ການທ່ອງທ່ຽວຫວຽດນາມ ປີ 2023: “ຍູ້ໄວການຟື້ນຟູ- ເພີ່ມຄວາມໄວໃນການພັດທະນາ”
ຕອນບ່າຍວັນທີ 15 ມີນາ, ທ່ານນາຍົກລັດຖະມົນຕີ ຟ້າມມິງຈິງ ໄດ້ເປັນປະທານກອງປະຊຸມທາງໄກທົ່ວປະເທດກ່ຽວກັບການທ່ອງທ່ຽວປີ 2023 ດ້ວຍຫົວຂໍ້ “ຍູ້ໄວການຟື້ນຟູ- ເພີ່ມຄວາມໄວໃນການພັດທະນາ”.
ກອງປະຊຸມໄດ້ດຳເນີນໄປພາຍຫຼັງ 1 ປີທີ່ຫວຽດນາມ ໄດ້ເປີດປະຕູການທ່ອງທ່ຽວຄືນໃໝ່ (ວັນທີ 15/03/2022). ເຂົ້າຮ່ວມມີທ່ານຮອງນາຍົກລັດຖະມົນຕີ ເຈີ່ນຮົ່ງຮ່າ, ການນຳບັນດາກະຊວງ, ຂະແໜງການ, 63 ແຂວງ, ນະຄອນ, ສະມາຄົມການທ່ອງທ່ຽວ, ວິສາຫະກິດ ແລະ ບໍລິສັດການບິນ.
ບັນດາບົດລາຍງານຂອງກະຊວງວັດທະນະທຳ, ກິລາ ແລະ ການທ່ອງທ່ຽວ, ບົດປະກອບຄຳເຫັນຂອງຜູ້ແທນທີ່ເຂົ້າຮ່ວມກອງປະຊຸມ ໄດ້ຢັ້ງຢືນບັນດາໝາກຜົນທີ່ບັນລຸໄດ້, ຊີ້ໃຫ້ເຫັນບັນດາຂໍ້ຈຳກັດ, ສິ່ງກີດຂວາງ, ຄວາມຫຍຸ້ງຍາກ, ຂໍ້ຕິດຂັດ ແລະ ສາຍເຫດຢ່າງກົງໄປກົງມາ, ຍົກໃຫ້ເຫັນບັນດາສິ່ງທ້າທາຍຫຼັກຂອງການທ່ອງທ່ຽວຫວຽດນາມ ແລະ ຂໍ້ສະເໜີບັນດາວິທີການແກ້ໄຂຢ່າງແທດຈິງເພື່ອຟື້ນຟູ ແລະ ພັດທະນາການທ່ອງທ່ຽວຫວຽດນາມ ໃນໄລຍະຈະມາເຖິງ.
ກ່າວຄຳເຫັນສະຫຼຸບກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ໄດ້ມອບໝາຍໃຫ້ກະຊວງວັດທະນະທຳ, ກິລາ ແລະ ການທ່ອງທ່ຽວເປັນເຈົ້າພາບຈັດຕັ້ງ, ສົມທົບກັບ ຫ້ອງວ່າການລັດຖະບານ ແລະ ບັນດາອົງການທີ່ກ່ຽວຂ້ອງເພື່ອຮັບເອົາຄຳເຫັນຢ່າງເຂັ້ມງວດ, ບຸລະນະ, ຍື່ນສະເໜີປະກາດໃຊ້ມະຕິຂອງລັດຖະບານກ່ຽວກັບການຍູ້ໄວການຟື້ນຟູ ເພີ່ມຄວາມໄວໃນການພັດທະນາການທ່ອງທ່ຽວຢ່າງມີປະສິດທິຜົນ, ຍືນຍົງ.
 |
| ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: dangcongsan.vn) |
ໂດຍເນັ້ນໜັກບາງເນື້ອໃນ, ທ່ານນາຍົກລັດຖະມົນຕີ ຮຽກຮ້ອງຕ້ອງກຳນົດສະພາບການຂອງປະເທດຊາດພວມພັດທະນາ, ພື້ນຖານເສດຖະກິດທີ່ພວມມີການຫັນປ່ຽນ, ຂະແໜງການທ່ອງທ່ຽວຂອງ ຫວຽດນາມ ພັດທະນາຫຼັງບັນດາປະເທດ, ພວກເຮົາປາດຖະໜາຢາກພັດທະນາການທ່ອງທ່ຽວໂດຍໄວ, ຍືນຍົງແຕ່ບັນດາໜ້າທີ່, ວິທີການຕ້ອງບໍ່ປະໝາ່ດ ກໍ່ຄືຟ້າວຟັ່ງ, ຢຶດໝັ້ນ, ມີຄຸນນະທາດ, ໃຈເຢັນ, ໄຈ້ແຍກ, ຕີລາຄາບັນດາໝາກຜົນ, ຄວາມສະດວກທີ່ຕ້ອງຜັນຂະຫຍາຍ, ຂໍ້ຫຍຸ້ງຍາກ, ຂໍ້ຕິດຂັດທີ່ຕ້ອງໄດ້ຮັບການແກ້ໄຂ, ບັນດາສິ່ງທ້າທາຍທີ່ຕ້ອງຜ່ານຜ່າ.
