ນາຍທະຫານໜຸ່ມຊາຍແດນ ຫວຽດນາມ - ລາວ ຖະໜອມບຳລຸງສາຍພົວພັນມິດຕະພາບ ຈາກບັນດານາທີ່ຢູ່ແນວໜ້າ

	ການພົບປະແລກປ່ຽນມິດຕະພາບປ້ອງກັນຊາດຊາຍແດນ ຫວຽດນາມ - ລາວ ຄັ້ງທີສາມ ຈະຈັດຂຶ້ນນັບຕັ້ງແຕ່ວັນທີ 9-10 ກໍລະກົດ
	ເພີ່ມພູນຄູນສ້າງສາຍພົວພັນມິດຕະພາບອັນພິເສດ ຫວຽດນາມ - ລາວ ຈາກຄົນຮຸ່ນໜຸ່ມ

ຕາມການໃຫ້ຮູ້ຂອງໜັງສືພິມ ບຽນຟອງ, ງານເສວະນາແມ່ນໜຶ່ງພາຍໃນບັນດາການເຄື່ອນໄຫວຈຸດສຸມ ຂອງໂຄງການພົບປະແລກປ່ຽນນາຍທະຫານໜຸ່ມຊາຍແດນ ຫວຽດນາມ - ລາວ ປີ 2026, ແນໃສ່ເພີ່ມທະວີຄວາມຜູກພັນລະຫວ່າງພະນັກງານຮຸ່ນໜຸ່ມ ຂອງກຳລັງປົກປັກຮັກສາເສັ້ນຊາຍແດນສອງປະເທດ, ສືບທອດ ແລະ ເສີມຂະຫຍາຍມູນເຊື້ອມິດຕະພາບພິເສດ ຫວຽດນາມ - ລາວ.

ເຂົ້າຮ່ວມໂຄງການມີ ທ່ານພົນຈັດຕະວາ ວູກວົກເອິນ, ກຳມະການຄະນະປະຈຳພັກ, ຮອງປະທານການເມືອງ ທະຫານຊາຍແດນ ຫວຽດນາມ; ທ່ານພັນເອກ ດາວໄຂ ເລີດລີວັນ, ຮອງປະທານການເມືອງ, ຫົວໜ້າຫ້ອງການເມືອງ ທະຫານຊາຍແດນ ລາວ, ຫົວໜ້າຄະນະນາຍທະຫານໜຸ່ມຊາຍແດນ ລາວ; ທ່ານພັນເອກ ຫງວຽນກວກຫຽວ, ຮອງຫົວໜ້າຫ້ອງການເມືອງ ທະຫານຊາຍແດນ ຫວຽດນາມ, ຫົວໜ້າຄະນະນາຍທະຫານໜຸ່ມຊາຍແດນ ຫວຽດນາມ, ພ້ອມດ້ວຍຕາງໜ້າບັນດາອົງການ, ກົມກອງກຳລັງປະກອບອາວຸດແຂວງ ເຫງະອານ ແລະ ນາຍທະຫານໜຸ່ມສອງປະເທດຢ່າງຄັບຄາໜາແໜ້ນ.

ບັ້ນສະແດງສິລະປະວັນນະຄະດີບົດໜຶ່ງ ຢູ່ທີ່ໂຄງການ. (ພາບ: ໜັງສືພິມ ບຽນຟອງ)

ເປີດສາກໂຄງການ, ບົດລາຍງານ “ຈຸດເດັ່ນພາຍໃນວຽກງານການປະສານງານ ຂອງນາຍທະຫານໜຸ່ມຊາຍແດນ ຫວຽດນາມ - ລາວ” ໄດ້ຖ່າຍທອດຢ່າງມີຊີວິດຊີວາ ເຖິງບັນດາພາບພົດພະນັກງານ, ນັກຮົບໜຸ່ມສອງປະເທດ ທີ່ຮ່ວມເດີນທາງໄປນຳກັນຢູ່ເທິງບັນດາເສັ້ນຊາຍແດນ ພາຍໃນການປະຕິບັດໜ້າທີ່ລາດຕະເວນ, ຄຸ້ມຄອງ, ປົກປັກຮັກສາອະທິປະໄຕຜືນແຜ່ນດິນ; ປະສານງານຕໍ່ສູ້ປ້ອງກັນ, ຕ້ານອາດຊະຍາກຳ, ຊອກຄົ້ນກູ້ໄພ, ສະໜັບສະໜູນຊ່ວຍເຫຼືອປະຊາຊົນຂະຫຍາຍຕົວເສດຖະກິດ, ສ້າງຕັ້ງຊົນນະບົດໃໝ່ ແລະ ຜັນຂະຫຍາຍບັນດາການເຄື່ອນໄຫວສະຫວັດດີການສັງຄົມ.

