ແມ່ວວາກ: ລົບລ້າງຄວາມຫິວ - ຫຼຸດຜ່ອນຄວາມທຸກຍາກ, ອະນຸລັກຮັກສາວັດທະນະທໍາພື້ນເມືອງ ໂດຍຜ່ານການພັດທະນາການທ່ອງທ່ຽວຊຸມຊົນ
ຕອນຮຸ່ງເຊົ້າ, ຟ້າຍັງມົວໆນ້ຳຄ້າງ, ຊຸງໝີປໍ໋ (ອາຍຸ 28 ປີ, ຢູ່ຕາແສງ ປ່າວີ) ໄດ້ຈັດແຈງກະກຽມໄປເຮັດວຽກ. ສະຖານທີ່ທີ່ລາວເຮັດວຽກແມ່ນ homestay ປ່າວີ ຂຶ້ນກັບໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າມົ້ງ ຢູ່ບ້ານ ປ່າວີຮ້າ. homestay ຢູ່ຫ່າງຈາກບ້ານຂອງລາວປະມານ 600 ແມັດ ສະນັ້ນ ລາວຍ່າງໄປ, ບາງຄັ້ງຄາວຈຶ່ງໃຊ້ລົດຈັກ. ໃນທ້າຍອາທິດ, ມີນັກທ່ອງທ່ຽວມາຢ້ຽມຢາມ homestay ຫຼາຍກ່ວາ ສະນັ້ນ ເວລາເຮັດວຽກຂອງ ຊຸງໝີປໍ໋ ແມ່ນເລີ່ມແຕ່ 6:30 ໂມງເຊົ້າຫາ 11 ໂມງແລງ ດ້ວຍບັນດາວຽກເຮັດຄື: ຕ້ອນຮັບແຂກ, ເຮັດຄວາມສະອາດຫ້ອງ, ປຸງແຕ່ງອາຫານ.
“ກ່ອນນີ້, ຂ້າພະເຈົ້າເຮັດວຽກງານທຸກປະເພດຄື: ຊ່າງກໍ່ສ້າງ, ແບກຫາບ, ຂາຍເຄື່ອງ... ແຕ່ລາຍຮັບກໍບໍ່ແນ່ນອນ, ບາງເດືອນກໍມີວຽກ ບາງເດືອນກໍບໍ່ມີ. ເມຍຂອງຂ້າພະເຈົ້າໄປຂາຍເຄື່ອງຢູ່ຕະຫຼາດ, ແຕ່ລະເດືອນໄດ້ເງິນປະມານ 3-4 ລ້ານດົ່ງ. ຄອບຄົວມີລູກ 3 ຄົນ ສະນັ້ນ ກໍລຳບາກຫຼາຍ. ແຕ່ໂຊກດີທີ່ຫຼັງຈາກໄດ້ເຂົ້າຮ່ວມສ້ອມແປງ homestay ປ່າວີ, ເຈົ້າຂອງເຮືອນໄດ້ຮັບຂ້າພະເຈົ້າມາເຮັດວຽກນຳ, ມາຮອດປັດຈຸບັນ, ຂ້າພະເຈົ້າເຮັດວຽກຢູ່ທີ່ນີ້ໄດ້ 4 ເດືອນແລ້ວ. ທັງມີລາຍຮັບທີ່ໝັ້ນຄົງ (7 ລ້ານດົ່ງ/ເດືອນ) ທັງໄດ້ເຮັດວຽກຢູ່ໃກ້ກັບບ້ານ, ທັງກໍມີເງື່ອນໄຂເບິ່ງແຍງລູກ, ພໍ່ແມ່”. ຊຸງໝີປໍ໋ ກ່າວ.