ຫວນຄືນໜຶ່ງປີແຫ່ງການເປີດບໍລິການ, ເຊິ່ງກວ້າງກ່ວານີ້ອີກແມ່ນ ແຕ່ປີ 2016 ຮອດປະຈຸບັນ, ທ່ານນາຍົກລັດຖະມົນຕີ ໄດ້ຕີລາຄາວ່າ ຂະແໜງການທ່ອງທ່ຽວຫວຽດນາມ ບັນລຸໄດ້ບັນດາໝາກຜົນທີ່ໜ້າພາກພມູໃຈ ແລະ ໜ້ານັບຖື. ຈໍານວນນັກທ່ອງທ່ຽວພາຍໃນເພີ່ມຈາກ 57 ລ້ານເທື່ອຄົນໃນປີ 2015 ຂຶ້ນເຖິງ 85 ລ້ານເທື່ອຄົນໃນປີ 2019. ນັກທ່ອງທ່ຽວຕ່າງປະເທດເພີ່ມຈາກ 7,9 ລ້ານເທື່ອຄົນໃນປີ 2015 ຂຶ້ນເຖິງ 18 ລ້ານເທື່ອຄົນໃນປີ 2019. ກຳລັງຄວາມສາມາດໃນການແຂ່ງຂັນຂອງການທ່ອງທ່ຽວຂອງຫວຽດນາມໃນປີ 2019 ເພີ່ມຂຶ້ນ 17 ອັນດັບເມື່ອທຽບໃສ່ປີ 2011. ປີ 2022, ຫວຽດນາມ ຕ້ອນຮັບນັກທ່ອງທ່ຽວສາກົນ 3,66 ລ້ານເທື່ອຄົນ ແລະ ນັກທ່ອງທ່ຽວພາຍໃນປະເທດ 103 ລ້ານເທື່ອຄົນ.
ໃນປີ 2020 ແລະ 2021, ເຖິງວ່າຈະໄດ້ຮັບຜົນກະທົບໜັກຈາກໂລກລະບາດກໍ່ຕາມ, ແຕ່ດັດຊະນີຄວາມອາດສາມາດພັດທະນາການທ່ອງທ່ຽວຂອງຫວຽດນາມ ຍັງເພີ່ມຂຶ້ນ, ໃນປີ 2021 ເພີ່ມຂຶ້ນ 8 ອັນດັບ ເມື່ອທຽບໃສ່ປີ 2019, ຢູ່ອັນດັບທີ 52/117; ຫວຽດນາມ ແມ່ນໜຶ່ງໃນ 3 ປະເທດທີ່ມີການປັບປຸງຂຶ້ນສູງສຸດໃນໂລກ. ນັບແຕ່ເດືອນພະຈິກ 2021 ເປັນຕົ້ນມາ, ພວກເຮົາໄດ້ທົດລອງການຕ້ອນຮັບນັກທ່ອງທ່ຽວສາກົນ ແລະ ໄດ້ເປີດປະຕູການທ່ອງທ່ຽວຢ່າງເປັນທາງການແຕ່ວັນທີ 15 ມີນາ 2022 ເປັນຕົ້ນມາ.
ນີ້ແມ່ນບັນດາພະຍານຫຼັກຖານທີ່ມີຊີວິດຊີວາໃຫ້ແກ່ການພັດທະນາການທ່ອງທ່ຽວຫວຽດນາມ, ປັບປຸງຄວາມເຊື່ອໝັ້ນໃນການຟື້ນຟູ ແລະ ພັດທະນາຢ່າງເຂັ້ມແຂງໃນໄລຍະຈະມາເຖິງ. ດ້ວຍບັນດາໝາກຜົນດັ່ງກ່າວ, ພວກຂ້າພະເຈົ້າມີຄວາມເຊື່ອໝັ້ນ, ປະສົບການ, ຄວາມຮັບຮູ້ທີ່ດີກ່ວາກ່ຽວກັບຄວາມສາມາດບົ່ມຊ້ອນ, ກາລະໂອກາດທີ່ດີ, ບັນດາທ່າໄດ້ປຽບໃນການແກ່ງແຍ້ງຂອງການທ່ອງທ່ຽວຫວຽດນາມ ເພື່ອກ້າວເຂົ້າສູ່ໄລຍະພັດທະນາໃໝ່, ໄດ້ຮັບການຜັນຂະຫຍາຍຈາກມືຂອງຕົນເອງ, ສະໝອງ, ດິນແດນ, ເຂດນ່ານຟ້າ, ເຂດທະເລຂອງຕົນ, ການພັດທະນາການທ່ອງທ່ຽວໄດ້ກາຍເປັນຂະແໜງເສດຖະກິດປາຍແຫຼມຕາມມະຕິຂອງກົມການເມືອງ, ຕິດພັນການທ່ອງທ່ຽວກັບການພັດທະນາອຸດສາຫະກຳວັດທະນະທຳ ແລະ ການບັນເທິງ, ປະກອບສ່ວນກໍ່ສ້າງພື້ນຖານເສດຖະກິດເອກະລາດ ແລະ ເປັນເຈົ້າຕົນເອງຕິດພັນກັບການເຊື່ອມໂຍງເຂົ້າກັບສາກົນຢ່າງຕັ້ງໜ້າ ແລະ ກວ້າງຂວາງ, ແທດຈິງ ແລະ ມີປະສິດທິພາບ.
ບຸນຄົງ