ດຽນບຽນ, ຢຸນນານ ແລະ ຫຼວງພະບາງ ຊຸກຍູ້ການເຊື່ອມໂຍງດ້ານການລົງທຶນ, ການຄ້າ ແລະ ການທ່ອງທ່ຽວ

ກອງປະຊຸມມີການເຂົ້າຮ່ວມຂອງສະຫາຍ ເຈິ່ນ ຕຽນ ຢຸງ, ກຳມະການສູນກາງພັກ, ເລຂາຄະນະພັກແຂວງ, ຫົວໜ້າຄະນະຜູ້ແທນສະພາແຫ່ງຊາດແຂວງດຽນບຽນ; ສະຫາຍ ຫງວຽນ ມິງ ຫວູ, ກຳມະການສູນກາງພັກ, ຮອງລັດຖະມົນຕີຜູ້ປະຈຳການກະຊວງການຕ່າງປະເທດ; ທ່ານນາງ ຄຳເພົາ ເອີນທະວັນ, ເອກອັກຄະລັດຖະທູດລາວປະຈຳຫວຽດນາມ; ທ່ານ ຫວາງ ຊຸນ, ອຸປະທູດຊົ່ວຄາວສະຖານທູດຈີນປະຈຳຫວຽດນາມ ພ້ອມດ້ວຍຜູ້ແທນຫຼາຍກວ່າ 300 ທ່ານ ທີ່ຕາງໜ້າໃຫ້ບັນດາກະຊວງ, ຂະແໜງການ, ສະມາຄົມ, ວິສາຫະກິດຂອງສາມທ້ອງຖິ່ນ ແລະ ແຂກຮັບເຊີນ.

ກອງປະຊຸມໄດ້ສະແດງເຖິງຄວາມຕັ້ງໃຈໃນການເພີ່ມທະວີການຮ່ວມມືທາງເສດຖະກິດໃນອະນຸພາກພື້ນ, ສົ່ງເສີມທ່າແຮງຂອງເຂດຊາຍແດນໃຫ້ກາຍເປັນພື້ນທີ່ເຊື່ອມໂຍງການຄ້າ, ການລົງທຶນ ແລະ ການພັດທະນາ.

ສົ່ງເສີມທ່າແຮງການເຊື່ອມໂຍງລະຫວ່າງສາມທ້ອງຖິ່ນ

ກ່າວເປີດກອງປະຊຸມ, ສະຫາຍ ເຈິ່ນ ຕຽນ ຢຸງ, ເລຂາຄະນະພັກແຂວງດຽນບຽນ ໄດ້ເນັ້ນໜັກວ່າ ນອກຈາກປະເພນີປະຫວັດສາດທີ່ຜູກພັນກັບໄຊຊະນະດຽນບຽນຝູແລ້ວ, ດຽນບຽນຍັງມີທີ່ຕັ້ງທາງພູມສາດ - ເສດຖະກິດທີ່ພິເສດ ເພາະເປັນແຂວງດຽວຂອງຫວຽດນາມທີ່ມີຊາຍແດນຕິດກັບທັງລາວ ແລະ ຈີນ.

ທີ່ຕັ້ງດັ່ງກ່າວຖືກປຽບທຽບວ່າ “ໄກ່ຂັນຄັ້ງດຽວ, ສາມປະເທດໄດ້ຍິນ” ເຊິ່ງສ້າງເງື່ອນໄຂໃຫ້ດຽນບຽນພັດທະນາເປັນສູນກາງຂົນສົ່ງສິນຄ້າຜ່ານ, ເຊື່ອມໂຍງການຄ້າ, ການລົງທຶນ ແລະ ການບໍລິການລະຫວ່າງເຂດຕາເວັນຕົກສ່ຽງເໜືອຂອງຫວຽດນາມ ກັບພາກເໜືອຂອງລາວ ແລະ ພາກຕາເວັນຕົກສ່ຽງໃຕ້ຂອງຈີນ.