ບໍ່ພຽງແຕ່ສະທ້ອນໃຫ້ເຫັນເຖິງປະສິດທິຜົນການປະສານງານ ພາຍໃນການປະຕິບັດໜ້າທີ່ເທົ່ານັ້ນ, ບັນດາຟີມຮູບເງົາດັ່ງກ່າວ ຍັງໄດ້ພັນລະນາເຖິງຄວາມຜູກພັນອັນສະໜິດແໜ້ນ ລະຫວ່າງ ນັກຮົບຊາຍແດນສອງປະເທດ ຜ່ານທາງແຕ່ລະບັ້ນລາດຕະເວນທວິພາຄີ, ບັນດາຄາບເຂົ້າຢູ່ທີ່ຄ້າຍທະຫານຊາຍແດນ ຫຼື ບັນດາຄັ້ງທີ່ໄດ້ຮ່ວມກັນຜ່ານຜ່າຄວາມຫຍຸ້ງຍາກ, ຄວາມລະອິດລະອ້ຽວ. ແມ່ນບັນດາປະສົບການເຫຼົ່ານັ້ນເອງ ທີ່ໄດ້ປະກອບສ່ວນສ້າງຕັ້ງຄວາມເຊື່ອໝັ້ນ, ຄວາມເຂົ້າອົກເຂົ້າໃຈ ແລະ ຄວາມຜູກພັນສະຫາຍອັນແໜ້ນແກ່ນ ລະຫວ່າງ ຮຸ່ນໜຸ່ມຂອງກຳລັງປົກປັກຮັກສາເສັ້ນຊາຍແດນ ຫວຽດນາມ ແລະ ລາວ.

ຕໍ່ເນື່ອງໂຄງການແມ່ນພາກສ່ວນການເສວະນາ ໂດຍມີການເຂົ້າຮ່ວມຂອງທ່ານພັນເອກ ເຈິ່ນດັງຄວາ, ຮອງປະທານການເມືອງ ກອງບັນຊາການທະຫານຊາຍແດນແຂວງ ເຫງະອານ; ທ່ານພັນຕີ ອາເລັກໄຊ ມາລາ, ຮອງຫົວໜ້າພະແນກປ້ອງກັນ, ຕ້ານອາດຊະຍາກຳ ແລະ ຢາເສບຕິດ, ຫ້ອງການສືບລາຊະການລັບ ກອງບັນຊາການທະຫານຊາຍແດນ ລາວ; ທ່ານຮ້ອຍເອກ ໂລແອງຕູ້, ຫົວໜ້າໜ່ວຍສືບລາຊະການລັບ, ຄ້າຍທະຫານຊາຍແດນດ່ານສາກົນ ແທັງຖຸຍ.

ຕາມການໃຫ້ຮູ້ຂອງ ໜັງສືພິມ ແລະ ສະຖານີວິທະຍຸ-ໂທລະພາບ ເຫງະອານ, ພາຍໃນບັນຍາກາດທີ່ເປີດກວ້າງ, ບັນດາຜູ້ແທນໄດ້ແບ່ງປັນຫຼາກຫຼາຍເລື່ອງລາວຕົວຈິງ ກ່ຽວກັບວິວັດທະນາການປະສານງານວຽກງານຢູ່ເທິງເສັ້ນຊາຍແດນ. ຕາມການໃຫ້ຮູ້ຂອງທ່ານຮ້ອຍເອກ ໂລແອງຕູ້, ສິ່ງທີ່ມີຄຸນຄ່າທີ່ສຸດພາຍຫຼັງແຕ່ລະໜ້າທີ່ ບໍ່ພຽງແຕ່ແມ່ນບັນດາໝາກຜົນທີ່ບັນລຸໄດ້ ພາຍໃນການຕໍ່ສູ້ປ້ອງກັນ, ຕ້ານອາດຊະຍາກຳ ຫຼື ປົກປັກຮັກສາເສັ້ນຊາຍແດນ, ຫຼັກໝາຍຊາຍແດນເທົ່ານັ້ນ, ແຕ່ຍັງແມ່ນຄວາມຜູກພັນອັນຈິງໃຈ ທີ່ໄດ້ຮັບການຖະໜອມບຳລຸງຜ່ານທາງແຕ່ລະບັ້ນວຽກງານ. ບັນດາການຈັບມືພາຍຫຼັງບັນດາການລາດຕະເວນຮ່ວມກັນ, ຄວາມເຂົ້າອົກເຂົ້າໃຈແບ່ງປັນພາຍໃນການດຳລົງຊີວິດ ແລະ ຄວາມມ່ວນຊື່ນຂອງປະຊາຊົນເມື່ອໄດ້ຮັບການສະໜັບສະໜູນຊ່ວຍເຫຼືອ ໄດ້ກາຍເປັນຮາກຖານອັນຍືນຍົງໃຫ້ແກ່ຄວາມຜູກພັນສະຫາຍ, ເພື່ອນມິດຮ່ວມຮົບ ລະຫວ່າງ ນາຍທະຫານໜຸ່ມສອງປະເທດ.

