ນະຄອນໂຮ່ຈີມິນ ຈັດພິທີສະເຫຼີມສະຫຼອງວັນບຸນໄຫວ້ພະເຈົ້າຮຸ່ງ ຢ່າງສົມກຽດ, ເຜີຍແຜ່ຈິດວິນຍານມຸ່ງສູ່ຕົ້ນກຳເນີດ

	ປະຊາຄົມຊາວຫວຽດນາມຢູ່ໂປໂລຍຈັດງານບຸນ ວູລານ ຢ່າງສົມກຽດ ເພື່ອຕອບບຸນແທນຄຸນພໍ່ແມ່
	ໄຂກອງປະຊຸມສະໄໝສາມັນເທື່ອທີ 9, ສະພາແຫ່ງຊາດຫວຽດນາມ ຊຸດທີ 14 ຢ່າງສົມກຽດ

ວັນບຸນໄຫວ້ພະເຈົ້າຮຸ່ງ ໃນວັນທີ 10 ເດືອນ 3 ຕາມຈັນທະປະຕິທິນຂອງທຸກໆປີ ແມ່ນໂອກາດໃຫ້ປະຊາຊົນທົ່ວປະເທດລະນຶກເຖິງຄຸນງາມຄວາມດີໃນການສ້າງຊາດ ແລະ ປົກປັກຮັກສາປະເທດຊາດຂອງບັນດາກະສັດຮຸ່ງ, ຜ່ານນັ້ນກໍ່ປະກອບສ່ວນເຂົ້າໃນການສຶກສາອົບຮົມມູນເຊື້ອປະຫວັດສາດ, ບຳລຸງສ້າງຈິດວິນຍານຮັກຊາດ ແລະ ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ.

ຂະບວນແຫ່ພິທີ, ການວາງຊໍ່ດອກໄມ້ ແລະ ຈຸດທູບລະນຶກເຖິງພະເຈົ້າຮຸ່ງ.

ກ່າວຄຳເຫັນໃນພິທີ, ທ່ານ ຫງວຽນ ເຟືອກ ລົກ (Nguyễn Phước Lộc), ກຳມະການສູນກາງພັກ, ຮອງເລຂາຄະນະພັກນະຄອນ, ປະທານຄະນະກຳມະການແນວໂຮມປະເທດຊາດຫວຽດນາມ ປະຈຳນະຄອນໂຮ່ຈີມິນ ໄດ້ເນັ້ນໜັກວ່າ: ໃນຈິດສຳນຶກຂອງຄົນຫວຽດນາມ, ບັນດາກະສັດຮຸ່ງ ແມ່ນບັນພະບຸລຸດທີ່ມີຄຸນງາມຄວາມດີໃນການສ້າງຕັ້ງປະເທດ ວັນລາງ – ລັດທຳອິດ, ວາງຮາກຖານໃຫ້ແກ່ການກຳເນີດ ແລະ ການຂະຫຍາຍຕົວຂອງຊາດ, ກາຍເປັນບັນພະບຸລຸດລວມຂອງຄົນຫວຽດນາມ.

ທ່ານ ຫງວຽນ ເຟືອກ ລົກ ຢືນຢັນວ່າ: "ການຈຸດທູບທຽນລະນຶກເຖິງພະເຈົ້າຮຸ່ງ ດ້ວຍຄວາມເຄົາລົບຮັກ ແມ່ນໂອກາດເພື່ອທົບທວນຄືນສິນທຳ 'ກິນນ້ຳໃຫ້ນຶກເຖິງແຫຼ່ງນ້ຳ', 'ຕົ້ນໄມ້ມີຮາກ, ແມ່ນ້ຳມີຕົ້ນກຳເນີດ', ຜ່ານນັ້ນຢືນຢັນຄຸນຄ່າອັນສັກສິດຂອງຕົ້ນກຳເນີດຊາດ ແລະ ມູນເຊື້ອປະຫວັດສາດຫຼາຍພັນປີແຫ່ງການສ້າງຊາດ ແລະ ປົກປັກຮັກສາປະເທດຊາດ".

ຕົວແທນການນຳນະຄອນ ໄດ້ຈຸດທູບດ້ວຍຄວາມເຄົາລົບ ເພື່ອລະນຶກເຖິງພະເຈົ້າຮຸ່ງ.

