ອີຢິບແມ່ນຕະຫຼາດໃຫຍ່ ແລະ ເປັນຄູ່ຮ່ວມມືທີ່ມີທ່າແຮງກັບ ຫວຽດນາມ

	ເພີ່ມທະວີການຮ່ວມມື້ດ້ານເສດຖະກິດ, ການຄ້າ ແລະ ການລົງທຶນ ຫວຽດນາມ ທີ່ ອີຢິບ
	ຫວຽດນາມ - ອີຢິບ ຕັ້ງໜ້າຜັນຂະຫຍາຍບັນດາມາດຕະການແນໃສ່ຊຸກຍູ້ການຮ່ວມມື

ໃນຂອບເຂດການຢ້ຽມຢາມເອຢິບ ແຕ່ວັນທີ 27 ຫາວັນທີ 29 ກັນຍາ, ຄະນະຜູ້ແທນຂັ້ນສູງຫວຽດນາມ ນຳໂດຍຮອງຫົວໜ້າຄະນະພົວພັນຕ່າງປະເທດສູນກາງ ໄດ້ມີການພົບປະກັບ ບັນດາສະມາຊິກສະພາ ແລະ ຜູ້ແທນຂອງພັກການເມືອງ ໃນເອຢິບ. ເຂົ້າຮ່ວມກອງປະຊຸມເຮັດວຽກຂອງຄະນະປະຕິບັດງານຄະນະພົວພັນຕ່າງປະເທດສູນກາງ ມີທ່ານເອກອັກຄະລັດຖະທູດຫວຽດນາມ ປະຈຳ ອີຢິບ ຫງວຽນຮຸຍຢຸງ.

ທີ່ການເຮັດວຽກ, ທ່ານຮອງຫົວໜ້າຄະນະພົວພັນຕ່າງປະເທດສູນກາງ ເຈຶ່ອງກວ່າງຫວ່າຍນາມ ໄດ້ ແຈ້ງໂດຍສັງເຂບກ່ຽວກັບສະພາບການການເມືອງ, ເສດຖະກິດ - ສັງຄົມຂອງ ຫວຽດນາມ, ພິເສດແມ່ນບັນດາຜົນງານທີ່ພົ້ນເດັ່ນຂອງ ຫວຽດນາມ ໃນໄລຍະ 35 ປີຜ່ານມາຂອງການປ່ຽນໃໝ່, ພ້ອມທັງແນະນຳກ່ຽວກັບນະໂຍບາຍການຕ່າງປະເທດຂອງຫວຽດນາມ.

ທ່ານຮອງຫົວໜ້າຄະນະພົວພັນຕ່າງປະເທດສູນກາງ ເຈຶ່ອງກວ່າງຫວ່າຍນາມ ເນັ້ນໜັກ ອີຢິບແມ່ນຕະຫຼາດໃຫຍ່ ແລະ ເປັນຄູ່ຮ່ວມມືທີ່ມີທ່າແຮງກັບ ຫວຽດນາມ.

ທ່ານຮອງຫົວໜ້າຄະນະພົວພັນຕ່າງປະເທດສູນກາງ ເນັ້ນໜັກວ່າ ຫວຽດນາມ ຍາມໃດກໍ່ຖືເປັນສຳຄັນ ແລະ ຕີລາຄາສູງບົດບາດຂອງ ອີຢິບ ໃນພາກພື້ນຕາເວັນອອກກາງ - ອາຟຣິກາ. ດ້ວຍຈຳນວນພົນລະເມືອງກວ່າ 100 ລ້ານຄົນ, ອີຢິບ ແມ່ນຕະຫຼາດໃຫຍ່ ແລະ ເປັນຄູ່ຮ່ວມມືທີ່ມີທ່າແຮງຂອງຫວຽດນາມ.

ທ່ານ ເຈຶ່ອງກວ່າງຫວ່າຍນາມ ເຊື່ອໝັ້ນວ່າ ດ້ວຍຄວາມໄວ້ເນື້ອເຊື່ອໃຈດ້ານການເມືອງ ແລະ ຄວາມມຸ່ງມາດປາດຖະໜາອັນຊອບທຳຂອງປະຊາຊົນສອງປະເທດ, ຫວຽດນາມ ແລະ ອີຢິບ ຈະສືບຕໍ່ຍູ້ແຮງການພົວພັນຮ່ວມມືຫຼາຍດ້ານ ແລະ ສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສຫຼາຍຝ່າຍ, ພາກພື້ນ ແລະ ສາກົນ ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອຄວາມສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ.

