ສະເໜີກົນໄກເສີມຂະຫຍາຍແຫຼ່ງທຶນຂອງພີ່ນ້ອງຮ່ວມຊາດຢູ່ຕ່າງປະເທດ, ຍົກສູງປະສິດທິຜົນວຽກງານການທູດປະຊາຊົນ

	ສາຍໃຍເຊື່ອມໂຍງພີ່ນ້ອງຮ່ວມຊາດ
	ແຜ່ຂະຫຍາຍສານກ່ຽວກັບ ຫວຽດນາມ ທີ່ຂະຫຍັນຂັນເຄື່ອນ, ປ່ຽນແປງໃໝ່, ເຊື່ອມໂຍງ ແລະ ບືນຕົວຂຶ້ນຢ່າງແຂງແຮງ ຢູ່ກອງປະຊຸມສຸດຍອດ ອາຊຽນ ຄັ້ງທີ 48

ສູນສົນທະນາພາຍໃຕ້ຫົວຂໍ້ "ຍົກສູງປະສິດທິຜົນການເຄື່ອນໄຫວການທູດປະຊາຊົນ, ຂະຫຍາຍການຮ່ວມມືສາກົນ, ປະກອບສ່ວນເຂົ້າໃນການສ້າງສາ ແລະ ປົກປັກຮັກສາປະເທດຊາດ ໃນຍຸກສະໄໝແຫ່ງການກ້າວຜ່ານຂອງປະຊາຊາດ" ໂດຍແມ່ນທ່ານນາງ ເລທິຖຸຍ, ກຳມະການຄະນະບໍລິຫານງານສູນກາງພັກ, ຮອງປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ, ປະທານສະຫະພັນແມ່ຍິງຫວຽດນາມ ແລະ ທ່ານ ຮວ່າງກົງຖຸຍ, ຮອງປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ເປັນປະທານຮ່ວມ.

ເຂົ້າຮ່ວມມີບັນດາກຳມະການຄະນະປະທານ, ກຳມະການຄະນະກຳມະການສູນກາງແນວໂຮມປະເທດຊາດ ຫວຽດນາມ ສະໄໝທີ X; ຕົວຕາງໜ້າບັນດາອົງການຈັດຕັ້ງສະມາຊິກຂອງແນວໂຮມປະເທດຊາດ ຫວຽດນາມ; ພະນັກງານວິຊາການຂອງອົງການຄະນະກຳມະການສູນກາງແນວໂຮມປະເທດຊາດ ຫວຽດນາມ; ຜູ້ແທນທີ່ເປັນຊາວຫວຽດນາມຢູ່ຕ່າງປະເທດ ພ້ອມດ້ວຍບັນດາຄະນະຜູ້ແທນທີ່ມາຈາກບັນດາແຂວງ ແລະ ນະຄອນຕ່າງໆ.

ບັນດາຜູ້ແທນຢູ່ທີ່ສູນສົນທະນາໝາຍເລກ 4. (ພາບ: Dinh Hoa)

ເສີມຂະຫຍາຍບົດບາດເສົາຄ້າຍຸດທະສາດຂອງການທູດປະຊາຊົນ

ກ່າວຄຳເຫັນນຳສະເໜີ, ທ່ານນາງ ເລທິຖຸຍ ໃຫ້ຮູ້ວ່າ: ການເຄື່ອນໄຫວການທູດປະຊາຊົນ ແລະ ວຽກງານຊາວຫວຽດນາມຢູ່ຕ່າງປະເທດ ມີຄວາມໝາຍສຳຄັນເປັນພິເສດໃນວຽກງານແນວໂຮມ; ແມ່ນວິທີການທີ່ແທດຕົວຈິງ ເພື່ອຂະຫຍາຍກຸ່ມມະຫາສາມັກຄີທົ່ວປວງຊົນທັງຊາດ, ເພີ່ມທະວີຄວາມມັກຄີມິດທະພາບລະຫວ່າງປະຊາຊົນຫວຽດນາມ ກັບປະຊາຊົນບັນດາປະເທດ, ຍາດແຍ່ງເອົາຄວາມເຫັນດີເຫັນພ້ອມ ແລະ ການສະໜັບສະໜູນຈາກເພື່ອນມິດສາກົນ. ພ້ອມທັງ, ເສີມຂະຫຍາຍແຫຼ່ງທຶນອັນມະຫາສານຂອງປະຊາຄົມຊາວຫວຽດນາມຢູ່ຕ່າງປະເທດ ທີ່ມີຕໍ່ພາລະກິດສ້າງສາ ແລະ ປົກປັກຮັກສາປະເທດຊາດ.

