ຫວຽດນາມ - ຕວກກີ ຈະເພີ່ມວົງເງິນການຄ້າສອງຝ່າຍຂຶ້ນເປັນ 4 ຕື້ USD ໂດຍໄວ
| ໃນ 11 ເດືອນ, ຍອດວົງເງິນການຄ້າຂອງຫວຽດນາມ ບັນລຸ 24,44 ຕື້ USD | |
| ຫວຽດນາມ ແລະ ສີລັງກາ ມຸ່ງໄປເຖິງເຕີບໂຕວົງເງິນການຄ້າສອງຝ່າຍທີ່ບັນລຸ 500 ລ້ານ USD |
ວັນທີ 29 ພະຈິກນີ້, ໃນຂອບເຂດການຢ້ຽມຢາມ ຕວກກີ ຢ່າງເປັນທາງການ, ພາຍຫຼັງພິທີຕ້ອນຮັບຢ່າງເປັນທາງການທີ່ໄດ້ຈັດຂຶ້ນຢູ່ທຳນຽບປະທານາທິບໍດີ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ມີການພົບປະເຈລະຈາກັບ ທ່ານຮອງປະທານາທິບໍດີ ຕງກກີ.
ໂດຍສະແດງຄວາມຊົມເຊີຍການຢ້ຽມຢາມ ຕວກກີ ຢ່າງເປັນທາງການຄັ້ງທຳອິດ, ທ່ານຮອງປະທານາທິບໍດີ ຕວກກີ Cevdet Yilmaz ຕີລາຄາວ່າ ນີ້ແມ່ນເຫດການສຳຄັນ, ມີຄວາມໝາຍທາງປະຫວັດສາດໃນການຊຸກຍູ້ການພົວພັນມິດຕະພາບທີ່ເປັນມູນເຊື້ອ, ການຮ່ວມມືຫຼາຍດ້ານລະຫວ່າງ ຫວຽດນາມ - ຕວກກີ, ພິເສດແມ່ນໃນໂອກາດທີ່ສອງປະເທດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (1978 – 2023).
 |
ຫວຽດນາມ - ຕວກກີ ຄົ້ນຄວ້າຍົກລະດັບການພົວພັນລະຫວ່າງສອງປະເທດຂຶ້ນສູ່ລະດັບສູງໃໝ່ທີ່ແທດຈິງ, ມີປະສິດທິຜົນ, ເລິກເຊິ່ງກວ່າ. |
ທ່ານຮອງປະທານາທິບໍດີ ຢືນຢັນວ່າ ຕວກກີ ຖື ຫວຽດນາມ ແມ່ນໜຶ່ງໃນບັນດາຄູ່ຮ່ວມມືບຸລິມະສິດອັນດັບຕົ້ນໆຂອງ ອາຊຽນ, ພິເສດແມ່ນໃນບັນດາຂົງເຂດເສດຖະກິດ, ການຄ້າ, ການລົງທຶນ, ການປ້ອງກັນຊາດ - ປ້ອງກັນຄວາມສະຫງົບ, ການທ່ອງທ່ຽວ...
ທ່ານນາຍົກລັດຖະມົນຕີ ຟ້າມມິງຈິງ ໄດ້ສະແດງຄວາມຊົມຊື່ນຕໍ່ບັນດາຜົນງານດ້ານເສດຖະກິດ - ສັງຄົມ ເຊິ່ງປະເທດອ້າຍນ້ອງ ຕວກກີ ບັນລຸໄດ້ໃນເວລາມໍ່ໆນີ້, ພິເສດແມ່ນການເຂົ້າເປັນສະມາຊິກ G20 ແລະ ມີບົດບາດສຳຄັນ, ມີອິດທິພົນໃນພາກພື້ນ.
ທ່ານນາຍົກລັດຖະມົນຕີ ເຊື່ອໝັ້ນວ່າ ຕວກກີ ຈະສືບຕໍ່ພັດທະນາຢ່າງແຮງກວ່າໃນໄລຍະຈະມາເຖິງ, ຜ່ານນັ້ນກໍ່ເປີດກາລະໂອກາດໃໝ່ໃຫ້ແກ່ການຮ່ວມມືລະຫວ່າງ 2 ປະເທດ.
ທີ່ການພົບປະ, ການນຳສອງປະເທດຢືນຢັນຄວາມປາຖະໜາ ແລະ ຄວາມຕັດສິນໃຈຊຸກຍູ້ການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງ ຫວຽດນາມ - ຕວກກີ ເພື່ອຜົນປະໂຫຍດລວມຂອງປະຊາຊົນສອງປະເທດ, ເພື່ອສັນຕິພາບ, ໝັ້ນຄົງ ແລະ ການພັດທະນາຢູ່ພາກພື້ນ ແລະ ໃນໂລກ, ມຸ່ງໄປເຖິງການຍົກລະດັບການພົວພັນໃນເວລາຈະມາເຖີງໂດຍໄວ.
ການນຳສອງປະເທດເຫັນເປັນເອກະພາບກັນຕ້ອງສືບຕໍ່ຮັດແໜ້ນ ແລະ ຊຸກຍູ້ສາຍພົວພັນທາງການເມືອງ ແລະ ການທູດທີ່ດີງາມ...
ທ່ານຮອງປະທານາທິບໍດີ ຕວກກີ ໃຫ້ຮູ້ວ່າ ການຮ່ວມມືລະຫວ່າງ 2 ປະເທດພວມສືບຕໍ່ພັດທະນາຢ່າງຕັ້ງໜ້າ ແລະ ຕາມທິດທີ່ສົມດຸນກ່ວາ.