ຕາມທ່ານ ເຈິ່ນ ຕຽນ ຢຸງ ແລ້ວ, ຊາຍແດນບໍ່ແມ່ນພຽງແຕ່ເສັ້ນແບ່ງອານາເຂດເທົ່ານັ້ນ ແຕ່ຍັງສາມາດກາຍເປັນພື້ນທີ່ຮ່ວມມື, ບ່ອນທີ່ຈຸດແຂງຂອງແຕ່ລະທ້ອງຖິ່ນໄດ້ຮັບການສົ່ງເສີມ ເພື່ອສ້າງໂອກາດພັດທະນາຮ່ວມກັນ.

ກ່ຽວກັບສະພາບເສດຖະກິດ, ໃນ 9 ເດືອນຕົ້ນປີ 2026, ຜະລິດຕະພັນລວມພາຍໃນແຂວງ (GRDP) ຂອງດຽນບຽນເພີ່ມຂຶ້ນ 9,81%. ສະເພາະໄຕມາດ III/2026, ແຂວງຢູ່ໃນກຸ່ມ 10 ທ້ອງຖິ່ນທີ່ມີອັດຕາເຕີບໂຕສອງຫຼັກສູງທີ່ສຸດໃນທົ່ວປະເທດ. ດຽນບຽນຍັງໄດ້ອະນຸມັດຫຼັກການລົງທຶນໃຫ້ 31 ໂຄງການ ດ້ວຍທຶນຈົດທະບຽນລວມຫຼາຍກວ່າ 54.000 ຕື້ດົ່ງ, ລວມມີຫຼາຍໂຄງການລົງທຶນໂດຍກົງຈາກຕ່າງປະເທດ (FDI) ຂະໜາດໃຫຍ່.

ເພື່ອຂຸດຄົ້ນທ່າແຮງເຫຼົ່ານີ້ຢ່າງມີປະສິດທິຜົນ, ເລຂາຄະນະພັກແຂວງດຽນບຽນໄດ້ສະເໜີ 3 ກຸ່ມຂົງເຂດບູລິມະສິດໃນການດຶງດູດການລົງທຶນສາກົນ.

ກ່ອນອື່ນໝົດແມ່ນການພັດທະນາໂຄງລ່າງພື້ນຖານເຊື່ອມໂຍງ, ລະບົບໂລຈິສຕິກ, ການຄ້າຊາຍແດນ ແລະ ອຸດສາຫະກຳປຸງແຕ່ງ, ມຸ່ງສູ່ການສ້າງຕ່ອງໂສ້ສະໜອງ ແລະ ຕ່ອງໂສ້ມູນຄ່າຮ່ວມກັນລະຫວ່າງສາມທ້ອງຖິ່ນ. ຕໍ່ມາແມ່ນການຊຸກຍູ້ກະສິກຳສິນຄ້າທີ່ເຊື່ອມໂຍງກັບເສດຖະກິດສີຂຽວ, ນຳໃຊ້ເຕັກໂນໂລຊີປຸງແຕ່ງຂັ້ນເລິກ ເພື່ອຍົກສູງມູນຄ່າຜະລິດຕະພັນກະສິກຳ, ປົກປ້ອງສິ່ງແວດລ້ອມ ແລະ ສ້າງອາຊີບທີ່ຍືນຍົງ. ຂົງເຂດທີສາມແມ່ນການທ່ອງທ່ຽວປະຫວັດສາດ, ວັດທະນະທຳ ແລະ ນິເວດ, ໂດຍຂຸດຄົ້ນການເຊື່ອມໂຍງລະຫວ່າງມໍລະດົກ ແລະ ທິວທັດຂອງດຽນບຽນ, ຫຼວງພະບາງ ແລະ ຢຸນນານ ເພື່ອສ້າງເສັ້ນທາງທ່ອງທ່ຽວຂ້າມປະເທດ.

