ຫວຽດນາມ ສະເໜີ ກຳປູເຈຍ ຍູ້ແຮງການອອກບັດຄົນຕ່າງດ້າວໃຫ້ແກ່ຄົນເຊື້ອຊາດຫວຽດ

	ຫວຽດນາມ, ລາວ, ໄທ ແລະ ກຳປູເຈຍ ເພີ່ມທະວີການຮ່ວມມືໃນຫຼາຍຂົງເຂດ
	ຫວຽດນາມ ແລະ ກຳປູເຈຍ ພ້ອມກັນຮັກສາ, ເພີ່ມພູນຄູນສ້າງການພົວພັນສອງຝ່າຍອັນດີງາມ

ທ່ານຮອງລັດຖະມົນຕີ ຟ້າມກວາງຮ້ຽວ ເຂົ້າຢ້ຽມຂ່ຳນັບທ່ານລັດຖະມົນຕີກະຊວງພາຍໃນ Samdech Kralahom Sar Kheng

ຄະນະໄດ້ເຂົ້າຢ້ຽມຂ່ຳນັບທ່ານ Samdech Kralahom Sar Kheng, ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ແລະ ມີການພົບປະກັບທ່ານ Ouch Borith, ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ກຳປູເຈຍ, ທ່ານຈອມພົນ Sok Phal - ລັດຖະມົນຕີກະຊວງພາຍໃນ, ທ່ານ Khuong Sreng, ເຈົ້າຄອງນະຄອນຫຼວງ ພະນົມເປັນ ແລະ ທ່ານ Var Than, ເຈົ້າແຂວງ Kratie.

ທີ່ການພົບປະ, ທ່ານຮອງລັດຖະມົນຕີ ຟ້າມກວາງຮ້ຽວ ໄດ້ຊົມເຊີຍ ກຳປູເຈຍ ໃນການຈັດຕັ້ງການເລືອກຕັ້ງສະພາເຂດ ຊຸດທີ V ຢ່າງສຳເລັດຜົນ, ບັນດາໝາກຜົນອັນດີງາມທີ່ ກຳປູເຈຍ ບັນລຸໄດ້ໃນການຄວບຄຸມໂລກລະບາດ ໂຄວິດ – 19, ການພັດພະທະນາເສດຖະກິດ - ສັງຄົມ ໃນໄລຍະມໍ່ໆມານີ້ ແລະ ໃນບົດບາດດໍາລົງຕໍາແໜ່ງເປັນປະທານ ອາຊຽນ 2022.

ທ່ານຮອງນາຍົກລັດຖະມົນຕີ ແລະ ການນຳບັນດາກະຊວງ, ຂະແໜງການໄດ້ຕີລາຄາການພົວພັນລະຫວ່າງສອງປະເທດນັບມື້ນັບພັດທະນາຢ່າງເລິກເຊິ່ງ ແລະ ຂອບໃຈພັກ, ລັດ ແລະ ປະຊາຊົນ ຫວຽດນາມ ທີ່ໄດ້ມີການໜູນຊ່ວຍຢ່າງແທດຈິງໃນທຸກຂົງເຂດໃນໄລຍະຜ່ານມາ. ທັງສອງຝ່າຍສະແດງຄວາມຊົມຊື່ນກ່ຽວກັບການພັດທະນາຢ່າງຕັ້ງໜ້າຂອງການພົວພັນລະຫວ່າງສອງປະເທດໃນໄລຍະຜ່ານມາ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍຢູ່ເຂດຊາຍແດນໄດ້ຮັບການຮັບປະກັນ, ການຮັກສາການພົບປະ, ການແລກປ່ຽນຄະນະຂັ້ນສູງໄດ້ດຳເນີນເປັນປະຈຳ ແລະ ການຮ່ວມມືດ້ານເສດຖະກິດ, ການແລກປ່ຽນດ້ານການຄ້ານັບມື້ນັບພັດທະນາ.

ທັງສອງຝ່າຍໄດ້ຕີລາຄາສູງຕໍ່ການຈັດຕັ້ງບັນດາກິດຈະກໍາໃນປີມິດຕະພາບ ຫວຽດນາມ - ກຳປູເຈຍ 2022 ເນື່ອງໃນໂອກາດສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ (24 ມິຖຸນາ 1967-2022), ໃນນັ້ນມີພິທີສະເຫຼີມສະຫຼອງ 45 ປີແຫ່ງ “ເສັ້ນທາງໂຄ່ນລົ້ມລະບອບດັບສູນເຊື້ອຊາດ Pol Pot” ຂອງທ່ານນາຍົກລັດຖະມົນຕີ Hun Sen ທີ່ເຂດຊາຍແດນແຂວງ ບີງເຟືອກ ແລະ ແຂວງ Tbaung Khmum ໃນວັນທີ 20 ມິຖຸນານີ້ ແລະ ພິທີສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດທີ່ສຳຄັນຢູ່ ຮ່າໂນ້ຍ ໃນວັນທີ 24 ມິຖຸນາ; ໄດ້ເຫັນດີເປັນເອກະພາບວ່າ ບັນດາກິດຈະກໍາດັ່ງກ່າວຈະປະກອບສ່ວນເຂົ້າໃນການຊ່ວຍປະຊາຊົນສອງປະເທດ, ໂດຍສະເພາະແມ່ນຄົນລຸ້ນໜຸ່ມໃຫ້ມີຄວາມຮັບຮູ້ຢ່າງຖືກຕ້ອງກ່ຽວກັບປະຫວັດສາດຂອງການພົວພັນສອງປະເທດ ເພື່ອມີຄວາມຮັບຜິດຊອບກວ່າອີກໃນການປົກປັກຮັກສາ ແລະ ການເພີ່ມພູນຄູນສ້າງສາຍພົວພັນມິດຕະພາບອັນດີງາມ.

