ຫວຽດນາມ ກາຍເປັນຄູ່ຮ່ວມມືການຄ້າໃຫຍ່ທີ່ສຸດຂອງ ກຳປູເຈຍ
| ໜັງສືພິມກຳປູເຈຍ ລົງຂ່າວກ່ຽວກັບເຫດການ 45 ປີແຫ່ງໄຊຊະນະລະບອບດັບສູນເຊື້ອຊາດ ໂດຍການຊ່ວຍເຫຼືອຂອງຫວຽດນາມ | |
| ຫວຽດນາມ ຢືນຢັນແມ່ນຄູ່ຮ່ວມມືການຄ້າໃຫຍ່ທີ່ສຸດຂອງຈີນ ຢູ່ ອາຊຽນ |
ໃນ 5 ເດືອນຕົ້ນປີ 2023, ຫວຽດນາມ ກາຍເປັນຄູ່ຮ່ວມມືການຄ້າໃຫຍ່ທີ່ສຸດຂອງ ກຳປູເຈຍ ໃນກຸ່ມ ອາຊຽນ ດ້ວຍຍອດວົງເງິນການຄ້າສອງຝ່າຍກວມເອົາເກືອບ 50% ຍອດວົງເງິນການຄ້າລະຫວ່າງ ກຳປູເຈຍ ກັບບັນດາປະເທດໃນພາກພື້ນ ອາຊຽນ.
ໃນບົດຂ່າວລົງວັນທີ 8 ກໍລະກົດ, ສື່ເອເລັກໂຕນິກ sbm.news ຂອງ ກຳປູເຈຍ, ໄດ້ຄັດສະເໜີແຫຼ່ງຂ່າວຈາກກະຊວງການຄ້າ ກຳປູເຈຍ, ໂດຍໃຫ້ຮູ້ວ່າ ໃນໄລຍະດັ່ງກ່າວ, ຍອດວົງເງິນການຄ້າສອງຝ່າຍລະຫວ່າງ ຫວຽດນາມ - ກຳປູເຈຍ ບັນລຸກວ່າ 2,8 ຕື້ USD, ເພີ່ມຂຶ້ນເກືອບ 3% ເມື່ອທຽບໃສ່ໄລຍະດຽວກັນຂອງປີ 2022.
 |
ຈຳນວນສິນຄ້າສົ່ງອອກຂອງ ກຳປູເຈຍ ໄປຍັງ ຫວຽດນາມ ບັນລຸປະມານ 1,3 ຕື້ USD, ໃນຂະນະທີ່ ກຳປູເຈຍ ນຳເຂົ້າສິນຄ້າຈາກ ຫວຽດນາມ ລວມມູນຄ່າກວ່າ 1,5 ຕື້ USD. ດ້ວຍທ່າເຕີບໂຕດ້ານການຄ້າທີ່ເປັນໜ້າຊື່ນຊົມໃນຊຸມເດືອນຕົ້ນປີນີ້, ຫວຽດນາມ ບໍ່ພຽງແຕ່ແມ່ນຄູ່ຮ່ວມມືໃຫຍ່ທີ່ສຸດຂອງ ກຳປູເຈຍ ໃນ ອາຊຽນ ເທົ່ານັ້ນ, ຫາກຍັງແມ່ນຄູ່ຮ່ວມມືການຄ້າໃຫຍ່ອັນດັບທີ 3 ຂອງ ກຳປູເຈຍ ໃນໂລກ ອີກດ້ວຍ, ເຊິ່ງຖັດຈາກ ຈີນ ແລະ ອາເມລິກາ.
ຕາມສື່ມວນຊົນກຳປູເຈຍແລ້ວ, ມູນຄ່າສິນຄ້າທີ່ສົ່ງອອກຈາກກຳປູເຈຍ ໄປຫວຽດນາມ ເພີ່ມຂຶ້ນຕົ້ນຕໍແມ່ນຈາກການສົ່ງອອກຜະລິດຕະພັນກະເສດ, ຍ້ອນການເກັບກ່ຽວຢູ່ປະເທດນີ້ເພີ່ມຂຶ້ນທຸກປີ. ສິນຄ້າສົ່ງອອກຕົ້ນຕໍຂອງກຳປູເຈຍ ໄປຫວຽດນາມລວມມີ ເຂົ້າສາ່ນ, ຢາງພາລາ, ໝາກມ່ວງຫິມະພານ, ມັນຕົ້ນ, ສາລີ, ໝາກກ້ວຍ, ໝາກມ່ວງ, ຢາສູບ ແລະ ຊັບພະຍາກອນທຳມະຊາດ.
ຄຳຮຸ່ງ