດທະຍົມຕອນຕົ້ນ Elsa Brandstrom, ບ່ອນທີ່ສົ່ງເສີມການ​ຮັກ​ສາ​ພາ​ສາ​ແມ່.

ຮູບແຕ້ມຄອບຄົວຂອງ ນ້ອຍ Sam, ນັກຮຽນໃນຫ້ອງຮຽນພາສາຫວຽດນາມ ຂອງອາຈານ Sally, ພ້ອມກັບຄຳແນະນຳ, ໂດຍທ່ານນາງ ຫງວຽນທູ໋ຍ ແບ່ງປັນ

ການ​ສອນ​ພາສາ​ຫວຽດນາມ​ ໃຫ້​ແກ່​ເດັກນ້ອຍ​ທີ່​ເກີດ ​ແລະ ​ເຕີບ​ໃຫຍ່​ຢູ່​ ຊູແອດ ບໍ່​ແມ່ນ​ເລື່ອງ​ງ່າຍ. ພາສາຫວຽດ, ມີ 6 ສຽງວັນນະຍຸດ ແລະ ບັນດາພະຍາງທີ່ສັບສົນ ເປັນສິ່ງທ້າທາຍສຳລັບນັກຮຽນທີ່ຄຸ້ນເຄີຍກັບພາສາທ້ອງຖິ່ນ. ເດັກນ້ອຍຫຼາຍຄົນສາມາດເວົ້າພຽງແຕ່ປະໂຫຍກທີ່ງ່າຍດາຍ, ຍັງບໍ່ຄ່ອງແຄ້ວ. ​ແຕ່​ສຳລັບ​ອາຈານ Sally, ບໍ່​ມີ​ຄວາມ​ກ້າວໜ້າໃດແມ່ນສິ່ງທີ່ເລັກນ້ອຍ: “ມີຄວາມຮູ້ສຶກຕື້ນຕັນໃຈຫຼາຍເມື່ອ​ໄດ້​ຍິນ​ພວກ​ເດັກນ້ອຍ​ຄ່ອຍໆ​ເວົ້າ​ພາສາ​ຫວຽດນາມ​ແຕ່ລະ​ສຽງ​ໄດ້​ຊັດ​ເຈນ​ຂຶ້ນ, ​ເຖິງວ່ານັ້ນ​ແມ່ນ​ສຽງ​ທີ່​ຍາກ​ຄື ​ວັນນະຍຸດໄມ້ໜັ້ງ ​ຫຼື​ ວັນນະຍຸດໄມ້ຫງາ”.

ບໍ່​ພຽງ​ແຕ່​ສອນ​ພາ​ສາ​ຫວຽດນາມ​ເທົ່າ​ນັ້ນ, ອາຈານຍັງ​ສົ່ງເສີມໃຫ້​ເດັກ​ນ້ອຍ​ມີ​ຄວາມ​ພາກ​ພູມ​ໃຈ​ກ່ຽວກັບຕົ້ນ​ກຳ​ເນີດ​ຂອງ​ຕົນ. “​ເຖິງ​ແມ່ນ​ວ່າພວກລູກ​ເວົ້າ​ພາສາ​ຊູ​ແອັດ, ນຸ່ງຖືຄື​ຄົນ​ຊູ​ແອັດ, ​ແຕ່​ໜ້າ, ຊື່ ​ແລະ ອາຫານ​ທີ່​ມັກ​ຂອງພວກລູກລ້ວນ​ແຕ່ມີລັກສະນະຫວຽດນາມ. ຈົ່ງພູມໃຈ ແລະ ໃຊ້ພາສາຫວຽດນາມເລື້ອຍໆ, ເພາະວ່າມັນເປັນຈິດວິນຍານຂອງພວກເຮົາ”. ນັກຮຽນຂອງອາຈານມັກຈະເວົ້າວ່າ “ສະບາຍດີ” ເປັນພາສາຫວຽດນາມ ແທນທີ່ “Hej” ເມື່ອພົບກັບອາຈານ, ແລະສິ່ງນັ້ນຢ່າງດຽວກໍ່ເປັນແຫຼ່ງກຳລັງໃຈອັນໃຫຍ່ຫຼວງໃຫ້ອາຈານສືບຕໍ່ການເດີນທາງຕໍ່ໄປຂອງຕົນ.

