“ບັ້ນຮົບ 500 ວັນ ແລະ ຄືນ”: ບໍ່ປ່ອຍໃຫ້ການເສຍສະຫຼະໃດໆ ຖືກຫຼົງລືມ

	ການກວດກາພາກສະໜາມຕົວຈິງ, ຊຸກຍູ້ແຜນງານ 500 ວັນ ແລະ ຄືນ ຢູ່ທ້ອງຖິ່ນ
	ຂຸດຄົ້ນ ແລະ ກູ້ຊ່ວຍອັດຖິເສຍສະຫຼະຊີວິດເພື່ອຊາດ ໄດ້ຫຼາຍກວ່າ 1.300 ສະຫາຍ ຫຼັງຈາກຜ່ານຜ່າ 111 ວັນ ແລະ ຄືນ

ກຳລັງຊອກຫາ ແລະ ທ້ອນໂຮມອັດຖິທະຫານເສຍສະຫຼະຊີວິດເພື່ອຊາດ ຂອງກອງບັນຊາການທະຫານ ນະຄອນໂຮ່ຈີມິນ ດຳເນີນການຂຸດຄົ້ນ ແລະ ເຄື່ອນຍ້າຍອັດຖິທະຫານເສຍສະຫຼະຊີວິດເພື່ອຊາດ ຢູ່ເຂດສວນສາທາລະນະ ເລທິຣຽງ.

ອັດຖິຫຼາຍກວ່າ 1.300 ອັດຖິ ໄດ້ຮັບການທ້ອນໂຮມ, ຕົວຢ່າງ ADN ຂອງຍາດຕິພີ່ນ້ອງຫຼາຍກວ່າ 93.000 ຕົວຢ່າງ ໄດ້ຮັບການເກັບກູ້, ແລະ ຕົວຢ່າງອັດຖິ ພ້ອມກັບຂໍ້ມູນ ADN ຫຼາຍສິບພັນຕົວຢ່າງ ພວມໄດ້ຮັບການເຊື່ອມໂຍງລະບົບ ເພື່ອຮັບໃຊ້ໃຫ້ແກ່ການພິສູດເອກະລັກຂອງທະຫານເສຍສະຫຼະຊີວິດເພື່ອຊາດ. ບັນດາໝາກຜົນເບື້ອງຕົ້ນເຫຼົ່ານີ້ ໄດ້ສະແດງໃຫ້ເຫັນເຖິງການຫັນປ່ຽນຢ່າງເປັນຮາກຖານ ຈາກຮູບແບບການເຮັດວຽກແບບກະຈັດກະຈາຍ ມາເປັນບັ້ນຮົບລະດັບຊາດ ດ້ວຍແນວຄິດການຄຸ້ມຄອງທີ່ທັນສະໄໝ.

ຢ່າງໃດກໍຕາມ, ໃນຂະນະທີ່ເວລາຈັດຕັ້ງປະຕິບັດຍັງເຫຼືອພຽງແຕ່ຫຼາຍກວ່າໜຶ່ງປີ, ສິ່ງທີ່ໜ້າເປັນຫ່ວງທີ່ສຸດໃນເວລານີ້ ບໍ່ແມ່ນເລື່ອງເຕັກໂນໂລຊີ ຫຼື ແຫຼ່ງທຶນຮອນອີກຕໍ່ໄປ, ແຕ່ແມ່ນຄວາມສ່ຽງທີ່ຈະ "ຊັກຊ້າ" ພາຍໃນຂັ້ນຕອນການຈັດຕັ້ງປະຕິບັດ. ມັນແຕກຕ່າງຈາກໜ້າທີ່ວຽກງານປົກກະຕິທົ່ວໄປ, ບັ້ນຮົບໜຶ່ງຈະສາມາດເສີມຂະຫຍາຍປະສິດທິພາບໄດ້ ກໍຕໍ່ເມື່ອໄດ້ຮັບການຜັນຂະຫຍາຍຢ່າງຖືກຕ້ອງຕາມກຳນົດເວລາ ແລະ ຮັກສາຈັງຫວະການເຄື່ອນໄຫວໄດ້ຢ່າງຕໍ່ເນື່ອງ.