ຕາມທ່ານນາງແລ້ວ, ເມື່ອກ້າວເຂົ້າສູ່ຍຸກສະໄໝໃໝ່, ຄວາມຮຽກຮ້ອງຕ້ອງການທີ່ມີຕໍ່ການເຄື່ອນໄຫວການທູດປະຊາຊົນ ແລະ ວຽກງານຊາວຫວຽດນາມຢູ່ຕ່າງປະເທດ ນັບມື້ນັບສູງຂຶ້ນ, ຮຽກຮ້ອງໃຫ້ຕ້ອງສືບຕໍ່ປ່ຽນແປງໃໝ່ເນື້ອໃນ ແລະ ວິທີການເຄື່ອນໄຫວ ຕາມທິດທາງແທດຕົວຈິງ, ເປັນມືອາຊີບ, ທັນສະໄໝ ແລະ ມີປະສິດທິຜົນກວ່າເກົ່າ.

ກ່າວຄຳເຫັນຢູ່ທີ່ສູນສົນທະນາ, ທ່ານ ຟານແອງເຊີນ, ປະທານສະຫະພັນບັນດາອົງການຈັດຕັ້ງມິດທະພາບ ຫວຽດນາມ ຖືວ່າ: ຄຽງຄູ່ກັບການທູດຂອງພັກ ແລະ ການທູດຂອງລັດ, ການທູດປະຊາຊົນໃນໄລຍະຜ່ານມາ ໄດ້ປະກອບສ່ວນຢ່າງຕັ້ງໜ້າໃນການຜັນຂະຫຍາຍບັນດາເຄື່ອນໄຫວການທູດຂອງການນຳພັກ ແລະ ລັດ ຢ່າງມີປະສິດທິຜົນ; ພ້ອມທັງປັບປຸງສາຍພົວພັນສາມັກຄີມິດທະພາບລະຫວ່າງປະຊາຊົນຫວຽດນາມ ກັບປະຊາຊົນບັນດາປະເທດໃຫ້ແໜ້ນແຟ້ນຍິ່ງຂຶ້ນ.

ທ່ານ ຟານແອງເຊີນ ໄດ້ສະເໜີໃຫ້ເຮັດແຈ້ງກວ່າເກົ່າ ກ່ຽວກັບໝາກຜົນຕົວຈິງຂອງການເຄື່ອນໄຫວການທູດປະຊາຊົນ ໃນລະບົບ ແນວໂຮມປະເທດຊາດ ຫວຽດນາມ ແລະ ບັນດາອົງການຈັດຕັ້ງສະມາຊິກໃນໄລຍະຜ່ານມາ, ໂດຍສະເພາະແມ່ນໃນບັນດາຂົງເຂດ ແລະ ເຂດພື້ນທີ່ທີ່ການທູດຂອງພັກ ແລະ ການທູດຂອງລັດ ຍາກທີ່ຈະຜັນຂະຫຍາຍໂດຍກົງ ຫຼື ຍັງບໍ່ທັນສະດວກໃນການຜັນຂະຫຍາຍ.

ທ່ານ ຟານແອງເຊີນ, ປະທານສະຫະພັນບັນດາອົງການຈັດຕັ້ງມິດທະພາບ ຫວຽດນາມ, ກ່າວຄຳເຫັນຢູ່ທີ່ສູນສົນທະນາໝາຍເລກ 4. (ພາບ: Dinh Hoa)

ຕາມທ່ານແລ້ວ, ມະຕິກອງປະຊຸມໃຫຍ່ ຄັ້ງທີ XIV ຂອງພັກ ໄດ້ກຳນົດວ່າ ການທູດປະຊາຊົນ ແມ່ນໜຶ່ງໃນເສົາຄ້າຍຸດທະສາດ ໃນພື້ນຖານການທູດທີ່ຮອບດ້ານ, ທັນສະໄໝ ແລະ ເປັນມືອາຊີບຂອງ ຫວຽດນາມ. ສິ່ງນີ້ຮຽກຮ້ອງໃຫ້ຕ້ອງສືບຕໍ່ປັບປຸງກົນໄກປະສານງານ, ການກໍ່ສ້າງກຳລັງພົນ, ເພີ່ມທະວີການສົມທົບ ແລະ ຈັດສັນແຫຼ່ງທຶນທີ່ເໝາະສົມໃຫ້ແກ່ວຽກງານການທູດປະຊາຊົນໃນທົ່ວລະບົບ.