ຈາກມູນເຊື້ອດັ່ງກ່າວ, ຈິດວິນຍານແຫ່ງຄວາມສາມັກຄີ, ນ້ຳໃຈຮັກຊາດ ແລະ ເຈດຈຳນົງອັນໜັກແໜ້ນໃນການຕໍ່ສູ້ເພື່ອເອກະລາດ, ອະທິປະໄຕ ແລະ ເອກະພາບຂອງປະເທດຊາດ ໄດ້ຮັບການຫຼໍ່ຫຼອມຜ່ານຫຼາຍຍຸກສະໄໝ, ກາຍເປັນພະລັງແຮງທີ່ຊ່ວຍໃຫ້ຊາດກ້າວຂ້າມຜ່ານຄວາມຫຍຸ້ງຍາກ ແລະ ສິ່ງທ້າທາຍຕ່າງໆ.

"ບັນດາຄຸນຄ່າເຫຼົ່ານີ້ຈະສືບຕໍ່ໄດ້ຮັບການປົກປັກຮັກສາ, ສືບທອດ ແລະ ເສີມຂະຫຍາຍ, ກາຍເປັນຮາກຖານທາງດ້ານຈິດວິນຍານທີ່ສຳຄັນໃນພາລະກິດສ້າງສາ ແລະ ປົກປັກຮັກສາປະເທດຊາດ".ທ່ານ ຫງວຽນ ເຟືອກ ລົກ ກ່າວ.

ທ່ານ ຫງວຽນ ເຟືອກ ລົກ ຍັງໄດ້ເຕືອນຄືນຂີດໝາຍປະຫວັດສາດ ເມື່ອປະທານ ໂຮ່ຈີມິນ ໄດ້ລົງນາມໃນລັດຖະດຳລັດ ເມື່ອເດືອນທັນວາ 1946 ກຳນົດເອົາວັນທີ 10 ເດືອນ 3 ຕາມຈັນທະປະຕິທິນຂອງທຸກໆປີ ເປັນວັນບຸນໄຫວ້ພະເຈົ້າຮຸ່ງ. ໂດຍສະເພາະ, ຢູ່ທີ່ວິຫານຮຸ່ງ ໃນປີ 1954, ເພິ່ນໄດ້ສັ່ງສອນວ່າ: "ບັນດາກະສັດຮຸ່ງມີຄຸນງາມຄວາມດີໃນການສ້າງຊາດ, ລຸງ ແລະ ຫຼານພວກເຮົາຕ້ອງຮ່ວມກັນປົກປັກຮັກສາປະເທດຊາດ", ເຊິ່ງກາຍເປັນຄຳສັ່ງສອນທີ່ມີຄວາມໝາຍປະຫວັດສາດຢ່າງເລິກເຊິ່ງ ແລະ ສືບຕໍ່ໄດ້ຮັບການຢືນຢັນໃນຂະບວນວິວັດແຫ່ງການພັດທະນາຂອງປະເທດຊາດ.

ບັນດາລາຍການສະແດງສິລະປະວັດທະນະທຳ ໄດ້ຈັດຂຶ້ນຢູ່ເຂດເດີນໜ້າວິຫານ.

ສືບທອດມູນເຊື້ອອັນສັກສິດນັ້ນ, ນະຄອນໂຮ່ຈີມິນ ບໍ່ຢຸດຢັ້ງທີ່ຈະເສີມຂະຫຍາຍຈິດວິນຍານແຫ່ງຄວາມສາມັກຄີ, ຄວາມຮັບຜິດຊອບ ແລະ ຄວາມຄິດສ້າງສັນຂອງທັງລະບົບການເມືອງ ແລະ ປະຊາຊົນ ເພື່ອພັດທະນາເສດຖະກິດ-ສັງຄົມ ຕິດພັນກັບການຮັບປະກັນປ້ອງກັນຊາດ-ປ້ອງກັນຄວາມສະຫງົບ. ນະຄອນກຳນົດເປົ້າໝາຍກາຍເປັນຕົວເມືອງທີ່ທັນສະໄໝ, ເປັນສູນກາງການບໍລິການ, ອຸດສາຫະກຳ, ເສດຖະກິດ, ການເງິນ ແລະ ການທ່ອງທ່ຽວຂອງພາກພື້ນ; ພັດທະນາບົນພື້ນຖານວິທະຍາສາດ-ເຕັກໂນໂລຊີ, ນະວັດຕະກຳ ແລະ ການຫັນເປັນດິຈິຕອນ, ມຸ່ງສູ່ຮູບແບບການເຕີບໂຕທີ່ຍືນຍົງ ແລະ ມີຄຸນນະພາບສູງ.