ພາຍໃນໂທລະເລກດ່ວນ ສະບັບເລກທີ 45/CĐ-TTg ລົງວັນທີ 8 ກໍລະກົດ, ທ່ານ ນາຍົກລັດຖະມົນຕີ ແຫ່ງລັດຖະບານ ເລມິງຮຶງ ໄດ້ຊີ້ແຈ້ງຢ່າງກົງໄປກົງມາວ່າ: ຄວາມຄືບໜ້າໃນການຜັນຂະຫຍາຍຢູ່ບາງທ້ອງຖິ່ນ ແລະ ກົມກອງຍັງຊັກຊ້າ; ໝາກຜົນທີ່ໄດ້ຮັບຍັງມີໄລຍະຫ່າງໄກຫຼາຍ ເມື່ອທຽບໃສ່ຄາດໝາຍທີ່ວາງໄວ້; ການປະສານສົມທົບໃນບາງຄັ້ງບາງຄາວຍັງບໍ່ທັນແໜ້ນແຟ້ນ; ຫົວໜ້າບາງອົງການ, ກົມກອງ ແລະ ທ້ອງຖິ່ນ ຍັງບໍ່ທັນກຳນົດຄວາມຮັບຜິດຊອບຂອງຕົນເອງໃຫ້ຈະແຈ້ງ, ທັງຍັງຂາດການຊີ້ນຳນຳພາຢ່າງເດັດຂາດ.

ພຶດຕິກຳຕົວຈິງສະແດງໃຫ້ເຫັນວ່າ, ມີບາງບ່ອນໄດ້ເປັນເຈົ້າການໃນການກວດກາຄືນ ແລະ ລະດົມກຳລັງຫຼາຍພາກສ່ວນເຂົ້າຮ່ວມ; ແຕ່ກໍມີບາງບ່ອນຍັງຖືວ່ານີ້ແມ່ນໜ້າທີ່ສະເພາະຂອງກຳລັງທະຫານ ຫຼື ອົງການຈັດຕັ້ງນະໂຍບາຍເທົ່ານັ້ນ, ສົ່ງຜົນໃຫ້ການປະສານງານບໍ່ມີຄວາມແໜ້ນແຟ້ນ ແລະ ປະສິດທິຜົນຍັງບໍ່ສູງເທົ່າທີ່ຄວນ.

ໃນຂະນະດຽວກັນ, ວຽກງານຊອກຫາ ແລະ ທ້ອນໂຮມໃນປັດຈຸບັນ ໄດ້ກາຍເປັນຂະບວນການຮ່ວມມືລະຫວ່າງຂະແໜງການ ທີ່ປະສົມປະສານລະຫວ່າງ ເຕັກໂນໂລຊີຊີວະພາບ, ຖານຂໍ້ມູນດີຈີຕອນ, ການສຳຫຼວດຟີຊິກທໍລະນີ, ການຂຸດຄົ້ນແຫຼ່ງເອກະສານປະຫວັດສາດສົງຄາມ ແລະ ພະຍານບຸກຄົນ. ຂໍພຽງແຕ່ມີຂໍ້ຕໍ່ໃດໜຶ່ງຊັກຊ້າ, ຂະບວນການທັງໝົດກໍຈະເກີດການຕິດຂັດທັນທີ.

