ຢາລາຍ: ສຽງຄ້ອງມ່ວນຊື່ນທ້າຍສັບປະດາ ເພື່ອເຊີດຊູ ວັນຄອບຄົວ ຫວຽດນາມ

ຕາມຂໍ້ມູນຈາກ ພະແນກວັດທະນະທຳ, ກິລາ ແລະ ການທ່ອງທ່ຽວ ແຂວງ ຢາລາຍ (Gia Lai) ໃຫ້ຮູ້ວ່າ: ໃນຕອນຄໍ່າຂອງວັນທີ 27 ມິຖຸນາ, ຢູ່ທີ່ສະນາມຫຼວງ ດ່າຍດົ່ານເກັດ (Quảng trường Đại Đoàn Kết, ເມືອງ ເປຼກູ), ລາຍການ “ສຽງຄ້ອງທ້າຍສັບປະດາ - ຊົມ ແລະ ສຳຜັດປະສົບການ” ຈະຖືກຈັດຂຶ້ນ ພາຍໃຕ້ຈິດໃຈສະເຫຼີມສະຫຼອງ ວັນຄ້າຍວັນສ້າງຕັ້ງ ວັນຄອບຄົວ ຫວຽດນາມ ຄົບຮອບ 25 ປີ (28/6/2001 - 28/6/2026). ລາຍການດັ່ງກ່າວ ມີການເຂົ້າຮ່ວມຂອງສິລະປິນພື້ນເມືອງເຜົ່າ ຢາຣາຍ ຈຳນວນ 40 ທ່ານ ທີ່ມາຈາກທີມສຽງຄ້ອງ ບ້ານ ເປຼກູ ໂຣ໊ະ (Pleiku Roh, ແຂວງ ຢາລາຍ) ຂໍ້ພິເສດແມ່ນ, ໃນທີມດັ່ງກ່າວ ມີຫຼາຍຄອບຄົວທີ່ໄດ້ເຂົ້າຮ່ວມກິດຈະກຳວັດທະນະທຳນີ້ຮ່ວມກັນ, ໂດຍມີຫຼາຍຮຸ່ນຄົນ ເຊັ່ນ: ພໍ່-ລູກ, ອ້າຍ-ນ້ອງ ທີ່ໄດ້ຮ່ວມກັນສະແດງສຽງຄ້ອງ, ຂັບຮ້ອງເພງພື້ນເມືອງ ແລະ ຖ່າຍທອດທັກສະຄວາມຮູ້ ໃຫ້ແກ່ຮຸ່ນສືບທອດຕໍ່ໄປ. ນີ້ແມ່ນຂໍ້ພິສູດອັນມີຊີວິດຊີວາ ໃຫ້ແກ່ພະລັງຊີວິດອັນຍືນຍົງ ຂອງມໍລະດົກວັດທະນະທຳສຽງຄ້ອງ ຢູ່ໃນຊີວິດການເປັນຢູ່ຂອງປະຊາຄົມ; ທັງເປັນການຢືນຢັນເຖິງບົດບາດອັນສຳຄັນຂອງຄອບຄົວ ໃນການປົກປັກຮັກສາ ແລະ ສືບສານຄຸນຄ່າຮີດຄອງປະເພນີ ຂອງພີ່ນ້ອງຮ່ວມຊາດເຜົ່າ ຢາຣາຍ.