ການເສວະນາໂດຍກົງ ຮ່ວມກັບບັນດາແຂກຮັບເຊີນ ທີ່ເປັນພະນັກງານ, ນາຍທະຫານຊາຍແດນສອງປະເທດ. (ພາບ: ໜັງສືພິມ ແລະ ສະຖານີວິທະຍຸ-ໂທລະພາບ ເຫງະອານ)

ການແບ່ງປັນຢູ່ທີ່ງານເສວະນາ, ທ່ານພັນຕີ ອາເລັກໄຊ ມາລາ ໄດ້ຢັ້ງຢືນວ່າ ຮາກຖານອັນສຳຄັນທີ່ສຸດ ເພື່ອໃຫ້ການປະສານງານນັບມື້ນັບມີປະສິດທິຜົນ ເຊິ່ງແມ່ນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ຄວາມໄວ້ເນື້ອເຊື່ອໃຈ ລະຫວ່າງ ສອງພັກ, ສອງລັດ, ສອງກອງທັບ ກໍຄືກຳລັງປົກປັກຮັກສາເສັ້ນຊາຍແດນ ຫວຽດນາມ ແລະ ລາວ. ເຖິງວ່າຈະຕ້ອງຜະເຊີນໜ້າກັບຄວາມຫຍຸ້ງຍາກຫຼາກຫຼາຍປະການ ເຊັ່ນ: ສະພາບພູມິປະເທດທີ່ເປັນຕາຢ້ານ, ສະພາບອາກາດທີ່ຮ້າຍແຮງ, ການເຄື່ອນໄຫວຂອງບັນດາປະເພດອາດຊະຍາກຳຂ້າມຊາຍແດນ, ໂດຍສະເພາະແມ່ນອາດຊະຍາກຳຢາເສບຕິດ, ຫຼື ຄວາມແຕກຕ່າງກັນທາງດ້ານພາສາ ແລະ ເງື່ອນໄຂຊີວິດການເປັນຢູ່, ແຕ່ດ້ວຍຈິດໃຈຄວາມຮັບຜິດຊອບ ແລະ ຄວາມໄວ້ເນື້ອເຊື່ອໃຈເຊິ່ງກັນແລະກັນ, ນາຍທະຫານໜຸ່ມສອງປະເທດ ຍາມໃດກໍປະສານງານກັນຢ່າງແໜ້ນແຟ້ນ ເພື່ອສຳເລັດທຸກໆໜ້າທີ່ເປັນຢ່າງດີ.

ຕາມການໃຫ້ຮູ້ຂອງທ່ານພັນເອກ ເຈິ່ນດັງຄວາ, ຖັນແຖວນາຍທະຫານໜຸ່ມ ພວມມີບົດບາດເປັນກຳລັງຫຼັກແຫຼ່ງ ພາຍໃນການຜັນຂະຫຍາຍບັນດາການເຄື່ອນໄຫວຮ່ວມມື ລະຫວ່າງ ກຳລັງປົກປັກຮັກສາເສັ້ນຊາຍແດນສອງປະເທດ. ຜ່ານທາງບັນດາການເຄື່ອນໄຫວລາດຕະເວນທວິພາຄີ, ພົບປະແລກປ່ຽນ, ແບ່ງປັນບົດຮຽນ ແລະ ສະໜັບສະໜູນຊ່ວຍເຫຼືອປະຊາຊົນເຂດຊາຍແດນ, ພະນັກງານຮຸ່ນໜຸ່ມ ໄດ້ປະກອບສ່ວນສ້າງຕັ້ງຄວາມເຊື່ອໝັ້ນ, ເພີ່ມທະວີຄວາມເຂົ້າອົກເຂົ້າໃຈເຊິ່ງກັນແລະກັນ ແລະ ສ້າງຮາກຖານອັນໜັກແໜ້ນໃຫ້ແກ່ສາຍພົວພັນການຮ່ວມມືຍາວນານ ລະຫວ່າງ ກຳລັງປົກປັກຮັກສາເສັ້ນຊາຍແດນ ຫວຽດນາມ ແລະ ລາວ.