ບັ້ນຮົບນີ້ໄດ້ເດີນທາງມາຮອດເກືອບ 1/3 ຂອງໄລຍະທາງແລ້ວ. ພວກ ເຮົາພວມແລ່ນແຂ່ງກັບເວລາ ຍ້ອນວ່າພະຍານບຸກຄົນນັບມື້ນັບໜ້ອຍລົງ, ພູມສັນຖານຂອງສະໜາມຮົບເກົ່າຖືກປ່ຽນແປງໄປຕາມຄວາມໄວຂອງການຂະຫຍາຍຕົວຂອງຕົວເມືອງ ແລະ ສະພາບທຳມະຊາດທີ່ຮ້າຍແຮງພວມລຶບລ້າງຮ່ອງຮອຍຕ່າງໆ. ດັ່ງນັ້ນ, ການເຮັດວຽກຊັກຊ້າ ບໍ່ພຽງແຕ່ແມ່ນການຫຼຸດຄາດໝາຍຄວາມຄືບໜ້າເທົ່ານັ້ນ, ແຕ່ມັນແມ່ນການສູນເສຍໂອກາດສຸດທ້າຍທີ່ຈະນຳພາອັດຖິຂອງບັນດາທ່ານທະຫານເສຍສະຫຼະຊີວິດເພື່ອກັບຄືນສູ່ບ້ານເກີດເມືອງນອນ.

ເພື່ອໃຫ້ "ບັ້ນຮົບ 500 ວັນ ແລະ ຄືນ" ບັນລຸເປົ້າໝາຍສູງສຸດ, ຕ້ອງມີບັນດາມາດຕະການແກ້ໄຂທີ່ມີລັກສະນະບຸກທະລຸ ແລະ ແທດຕົວຈິງ ດັ່ງນີ້:

ທຳອິດ, ຕ້ອງຫັນຄວາມຮັບຜິດຊອບຂອງຫົວໜ້າອົງການຈັດຕັ້ງໃຫ້ເປັນຕົວເລກສະເພາະ ດ້ວຍບັນດາຕົວຊີ້ວັດການຕີລາຄາໝາກຜົນການປະຕິບັດວຽກງານຕົວຈິງ. ການທີ່ທ່ານນາຍົກລັດຖະມົນຕີ ຮຽກຮ້ອງໃຫ້ເລຂາຄະນະພັກແຂວງ ນຳເອົາໜ້າທີ່ວຽກງານນີ້ເຂົ້າໃນແຜນວຽກປະຈຳສັບປະດາ ນັ້ນສະແດງໃຫ້ເຫັນເຖິງຄວາມຕັ້ງໃຈໃນການຍົກລະດັບຄວາມຮັບຜິດຊອບທາງດ້ານການເມືອງ ໃຫ້ກາຍເປັນຄວາມຮັບຜິດຊອບໃນການປະຕິບັດຕົວຈິງ.

ຢ່າງໃດກໍຕາມ, ຕ້ອງສ້າງຕັ້ງກົນໄກຕິດຕາມ, ກວດກາ ແລະ ເປີດເຜີຍຄວາມຄືບໜ້າຢ່າງເປັນປະຈຳ, ຕິດພັນໝາກຜົນການປະຕິບັດກັບຄວາມຮັບຜິດຊອບຂອງແຕ່ລະທ້ອງຖິ່ນ ແລະ ຫົວໜ້າແຕ່ລະບ່ອນ. ເມື່ອຄວາມຮັບຜິດຊອບຖືກວັດແທກດ້ວຍໝາກຜົນຕົວຈິງ, ກໍຈະສາມາດແກ້ໄຂສະພາບການທີ່ບາງບ່ອນເຮັດຢ່າງຂຸ້ນຂ້ຽວ ແຕ່ບາງບ່ອນເຮັດແບບແກ້ໄຂໄປມື້ໆ, ຮັບປະກັນໃຫ້ບັ້ນຮົບທັງໝົດດຳເນີນໄປຢ່າງພ້ອມພຽງ ແລະ ຖືກຕ້ອງຕາມກຳນົດເວລາ.