ທ່ານຍັງໃຫ້ຮູ້ຕື່ມວ່າ, ສະເພາະແຫຼ່ງທຶນຊ່ວຍເຫຼືອ ແລະ ການສະໜັບສະໜູນຜ່ານບັນດາອົງການຈັດຕັ້ງທີ່ບໍ່ແມ່ນລັດຖະບານຕ່າງປະເທດ ໃນໄລຍະ 5 ປີຜ່ານມາ ບັນລຸໄດ້ສະເລ່ຍປະມານ 240-245 ລ້ານ USD ຕໍ່ປີ, ເຊິ່ງສະແດງໃຫ້ເຫັນເຖິງທ່າແຮງອັນໃຫຍ່ຫຼວງຂອງວຽກງານການທູດປະຊາຊົນ ໃນການປຸກລະດົມແຫຼ່ງທຶນສາກົນ ເພື່ອຮັບໃຊ້ການພັດທະນາ ແລະ ສະຫວັດດີການສັງຄົມ.

ເມື່ອກ່າວເຖິງວຽກງານຊາວຫວຽດນາມຢູ່ຕ່າງປະເທດ, ປະທານສະຫະພັນບັນດາອົງການຈັດຕັ້ງມິດທະພາບ ຫວຽດນາມ ຟານແອງເຊີນ ຖືວ່າ ຈຳເປັນຕ້ອງມີວິທີການທີ່ລະອຽດກວ່າ ເພື່ອເສີມຂະຫຍາຍບົດບາດຂອງຖັນແຖວປັນຍາຊົນ ແລະ ຊ່ຽວຊານພີ່ນ້ອງຮ່ວມຊາດຢູ່ຕ່າງປະເທດ; ໃນນັ້ນ ຄວນກຳນົດຕົວເລກປະສິດທິຜົນການເຂົ້າຮ່ວມຂອງປັນຍາຊົນຊາວຫວຽດນາມຢູ່ຕ່າງປະເທດ ໃນບັນດາສະພາໃຫ້ຄຳປຶກສາ, ບັນດາແຜນງານ ແລະ ໂຄງການທີ່ລະອຽດ ແທນທີ່ຈະຢຸດຢູ່ພຽງແຕ່ແນວທາງລວມ.

ຫຼາຍຜູ້ແທນເຫັນວ່າ ເຄື່ອນໄຫວການທູດປະຊາຊົນ ຕ້ອງຫັນປ່ຽນຢ່າງແຂງແຮງຈາກການແລກປ່ຽນມິດທະພາບ ໄປສູ່ການຮ່ວມມືທີ່ແທດຕົວຈິງ, ຕິດພັນກັບການພັດທະນາເສດຖະກິດ-ສັງຄົມ, ການປົກປັກຮັກສາອະທິປະໄຕ, ຮັກສາສະພາບແວດລ້ອມແຫ່ງສັນຕິພາບ ແລະ ສະຖຽນລະພາບ ເພື່ອການພັດທະນາປະເທດຊາດ.