ນອກຈາກ ຊຸງໝີປໍ໋ ແລ້ວ. ຍັງມີຊາວທ້ອງຖິ່ນອີກ 2 ຄົນທີ່ເຮັດວຽກຢູ່ homestay ປ່າວີ ດ້ວຍລາຍຮັບແຕ່ 5-7 ລ້ານດົ່ງ/ເດືອນ, ມີທີ່ພັກ ແລະ ອາຫານໃຫ້ພ້ອມ.
 |
| ໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າມົ້ງ ຢູ່ບ້ານ ປ່າວີຮ້າ, ຕາແສງ ປ່າວີ, ເມືອງແມ່ວວາກ, ແຂວງ ຮ່າຢາງ. (ພາບ: ແທງລວນ) |
ຕາມທ່ານນາງ ຮວ່າງທິຮ່ຽນ (ອາຍຸ 36 ປີ), ເຈົ້າຂອງ homestay ປ່າວີ ແລ້ວ, homestay ຂອງຄອບຄົວລາວ ໄດ້ຮັບການກໍ່ສ້າງຕາມສະຖາປັດຕະຍະກຳຂອງຊາວເຜົ່າມົ້ງ, ແບບເຮືອນມີເສົາໄມ້, ໂຄງຮ່າງສາມຫ້ອງກາງ ແລະ ສອງຫ້ອງຂ້າງ ພ້ອມກັບຫຼັງຄາມຸງດິນຂໍສອງຊັ້ນ, ອ້ອມຮອບດ້ວຍຮົ້ົ້ວຫີນທີ່ເຮັດຢ່າງພິຖີພິຖັນ, ໃນເຮືອນໄດ້ຕົບແຕ່ງບັນດາເຄື່ອງໃຊ້ຂອງຊາວເຜົ່າມົ້ງ, ປູກດອກໄມ້ຢູ່ເດີ່ນຕື່ມອີກ...
ເມື່ອເລົ່າຄືນມື້ທຳອິດທີ່ນຳ 27 ຄອບຄົວເຂົ້າຮ່ວມລົງທຶນ, ດຳເນີນທຸລະກິດ homestay ຢູ່ໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າມົ້ງ ເມື່ອ 8 ປີທີ່ຜ່ານມາ, ນາງ ຮ່ຽນ ໃຫ້ຮູ້ວ່າ: ສອງຜົວເມຍນາງເຄີຍຊິນກັບການເຮັດກະສິກຳ, ປະຈຸບັນໄດ້ຫັນເປັນເຮັດການເຄື່ອນໄຫວທ່ອງທຽວ, ດ້ວຍທຶນລົງທຶນຂະຫນາດໃຫຍ່ ສະນັ້ນ ສອງຜົວເມຍນາງ ກໍມີຄວາມເປັນຫ່ວງ, ລັງເລຫຼາຍ. ຫຼັງຈາກໄດ້ຮັບການລະດົມ, ໜູນຊ່ວຍຈາກອຳນາດການປົກຄອງທ້ອງຖິ່ນ, ສອງຜົວເມຍນາງ ກໍໄດ້ຕັດສິນໃຈລົງທຶນ. ຕາມນັ້ນແລ້ວ, ຄອບຄົວຂອງນາງ ແລະ ຄົວເຮືອນອື່ນໆທີ່ເຂົ້າຮ່ວມດຳເນີນທຸລະກິດການບໍລິການພາຍໃນໝູ່ບ້ານ ກໍໄດ້ຮັບການໜູນຊ່ວຍດ້ານໜ້າພຽງ ໂດຍບໍ່ໃຫ້ເສຍຄ່າ ເປັນເວລາ 50 ປີ; ໜູນຊ່ວຍ 80 ລ້ານດົ່ງ/ຄອບຄົວເຮັດທຸລະກິດ; ໄດ້ຫຼຸດຜ່ອນອັດຕາດອກເບ້ຍຈາກທະນາຄານກະສິກຳ ແລະ ພັດທະນາຊົນນະບົດ, ທະນາຄານນະໂຍບາຍສັງຄົມ.