ອັດສາກໂຄງການ, ຕາງໜ້ານາຍທະຫານໜຸ່ມສອງປະເທດ ໄດ້ຮ່ວມກັນສະແດງຄວາມມຸ່ງມັ້ນທຸ້ມເທ ທີ່ຈະສືບຕໍ່ສືບທອດມູນເຊື້ອຄວາມສາມັກຄີພິເສດ ຫວຽດນາມ - ລາວ, ບໍ່ຢຸດຢັ້ງການຮ່ຳຮຽນ, ຝຶກຝົນຫຼໍ່ຫຼອມ, ຍົກສູງລະດັບຄວາມຮູ້ວິຊາສະເພາະ, ເສີມຂະຫຍາຍຈິດໃຈການເປັນກຳລັງປະຈັນບານ, ປະດິດສ້າງ ເພື່ອຮ່ວມກັນປົກປັກຮັກສາອະທິປະໄຕຜືນແຜ່ນດິນຢ່າງໝັ້ນຄົງ, ຮັກສາຄວາມໝັ້ນຄົງເສັ້ນຊາຍແດນແຫ່ງຊາດ ແລະ ຖະໜອມບຳລຸງສາຍພົວພັນມິດຕະພາບ "ຂຽວສົດງົດງາມຕະຫຼອດກາລະນານ, ໝັ້ນຄົງທະນົງແກ່ນຊົ່ວຟ້າດິນສະຫຼາຍ".

ການນຳຂອງສອງຄະນະນາຍທະຫານໜຸ່ມ ກໍໄດ້ເຫັນດີເປັນເອກະພາບ ທີ່ຈະສືບຕໍ່ເປີດກວ້າງບັນດາການເຄື່ອນໄຫວພົບປະແລກປ່ຽນ, ແບ່ງປັນບົດຮຽນ, ບຳລຸງທັກສະໃຫ້ແກ່ພະນັກງານຮຸ່ນໜຸ່ມ; ເພີ່ມທະວີການປະສານງານຄຸ້ມຄອງ, ປົກປັກຮັກສາເສັ້ນຊາຍແດນ, ຫຼັກໝາຍຊາຍແດນ, ຕໍ່ສູ້ຢ່າງມີປະສິດທິຜົນກັບບັນດາປະເພດອາດຊະຍາກຳຂ້າມຊາຍແດນ, ເປັນຕົ້ນແມ່ນອາດຊະຍາກຳຢາເສບຕິດ. ຄຽງຄູ່ກັນນັ້ນ, ສອງຝ່າຍຈະຊຸກຍູ້ບັນດາການເຄື່ອນໄຫວມຸ່ງໄປຫາປະຊາຊົນ ເຊ່ນ: ການກວດ, ປິ່ນປົວພະຍາດ, ເບິ່ງແຍງສຸຂະພາບຊຸມຊົນ, ສະໜັບສະໜູນຊ່ວຍເຫຼືອນັກຮຽນທີ່ມີເງື່ອນໄຂຄວາມຫຍຸ້ງຍາກ, ສ້າງຕັ້ງກິດຈະການຊີວິດການເປັນຢູ່ຂອງປະຊາຊົນ, ປົກປັກຮັກສາສິ່ງແວດລ້ອມ ແລະ ສະໜັບສະໜູນຊ່ວຍເຫຼືອການດຳລົງຊີວິດໃຫ້ແກ່ປະຊາຊົນເຂດຊາຍແດນ. ໃນຂະນະດຽວກັນ, ວຽກງານການສຶກສາມູນເຊື້ອ ກໍຈະສືບຕໍ່ໄດ້ຮັບການເອົາໃຈໃສ່ ແນໃສ່ຊ່ວຍໃຫ້ຮຸ່ນນາຍທະຫານໜຸ່ມ ຮັບຮູ້ໄດ້ຢ່າງເລິກເຊິ່ງກວ່າເກົ່າ ເຖິງຄຸນຄ່າຂອງສາຍພົວພັນຄວາມສາມັກຄີພິເສດ ຫວຽດນາມ - ລາວ ແລະ ຄວາມຮັບຜິດຊອບພາຍໃນການຮັກສາ, ເສີມຂະຫຍາຍມໍລະດົກອັນລ້ຳຄ່າ ທີ່ບັນດາຮຸ່ນຄົນກ່ອນໄດ້ຮ່ວມກັນສ້າງສາໄວ້.