ທ່ານ ຫງວຽນຈີແທັງ, ຮອງປະທານປະຈຳການ ຄະນະກຳມະການແນວໂຮມປະເທດຊາດ ແຂວງ ກວາງນິງ ໃຫ້ຮູ້ວ່າ, ແຂວງ ກວາງນິງ ໄດ້ເປັນເຈົ້າການໃນການຂະຫຍາຍ ແລະ ເຮັດໃຫ້ການພົວພັນຮ່ວມມືກັບບັນດາທ້ອງຖິ່ນຂອງ ຈີນ ເລິກເຊິ່ງກວ່າເກົ່າ, ໂດຍຈຸດສຸມແມ່ນ ເຂດປົກຄອງຕົນເອງເຜົ່າຈ້ວງ ກວາງຊີ. ທັງສອງຝ່າຍໄດ້ລົງນາມໃນບົດບັນທຶກການເຈລະຈາ 5 ສະບັບ ແລະ ບົດບັນທຶກຄວາມເຂົ້າໃຈການຮ່ວມມື 11 ສະບັບ ໃນຫຼາຍຂົງເຂດ, ສ້າງພື້ນຖານຊຸກຍູ້ການແລກປ່ຽນລະຫວ່າງປະຊາຊົນ ແລະ ການຮ່ວມມືທ້ອງຖິ່ນ. ຮູບແບບການເປັນເມືອງແຮກສ່ຽວຂອງກຸ່ມປະຊາກອນສອງຟາກຊາຍແດນ ຍັງຄົງໄດ້ຮັບການຮັກສາ, ປະກອບສ່ວນເຂົ້າໃນການປະສານງານປົກປັກຮັກສາອະທິປະໄຕ, ຮັກສາຄວາມສະຫງົບຮຽບຮ້ອຍ, ຊ່ວຍເຫຼືອການພັດທະນາເສດຖະກິດ, ປົກປັກຮັກສາສະພາບແວດລ້ອມ ແລະ ແກ້ໄຂບັນຫາຕ່າງໆທີ່ເກີດຂຶ້ນຢູ່ຮາກຖານຢ່າງທັນການ.

ຕາມທ່ານ ຫງວຽນຈີແທັງ ແລ້ວ, ການທູດປະຊາຊົນ ຕ້ອງຕິດພັນຢ່າງແໜ້ນແຟ້ນກັບໜ້າທີ່ພັດທະນາເສດຖະກິດ-ສັງຄົມ, ປັບປຸງວຽກງານປ້ອງກັນຊາດ-ປ້ອງກັນຄວາມສະຫງົບ, ພ້ອມທັງຍູ້ແຮງການນຳໃຊ້ເຕັກໂນໂລຊີດີຈີຕອນ, ປ່ຽນແປງໃໝ່ວຽກງານຂໍ້ມູນຂ່າວສານຕ່າງປະເທດ ຕາມທິດທາງທີ່ທັນສະໄໝ ແລະ ມີປະສິດທິຜົນກວ່າເກົ່າ.

ທ່ານ ລໍຢ່າງປາວ, ຮອງປະທານສະພາໃຫ້ຄຳປຶກສາດ້ານຊົນເຜົ່າ, ຄະນະກຳມະການສູນກາງແນວໂຮມປະເທດຊາດ ຫວຽດນາມ, ໄດ້ສະເໜີໃຫ້ເພີ່ມທະວີກົນໄກຊ່ວຍເຫຼືອຖັນແຖວບຸກຄົນຕົວແບບ, ໂດຍສະເພາະແມ່ນຢູ່ເຂດພີ່ນ້ອງຊົນເຜົ່າສ່ວນໜ້ອຍ ແລະ ເຂດຊາຍແດນ; ພ້ອມທັງຍົກສູງຄຸນນະພາບວຽກງານຂໍ້ມູນຂ່າວສານ, ບຳລຸງທັກສະ ແລະ ສ້າງເງື່ອນໄຂໃຫ້ບັນດາບຸກຄົນຕົວແບບໄດ້ເຂົ້າຮ່ວມເລິກເຊິ່ງກວ່າເກົ່າ ເຂົ້າໃນການເຄື່ອນໄຫວຂອງ ແນວໂຮມ ຢູ່ຮາກຖານ.

ຈຳເປັນຕ້ອງມີກົນໄກທີ່ແທດຕົວຈິງ ເພື່ອເສີມຂະຫຍາຍແຫຼ່ງທຶນຂອງພີ່ນ້ອງຮ່ວມຊາດຢູ່ຕ່າງປະເທດ

ເນື້ອໃນທີ່ດຶງດູດຄຳເຫັນຫຼາຍທີ່ສຸດໃນວາລະສົນທະນາ ແມ່ນວິທີການແກ້ໄຂເພື່ອເສີມຂະຫຍາຍປະສິດທິຜົນແຫຼ່ງທຶນຂອງປະຊາຄົມຊາວຫວຽດນາມຢູ່ຕ່າງປະເທດ, ໂດຍສະເພາະແມ່ນຖັນແຖວປັນຍາຊົນ, ຊ່ຽວຊານ ແລະ ນັກທຸລະກິດພີ່ນ້ອງຮ່ວມຊາດຢູ່ຕ່າງປະເທດ.