ທີສອງ, ສ້າງ "ເຄືອຂ່າຍຕອບໂຕ້ໄວ" ດ້ານຂໍ້ມູນຂ່າວສານ. ໃນປັດຈຸບັນ, ຈຸດສຸມຂອງບັ້ນຮົບພວມຫັນປ່ຽນຢ່າງແຂງແຮງໄປສູ່ "ການພິສູດເອກະລັກອັດຖິທະຫານເສຍສະຫຼະຊີວິດເພື່ອຊາດ" ໂດຍອີງໃສ່ຄັງຂໍ້ມູນແຊນ (Gene Bank) ແລະ ຖານຂໍ້ມູນແຫ່ງຊາດ. ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ ແລະ ກະຊວງພາຍໃນ ຕ້ອງສືບຕໍ່ປະສານສົມທົບ ແລະ ເຊື່ອມໂຍງຖານຂໍ້ມູນກ່ຽວກັບທະຫານເສຍສະຫຼະຊີວິດ, ຂຸມຝັງສົບ, ຍາດຕິພີ່ນ້ອງ ແລະ ຄັງຂໍ້ມູນແຊນ ເພື່ອຫຼຸດຜ່ອນເວລາໃນການປຽບທຽບ ແລະ ພິສູດເອກະລັກ.

ຕ້ອງພັດທະນາແອັບພລິເຄຊັນ (App) ຫຼື ປະຕູຂໍ້ມູນຂ່າວສານແຫ່ງຊາດທີ່ທັນສະໄໝ ທີ່ຊ່ວຍໃຫ້ຍາດຕິພີ່ນ້ອງ ແລະ ປະຊາຊົນສາມາດຄົ້ນຫາ, ສະໜອງຂໍ້ມູນ ແລະ ສົ່ງຜົນກວດ ADN ໄດ້ຢ່າງສະດວກສະບາຍໃນຮູບແບບ Real-time ໂດຍບໍ່ຕ້ອງຜ່ານຂັ້ນຕອນທາງບໍລິຫານທີ່ຊັບຊ້ອນ.

ທີສາມ, ປຸກລະດົມ "ກຳລັງແຮງຂອງທົ່ວປວງຊົນ" ດ້ວຍກົນໄກຫັນເປັນຂອງສັງຄົມ. ວຽກງານຊອກຫາອັດຖິແມ່ນວຽກງານແຫ່ງຄວາມກະຕັນຍູຮູ້ບຸນຄຸນ, ແຕ່ການບໍລິຫານບັ້ນຮົບຕ້ອງອາໄສຄວາມເປັນມືອາຊີບຂອງພື້ນຖານເສດຖະກິດແຫ່ງປັນຍາ. ຕ້ອງມີກົນໄກເປີດກວ້າງເພື່ອລະດົມບັນດາວິສາຫະກິດເຕັກໂນໂລຊີທີ່ມີຄວາມສາມາດສູງ ເຂົ້າມາຊ່ວຍເຫຼືອດ້ານແຫຼ່ງທຶນ, ອຸປະກອນ, ໂຄງລ່າງພື້ນຖານດີຈີຕອນ ແລະ ເຕັກໂນໂລຊີ ຮັບໃຊ້ໃຫ້ແກ່ວຽກງານຊອກຫາ, ຄຸ້ມຄອງຂໍ້ມູນ ແລະ ພິສູດເອກະລັກອັດຖິ.

ຄຽງຄູ່ກັນນັ້ນ, ຕ້ອງຜັນຂະຫຍາຍການໂຄສະນາເຜີຍແຜ່ຢ່າງກວ້າງຂວາງທັງພາຍໃນ ແລະ ຕ່າງປະເທດ ແນໃສ່ເກັບກຳ, ເຊື່ອມຕໍ່ຂໍ້ມູນຈາກອະດີດທະຫານເສຍອົງຄະຈາກທັງສອງຝ່າຍ, ສົມທົບກັບການເປີດກວ້າງການຮ່ວມມືສາກົນໃນການແລກປ່ຽນແຟ້ມເອກະສານ ແລະ ຂໍ້ມູນສົງຄາມ ຮັບໃຊ້ໃຫ້ແກ່ວຽກງານຊອກຫາ, ທ້ອນໂຮມ ແລະ ພິສູດເອກະລັກອັດຖິທະຫານເສຍສະຫຼະຊີວິດເພື່ອຊາດ.

"ບັ້ນຮົບ 500 ວັນ ແລະ ຄືນ" ແມ່ນຄຳໝັ້ນສັນຍາທີ່ມີລັກສະນະປະຫວັດສາດ.