ເພື່ອເຮັດໃຫ້ເວລາຮຽນມີຊີວິດຊີວາຂຶ້ນ, ອາຈານ Sally ໄດ້ປະສົມປະສານລະຫວ່າງເຕັກໂນໂລຢີ ແລະ ເອກະສານສິດສອນທີ່ທັນສະໄໝ. ສຳລັບ​ເດັກນ້ອຍ, ອາຈານໄດ້​ນຳ​ໃຊ້​ບັນດາ​ບົດ​ເພງ​ເດັກນ້ອຍ ຫວຽດນາມ, ຮູບເງົາເອກະສານກ່ຽວກັບບຸນປີໃໝ່ ແລະ ບຸນໄຫວ້ພະຈັນ. ສຳລັບ​ເດັກນ້ອຍ​ຜູ້​ມີ​ອາຍຸໃຫຍ່ກ່ວາ, ອາຈານໄດ້​ແນະນຳ​ປະຫວັດສາດ​ ຫວຽດນາມ, ກອນຜະຫຍາ, ສຸພາສິດ ແລະ ທັງສິລະ​ປະ​ຂັບແຈ່ວ, ກ່າຍເລືອງ ຫຼື​ ​ເຄື່ອງ​ດົນຕີ​ພື້ນ​ເມືອງ. ອາຈານໄດ້ຊອກຫາວິທີການສິດສອນທີ່ເໝາະສົມກັບອາຍຸ ແລະ ລະດັບຂອງເດັກນ້ອຍ, ພ້ອມກັນນັ້ນ ກໍ່ຕິດແທດກັບຫຼັກສູດຂອງເດັກນ້ອຍຢູ່ໂຮງຮຽນ ເພື່ອທັງຮຽນເອົາຄວາມຮູ້ ແລະ ຝຶກພາສາຫວຽດນາມໄປນຳ.

ທ່ານ​ນາງ ຫງວຽນທູ໋ຍ, ພໍ່​ແມ່​ຂອງ​ນ້ອຍ Sam, ບໍ່​ສາ​ມາດ​ປົກ​ປິດ​ຄວາມ​ສຸກ​ຂອງ​ຕົນ​ໄດ້​ເມື່ອ​ແບ່ງ​ປັນ​ຮູບ​ຄອບ​ຄົວ​ທີ່​ລູກ​ຊາຍ​ອາ​ຍຸ 8 ປີ​ແຕ້ມ​ດ້ວຍ​ມື, ພ້ອມ​ກັບ​ຄຳ​ແນະ​ນຳ​ສັ້ນ ແຕ່​ໜ້າ​ຮັກ​ເປັນ​ພາ​ສາ​ຫວຽດ​ນາມ: “ຂ້າ​ພະ​ເຈົ້າ​ຊື່ Sam. ອາຍຸແປດປີ, Susu ແມ່ນໂຕແມວຂອງຂາ້ພະເຈົ້າ. ພໍ່ຂອງຂ້າພະເຈົ້າຊື່ ແທງ. ແມ່ຂອງຂ້າພະເຈົ້າຊື່ ທູ໋ຍ. ເອື້ອຍຂອງຂ້າພະເຈົ້າຊື່ ແອງ. ອ້າຍຂອງ​ຂ້າພະເຈົ້າຊື່​ ຫວຽດ.”

ທ່ານ​ນາງ ທູ໋ຍ ໃຫ້​ຮູ້​ວ່າ ນີ້​ແມ່ນ​ໝາກຜົນ​ອັນ​ໃຫຍ່​ຫຼວງ​ພາຍຫຼັງ​ທີ່​ໄດ້​ຮຽນ​ພາສາ​ຫວຽດນາມ ຢູ່​ໃນ​ຫ້ອງ​ຮຽນພາສາຫວຽດນາມ ຂອງອາຈານ Sally. ໃນເມື່ອກ່ອນ, Sam ສ່ວນຫຼາຍພຽງແຕ່ສື່ສານເປັນພາສາຊູແອັດ, ແຕ່ປະຈຸບັນ Sam ສາມາດຂຽນແລະເວົ້າປະໂຫຍກພາສາຫວຽດນາມ ພື້ນຖານໄດ້, ເຮັດໃຫ້ຄອບຄົວທັງຫມົດຂອງນາງມີຄວາມພູມໃຈຫຼາຍ.

ກໍ່ສ້າງຂົວເຊື່ອມຕໍ່ທີ່ແໜ້ນແຟ້ນກັບບ້ານເກີດເມືອງນອນ

ບໍ່​ພຽງ​ແຕ່​ໄດ້​ຮັບ​ການ​ຕີ​ລາຄາ​ສູງ​ຈາກ​ປະຊາ​ຄົມ​ຊາວ ​ຫວຽດນາມ ຢູ່​ ຊູ​ແອັດ ​ເທົ່າ​ນັ້ນ, ຫ້ອງ​ຮຽນ​ຂອງອາຈານ Sally ຍັງໄດ້​ຮັບ​ການ​ໜູນ​ຊ່ວຍ​ຢ່າງເຂັ້ມແຂງ​ຈາກ​ຝ່າຍຄະນະອຳນວຍການໂຮງຮຽນ​ມັດທະຍົມຕອນຕົ້ນ Elsa Brandstrom.