ທ່ານນາງ ຟານບິກທ້ຽນ (Phan Bích Thiện), ປະທານເວທີປາໄສແມ່ຍິງຫວຽດນາມ ຢູ່ ເອີຣົບ, ປະທານສະມາຄົມແມ່ຍິງຫວຽດນາມ ຢູ່ ຮົງກາຣີ (Hungary), ກ່າວຄຳເຫັນຢູ່ທີ່ສູນສົນທະນາໝາຍເລກ 4. (ພາບ: Dinh Hoa)

ທ່ານນາງ ຟານບິກທ້ຽນ, ປະທານເວທີປາໄສແມ່ຍິງຫວຽດນາມ ຢູ່ ເອີຣົບ, ປະທານສະມາຄົມແມ່ຍິງຫວຽດນາມ ຢູ່ Hungary ຖືວ່າ: ວັດທະນະທຳແມ່ນ "ພະລັງອ່ອນ" (soft power) ທີ່ມີປະສິດທິຜົນ ເພື່ອໂຄສະນາພາບພົດຂອງປະເທດຊາດ ແລະ ເຊື່ອມຕໍ່ປະຊາຄົມຊາວຫວຽດນາມຢູ່ຕ່າງປະເທດ. ຜ່ານບັນດາເຄື່ອນໄຫວເຊີດຊູເຊື້ອຍາວ, ມໍລະດົກວັດທະນະທຳ ຫຼື ການປະກວດຂຽນສຳລັບແມ່ຍິງຫວຽດນາມຢູ່ຕ່າງປະເທດ, ຄວາມຮັກບ້ານເກີດເມືອງນອນ ແລະ ພາສາຫວຽດນາມ ໄດ້ຮັບການແຜ່ກະຈາຍຢ່າງເປັນທຳມະຊາດໄປສູ່ຄົນລຸ້ນໜຸ່ມ.

ແນວໃດກໍຕາມ, ຕາມທ່ານນາງແລ້ວ, ເພື່ອເສີມຂະຫຍາຍປະສິດທິຜົນແຫຼ່ງທຶນຂອງພີ່ນ້ອງຮ່ວມຊາດຢູ່ຕ່າງປະເທດ ແມ່ນຈຳເປັນຕ້ອງມີກົນໄກທີ່ລະອຽດກວ່າ ເພື່ອຊ່ວຍເຫຼືອບັນດາກຳມະການແນວໂຮມປະເທດຊາດ ຫວຽດນາມ ຢູ່ຕ່າງປະເທດ ໃນການເຊື່ອມຕໍ່ກັບບັນດາອົງການຈັດຕັ້ງທີ່ທຽບເທົ່າຢູ່ປະເທດເຈົ້າພາບ; ພ້ອມທັງປ່ຽນແປງໃໝ່ວິທີການເຂົ້າເຖິງຄົນລຸ້ນໜຸ່ມຢູ່ຕ່າງປະເທດ ຜ່ານເວທີດີຈີຕອນ ແລະ ສື່ມວນຊົນຫຼາຍພາສາ ເພື່ອສ້າງພື້ນທີ່ທີ່ໜ້າດຶງດູດ, ຊຸກຍູ້ໃຫ້ເຂົາເຈົ້າປະກອບສ່ວນສະຕິປັນຍາໃຫ້ແກ່ປະເທດຊາດ.

ດ້ວຍໄລຍະເວລາກວ່າ 40 ປີ ທີ່ເຮັດວຽກຢູ່ ລັດເຊຍ, ທ່ານ ຫງວຽນກວກສື, ຮອງປະທານປະຈຳການສະມາຄົມບັນດາມະຫາວິທະຍາໄລ ແລະ ວິທະຍາໄລຫວຽດນາມ ໃຫ້ຮູ້ວ່າ: ປັດຈຸບັນມີປັນຍາຊົນປະມານ 600,000 ຄົນ ໃນຈຳນວນຊາວຫວຽດນາມຢູ່ຕ່າງປະເທດທັງໝົດກວ່າ 6 ລ້ານຄົນ. ນີ້ແມ່ນແຫຼ່ງທຶນທີ່ໃຫຍ່ຫຼວງຫຼາຍ ທີ່ພວມອາໄສຢູ່ໃນຫຼາຍປະເທດທີ່ມີຄວາມກ້າວໜ້າທາງດ້ານວິທະຍາສາດ ແລະ ເຕັກໂນໂລຊີ.