ທ່ານ ເຈິ່ນ ຕຽນ ຢຸງ ຢືນຢັນວ່າ ແຂວງດຽນບຽນຈະສືບຕໍ່ປະຕິຮູບລະບຽບຂັ້ນຕອນບໍລິຫານ, ເປີດເຜີຍຂໍ້ມູນແຜນຜັງຢ່າງໂປ່ງໃສ, ຮັບປະກັນສະພາບແວດລ້ອມການລົງທຶນທີ່ເປັນທຳ ແລະ ຖືເອົາຄວາມພໍໃຈ ແລະ ຄວາມສຳເລັດຂອງວິສາຫະກິດເປັນເກນປະເມີນປະສິດທິຜົນການບໍລິຫານ.

ບັນຍາກາດລວມຂອງກອງປະຊຸມສົ່ງເສີມການລົງທຶນສາກົນ ປີ 2026 ລະຫວ່າງສາມທ້ອງຖິ່ນ ດຽນບຽນ (ຫວຽດນາມ), ຫຼວງພະບາງ (ລາວ) ແລະ ຢຸນນານ (ຈີນ).

ໃຫ້ບູລິມະສິດແກ່ການຂຸດຄົ້ນໂຄງລ່າງພື້ນຖານການຄົມມະນາຄົມ ແລະ ເສດຖະກິດດ່ານຊາຍແດນຢ່າງມີປະສິດທິຜົນ

ກ່າວໃນກອງປະຊຸມ, ທ່ານ ຫງວຽນ ມິງ ຫວູ, ຮອງລັດຖະມົນຕີຜູ້ປະຈຳການກະຊວງການຕ່າງປະເທດ ໄດ້ຕີລາຄາສູງຕໍ່ຄວາມເປັນເຈົ້າການຂອງດຽນບຽນ, ຢຸນນານ ແລະ ຫຼວງພະບາງ ໃນການຊຸກຍູ້ການຮ່ວມມື. ຕາມທ່ານຮອງລັດຖະມົນຕີແລ້ວ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດຫວຽດນາມ - ລາວ ແລະ ສາຍພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ຈີນ ແມ່ນພື້ນຖານອັນເອື້ອອຳນວຍໃຫ້ສາມທ້ອງຖິ່ນພັດທະນາການເຊື່ອມໂຍງທາງເສດຖະກິດ.

ທ່ານຮອງລັດຖະມົນຕີໄດ້ເນັ້ນໜັກວ່າ ປະສິດທິຜົນຂອງການຮ່ວມມືຕ້ອງສະແດງອອກຜ່ານຜົນປະໂຫຍດທີ່ເປັນຮູບປະທຳຕໍ່ປະຊາຊົນ ແລະ ວິສາຫະກິດ ເຊັ່ນ ຜະລິດຕະພັນກະສິກຳສາມາດຈຳໜ່າຍໄດ້ໃນລາຄາທີ່ດີຂຶ້ນ, ສິນຄ້າຖືກຂົນສົ່ງໄດ້ໄວຂຶ້ນດ້ວຍຕົ້ນທຶນຕ່ຳລົງ ແລະ ປະຊາຊົນເຂດຊາຍແດນມີວຽກເຮັດທີ່ໝັ້ນຄົງຢູ່ທ້ອງຖິ່ນ.

ໂດຍກ່າວເຖິງບັນດາບາດກ້າວພັດທະນາໂຄງລ່າງພື້ນຖານໃນພາກພື້ນ, ໃນນັ້ນມີການຍົກລະດັບສະໜາມບິນດຽນບຽນ, ການວາງແຜນເສັ້ນທາງດ່ວນຮ່າໂນ້ຍ - ດຽນບຽນ, ການນຳເສັ້ນທາງລົດໄຟລາວ - ຈີນເຂົ້າດຳເນີນງານ ແລະ ລະບົບທາງດ່ວນຢຸນນານທີ່ເຊື່ອມຕໍ່ກັບຄຸນໝິງ, ທ່ານຮອງລັດຖະມົນຕີເຫັນວ່າ ຈຸດສຸມຕ້ອງຫັນຈາກແນວຄິດການກໍ່ສ້າງໂຄງການ ໄປສູ່ການຍົກສູງປະສິດທິຜົນໃນການຂຸດຄົ້ນນຳໃຊ້ໂຄງການ.