ຄຽງຄູ່ກັນນັ້ນ, ນະຄອນຍັງເອົາໃຈໃສ່ຍົກສູງຊີວິດການເປັນຢູ່ຂອງປະຊາຊົນ, ຮັບປະກັນສະຫວັດດີການສັງຄົມ, ປະຕິບັດຄວາມກ້າວໜ້າ ແລະ ຄວາມຍຸຕິທຳທາງສັງຄົມ; ຖືເອົາປະຊາຊົນເປັນສູນກາງ, ເອົາປະສິດທິຜົນຕົວຈິງ ແລະ ລະດັບການຊົມໃຊ້ຂອງປະຊາຊົນເປັນບັນທັດຖານໃນການວັດແທກການພັດທະນາ. ນະຄອນໂຮ່ຈີມິນ ສືບຕໍ່ເສີມຂະຫຍາຍພະລັງແຮງມະຫາສາມັກຄີທົ່ວປວງຊົນ, ສ້າງ "ທ່າສະໜາມຮົບໃນໃຈປະຊາຊົນ" ໃຫ້ໜັກແໜ້ນ, ສ້າງຮາກຖານໃຫ້ແກ່ການພັດທະນາທີ່ໝັ້ນຄົງ ແລະ ຍືນຍົງ.

ປະຊາຊົນທຸກຊັ້ນຄົນເຂົ້າຮ່ວມໂຄງການ, ຂະບວນແຫ່ ແລະ ຖວາຍເຄື່ອງບູຊາ.

ທ່ານ ຫງວຽນ ເຟືອກ ລົກ ຢືນຢັນວ່າ, ການຮູ້ບຸນຄຸນຕໍ່ບັນພະບຸລຸດ, ການຮັກສາ ແລະ ເສີມຂະຫຍາຍມູນເຊື້ອປະຫວັດສາດ ແມ່ນຄວາມຮັບຜິດຊອບຂອງພະນັກງານ, ສະມາຊິກພັກ ແລະ ທົ່ວສັງຄົມ, ເພື່ອສ້າງນະຄອນໂຮ່ຈີມິນ ໃຫ້ເປັນເມືອງສີວິໄລ, ທັນສະໄໝ ແລະ ເຕັມໄປດ້ວຍຄວາມຮັກແພງ, ສົມກັບບົດບາດເປັນຫົວຈັກລາກແກ່ຂອງທົ່ວປະເທດ.

ພິທີດັ່ງກ່າວໄດ້ຈັດຂຶ້ນຢ່າງເຄັ່ງຄັດຕາມຮີດຄອງປະເພນີ ເຊັ່ນ: ການສະແດງເຄື່ອງດົນຕີພື້ນເມືອງ, ການແຫ່ຂະບວນບູຊາ, ການວາງຊໍ່ດອກໄມ້ ແລະ ຈຸດທູບລະນຶກເຖິງພະເຈົ້າຮຸ່ງ. ຫຼັງຈາກພິທີຫຼັກ, ການນຳນະຄອນໄດ້ສືບຕໍ່ພິທີຈຸດທູບລະນຶກເຖິງທ່ານ ຫງວຽນ ຫືວ ແກ່ງ ຕາມຮີດຄອງປະເພນີບູຮານ.

ບຸນໄຫວ້ພະເຈົ້າຮຸ່ງ ທີ່ມີຫຼາຍກິດຈະກຳ ໄດ້ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມ.

ຄຽງຄູ່ກັບພາກພິທີການ, ຍັງມີຫຼາຍກິດຈະກຳຂອງພາກບຸນທີ່ໄດ້ດຳເນີນໄປຢ່າງຄຶກຄື້ນ, ສ້າງບັນຍາກາດແຫ່ງຄວາມສາມັກຄີໃນຊຸມຊົນ. ທີ່ພົ້ນເດັ່ນແມ່ນການປະກວດ “ຫໍ່ - ຕົ້ມເຂົ້າຕົ້ມ” ເພື່ອຖວາຍບູຊາພະເຈົ້າຮຸ່ງ ຄັ້ງທີ VIII ໂດຍມີປະມານ 200 ທິມເຂົ້າຮ່ວມ; ຄ້າຍພັກແລ້ງມູນເຊື້ອ “ພາກພູມໃຈໃນສາຍເລືອດ ຕຽນ-ຣົ່ງ” ຄັ້ງທີ XVII ເຊິ່ງໄດ້ເຕົ້າໂຮມເອົາປະມານ 60 ຫົວໜ່ວຍຈາກຄະນະຊາວໜຸ່ມ ແລະ ສະມາຊິກຊາວໜຸ່ມ ໃນລະຫວ່າງສອງວັນທີ 26 ແລະ 27 ເມສາ.