ແນວໃດກໍຕາມ, ຕາມທ່ານ ຫງວຽນກວກສື ແລ້ວ, ຫຼາຍປີຜ່ານມາພວກເຮົາໄດ້ເວົ້າເຖິງທ່າແຮງຂອງຖັນແຖວປັນຍາຊົນຊາວຫວຽດນາມຢູ່ຕ່າງປະເທດຫຼາຍສົມຄວນ, ແຕ່ຈຳນວນຜູ້ທີ່ເຂົ້າຮ່ວມບັນດາໂຄງການວິທະຍາສາດ ແລະ ເຕັກໂນໂລຊີ ພາຍໃນປະເທດຢ່າງແທ້ຈິງນັ້ນ ຍັງມີຈຳກັດ.

ທ່ານໄດ້ສະເໜີໃຫ້ແນວໂຮມປະເທດຊາດ ຫວຽດນາມ ຕ້ອງສວມບົດບາດເປັນແກນກາງ ໃນການເຕົ້າໂຮມຖັນແຖວປັນຍາຊົນ, ຊ່ຽວຊານຊາວຫວຽດນາມຢູ່ຕ່າງປະເທດ ເພື່ອຮັບໃຊ້ບັນດາໂຄງການວິທະຍາສາດ, ເຕັກໂນໂລຊີ, ການຫັນເປັນອຸດສາຫະກຳ ແລະ ທັນສະໄໝຂອງປະເທດຊາດ; ພ້ອມທັງຂະຫຍາຍນະໂຍບາຍດຶງດູດຊ່ຽວຊານ ແລະ ນັກວິທະຍາສາດຕ່າງປະເທດ ເຂົ້າມາມີສ່ວນຮ່ວມ ແລະ ອຸທິດສ່ວນຢູ່ ຫວຽດນາມ ໃນໄລຍະຍາວ.

ກ່າວສະຫຼຸບວາລະສົນທະນາ, ທ່ານ ຮວ່າງກົງຖຸຍ ໃຫ້ຮູ້ວ່າ: ບັນດາຄຳເຫັນໃນກອງປະຊຸມລ້ວນແຕ່ມີຄວາມເປັນເອກະພາບ ຕີລາຄາສູງຕໍ່ໝາກຜົນຂອງການເຄື່ອນໄຫວການທູດປະຊາຊົນຂອງແນວໂຮມປະເທດຊາດ ຫວຽດນາມ ໃນໄລຍະຜ່ານມາ; ພ້ອມທັງສະເໜີໃຫ້ສືບຕໍ່ປ່ຽນແປງໃໝ່ເນື້ອໃນ ແລະ ວິທີການເຄື່ອນໄຫວ ຕາມທິດທາງແທດຕົວຈິງ, ເປັນມືອາຊີບ, ມີຄວາມຄ່ອງຕົວ ແລະ ມີປະສິດທິຜົນກວ່າເກົ່າ.

ບັນດາຜູ້ແທນຍັງໄດ້ສະເໜີໃຫ້ສືບຕໍ່ຍູ້ແຮງວຽກງານຂໍ້ມູນຂ່າວສານຕ່າງປະເທດ, ໂຄສະນາພາບພົດປະເທດຊາດ ແລະ ຄົນຫວຽດນາມ; ເປັນເຈົ້າການໃນການສະໜອງຂໍ້ມູນຂ່າວສານທີ່ເປັນທາງການ, ແຜ່ກະຈາຍຂໍ້ມູນໃນແງ່ບວກ, ຕໍ່ສູ້ປະຕິເສດບັນດາຂໍ້ມູນທີ່ຜິດພາດ, ບິດເບືອນ ແລະ ແບ່ງແຍກກຸ່ມມະຫາສາມັກຄີທົ່ວປວງຊົນທັງຊາດ ໃຫ້ທັນການ.