ບົນພື້ນຖານນັ້ນ, ທ່ານ ຫງວຽນ ມິງ ຫວູ ໄດ້ສະເໜີ 3 ທິດທາງການຮ່ວມມືທາງຍຸດທະສາດ.

ທິດທາງທີໜຶ່ງ, ເພີ່ມທະວີການເຊື່ອມໂຍງການຄົມມະນາຄົມ ແລະ ປັບປຸງລະບຽບຂັ້ນຕອນຢູ່ດ່ານຊາຍແດນ, ແກ້ໄຂບັນດາຈຸດຕິດຂັດດ້ານໂລຈິສຕິກ. ໃນນັ້ນ, ເລັ່ງລັດລະບຽບຂັ້ນຕອນຍົກລະດັບຄູ່ດ່ານຊາຍແດນ ຫ້ວຍປວກ - ນາຊອນ ຢູ່ເສັ້ນຊາຍແດນຫວຽດນາມ - ລາວ ໃຫ້ກາຍເປັນດ່ານສາກົນ; ປັບປຸງໂຄງລ່າງພື້ນຖານໃຫ້ສົມບູນເພື່ອນຳຄູ່ດ່ານ ອາປາຈາຍ - ຫຼົງຝູ ຢູ່ເສັ້ນຊາຍແດນຫວຽດນາມ - ຈີນ ເຂົ້າດຳເນີນງານຢ່າງເປັນທາງການ, ພ້ອມທັງເຊື່ອມຕໍ່ກັບສະໜາມບິນດຽນບຽນ ແລະ ເສັ້ນທາງລົດໄຟລາວ - ຈີນ.

ທິດທາງທີສອງ, ພັດທະນາຕ່ອງໂສ້ມູນຄ່ານັບແຕ່ເຂດຜະລິດວັດຖຸດິບ ໄປຈົນເຖິງການປຸງແຕ່ງຂັ້ນເລິກ ແລະ ການຈຳໜ່າຍສຳລັບບັນດາຜະລິດຕະພັນທີ່ມີທ່າແຮງ ເຊັ່ນ ກາເຟອາຣາບິກາ, ໝາກມາກາດາເມຍ, ເຂົ້າສານພິເສດ ແລະ ພືດສະໝຸນໄພ. ຄຽງຄູ່ກັນນັ້ນແມ່ນການຊຸກຍູ້ການຫັນປ່ຽນເປັນດິຈິຕອນ, ການກວດສອບຍ້ອນກັບແຫຼ່ງກຳເນີດສິນຄ້າ ແລະ ໜູນຊ່ວຍສະຫະກອນ, ວິສາຫະກິດຂະໜາດນ້ອຍໃຫ້ເຂົ້າຮ່ວມຕ່ອງໂສ້ສະໜອງ.

ທິດທາງທີສາມ, ສ້າງບັນດາເສັ້ນທາງທ່ອງທ່ຽວມໍລະດົກຂ້າມຊາຍແດນ, ເຊື່ອມໂຍງໂບຮານສະຖານປະຫວັດສາດດຽນບຽນຝູ ກັບນະຄອນມໍລະດົກໂລກຫຼວງພະບາງ ແລະ ບັນດາຈຸດໝາຍທ່ອງທ່ຽວທາງນິເວດ, ວັດທະນະທຳຊາຜູເອີ ຢູ່ແຂວງຢຸນນານ.

ເພື່ອປະຕິບັດໃຫ້ມີປະສິດທິຜົນ, ທ່ານຮອງລັດຖະມົນຕີໄດ້ສະເໜີໃຫ້ສາມທ້ອງຖິ່ນກຳນົດຈຸດປະສານງານຢ່າງສະໝ່ຳສະເໝີ, ຄັດເລືອກບັນດາໂຄງການບູລິມະສິດທີ່ມີຄວາມເປັນໄປໄດ້ ແລະ ສ້າງກົນໄກປະເມີນຄວາມຄືບໜ້າການປະຕິບັດເປັນໄລຍະ.

