ການາດາ ປາດຖະໜາຢາກເປີດກວ້າງການຮ່ວມມືກັບຫວຽດນາມ

	ມອບຫຼຽນກາທີ່ລະນຶກໃຫ້ແກ່ທ່ານ Deborah Paul ເອກອັກຄະລັດຖະທູດການາດາປະຈຳຫວຽດນາມ
	ປີທີສາມຕິດຕໍ່ກັນ, ການສົ່ງອອກໄປການາດາເພີ່ມຂຶ້ນໃນທາງບວກ

ຫວ່າງແລ້ວນີ້, ຢູ່ຮ່າໂນ້ຍ, ທ່ານລັດຖະມົນຕີການຕ່າງປະເທດ ບຸ່ຍແທງເຊີນ ໄດ້ໃຫ້ການຕ້ອນຮັບທ່ານນາງ Mélanie Joly ລັດຖະມົນຕີກະຊວງການຕ່າງປະເທດ ການາດາ ໃນໂອກາດຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 12 – 14 ເມສາ.

ທ່ານລັດຖະມົນຕີ ບຸ່ຍແທງເຊີນ ໄດ້ໃຫ້ການຕ້ອນຮັບທ່ານນາງ Mélanie Joly ມາຢ້ຽມຢາມ ຫວຽດນາມ ເປັນຄັ້ງທຳອິດໃນຖານະເປັນລັດຖະມົນຕີການຕ່າງປະເທດ ການາດາ; ຢືນຢັນວ່າ ການຢ້ຽມຢາມຈະປະກອບສ່ວນຮັດແໜ້ນການພົວພັນລະຫວ່າງຫວຽດນາມ - ການາດາ ເວົ້າລວມ ແລະ ລະຫວ່າງສອງກະຊວງການຕ່າງປະເທດເວົ້າສະເພາະ.

ທ່ານລັດຖະມົນຕີເນັ້ນໜັກວ່າ: ການຢ້ຽມຢາມ ຍັງມີຄວາມໝາຍສຳຄັນພິເສດເນື່ອງໃນໂອກາດວັນສ້າງຕັ້ງການພົວພັນຄູ່ຮ່ວມມືຮອບດ້ານລະຫວ່າງ 2 ປະເທດຄົບຮອບ 5 ປີ (2017-2022).

ການາດາ ປາດຖະໜາຢາກເປີດກວ້າງການຮ່ວມມືກັບຫວຽດນາມ. (ພາບ: dangcongsan)

ທ່ານລັດຖະມົນຕີ Mélanie Joly ຢືນຢັນວ່າ: ການາດາ ຖືເປັນສຳຄັນການພົວພັນກັບ ຫວຽດນາມ ແລະ ປາດຖະໜາຢາກເພີ່ມທະວີການຮ່ວມມືກັບ ຫວຽດນາມ, ພິເສດແມ່ນການຮ່ວມມືດ້ານເສດຖະກິດ - ການຄ້າ; ເຫັນດີເປັນເອກະພາບບັນດາມາດຕະການຊຸກຍູ້ການຮ່ວມມືດ້ານການຄ້າ, ພິເສດແມ່ນລະຫວ່າງວິສາຫະກິດຂອງສອງປະເທດ.

ທ່ານລັດຖະມົນຕີຢືນຢັນ ຈະເພີ່ມທະວີການຮ່ວມມື ແລະ ສະໜັບສະໜູນ ຫວຽດນາມ ເພື່ອຮັບມືກັບການປ່ຽນແປງຂອງດິນຟ້າອາກາດ ແລະ ປະຕິບັດບັນດາຄຳໝັ້ນສັນຍາທີ່ກອງປະຊຸມສຸດຍອດການປ່ຽນແປງຂອງດິນຟ້າອາກາດສະຫະປະຊາຊາດ (COP-26) ປີ 2021.

2 ຝ່າຍໄດ້ເຫັນດີຕີລາຄາວ່າ ການພົວພັນລະຫວ່າງ ຫວຽດນາມ - ການາດາ ສືບຕໍ່ຮັດແໜ້ນ ແລະ ພັດທະນາຢ່າງຕັ້ງໜ້າໃນຫຼາຍຂົງເຂດ. ວົງເງິນການຄ້າສອງຝ່າຍບັນລຸກວ່າ 6 ຕື້ USD ໃນປີ 2021, ເພີ່ມຂຶ້ນເກືອບ 19% ເມື່ອທຽບໃສ່ປີ 2020, ເຖິງວ່າຈະປະສົບກັບຄວາມຫຍຸ້ງຍາກຫຼາຍຢ່າງ ແລະ ໄດ້ຮັບຜົນກະທົບທາງລົບຈາກໂລກລະບາດໂຄວິດ-19 ກໍຕາມ.