ອາຈານ ລືວ Sally ​ແບ່ງ​ປັນ​ກ່ຽວ​ກັບ​ຫ້ອງ​ຮຽນ.

ທ່ານນາງ Sabina Carlsson, ຮອງອະທິການບໍດີໂຮງຮຽນ Elsa Brandstrom ໃຫ້ຮູ້ວ່າ “ພວກ​ຂ້າພະເຈົ້າໄດ້ມີຄວາມຮັບຮູ້​ວ່າ ການ​ຮຽນ​ພາ​ສາ​ ຫຼື “ພາ​ສາ​ແມ່” ຂອງ​ນັກ​ຮຽນຕ່າງປະເທດຢູ່ ຊູແອດ ເວົ້າລວມ ຫຼື ລູກຫຼານຂອງຊາວຫວຽດນາມ ເວົ້າສະເພາະ ແມ່ນ​ສຳ​ຄັນ​ຫຼາຍ. ທີ່​ໂຮງ​ຮຽນ Elsa Brandstrom ພວມມີຫ້ອງຮຽນສອນພາສາປະຈຳຖິ່ນປະມານ 15 ພາສາໃຫ້ແກ່ນັກຮຽນ. ສິ່ງນີ້ ຈະຊ່ວຍໃຫ້ນັກຮຽນເຊື່ອມໂຍງເຂົ້າໃນສະພາບແວດລ້ອມຂອງໂຮງຮຽນ ແລະ ສາມາດເຂົ້າເຖິງວິຊາຮຽນໃນແຕ່ລະລະດັບຢູ່ ຊູແອດ ໄດ້ຢ່າງວ່ອງໄວ. ໂຮງຮຽນ ຍາມໃດກໍ່ສ້າງເງື່ອນໄຂເພື່ອໃຫ້ນັກຮຽນມີເວລາຮຽນພາສາຫວຽດນາມ ຢູ່ໂຮງຮຽນ. ນັ້ນ​ແມ່ນ​ເຫດ​ຜົນ​ທີ່​ອາຈານ ລືວ ເປີດ​ຫ້ອງ​ຮຽນ ແລະ ໜູນ​ຊ່ວຍ​ການ​ສອນ​ພາ​ສາ​ຫວຽດ​ ຢູ່​ໂຮງ​ຮຽນ Elsa Brandstrom”.

ເດືອນກັນຍາ 2024, ທ່ານນາງ ວູທິຮວິ່ງມາຍ, ຫົວໜ້າຄະນະກຳມະການກ່ຽວກັບຊາວຫວຽດນາມ ອາໄສຢູ່ຕ່າງປະເທດ ນະຄອນໂຮ່ຈີມິນ ໄດ້ໄປຢ້ຽມຢາມຫ້ອງຮຽນພາສາຫວຽດນາມ ຢູ່ Linköping. ທ່ານນາງ ບໍ່ອາດກັ້ນຄວາມຕື້ນຕັນໃຈຕໍ່ກັບຄວາມກະຕືລືລົ້ນຂອງອາຈານ Sally ແລະ ຄວາມພະຍາຍາມທີ່ບໍ່ຢຸດຢັ້ງຂອງນັກຮຽນໄວ້ໄດ້.

ທີ່​ການ​ພົບ​ປະ, ນັກຮຽນຜູ້​ໜຶ່ງ​ໄດ້​ສະ​ແດງ​ຄວາມ​ປາດ​ຖະໜາ​ຢາກ​ມີ​ປຶ້ມ​ພາສາ​ຫວຽດນາມ ​ແລະ ຝຶກ​ຂຽນຕົວໜັງສືໃສ່ປຶ້ມຕາກະໂລ້ ຄື​ກັບ​ບັນດາ​ນັກຮຽນຢູ່​ຫວຽດນາມ. ນັ້ນແມ່ນຄວາມປາດຖະຫນາທີ່ງ່າຍດາຍແຕ່ເລິກເຊິ່ງ, ສະແດງອອກເຖິງຄວາມປາຖະຫນາທີ່ຈະເຊື່ອມຕໍ່ກັບບ້ານເກີດເມືອງນອນ, ເຖິງແມ່ນວ່າເດັກນ້ວຍພວມອາໄສຢູ່ໄກເຄິ່ງໜ່ວຍໂລກກໍ່ຕາມ.