ການນຳສອງປະເທດເຫັນດີເປັນເອກະພາບກັນ ຕ້ອງເພີ່ມທະວີການເຄື່ອນໄຫວຮ່ວມມືດ້ານເສດຖະກິດທີ່ແທດຈິງ ແລະ ມີປະສິດທິຜົນ ເພື່ອເພີ່ມວົງເງິນການຄ້າສອງຝ່າຍໃຫ້ຂຶ້ນເຖິງ 4 ຕື້ USD ໂດຍໄວ ໂດຍຜ່ານການເປີດກວ້າງທ້ອງຕະຫຼາດໃຫ້ຜະລິດຕະພັນກະເສດ ແລະ ສິນຄ້າທີ່ມີທ່າແຮງຂອງກັນແລະກັນ, ຊຸກຍູ້ການເຈລະຈາ FTA ທີ່ກອງປະຊຸມຄະນະກຳມະການປະສົມຄັ້ງທີ 8, ເພີ່ມທະວີຄວາມຖີ່ຂອງການບິນຂົນສົ່ງສິນຄ້າ ...
ທ່ານນາຍົກລັດຖະມົນຕີ ຟ້າມມິງຈິງ ຕີລາຄາສູງເລື່ອງ ຕວກກີ ແມ່ນນັກລົງທຶນໂດຍກົງໃຫຍ່ທີ່ສຸດຈາກພາກພື້ນ ຕາເວັນອອກກາງ ເຂົ້າຍັງ ຫວຽດນາມ ດ້ວຍຍອດຈຳນວນທຶນຈົດທະບຽນເກືອບ 1 ຕື້ USD.
ທ່ານຜູ້ນຳໜ້າລັດຖະບານ ຫວຽດນາມ ຢືນຢັນຈະສ້າງທຸກເງື່ອນໄຂເພື່ອໃຫ້ບັນດາກຸ່ມບໍລິສັດ, ວິສາຫະກິດ ຕວກກີ ລົງທຶນເຂົ້າ ຫວຽດນາມ ໃນບັນດາຂົງເຂດບຸລິມະສິດຄື ການຜະລິດອຸດສາຫະກຳ, ກະສິກຳເຕັກໂນໂລຊີສູງ, ການບໍລິໂພກ, ເສດຖະກິດສີຂຽວ, ນະວັດຕະກຳ.
ນອກນີ້, ສອງຝ່າຍເຫັນເປັນເອກະພາບກັນເພີ່ມທະວີການຮ່ວມມືໃນຂົງເຂດອຸດສາຫະກຳປ້ອງກັນຊາດ, ຊຸກຍູ້ການແລກປ່ຽນຂໍ້ມູນຂ່າວສານ, ຕໍ່ສູ້ ຕ້ານອາດຊະຍາກຳ, ຊຸກຍູ້ການຮ່ວມມືດ້ານການຝຶກອົບຮົມ, , ບຳລຸງສ້າງເຕັກນິກ, ເຕັກໂນໂລຊີ, ຊອກຫາກູ້ຊີບ, ກູ້ໄພ ແລະ ການຊ່ວຍເຫຼືອມະນຸດສະທຳ...
ຫວຽດນາມ ແລະ ຕວກກີ ພ້ອມແລ້ວທີ່ຈະແບ່ງປັນຄວາມຮູ້, ເພີ່ມທະວີການແລກປ່ຽນ ແລະ ຊຸກຍູ້ການຮ່ວມມືໃນບັນດາຂົງເຂດທີ່ມີທ່າແຮງຄື: ກະສິກຳ, ພະລັງງານທົດແທນ, ວິທະຍາສາດເຕັກໂນໂລຢີ, ນະວັດຕະກຳ, ການຫັນເປັນດິຈິຕອນ.
ການນຳສອງທ່ານໄດ້ເຫັນເປັນເອກະພາບກັນວ່າ ຕ້ອງສົມທົບກັນຄົ້ນຄວ້າ ແລະ ຜັນຂະຫຍາຍບັນດາກົນໄກຮ່ວມມືບຸກທະລຸ, ດຳເນີນກອງປະຊຸມຄັ້ງທີ 8 ຂອງຄະນະກຳມະການລະຫວ່າງລັດຖະບານ ຫວຽດນາມ - ຕວກກີ ໃນໄຕມາດທີ 1 ປີ 2024 ໂດຍໄວ ເພື່ອກວດກາ ແລະ ລົບລ້າງບັນດາສິ່ງກີດຂວາງໃນບັນດາໂຄງການຮ່ວມມືສະເພາະ, ເລັ່ງລັດການເຈລະຈາ ແລະ ລົງນາມບັນດາເອກະສານຮ່ວມມືສຳຄັນໃນຂົງເຂດປ້ອງກັນຊາດ - ປ້ອງກັນຄວາມສະຫງົບ, ແຮງງານ, ກະສິກຳ...
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຟ້າມມິງຈິງ ໄດ້ເຊື້ອເຊີນທ່ານຮອງປະທານາທິບໍດີ ຕວກກີ ມາຢ້ຽມຢາມ ຫວຽດນາມ ຢ່າງເປັນທາງການໃນປີ 2024 ເພື່ອປະກອບສ່ວນນຳການຮ່ວມມືລະຫວ່າງ 2 ປະເທດຂຶ້ນສູ່ລະດັບສູງໃໝ່. ທ່ານຮອງປະທານປະເທດ Cevdet Yilmaz ໄດ້ຮັບຄຳເຊີນຢ່າງດີໃຈ ແລະ ຫວັງວ່າຈະດຳເນີນການຢ້ຽມຢາມໂດຍໄວ.
ມິງດຶກ