ສະຖານທູດຫວຽດນາມ ປະຈຳ ກຳປູເຈຍ ໄດ້ຈັດຕັ້ງງານສະເຫຼີມສະຫຼອງບຸນປີໃໝ່ປະຈຳຊາດ
| ຄວາມອົບອຸ່ນບຸນປີໃໝ່ປະຈໍາຊາດ 2022 ຂອງນັກຮຽນຫວຽດນາມ ຢູ່ ກຳປູເຈຍ | |
| ກຽນຢາງ ສົ່ງຂອງຂວັນໜູນຊ່ວຍພີ່ນ້ອງຊາວຫວຽດນາມຢູ່ກຳປູເຈຍ ຕ້ອນຮັບບຸນປີໃຫມ່ປີຂານ 2022 |
ຕອນຄ່ຳວັນທີ 16 ມັງກອນ, ສະຖານທູດ ຫວຽດນາມ ປະຈຳ ລາຊະອານາຈັກ ກຳປູເຈຍ ໄດ້ດຳເນີນງານພົບປະ “ລະດູບານໃໝ່ບ້ານເກີດເມືອງນອນ ປີຂານ 2022” ໂດຍມີການເຂົ້າຮ່ວມຂອງພະນັກງານ, ພາລະກອນຂອງສະຖານທູດ, ບັນດາອົງການ, ອົງການທີ່ຢູ່ໃກ້ກັບສະຖານທູດ, ຜູ້ຕາງໜ້າການນຳ ແລະ ພະນັກງານສະຖານກົງສຸນໃຫຍ່ປະຈຳ ກຳປູເຈຍ, ຄະນະນຳສະມາຄົມ Khmer - ຫວຽດນາມ, ຄະນະນຳສະໂມສອນວິສາຫະກິດ ຫວຽດນາມ (VBCC), ການນຳບັນດາວິສາຫະກິດ ຫວຽດນາມ ປະຈຳ ກຳປູເຈຍ, ການນຳວິສາຫະກິດຊາວ Khmer ເຊື້ອຊາດຫວຽດນາມ, ພໍ່ແມ່ພີ່ນ້ອງຫວຽດນາມ, ນັກສຶກສາຫວຽດນາມ ຢູ່ ກຳປູເຈຍ.
ກ່າວຄຳເຫັນທີ່ການພົບປະ, ທ່ານເອກອັກຄະລັດຖະທູດ ຫງວຽນຮຸຍຕັງ ໄດ້ໃຫ້ການຕ້ອນຮັບຢ່າງອົບອຸ່ນຕໍ່ພະນັກງານ, ພາລະກອນສະຖານທູດ, ສະຖານກົງສຸນໃຫຍ່, ພະນັກງານ, ລັດຖະກອນບັນດາອົງການທີ່ຢູ່ອ້ອມຂ້າງສະຖານທູດ, ຜູ້ຕາງໜ້າບັນດາວິສາຫະກິດຫວຽດນາມ, ວິສາຫະກິດຊາວ Khmer ເຊື້ອຊາດຫວຽດນາມ ພ້ອມກັບພໍ່ແມ່ປະຊາຊົນ ແລະ ບັນດານັກສຶກສາຫວຽດນາມ ຢູ່ປະເທດກຳປູເຈຍ ທີ່ໄດ້ເຂົ້າຮ່ວມງານ “ລະດູບານໃໝ່ບ້ານເກີດເມືອງນອນ ປີໃໝ່ 2022” ແລະ ປິຕິຍິນດີປະກາດບັນດາຜົນງານດ້ານເສດຖະກິດ, ການເມືອງ, ສັງຄົມຂອງຫວຽດນາມ ໃນຊຸມປີທີ່ຜ່ານມາ.
 |
| ທ່ານ Sim Chy ປະທານສະມາຄົມຂະເໝນ-ຫວຽດນາມ. ພາບ: TTXVN |
ທ່ານເອກອັກຄະລັດຖະທູດ ຫງວຽນຮຸຍຕັງ ໄດ້ຍ້ອງຍໍ ແລະ ອວຍພອນສະຖານທູດ ແລະ ບັນດາອົງການທີ່ຢູ່ອ້ອມຂ້າງສະຖານທູດ ທີ່ໄດ້ມານະພະຍາຍາມຜ່ານຜ່າຄວາມຫຍຸ້ງຍາກ ແລະ ປະສົບຜົນສຳເລັດໃນທຸກວຽກງານທີ່ມອບໝາຍ ໂດຍພັກ ແລະ ລັດ; ປະຊາຄົມວິສາຫະກິດ ຫວຽດນາມ ແລະ ວິສາຫະກິດ Khmer - ຫວຽດນາມ ຢູ່ ກຳປູເຈຍ ທີ່ໄດ້ມານະພະຍາຍາມ ຜ່ານຜ່າທຸກຄວາມຫຍຸ້ງຍາກ, ຮັກສາການດຳເນີນງານຢ່າງໝັ້ນຄົງ ແລະ ຄ່ອຍໆດີກ່ວາປີ 2020, ມີບາງວິສາຫະກິດມີກຳໄລ, ປະຕິບັດນະໂຍບາຍ ເພື່ອຄວາມສະຫງົບປອດໄພສັງຄົມເປັນຢ່າງດີ, ໜູນຊ່ວຍຍາດຕິພີ່ນ້ອງເຊື້ອຊາດຫວຽດນາມ.