ທ່ານນາງ ມາຍ ກ່າວວ່າ “ພາສາຫວຽດນາມ​ ຍັງ​ມີ ແມ່ນ​ຊົນ​ເຜົ່າກໍ່ຍັງມີ, ເຖິງວ່າ​ຈະ​ໄປ​ໃສ​ກໍ່​ຍັງ​ເປັນ​ຄົນ​ຫວຽດນາມ, ສະນັ້ນ ​ຕ້ອງ​ຮັກສາ​ພາສາ​ຫວຽດນາມ, ຮຽນ​ຮູ້ ​ແລະ ​ເຂົ້າ​ໃຈເຊື້ອຊາດຫວຽດນາມ, ຫຼັງຈາກນັ້ນຈະສາມາດຮຽນ​ພາສາຂອງປະເທດປະຈຳຖິ່ນ (ຊູແອດ) ຫຼື ພາສາອື່ນໆ”.

ເລື່ອງລາວຂອງອາຈານ Sally ບໍ່ຢຸດຢູ່ໃນຫ້ອງຮຽນພາສາ. ນັ້ນເປັນ​ການ​ເດີນ​ທາງຢ່າງຍຶດໝັ້ນດ້ວຍຄວາມ​ເຊື່ອໝັ້ນເຂົ້າໃນຄຸນຄ່າ​ຂອງ​ພາ​ສາ ​ແລະ ​ວັດ​ທະ​ນະ​ທໍາ​. ຫ້ອງ​ຮຽນ​ຂອງ​ອາຈານ​ໄດ້​ກາຍ​ເປັນ​ສັນ​ຍາ​ລັກ​ແຫ່ງ​ຄວາມ​ມາ​ນະ​ພະ​ຍາ​ຍາມ​ເພື່ອ​ປົກ​ປັກ​ຮັກ​ສາ​ວັດ​ທະ​ນະ​ທຳ​ຫວຽດ​ນາມ ​ຢູ່​ໃນປະ​ຊາ​ຄົມ​ຊາວ​ຫວຽດ​ນາມ ຢູ່ ຊູ​ແອັດ. ຄວາມ​ອົດ​ທົນ​ຂອງອາຈານ​ບໍ່​ພຽງ​ແຕ່​ຊ່ວຍ​ໃຫ້​ຄົນ​ລຸ້ນ​ໜຸ່ມ​ຮຽນ​ພາ​ສາ​ເທົ່າ​ນັ້ນ, ຫາກ​ຍັງ​ສ້າງ​ຂົວຕໍ່ກັບ​ບ້ານ​ເກີດ​ເມືອງ​ນອນຢ່າງແໜ້ນແຟ້ນອີກດ້ວຍ.

ເຜີຍແຜ່ຄວາມຮັກພາສາຫວຽດນາມ ໃນດິນແດນລ້ານຊ້າງ ຍສໝ - ຕອບ​ສະໜອງ​ວັນເຊີດຊູພາສາ ຫວຽດນາມ ໃນປະຊາຄົມຊາວ​ຫວຽດນາມ ຢູ່​ຕ່າງປະ​ເທດ, ສະຖານທູດ ຫວຽດນາມ ປະຈຳ ລາວ ໄດ້ສົມທົບ​ກັບ​ສະມາຄົມ​ຊາວ​ຫວຽດນາມ ອາ​ໄສ​ຢູ່​ນະຄອນຫຼວງ​ວຽງ​ຈັນ ​ແລະ ຄະນະ​ປະສານ​ງານສະມາຄົມພຸດທະສາສະໜາ ຫວຽດນາມ ປະຈຳ ລາວ ຈັດ​ຕັ້ງ​ພິທີເຊີດຊູພາສາ ຫວຽດນາມ ຢູ່ ລາວ ໃນປີ 2024.

ຕອບບຸນຄຸນຕໍ່ຜູ້ປົກປັກຮັກສາພາສາ ຫວຽດນາມ ຢູ່ ສ.ເຊັກໂກ Mới đây, Lễ Tôn vinh tiếng Việt trong cộng đồng người Việt Nam tại Séc đã được tổ chức. ຍສໝ - ຫວ່າງ​ມໍ່ໆ​ມາ​ນີ້, ພິທີ​ເຊີດ​ຊູ​ພາສາ​ ຫວຽດນາມ​ ໃນ​ປະຊາ​ຄົມ​ ...