ການຮ່ວມມືດ້ານການພັດທະນາ, ການສຶກສາ-ບຳລຸງສ້າງ, ການຮັບມືກັບການປ່ຽນແປງຂອງດິນຟ້າອາກາດ ແລະ ການແຜ່ລະບາດນັບມື້ນັບໄດ້ຮັບການເພີ່ມທະວີ.

2 ຝ່າຍໄດ້ແລກປ່ຽນບັນດາມາດຕະການເພື່ອແນໃສ່ຮັດແໜ້ນການພົວພັນລະຫວ່າງ 2 ປະເທດໃຫ້ເລິກເຊິ່ງກ່ວາອີກ, ມຸ່ງໄປເຖິງວັນສ້າງຕັ້ງການພົວພັນທາງການທູດຄົບຮອບ 50 ປີ (1973-2023).

ທ່ານລັດຖະມົນຕີ ບຸ່ຍແທງເຊີນ ສະເໜີ 2 ຝ່າຍສືບຕໍ່ຊຸກຍູ້ການພົບປະແລກປ່ຽນຄະນະຜູ້ແທນທຸກຂັ້ນ, ເລີ່ມດຳເນີນບັນດາກົນໄກເຈລະຈາສອງຝ່າຍໂດຍໄວ; ໝູນໃຊ້ກາລະໂອກາດໃຫ້ຫຼາຍທີ່ສຸດຈາກການປະຕິບັດສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP).

ທ່ານລັດຖະມົນຕີສະເໜີໃຫ້ ການາດາ ສືບຕໍ່ເປີດປະຕູຕະຫຼາດໃຫ້ສິນຄ້າ, ຜະລິດຕະພັນກະເສດຂອງ ຫວຽດນາມ ພ້ອມທັງເພີ່ມທະວີການໜູນຊ່ວຍໃຫ້ຫວຽດນາມ ຟື້ນຕົວໄວ ແລະ ພັດທະນາເສດຖະກິດ - ສັງຄົມ ພາຍຫຼັງໂລກລະບາດໂຄວິດ-19. ຫວ່າງມໍ່ໆມານີ້, ການາດາໄດ້ຮັບຮູ້ໜັງສືຜ່ານແດນວັກແຊງຂອງຫວຽດນາມ, ສ້າງເງື່ອນໄຂໃຫ້ປະຊາຄົມຊາວຫວຽດນາມຢູ່ການາດາມີຊີວິດການເປັນຢູ່, ຮ່ຳຮຽນ ແລະ ເຮັດວຽກເປັນປົກກະຕິ.

2 ຝ່າຍໄດ້ແລກປ່ຽນກ່ຽວກັບສະພາບການສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. ກ່ຽວກັບບັນຫາທະເລຕາເວັນອອກ, 2 ຝ່າຍຢືນຢັນຈະປະຕິບັດກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982; ເຫັນດີສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍໃນພາກພື້ນ ແລະ ສາກົນຄື: ສະຫະປະຊາຊາດ, APEC, ອາຊຽນ, ປະຊາຄົມທີ່ນຳໃຊ້ພາສາຝລັ່ງ Francophonie.

ກ່ຽວກັບບັນຫາ ຢູແກຼນ, ທ່ານລັດຖະມົນຕີ ບຸ່ຍແທງເຊີນ ຢືນຢັນຫຼັກໝັ້ນສະເໜີຕົ້ນສະເໝີປາຍຂອງ ຫວຽດນາມ, ຕາມນັ້ນແລ້ວ ກໍພະຍາຍາມສະໜັບສະໜູນແກ້ໄຂການຂັດແຍ່ງສາກົນໂດຍສັນຕິວິທີ ບົນພື້ນຖານເຄົາລົບກົດບັດສະຫະປະຊາຊາດ ແລະ ບັນດາຫຼັກການພື້ນຖານຂອງກົດໝາຍສາກົນ.

ຫວຽດນາມ ຮຽກຮ້ອງໃຫ້ຢຸດຕິການໃຊ້ກຳລັງຢ່າງທັນທີ, ເຊິ່ງເຮັດໃຫ້ພົນລະເຮືອນເສຍຊີວິດ ແລະຮັບບາດເຈັບ, ບັນດາພື້ນຖານໂຄງລ່າງສຳຄັນ, ຮັບປະກັນຄວາມປອດໄພຂອງພົນລະເຮືອນ, ໃນນັ້ນມີຊາວ ຫວຽດນາມ ຢູ່ ຢູແກຼນ.

ຫວຽດນາມ ພ້ອມແລ້ວທີ່ຈະປະກອບສ່ວນຢ່າງຕັ້ງໜ້າເຂົ້າໃນການໜູນຊ່ວຍດ້ານມະນຸດສະທຳ, ຂະບວນການທາງການທູດ, ການສົນທະນາ ແລະ ການເຈລະຈາ, ເປັນຕົ້ນແມ່ນການສ້າງສາ ແລະ ຟື້ນຟູຄືນໃໝ່ຢູ່ ຢູແກຼນ.

ຄຳຮຸ່ງ