ກະຊວງການຕ່າງປະເທດຢືນຢັນວ່າ ຈະສືບຕໍ່ປະສານສົມທົບ ແລະ ໜູນຊ່ວຍດຽນບຽນໃນການສົ່ງເສີມການລົງທຶນ, ການໂຄສະນາປະຊາສຳພັນສູ່ສາກົນ ແລະ ການແກ້ໄຂບັນດາຂໍ້ຕິດຂັດທີ່ກ່ຽວຂ້ອງກັບກົນໄກດ່ານຊາຍແດນ.

ການເຊື່ອມໂຍງດ່ານຊາຍແດນສ້າງໂອກາດໃໝ່ດ້ານການຄ້າ ແລະ ການລົງທຶນ

ໃນກອງປະຊຸມ, ຜູ້ຕາງໜ້າບັນດາທ້ອງຖິ່ນຂອງຈີນ ແລະ ລາວ ໄດ້ແບ່ງປັນບັນດາຜົນສຳເລັດດ້ານການຮ່ວມມື, ໂດຍສະເພາະໃນການພັດທະນາໂຄງລ່າງພື້ນຖານການຄົມມະນາຄົມ, ເສດຖະກິດດ່ານຊາຍແດນ ແລະ ການຄ້າຂ້າມຊາຍແດນ.

ທ່ານ ຢາງ ຈົງຊິງ, ຮອງເຈົ້ານະຄອນຂອງລັດຖະບານປະຊາຊົນນະຄອນຜູເອີ (ແຂວງຢຸນນານ, ຈີນ), ໃຫ້ຮູ້ວ່າ ວັນທີ 7/2/2026, ສິນຄ້າກາເຟໂຣບັສຕາຊຸດທຳອິດຂອງຫວຽດນາມ ນ້ຳໜັກ 22 ໂຕນ ໄດ້ຖືກສົ່ງອອກຜ່ານຈຸດຜ່ານແດນ ຫຼົງຝູ - ອາປາຈາຍ ຢ່າງສະດວກ.

ຕໍ່ມາ, ວັນທີ 23/3, ສະພາລັດຖະບານຈີນໄດ້ອະນຸມັດຢ່າງເປັນທາງການໃຫ້ເປີດດ່ານຊາຍແດນທາງບົກຫຼົງຝູ ເພື່ອຮອງຮັບການໄປມາຫາສູ່ກັບຕ່າງປະເທດ.

ບັນດາການປ່ຽນແປງທີ່ດີຂຶ້ນໃນການເຊື່ອມໂຍງດ່ານຊາຍແດນໄດ້ປະກອບສ່ວນຊຸກຍູ້ການແລກປ່ຽນສິນຄ້າ. ໃນ 8 ເດືອນຕົ້ນປີ 2026, ມູນຄ່າການຄ້າລະຫວ່າງຜູເອີ ກັບບັນດາຄູ່ຮ່ວມມືຫວຽດນາມບັນລຸ 40,74 ລ້ານຢວນ, ເພີ່ມຂຶ້ນ 529,7% ທຽບກັບໄລຍະດຽວກັນຂອງປີກ່ອນ.

ສ່ວນຝ່າຍລາວ, ສະຫາຍ ຈິນດາວົງ ໂພສີຄຳ, ກຳມະການສຳຮອງຄະນະບໍລິຫານງານສູນກາງພັກປະຊາຊົນປະຕິວັດລາວ, ຮອງປະທານຄະນະກຳມະການປົກຄອງແຂວງຫຼວງພະບາງ ໃຫ້ຮູ້ວ່າ ທ້ອງຖິ່ນພວມຂຸດຄົ້ນທ່າແຮງດ້ານທີ່ຕັ້ງພູມສາດ, ເສັ້ນທາງລົດໄຟລາວ - ຈີນ ແລະ ບັນດາແລວທາງຂົນສົ່ງທາງບົກທີ່ເຊື່ອມຕໍ່ກັບດຽນບຽນ.