ທີ່ການພົບປະ, ຜູ້ຕາງໜ້າບັນດາພັກການເມືອງ ແລະ ສະມາຊິກລັດຖະສະພາ ອີຢິບ ສະແດງຄວາມຊົມເຊີຍຕໍ່ບັນດາບາດກ້າວພັດທະນາເສດຖະກິດ - ສັງຄົມທີ່ໜ້າປະທັບໃຈຂອງ ຫວຽດນາມ ແລະ ມີຄວາມສົນໃຈເຖິງນະໂຍບາຍປ່ຽນແປງໃໝ່ ກໍຄືປະສົບການຂອງ ຫວຽດນາມ ໃນຂົງເຂດການເມືອງ, ເສດຖະກິດ, ສັງຄົມ, ວຽກງານກໍ່ສ້າງພັກ ແລະ ການບຳລຸງສ້າງພະນັກງານ.

ຝ່າຍອີຢິບ ກໍໄດ້ແລກປ່ຽນຂໍ້ມູນກ່ຽວກັບສະພາບການເສດຖະກິດ - ສັງຄົມ ກໍ່ຄືກັບບັນດາສິ່ງທ້າທາຍທີ່ອີຢິບ ພວມປະເຊີນໜ້າຢູ່. ແລະຖືວ່າໝາກຜົນແຫ່ງການຮ່ວມມືລະຫວ່າງສອງປະເທດໃນປະຈຸບັນໃນຂົງເຂດເສດຖະກິດ, ການຄ້າ ແລະ ການລົງທຶນຍັງບໍ່ທັນແທດເໝາະກັບຄວາມສາມາດບົ່ມຊ້ອນຂອງສອງປະເທດ, ຝ່າຍອີຢິບ ສະເໜີວ່າ ຫວຽດນາມ ແລະ ອີຢິບ ຕ້ອງຊອກຫາວິທີແກ້ໄຂເພື່ອເພີ່ມທະວີການຮ່ວມມືສອງປະເທດໃນຂົງເຂດທີ່ສອງຝ່າຍມີທ່າແຮງ.

ຄະນະປະຕິບັດງານຄະນະພົວພັນຕ່າງປະເທດສູນກາງ ແລະ ຝ່າຍຕ່າງໆ ກໍ່ໄດ້ປຶກສາຫາລືຫຼາຍບັນຫາທີ່ຕ່າງຝ່າຍຕ່າງມີຄວາມສົນໃຈ ເຊັ່ນ ການປ່ຽນແປງຂອງດິນຟ້າອາກາດ ແລະ ຄວາມໝັ້ນຄົງດ້ານສະບຽງອາຫານ.

ບັນດາຜູ້ແທນ ໄດ້ຖ່າຍຮູບທີ່ລະນຶກ.

2 ຝ່າຍເຫັນດີເປັນເອກະສັນວ່າ ຫວຽດນາມ ແລະ ອີຢິບ ຕ້ອງເພີ່ມທະວີການແລກປ່ຽນຄະນະຜູ້ແທນບັນດາຂັ້ນ ແລະ ຕັ້ງໜ້າຊຸກຍູ້ການເຊື່ອມຕໍ່ລະຫວ່າງປະຊາຄົມວິສາຫະກິດຂອງ 2 ປະເທດ, ມີທິດທາງ ແລະ ວິທີແກ້ໄຂເພື່ອເພີ່ມທະວີຄວາມເຂົ້າໃຈເຊິ່ງກັນ ແລະ ກັນ, ຊຸກຍູ້ການຮ່ວມມືໃນທຸກຂົງເຂດໃນໄລຍະຍາວ, ພິເສດແມ່ນໃນຂົງເຂດເສດຖະກິດ, ການຄ້າ, ການລົງທຶນ, ວັດທະນະທຳ, ການທ່ອງທ່ຽວ ແລະ ການແລກປ່ຽນປະຊາຊົນ, ເພື່ອຜົນປະໂຫຍດຂອງປະຊາຊົນສອງປະເທດ.

ຄຳຮຸ່ງ