ທ່ານເອກອັກຄະລັດຖະທູດ ຫງວຽນຮຸຍຕັງ ເນັ້ນໜັກວ່າ: ປີ 2022, ສອງປະເທດ ຈະສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ (24 ມິຖຸນາ 1967 - 24 ມິຖຸນາ 2022) ແລະ ກໍ່ແມ່ນປີມິດຕະພາບ ຫວຽດນາມ - ກຳປູເຈຍ, ກຳປູເຈຍ - ຫວຽດນາມ; ສອງຝ່າຍຍັງຈະສົມທົບກັນຈັດຕັ້ງບັນດາການເຄື່ອນໄຫວ ທີ່ມີຄວາມໝາຍໃນທຸກຂົງເຂດ ເພື່ອສະເຫຼີມສະຫຼອງເຫດການສຳຄັນນີ້.
ທ່ານເອກອັກຄະລັດຖະທູດ ສະເໜີໃຫ້ ພາລະກອນຂອງສະຖານທູດ ແລະ ບັນດາອົງການອ້ອມຂ້າງສະຖານທູດ ຕ້ອງຕັ້ງໜ້າຍາດແຍ່ງກາລະໂອກາດ, ຜ່ານຜ່າບັນດາສິ່ງທ້າທາຍ, ສົມທົບກັນຢ່າງແໜ້ນແຟ້ນ ກັບບັນດາອົງການພາຍໃນ ແລະ ທຸກຂັ້ນຂອງປະເທດກຳປູເຈຍ ເພື່ອສ້າງການປ່ຽນແປງໃໝ່ໃນທຸກຂົງເຂດ. ໃນນັ້ນ ເອົາໃຈໃສ່ເປັນພິເສດເຖິງການຊຸກຍູ້ ແລະ ຍົກສູງປະສິດທິຜົນການຮ່ວມມືລະຫວ່າງ ສອງປະເທດໃນຂົງເຂດເສດຖະກິດ, ສ້າງກຳລັງແຮງໃໝ່ ໃຫ້ແກ່ການພົວພັນສອງປະເທດ.
ປະທານສະມາຄົມຂະເໝນ-ຫວຽດນາມ, ທ່ານ Sim Chy ແລະ ຜູ້ຕາງໜ້າປະຊາຄົມວິສາຫະກິດຫວຽດນາມ ແລະ ວິສາຫະກິດຊາວ Khmer ເຊື້ອຊາດຫວຽດນາມ ຢູ່ ກຳປູເຈຍ ໄດ້ສະແດງຄວາມຕື້ນຕັນໃຈທີ່ເຂົ້າຮ່ວມງານ “ລະດູບານໃໝ່ບ້ານເກີດເມືອງນອນ ປີໃໝ່ 2022” ທີ່ສະຖານທູດໄດ້ຈັດຕັ້ງ; ໃຫ້ຄຳໝັ້ນສັນຍາຈະສາມັກຄີ, ຕິດພັນ ແລະ ຮ່ວມແຮງຮ່ວມໃຈກັບສະຖານທູດ ແລະ ບັນດາອົງການອ້ອມຂ້າງສະຖານທູດ ເພື່ອປະຕິບັດແນວທາງ ແລະ ນະໂຍບາຍຂອງພັກ ແລະ ລັດໃຫ້ເປັນຢ່າງດີ.
ໃນບັນຍາກາດເບີກບານມ່ວນຊື່ນ ເພື່ອຕ້ອນຮັບບຸນປີໃໝ່ປະຈຳຊາດ 2022, ໝູ່ຄະນະ ພະນັກງານສະຖານທູດຫວຽດນາມ ປະຈຳ ກຳປູເຈຍ, ບັນດາອົງການຕາງໜ້າຫວຽດນາມ, ປະຊາຄົມເຊື້ອຊາດຫວຽດນາມ ແລະ ວິສາຫະກິດຫວຽດນາມ ໄດ້ຮັບຊົມບັນດາລາຍການສະແດງວັດທະນະທຳພິເສດ, ເຍື່ອງອາຫານທີ່ເຕັມໄປດ້ວຍລົດຊາດພື້ນເມືອງ./.
ຄຳຮຸ່ງ