ອຳນາດການປົກຄອງທ້ອງຖິ່ນ ກໍຈັດຕັ້ງຊຸດເຝິກອົບຮົມວິຊາສະເພາະການທ່ອງທ່ຽວ, ການຕ້ອນຮັບນັກທ່ອງທ່ຽວໃຫ້ແກ່ຫົວໜ້າຄອບຄົວ, ທັກສະການບໍລິການຫ້ອງພັກ, ພະນັກງານຕ້ອນຮັບ, ພໍ່ຄົວ, ວຽກງານຮັບປະກັນຫຼັກອະນາໄມຄວາມປອດໄພດ້ານອາຫານ, ເປີດຊຸດຝຶກອົບຮົມພາສາອັງກິດແບບເລັ່ງລັດ ... ນາງ ຮ່ຽນ ແລະ ຄອບຄົວອື່ນໆຈໍານວນຫຼາຍ ໄດ້ຮັບໂອກາດໄປຢ້ຽມຢາມ, ຮຽນຮູ້ບັນດາຮູບແບບພັດທະນາການທ່ອງທ່ຽວຊຸມຊົນຢ່າງມີປະສິດທິຜົນຢູ່ ຮວ່າບິງ, ເຊີນລາ, ໄທຫງວຽນ...
“ມາຮອດປະຈຸບັນ, ຈຳນວນນັກທ່ອງທ່ຽວທີ່ມາໝູ່ບ້ານວັດທະນະທຳການທ່ອງທ່ຽວຊຸມຊົນຊົນເຜົ່າມົ້ງ ແມ່ນມີຈຳນວນຫຼວງຫຼາຍ ແລະ ໝັ້ນຄົງ. ສ່ວນ homestay ປ່າວີ, ໂດຍສະເລ່ຍແລ້ວ ພວກຂ້າພະເຈົ້າຕ້ອນຮັບແຂກທ່ອງທ່ຽວ 20 ເທື່ອຄົນຕໍ່ມື້, ເວລາຈຸດສຸມໃນວັນບຸນ, ເຕັດ, ທ້າຍອາທິດ, homestay ແມ່ນເຕັມໝົດ”, ນາງ ຮ່ຽນ ກ່າວ.
ເພື່ອໃຫ້ນັກທ່ອງທ່ຽວຮູ້ກ່ຽວກັບໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າມົ້ງ ເວົ້າລວມ ແລະ homestay ເວົ້າສະເພາະ, ນອກຈາກການໜູນຊ່ວຍຂອງແຂວງ, ເມືອງແລ້ວ, ທ່ານນາງຮ່ຽນ ກໍ່ໄດ້ເປັນເຈົ້າການຕັ້ງ fanpage ຂອງ homestay ປ່າວີ ໃນ Facebook, Zalo, ເຊື່ອມຕໍ່ກັບອົງການທ່ອງທ່ຽວ, ບັນດາໜ້າເວບທ່ອງທ່ຽວ... ເພື່ອໂຄສະນາ. homestay ປ່າວີ ຍາມໃດກໍ່ກະກຽມເຂົ້າໜົມປະເພດຕ່າງໆທີ່ເຮັດຈາກເມັດທັນຍະພືດ ບັກວິດ, ຕົ້ນໄມ້ພິເສດຂອງແຂວງ ຮ່າຢາງ ທີ່ເຮັດໂດຍນາງ ຮ່ຽນ ເອງ ແລະ ບັນດາສະມາຊິກສະຫະກອນການບໍລິການກະສິກຳ ແລະ ການຄ້າ ປ່າວີ ເຮັດເພື່ອແນະນຳໃຫ້ແກ່ແຂກທ່ອງທ່ຽວ.
