ເດືອນ ກຸມພາ ປີ 1909 ແມ່ຍິງປະເທດອາເມຣິກາໄດ້ຈັດພິທີສະຫຼອງວັນແມ່ຍິງສາກົນເປັນເທື່ອທຳອິດ ແລະ ແມ່ຍິງໃນເມືອງນິວຢອກ 3000 ຄົນ ໄດ້ເຂົ້າຮ່ວມການຕໍ່ສູ້ຄັດຄ້ານລັດຖະບານທີ່ບໍ່ຍອມໃຫ້ແມ່ຍິງມີສິດຮັບເລືອກຕັ້ງ, ຊຶ່ງການຕໍ່ສູ້ດັ່ງກ່າວໄດ້ເປັນການລະດົມນ້ຳໃຈຕໍ່ສູ້ຂອງແມ່ຍິງທີ່ຖືກກົດຂີ່ຂູດຮີດຢູ່ບັນດາປະເທດໃນທົ່ວໂລກ.
ການຕໍ່ສູ້ເພື່ອປົດປ່ອຍຕົນເອງອອກຈາກການກົດຂີ່ຂູດຮີດ ຫຼື ໃຫ້ຫຼຸດພົ້ນຈາກການເປັນແຮງງານແບບຂ້າທາດ ໄດ້ກຳເນີດເກີດຂຶ້ນເປັນແຕ່ລະໄລຍະ ໃນຕອນທ້າຍຂອງສັດຕະວັດທີ 18 ການເຄື່ອນໄຫວ ເພື່ອຕໍ່ສູ້ໃຫ້ຫຼຸດຊົ່ວໂມງການເຮັດວຽກລົງ ໂດຍໄດ້ຂະຫຍາຍເປັນວົງກວ້າງ ແລະ ແຜ່ລາມໄປໃນຫຼາຍປະເທດທັງເອີຣົບ ແລະ ອາເມລິກາ, ອາເມລິກາໃຕ້, ຍີ່ປຸ່ນ ແລະ ອົດສະຕຣາລີ.