ເສັ້ນທາງ ເລກ 21 ແຕ່ບ້ານຜາເມືອງ ຫາ ເສັ້ນທາງ 1D ບ້ານທ່າສີ ມີຄວາມຍາວ 28,77 ກິໂລແມັດ.
ຫລາຍປີຜ່ານມາ ພໍເຂົ້າສູ່ລະດູຝົນ ຜູ້ໃຊ້ລົດໃຊ້ຖະໜົນຢູ່ເສັ້ນທາງ ລະຫວ່າງປາກຊັນ-ຊຽງຂວາງ, ຊຽງຂວາງ-ປາກຊັນ ແມ່ນໄດ້ພົບຄວາມຫຍຸ້ງຍາກ ຢ່າງໜັກໜ່ວງສົມຄວນ ເພາະວ່າເສັ້ນທາງເປ່ເພ ເປັນຕົມໝື່ນ, ໂດຍສະເພາະ ແຕ່ເຂດບ້ານຜາເມືອງ-ທ່າສີ ເມືອງບໍລິຄັນ ແຂວງບໍລິຄຳໄຊ. ມາຮອດປັດຈຸບັນ ຫລື ນັບແຕ່ທ້າຍປີ 2017 ຫາຕົ້ນປີ 2018 ໂຄງການການປັບປຸງສ້ອມແປງ ແລະ ຍົກລະດັບ ເສັ້ນທາງຈຸດດັ່ງກ່າວ ໄດ້ສຳເລັດສົມບູນແລ້ວ ເຮັດໃຫ້ການສັນຈອນໄປ-ມາ ສະດວກສະບາຍຍິ່ງຂຶ້ນ.
ໂຄງການປັບປຸງ ແລະ ຂະຫຍາຍເສັ້ນທາງ ເລກ 21 ແຕ່ບ້ານຜາເມືອງ ຫາ ເສັ້ນທາງ 1D ບ້ານທ່າສີ ມີຄວາມຍາວ 28,77 ກິໂລແມັດ, ມີມູນຄ່າທັງໝັດ 134 ຕື້ກວ່າກີບ, ໂດຍງົບປະມານຂອງລັດຖະບານ ແລະ ກອງທຶນບູລະນະຮັກສາທາງຫລວງ ເຊິ່ງປະຕິບັດແຕ່ທ້າຍ ປີ 2015 ແລະ ສຳເລັດສົມບູນໃນຕົ້ນປີ 2018. ປະຊາຊົນ, ພໍ່ຄ້າ-ຊາວຂາຍ ຜູ້ທີ່ມີຈຸດປະສົງ ນຳໃຊ້ເສັ້ນທາງສາຍນີ້ ໂດຍສະເພາະ ແຕ່ປາກຊັນ-ຊຽງຂວາງ ຫລື ວຽງຈັນ-ຊຽງຂວາງ ເພື່ອແລກປ່ຽນສິນຄ້າ ແລະ ຈຸດປະສົງອື່ນໆ ແມ່ນສາມາດເດີນທາງໄປມາດ້ວຍ ຄວາມສະດວກສະບາຍ ເພາະເປັນທາງປູຢາງ ຕະຫລອດເສັ້ນ, ຈຸດໃດ ໄລຍະໃດ ທີ່ມີເປັນພູສູງ ຫລື ຫ້ວຍເລິກ ແມ່ນໄດ້ຮັບການຕັດ, ການເຈາະ ແລະ ຖົມໃຫ້ມີລະດັບມາດຕະຖານດີສົມຄວນ.
ເມື່ອມີການປຽບທຽບການເດີນທາງ ແຕ່ວຽງຈັນ-ຊຽງຂວາງ ຫລື ຊຳເໜືອ, ເມື່ອກ່ອນແມ່ນມີການນຳໃຊ້ເສັ້ນທາງເລກທີ 13 ເໜືອ ໄປລ້ຽວຂວາຈຸດສາມແຍກພູຄູນ ໄປຮອດແຂວງຊຽງຂວາງ ແມ່ນໃຊ້ເວລາປະມານ 9-10 ຊົ່ວໂມງ, ແຕ່ປັດຈຸບັນ ຫລາຍຄົນໄດ້ນຳໃຊ້ເສັ້ນທາງ 13 ໃຕ້ ໄປລ້ຽວຊ້າຍທີ່ປາກຊັນ ຜ່ານເສັ້ນທາງເລກ 21 ຕໍ່ໃສ່ເສັ້ນທາງ 1D ຮອດຊຽງຂວາງ ໃຊ້ເວລາພຽງ 6-7 ຊົ່ວໂມງ, ຖ້າຫາກມີຈຸດປະສົງ ຢາກໄປຮອດຊຳເໜືອເລີຍ ກໍໃຊ້ເວລາປະມານ 12 ຊົ່ວໂມງ (ໜຶ່ງມື້). ການປັບປຸງບູລະນະເສັ້ນທາງສາຍນີ້ ກໍແມ່ນຄວາມມຸ່ງຫວັງຂອງພັກ-ລັດຖະບານ ເພື່ອອຳນວຍຄວາມສະດວກແກ່ປະຊາຊົນບັນດາເຜົ່າ, ນັກທຸລະກິດ ແລະ ນັກທ່ອງທ່ຽວ ໃຫ້ໄດ້ໄປຮອດໄປເຖິງ ແລະ ສາມາດປະຕິບັດພາລະກິດ ໄດ້ຮັບຜົນສຳເລັດຕາມແຜນການ. ສິ່ງສຳຄັນ ແມ່ນອຳນວຍຄວາມສະດວກແກ່ປະຊາຊົນ ທີ່ດຳລັງຊີວິດລຽບຕາມເສັ້ນທາງ ໃຫ້ສາມາດປະກອບການຄ້າຂາຍ ແລະ ບໍລິການຫລາຍຂຶ້ນ ຕີຖອຍ ຄວາມທຸກຍາກລົງເທື່ອລະກ້າວ.
(ແຫຼ່ງຂໍ້ມູນ: ຂປລ)