ຍສໝ - ໄຟໄໝ້ມັກເກີດຂຶ້ນຢູ່ລາວ ໃນຍາມລະດູແລ້ງ ແລະ ລະດູຮ້ອນ, ດ້ວຍອຸນຫະພຸມຢູ່ນະຄອນຫຼວງວຽງຈັນຂຶ້ນເຖິງ 39 ອົງສາ ໃນຫຼາຍວັນຕໍ່ເນື່ອງ. ວົງການເຈົ້າໜ້າທີ່ມີຄວາມວິຕົກກັງວົນວ່າ ເຫດໄຟໄໝ້ໂດຍປະຊາຊົນຈູດປ່າເຮັດໄຮ່ເພື່ອກະກຽມໃຫ້ແກ່ລະດູການຕໍ່ໄປອາດຈະຮ້າຍແຮງກ່ວານີ້ອີກ.
ນັບແຕ່ຕົ້ນເດືອນເມສາ ນີ້ ໄດ້ເກີດສະພາບໄຟໄໝ້ປ່າສະຫງວນ, ປ່າປ້ອງກັນ, ປ່າຜະລິດ ແລະ ປ່າປະເພດອື່ນໆ ເປັນບໍລິເວນກວ້າງຢູ່ຫລາຍເມືອງໃນທົ່ວແຂວງເຮັດໃຫ້ເນື້ອທີ່ປ່າໄມ້ເສຍຫາຍຫລາຍກວ່າ 42 ພັນເຮັກຕາ, ໃນນັ້ນ ເມືອງໄຊ ເສຍຫາຍກວ່າ 18 ພັນເຮັກຕາ, ເມືອງຫລາ 2.525 ເຮັກຕາ, ນາໝໍ້ 7.670 ເຮັກຕາ, ເມືອງງາ 9.707 ເຮັກຕາ, ເມືອງແບ່ງ 1.700 ກວ່າເຮັກຕາ, ເມືອງຮຸນ 224 ເຮັກຕາ ແລະ ເມືອງປາກແບ່ງ 2.998 ເຮັກຕາ.