ຫຼາຍຄຳເຫັນໄດ້ສະເໜີໃຫ້ແນວໂຮມປະເທດຊາດ ຫວຽດນາມ ສືບຕໍ່ປັບປຸງກົນໄກ ແລະ ນະໂຍບາຍ ເພື່ອເສີມຂະຫຍາຍແຫຼ່ງທຶນຂອງພີ່ນ້ອງຮ່ວມຊາດຢູ່ຕ່າງປະເທດໃຫ້ແຂງແຮງກວ່າເກົ່າ, ໂດຍສະເພາະແມ່ນຖັນແຖວປັນຍາຊົນ, ຊ່ຽວຊານ, ນັກວິທະຍາສາດ, ນັກທຸລະກິດ ແລະ ເຍົາວະຊົນຫວຽດນາມຢູ່ຕ່າງປະເທດ ເພື່ອເຂົ້າຮ່ວມການໃຫ້ຄຳປຶກສາດ້ານນະໂຍບາຍ, ການຖ່າຍທອດຄວາມຮູ້, ການລົງທຶນ, ການປະດິດສ້າງໃໝ່ ແລະ ການໂຄສະນາວັດທະນະທຳຫວຽດນາມອອກສູ່ໂລກ.

ບັນດາຄຳເຫັນຢູ່ສູນສົນທະນາ ລ້ວນແຕ່ມີຄວາມເປັນເອກະພາບເຫັນວ່າ ໃນບໍລິບົດໃໝ່, ເຄື່ອນໄຫວການທູດປະຊາຊົນ ຕ້ອງສືບຕໍ່ປ່ຽນແປງໃໝ່ຢ່າງແຂງແຮງ ຕາມທິດທາງເປັນມືອາຊີບ, ແທດຕົວຈິງ ແລະ ທັນສະໄໝກວ່າເກົ່າ, ພ້ອມທັງສ້າງກົນໄກທີ່ເຂັ້ມແຂງພໍ ເພື່ອເສີມຂະຫຍາຍປະສິດທິຜົນແຫຼ່ງທຶນສາກົນ ແລະ ປະຊາຄົມຊາວຫວຽດນາມຢູ່ຕ່າງປະເທດ ເພື່ອຮັບໃຊ້ການພັດທະນາປະເທດຊາດ.

ຫວຽດນາມ - EU: ສາຍພົວພັນຄູ່ຮ່ວມມືທີ່ເລິກເຊິ່ງ, ກ້າວໄປສູ່ອະນາຄົດ ຍສໝ - ໃນຕອນຄໍ່າວັນທີ 8 ພຶດສະພາ, ຢູ່ ຮ່າໂນ້ຍ, ຄະນະຜູ້ແທນສະຫະພາບເອີຣົບ (EU) ປະຈຳ ຫວຽດນາມ ໄດ້ຈັດພິທີສະເຫຼີມສະຫຼອງວັນເອີຣົບ ສອງພັນຊາວຫົກ (Europe Day).

ເຊື້ອຍາວ ສ້າງສະຖິຕິຄົນຫວຽດນາມທົ່ວໂລກ: ຢືນຢັນບົດບາດ ແລະ ພະລັງຊີວິດຂອງເຊື້ອຍາວ ຫວຽດນາມ ຍສໝ - ວັນທີ 8 ພຶດສະພາ, ຢູ່ທີ່ ຮ່າໂນ້ຍ, ຜົນງານ "ສູດການຕັດຫຍິບເຊື້ອຍາວແບບຫຼ່ຽມ (ly vuông)" ຂອງນັກອອກແບບ ໂດ໋ຈິ່ງຮວ່າຍນາມ (Đỗ Trịnh Hoài Nam) ໄດ້ເປີດຕົວຢ່າງເປັນທາງການ ແລະ ເປັນກຽດໄດ້ຮັບການບັນທຶກສະຖິຕິໂລກ. ເຫດການດັ່ງກ່າວບໍ່ພຽງແຕ່ແມ່ນຂີດໝາຍອັນສະຫວ່າງສະໄຫວຂອງຂະແໜງແຟຊັນເທົ່ານັ້ນ, ແຕ່ຍັງແມ່ນການຢືນຢັນຢ່າງແຂງແຮງກ່ຽວກັບພະລັງຊີວິດອັນແຮງກ້າຂອງມໍລະດົກວັດທະນະທຳ ຫວຽດນາມ, ພ້ອມທັງຍົກລະດັບເຕັກນິກການຕັດຫຍິບເຊື້ອຍາວພື້ນເມືອງໃຫ້ກາຍເປັນລະບົບຄວາມຮູ້ທີ່ໄດ້ມາດຕະຖານເພື່ອກ້າວສູ່ລະດັບສາກົນ.