ໃນປີຜ່ານມາ, ມູນຄ່າການຄ້າສອງສົ້ນລະຫວ່າງຫຼວງພະບາງ ແລະ ດຽນບຽນ ບັນລຸຫຼາຍກວ່າ 3,42 ລ້ານໂດລາສະຫະລັດ, ເພີ່ມຂຶ້ນ 7,56%. ທຶນລົງທຶນຈາກຫວຽດນາມເຂົ້າສູ່ທ້ອງຖິ່ນບັນລຸ 5,66 ລ້ານໂດລາສະຫະລັດ, ເພີ່ມຂຶ້ນ 17,53%, ໃນຂະນະທີ່ທຶນລົງທຶນຈາກຈີນເພີ່ມຂຶ້ນ 75,02%.

ຜູ້ນຳແຂວງຫຼວງພະບາງຢືນຢັນວ່າ ຈະສືບຕໍ່ປັບປຸງສະພາບແວດລ້ອມການລົງທຶນ, ຫຼຸດຜ່ອນລະບຽບຂັ້ນຕອນບໍລິຫານຢູ່ດ່ານຊາຍແດນ, ສ້າງຄວາມສະດວກໃຫ້ແກ່ການຂົນສົ່ງສິນຄ້າ ແລະ ການເດີນທາງຂອງນັກທ່ອງທ່ຽວ.

ວິສາຫະກິດສະເໜີບັນດາທິດທາງການຮ່ວມມືທີ່ເປັນຮູບປະທຳ

ຜູ້ຕາງໜ້າບັນດາສະມາຄົມ ແລະ ອົງການວິສາຫະກິດພາຍໃນ ແລະ ຕ່າງປະເທດ ໄດ້ປະກອບຫຼາຍຂໍ້ສະເໜີເພື່ອຂຸດຄົ້ນທ່າແຮງການເຊື່ອມໂຍງທາງເສດຖະກິດລະຫວ່າງດຽນບຽນ, ຢຸນນານ ແລະ ຫຼວງພະບາງ.

ຜູ້ຕາງໜ້າອຳນາດການປົກຄອງທ້ອງຖິ່ນ, ບັນດາສະມາຄົມວິສາຫະກິດ ແລະ ກຸ່ມບໍລິສັດລົງທຶນພາຍໃນ ແລະ ຕ່າງປະເທດ ລົງນາມໃນບັນດາບົດບັນທຶກຄວາມເຂົ້າໃຈການຮ່ວມມື (MOU) ໃນຂອບເຂດກອງປະຊຸມ.

ຕາມທ່ານ ຮວ່າງ ກວາງ ຟ່ອງ, ຮອງປະທານສະຫະພັນການຄ້າ ແລະ ອຸດສາຫະກຳຫວຽດນາມ (VCCI) ແລ້ວ, ຕໍ່ໜ້າບັນດາການປ່ຽນແປງຂອງການຄ້າໂລກ, ວິສາຫະກິດນັບມື້ນັບໃຫ້ຄວາມສົນໃຈຕໍ່ສະພາບແວດລ້ອມທີ່ໝັ້ນຄົງ, ໂປ່ງໃສ ແລະ ຄວາມສາມາດໃນການເຂົ້າຮ່ວມຕ່ອງໂສ້ມູນຄ່າ ແທນທີ່ຈະສຸມໃສ່ພຽງແຕ່ທ່າແຮງດ້ານຕົ້ນທຶນຕ່ຳ.

VCCI ໄດ້ສະເໜີ 4 ຂົງເຂດຮ່ວມມື ປະກອບມີ ໂລຈິສຕິກຊາຍແດນ, ກະສິກຳສິນຄ້າ ແລະ ການປຸງແຕ່ງຂັ້ນເລິກ, ການທ່ອງທ່ຽວເຊື່ອມໂຍງສາມປະເທດ ແລະ ການຄ້າເອເລັກໂຕຣນິກຂ້າມຊາຍແດນ. ພ້ອມກັນນັ້ນ, VCCI ໃຫ້ຄຳໝັ້ນສັນຍາວ່າຈະໜູນຊ່ວຍການເຊື່ອມໂຍງບັນດານັກລົງທຶນທີ່ມີຄຸນນະພາບກັບດຽນບຽນ.