ການນຳຄະນະນາຍທະຫານໜຸ່ມສອງປະເທດ ມອບທຶນການສຶກສາໃຫ້ແກ່ນັກຮຽນ. (ພາບ: ໜັງສືພິມ ແລະ ສະຖານີວິທະຍຸ-ໂທລະພາບ ເຫງະອານ)

ໂອກາດນີ້, ຄະນະຈັດຕັ້ງໄດ້ມອບທຶນການສຶກສາ 100 ທຶນ ໃຫ້ແກ່ນັກຮຽນທີ່ມີເງື່ອນໄຂຄວາມຫຍຸ້ງຍາກ ຢູ່ເຂດຊາຍແດນແຂວງ ເຫງະອານ. ນີ້ແມ່ນພາກສ່ວນໜຶ່ງພາຍໃນຈຳນວນທຶນການສຶກສາທັງໝົດ 200 ທຶນ ໂດຍແມ່ນກະຊວງປ້ອງກັນປະເທດ ຫວຽດນາມ ມອບໃຫ້ ພາຍໃນຂອບເຂດໂຄງການພົບປະແລກປ່ຽນມິດຕະພາບປ້ອງກັນຊາດຊາຍແດນ ຫວຽດນາມ - ລາວ ຄັ້ງທີ 3, ເຊິ່ງສະຫງວນໃຫ້ແກ່ນັກຮຽນ ຫວຽດນາມ 100 ຄົນ ແລະ ນັກຮຽນລາວ 100 ຄົນ. ບັນດາທຶນການສຶກສາດັ່ງກ່າວ ບໍ່ພຽງແຕ່ເພີ່ມກຳລັງໃຈ ເພື່ອໃຫ້ພວກນ້ອງກ້າວຂຶ້ນພາຍໃນການຮໍ່າຮຽນເທົ່ານັ້ນ, ແຕ່ຍັງປະກອບສ່ວນແຜ່ຂະຫຍາຍຈິດໃຈຄວາມສາມັກຄີ, ການແບ່ງປັນ, ມຸ່ງໄປເຖິງການສ້າງຕັ້ງຮຸ່ນໜຸ່ມສອງປະເທດ ໃຫ້ສືບຕໍ່ຮັກສາ ແລະ ເສີມຂະຫຍາຍສາຍພົວພັນມິດຕະພາບພິເສດ ຫວຽດນາມ - ລາວ.

ຜັນຂະຫຍາຍຄຳໝັ້ນສັນຍາການລົງທຶນ, ເສີມຂະຫຍາຍບົດບາດຂອງວິສາຫະກິດ ໃນສາຍພົວພັນ ຫວຽດນາມ - ລາວ ຍສໝ - ຕາມການລາຍງານຂອງນັກຂ່າວສຳນັກຂ່າວສານຫວຽດນາມ (TTXVN) ປະຈຳ ສປປ ລາວ ໃຫ້ຮູ້ວ່າ: ໃນວັນທີ 28 ມິຖຸນາ, ຢູ່ທີ່ນະຄອນຫຼວງວຽງຈັນ, ບໍລິສັດ ເຄເອັນ ວຽງຈັນ ກຣຸບ ຈຳກັດ (KN Vientiane Group Co., Ltd) ແລະ ບໍລິສັດ ຣຽວ ...

ນະຄອນ ໂຮ່ຈີມິນ: ງານບຸນ "ຄອບຄົວ ຫວຽດນາມ - ລາວ - ກຳປູເຈຍ" ແຜ່ຂະຫຍາຍສາຍຈິດມິດຕະພາບ ຍສໝ - ວັນທີ 28 ມິຖຸນາ, ຢູ່ທີ່ຫໍພັກນັກສຶກສາ ລາວ - ກຳປູເຈຍ (ນະຄອນ ໂຮ່ຈີມິນ), ຄະນະປະຈຳຄະນະຊາວໜຸ່ມນະຄອນ ໂຮ່ຈີມິນ ສົມທົບຮ່ວມກັບ ຄະນະອຳນວຍການຫໍພັກ ຈັດຕັ້ງງານບຸນ "ຄອບຄົວ ຫວຽດນາມ - ລາວ - ກຳປູເຈຍ" ປະຈຳປີ 2026.