ບົນຈິດໃຈ “ບ້ານໃກ້ເຮືອນຄຽງທີ່ດີ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະ ຍືນຍົງຍາວນານ”, ທ່ານຮອງລັດຖະມົນຕີ ຟ້າມກວາງຮ້ຽວ ໄດ້ຂອບໃຈມາຍັງລັດຖະບານພະບໍລົມວົງສານຸວົງ ແລະ ປະຊາຊົນ ກຳປູເຈຍ ທີ່ໄດ້ສ້າງເງື່ອນໄຂສະດວກໃຫ້ແກ່ປະຊາຄົມຊາວ ຫວຽດນາມ ທີ່ທໍາມາຫາກິນ ແລະ ດຳລົງຊີວິດຢ່າງໝັ້ນຄົງຢູ່ ກຳປູເຈຍ ແລະ ສະເໜີການນຳ ກຳປູເຈຍ ສືບຕໍ່ໃຫ້ຄວາມສົນໃຈໃນການແກ້ໄຂບາງບັນຫາທີ່ກ່ຽວຂ້ອງກັບຄົນເຊື້ອຊາດຫວຽດນາມ.

ທ່ານຮອງລັດຖະມົນຕີ ຟ້າມກວາງຮ້ຽວ ປາດຖະໜາວ່າ ຝ່າຍ ກຳປູເຈຍ, ພິເສດແມ່ນອຳນາດການປົກຄອງທ້ອງຖິ່ນທຸກຂັ້ນ, ໂດຍຜ່ານບັນດາສະມາຄົມຊາວເຜົ່າ ຂະແມ - ຫວຽດນາມ ສົມທົບກັບບັນດາອົງການຕົວແທນ ຫວຽດນາມ ເພື່ອຍົກສູງການໂຄສະນາໃຫ້ຄົນເຊື້ອຊາດຫວຽດນາມ ຕ້ອງປະຕິບັດຖືກຕາມກົດໝາຍ, ແນວທາງ, ນະໂຍບາຍຂອງ ກຳປູເຈຍ, ພິເສດບັນດາເນື້ອໃນທີ່ກ່ຽວຂ້ອງກັບການຂຶ້ນທະບຽນ, ການຕໍ່ອາຍຸບັດຄົນຕ່າງດ້າວ ແລະ ນະໂຍບາຍຍົກຍ້າຍປະຊາຊົນອອກຈາກເຂດທະເລສາບ.

ກ່ຽວກັບບັນຫາເອກະສານນິຕິກຳ, ທ່ານຮອງລັດຖະມົນຕີ ສະເໜີໃຫ້ຝ່າຍ ກຳປູເຈຍ ເລັ່ງການອອກບັດຄົນຕ່າງດ້າວ, ເລັ່ງການຜັນຂະຫຍາຍໃນການອອກເອກະສານສໍາມະໂນຄົວຕາມການກໍານົດ, ການປະກາດໃຊ້ຂໍ້ກໍານົດກ່ຽວກັບສິດ ແລະ ພັນທະຂອງຄົນຕ່າງດ້າວ ແລະ ການແກ້ໄຂບາງບັນຫາທີ່ຫຍຸ້ງຍາກໃນການຍົກສູງຖານະດ້ານນິຕິກຳຂອງຊາວ ຫວຽດນາມ ບົນພື້ນຖານຂໍ້ກໍານົດກົດໝາຍຂອງ ກຳປູເຈຍ, ໂດຍໃຫ້ສອດຄ່ອງກັບທໍານຽມ ແລະ ກົດໝາຍສາກົນ ກໍຄືສອດຄ່ອງກັບຊີວິດຈິງ.

ກ່ຽວກັບການຍົກຍ້າຍ ແລະ ການຕັ້ງຖິ່ນຖານຄືນໃໝ່ໃຫ້ປະຊາຊົນ, ໃນນັ້ນມີຄົນເຊື້ອຊາດ ຫວຽດນາມ ຢູ່ເຂດທະເລສາບ, ຝ່າຍ ກຳປູເຈຍ ແລະ ບັນດາອົງການທີ່ກ່ຽວຂ້ອງຈະຜັນຂະຫຍາຍຕາມບັນດາຂັ້ນຕອນໃຫ້ເໝາະສົມ, ເພື່ອແກ້ໄຂບັນດາຂໍ້ຄົງຄ້າງທິ່ເກີດຂຶ້ນໃຫ້ປະຊາຊົນ ໄດ້ຮັບການຮັບປະກັນພື້ນຖານໂຄງລ່າງ ແລະ ການບໍລິການສາທາລະນະໂດຍພື້ນຖານ, ຊ່ວຍໃຫ້ປະຊາຊົນມີການກໍານົດທິດທາງອາຊີບໃຫ້ເໝາະສົມ ເພື່ອເຮັດໃຫ້ຊີວິດການເປັນຢູ່ເປັນປົກກະຕິໂດຍໄວ. ຝ່າຍ ກຳປູເຈຍ ກໍປາດຖະໜາວ່າ ຝ່າຍ ຫວຽດນາມ ຈະມີບັນດາການໜູນຊ່ວຍໃນການປ່ຽນວຽກເຮັດງານທຳໃຫ້ແກ່ຜູ້ທີ່ຖືກຍົກຍ້າຍ, ພິເສດແມ່ນການຖ່າຍທອດເຕັກໂນໂລຢີຂອງການລ້ຽງສິນໃນນ້ຳ.

ຫອມມາລາ