ເພື່ອໃຫ້ຄຳໝັ້ນສັນຍານັ້ນໄດ້ຮັບການປະຕິບັດຢ່າງສົມບູນແບບ, ທົ່ວສັງຄົມ ແລະ ທົ່ວລະບົບການເມືອງ ຕ້ອງຮ່ວມແຮງຮ່ວມໃຈກັນເຄື່ອນໄຫວດ້ວຍຈິດວິນຍານທີ່ຮີບຮ້ອນ, ວ່ອງໄວ ແລະ ຕັ້ງໃຈຢ່າງເດັດດ່ຽວ ທີ່ຈະບໍ່ປ່ອຍໃຫ້ການເສຍສະຫຼະໃດໆ ຖືກຫຼົງລືມເປັນອັນຂາດ.

ບັ້ນຮົບ 500 ວັນ ແລະ ຄ່ຳຄືນ: ເກັບຕົວຢ່າງ, ຫັນເປັນດິຈິຕອນຂໍ້ມູນອັດຖິທະຫານເສຍສະຫຼະຊີວິດເພື່ອຊາດ 1.456 ທ່ານ ຍສໝ - ວັນທີ 16 ມິຖຸນາ, ຄະນະຊີ້ນຳການຊອກຫາ, ທ້ອນໂຮມ ແລະ ກຳນົດຕົວຕົນອັດຖິທະຫານເສຍສະຫຼະຊີວິດເພື່ອຊາດ ນະຄອນ ເຫ້ວ ໄດ້ປະສານງານຮ່ວມກັບ ຄະນະກຳມະການປະຊາຊົນຕາແສງ ອານກິວ (An Cựu) (ນະຄອນ ເຫ້ວ) ຈັດຕັ້ງການເກັບຕົວຢ່າງອັດຖິທະຫານເສຍສະຫຼະຊີວິດເພື່ອຊາດ ທີ່ຍັງບໍ່ທັນສາມາດກຳນົດຕົວຕົນໄດ້ ເພື່ອຮັບໃຊ້ເຂົ້າໃສ່ວຽກງານການກວດພິສູດ DNA ຢູ່ທີ່ ປ່າຊ້າທະຫານເສຍສະຫຼະຊີວິດເພື່ອຊາດ ນະຄອນ ...

ວັນ​ທີ 2 ກັນຍາ ​ແມ່ນ​ວັນ​ມໍລະດົກ​ມິດຕະພາບ ​ຫວຽດນາມ - ອາ​ເມ​ລິ​ກາ ຢູ່ນະຄອນ ຊານຟານຊິດສໂກ ຍສໝ - ໃນ​​ການໄປ​ຢ້ຽມ​ຢາມ ແລະ ເຮັດວຽກ​ຂອງ​ຄະ​ນະ​ຜູ້​ແທນ​ກະ​ຊວງ​ການ​ຕ່າງ​ປະ​ເທດ ຫວຽດນາມ, ຄະ​ນະ​ກຳ​ມະ​ການ​ແຫ່ງ​ລັດ​ກ່ຽວ​ກັບ​ຊາວ​ຫວຽດ​ນາມ ຢູ່ອາ​ເມ​ລິ​ກາ ໃນ​ທ້າຍ​ເດືອນສິງຫາ 2024, ທ່ານນາງ​ຮອງ​ລັດ​ຖະ​ມົນ​ຕີ ເລ​ທິ​ທູ​ຮັ່ງ, ປະ​ທານ​ຄະ​ນະ​ກຳ​ມະ​ການ ໄດ້​ຮັບ​ຖະ​ແຫຼງ​ການ​ຈາກ​ເຈົ້າ​ຄອງ​ນະ​ຄອນຊານຟານຊິດສໂກ ລົງນາມ ດ້ວຍ​ເນື້ອ​ໃນ​ປະກາດ​ເອົາ​ວັນ​ທີ 2 ກັນຍາ ປີ 2024 ເປັນ​ວັນ​ມໍລະດົກ​ມິດຕະພາບ ຫວຽດນາມ - ອາ​ເມ​ລິ​ກາ ຢູ່​ນະຄອນ ...