ຢູ່ທີ່ບໍລິເວນເດີນກວ້າງທາງໜ້າວິຫານ, ບັນດາລາຍການສະແດງສິລະປະວັດທະນະທຳ, ມວຍພື້ນເມືອງ, Vovinam, ຟ້ອນມັງກອນ, ຕີກອງບຸນ... ກໍ່ໄດ້ຮັບການຈັດຕັ້ງຂຶ້ນ, ເພື່ອຮັບໃຊ້ປະຊາຊົນ ແລະ ນັກທ່ອງທ່ຽວ. ຄຽງຄູ່ກັນນັ້ນ ກໍ່ແມ່ນບັນດາສາຍກິດຈະກຳ ເຊັ່ນ: ງານບຸນປຶ້ມ, ຮ້ານວັດທະນະທຳພື້ນເມືອງ, ສະຖານທີ່ບໍລິການອາຫານເຈຟຣີ, ການວາງສະແດງຮູບພາບພາຍໃຕ້ຫົວຂໍ້ “ພາກໃຕ້ມຸ່ງສູ່ຕົ້ນກຳເນີດຂອງຊາດ”, ປະກອບສ່ວນເຜີຍແຜ່ຄຸນຄ່າວັດທະນະທຳມູນເຊື້ອ.

ກິດຈະກຳລະນຶກເຖິງພະເຈົ້າຮຸ່ງ ຢູ່ທີ່ວິຫານພະເຈົ້າຮຸ່ງ (ຫໍພິພິທະພັນປະຫວັດສາດນະຄອນໂຮ່ຈີມິນ).

ນອກຈາກສະຖານທີ່ຫຼັກແລ້ວ, ບັນດາກິດຈະກຳລະນຶກເຖິງພະເຈົ້າຮຸ່ງ ຍັງໄດ້ຮັບການຈັດຕັ້ງຂຶ້ນຢູ່ຫຼາຍແຫ່ງໃນທົ່ວນະຄອນ ເຊັ່ນ: ຫໍພິພິທະພັນປະຫວັດສາດນະຄອນໂຮ່ຈີມິນ, ສວນວັດທະນະທຳ ເດິ່ມແຊນ ແລະ ເຂດທ່ອງທ່ຽວ ສວຍຕຽນ... ປະກອບສ່ວນເຜີຍແຜ່ຈິດວິນຍານ “ກິນນ້ຳໃຫ້ນຶກເຖິງແຫຼ່ງນ້ຳ”, ບຳລຸງສ້າງສະຕິຊຸມຊົນ ແລະ ຄວາມພາກພູມໃຈໃນຊາດເຂົ້າໃນຊີວິດສັງຄົມ.

ໂຄສະນາເຜີຍແຜ່ຈຸດເດັ່ນຂອງໝູ່ບ້ານອາຊີບ ໃນສັບປະດາວັດທະນະທຳ – ທ່ອງທ່ຽວ ວັດໄທ (Chùa Thầy) 2026 ຍສໝ - ຄໍ່າຄືນວັນທີ 20 ເມສາ, ຢູ່ເຂດ ວັດໄທ (Chùa Thầy), ຕາແສງ ກວກອວາຍ (Quoc Oai) (ຮ່າໂນ້ຍ), ພະແນກອຸດສາຫະກຳ ແລະ ການຄ້າ ຮ່າໂນ້ຍ ສົມທົບກັບ ຄະນະກຳມະການປະຊາຊົນເມືອງ ກວກອວາຍ ແລະ ບັນດາພາກສ່ວນທີ່ກ່ຽວຂ້ອງ ຈັດຕັ້ງ “ພິທີເປີດງານບຸນວັດໄທ, ...

ການແຂ່ງຂັນ "ເລື່ອງລາວຫວຽດນາມຂອງຂາ້ພະເຈົ້າ" - ເຜີຍແຜ່ພາສາ ແລະ ວັດທະນະທໍາຫວຽດນາມໃນປະເທດໄທ ຍສໝ - ຕອນເຊົ້າວັນທີ 31 ມີນາ, ທີ່ນະຄອນຫຼວງ Bangkok, ສະຖານທູດຫວຽດນາມປະຈຳໄທ ຮ່ວມມືກັບມະຫາວິທະຍາໄລ Srinakharinwirot ໄດ້ຈັດການແຂ່ງຂັນສິລະປະການເວົ້າ ແລະ ການສະແດງພາສາຫວຽດນາມຮອບສຸດທ້າຍດ້ວຍຫົວຂໍ້ "ເລື່ອງລາວຫວຽດນາມຂອງຂາ້ພະເຈົ້າ" (My Viet Nam Story).