ກໍຄ້າຍຄືກັນ homestay ປ່າວີ, ບັນດາ homestay ອື່ນໆຢູ່ໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າມົ້ງ ລ້ວນແຕ່ເຕັມໄປດ້ວຍລັກສະນະວັດທະນະທຳຂອງຊາວເຜົ່າມົ້ງ ນັບແຕ່ການອອກແບບຈົນເຖິງການຕົບແຕ່ງ, ອາຫານພື້ນເມືອງ. ມາຮອດໝູ່ບ້ານ, ແຂກທ່ອງທ່ຽວສາມາດສຳຜັດກັບຫຼາຍຮູບການວັດທະນະທຳຊີວິດຂອງຊາວທ້ອງຖິ່ນເຊັ່ນ ສານກະຕ່າກະບຸງ, ປັ່ນ, ຕ່ຳຜ້າ, ເຄື່ອງລະຫຼີ້ນພື້ນເມືອງ... ນັກທ່ອງທ່ຽວສາມາດສຳຜັດກັບການບໍລິການຄື: ອາບນ້ຳ, ແຊ່ຕີນດ້ວຍໃບຢາພື້ນເມືອງ; ຊົມບັນດາລາຍການວັດທະນະທຳ, ສີລະປະທີ່ມີລັກສະນະວັດທະນະທໍາມົ້ງໃນຄ່ຳຄືນທ້າຍອາທິດ.
ຕາມທ່ານ ໂງແມ້ງເກື່ອງ, ຮອງປະທານຄະນະກຳມະການປະຊາຊົນເມືອງ ແມ່ວວາກ ແລ້ວ, ເມືອງໄດ້ກຳນົດການອະນຸລັກຮັກສາ, ຮັກສາວັດທະນະທຳພື້ນເມືອງ, ພັດທະນາການທ່ອງທ່ຽວຊຸມຊົນເປັນໜຶ່ງໃນບັນດາໜ້າທີ່ສຳຄັນ. ມາຮອດປະຈຸບັນ, ເມືອງມີ 5 ໝູ່ບ້ານວັດທະນະທຳການທ່ອງທ່ຽວຊຸມຊົນ ລວມມີ: ໝູ່ບ້ານໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າມົ້ງ ຢູ່ບ້ານ ປ່າວີຮ້າ (ຕາແສງ ປ່າວີ); ໝູ່ບ້ານໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າ ໂລໂລ ບ້ານ ສາງປ່າ A (ເມືອງແມ່ວວາກ); ໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າ ໄຢ໋ ບ້ານ ຕ໋າດຫງາ່ (ຕາແສງ ຕ໋າດຫງາ່), ໝູ່ບ້ານໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າ ໄຕ ບ້ານ ບານຕົງ (ຕາແສງ ນຽມເຊີນ) ແລະ ໝູ່ບ້ານໝູ່ບ້ານວັດທະນະທຳການທ່ອງທ່ຽວຊຸມຊົນ ຊົນເຜົ່າ ໜູ່ ບ້ານ ເຄົ່າວາຍ (ຕາແສງ ເຄົ່າວາຍ). ການຜັນຂະຫຍາຍບັນດາຮູບແບບໝູ່ບ້ານວັດທະນະທຳການທ່ອງທ່ຽວຊຸມຊົນ ໄດ້ນຳມາເຊິ່ງຄຸນຄ່າດ້ານເສດຖະກິດ, ສ້າງວຽກເຮັດງານທຳ, ເພີ່ມລາຍຮັບໃຫ້ປະຊາຊົນ, ລົບລ້າງຄວາມຫິວ - ຫຼຸດຜ່ອນຄວາມທຸກຍາກແບບຍືນຍົງໃຫ້ເມືອງ ແມ່ວວາກ. ເມືອງພວມຄົ້ນຄວ້າ ແລະ ສະເໜີໃຫ້ແຂວງສືບຕໍ່ສ້າງໝູ່ບ້ານວັດທະນະທຳການທ່ອງທ່ຽວທີ່ມີເອກະລັກສະເພາະຂອງຊາວເຜົ່າ ໂລໂລ, ໜຶ່ງໃນຈຳນວນ 16 ຊົນເຜົ່າສ່ວນໜ້ອຍທີ່ມີປະຊາກອນບໍ່ຮອດ 10.000 ຄົນ.
ມິງດຶກ