ທ່ານ ຊຸນ ເຟິງເຫຼີຍ, ປະທານສະມາຄົມວິສາຫະກິດຈີນປະຈຳຫວຽດນາມ (CBAV), ຕາງໜ້າໃຫ້ອົງການທີ່ມີວິສາຫະກິດສະມາຊິກເກືອບ 5.000 ແຫ່ງ, ໄດ້ຕີລາຄາວ່າ ສາມທ້ອງຖິ່ນມີທ່າແຮງດ້ານທີ່ຕັ້ງພູມສາດທີ່ໃກ້ຄຽງກັນ ແລະ ໂຄງປະກອບເສດຖະກິດທີ່ສາມາດເສີມໜູນເຊິ່ງກັນແລະກັນ.

CBAV ໄດ້ສະເໜີ 3 ຄຳໝັ້ນສັນຍາ ຄື ຊຸກຍູ້ການເຊື່ອມໂຍງລະຫວ່າງການສະໜອງ ແລະ ຄວາມຕ້ອງການໃຫ້ເໝາະສົມ, ລະດົມແຫຼ່ງຊັບພະຍາກອນຈາກບັນດາຂະແໜງການຜະລິດຄຸນນະພາບສູງ ແລະ ເຕັກໂນໂລຊີທີ່ທັນສະໄໝ, ພ້ອມທັງປະສານສົມທົບແກ້ໄຂຄວາມຫຍຸ້ງຍາກໃຫ້ວິສາຫະກິດໃນຂະບວນການດຳເນີນໂຄງການຢູ່ດຽນບຽນ.

ທ່ານ Steve Bùi, ຜູ້ຕາງໜ້າສະພາວິສາຫະກິດຫວຽດນາມ - ຈີນ (VCBC), ໄດ້ສະເໜີ 3 ໂຄງການດຳເນີນງານ ຄື ຈັດໃຫ້ບັນດາກຸ່ມບໍລິສັດດ້ານໂຄງລ່າງພື້ນຖານຂອງຈີນເຂົ້າສຳຫຼວດສະພາບຕົວຈິງຢູ່ດຽນບຽນ; ໜູນຊ່ວຍສົ່ງເສີມການສົ່ງອອກກາເຟ ແລະ ໝາກມາກາດາເມຍໄປຈີນຜ່ານຊ່ອງທາງການຄ້າທາງການ; ປະສານສົມທົບກັບຄູ່ຮ່ວມມື Douyin ສ້າງຊ່ອງສື່ສານສະເພາະ ເພື່ອແນະນຳການທ່ອງທ່ຽວ ແລະ ວັດທະນະທຳດຽນບຽນໃຫ້ແກ່ຜູ້ໃຊ້ງານຊາວຈີນຫຼາຍຮ້ອຍລ້ານຄົນ.

ໃນຂະນະດຽວກັນ, ທ່ານ ຫວໍ ວັນ ເທິນ, ປະທານສະມາຄົມວິສາຫະກິດເຂດອຸດສາຫະກຳນະຄອນໂຮ່ຈີມິນ (HBA), ໄດ້ເນັ້ນໜັກເຖິງທ່າອ່ຽງການລົງທຶນທີ່ມຸ່ງສູ່ມາດຕະຖານສີຂຽວ ແລະ ESG.

HBA ປາຖະໜາພັດທະນາຮູບແບບການເຊື່ອມໂຍງສອງທິດທາງ, ໃນນັ້ນວິສາຫະກິດຈາກນະຄອນໂຮ່ຈີມິນລົງທຶນກໍ່ສ້າງໂຮງງານປຸງແຕ່ງຢູ່ດຽນບຽນ, ພ້ອມທັງນຳຜະລິດຕະພັນກະສິກຳຂອງແຂວງເຂົ້າສູ່ລະບົບຈຳໜ່າຍຢູ່ບັນດາແຂວງພາກໃຕ້. ສະມາຄົມຍັງໄດ້ສະເໜີໃຫ້ຈັດໂຄງການທ່ອງທ່ຽວ MICE ປະຈຳປີ ສຳລັບຜູ້ອອກແຮງງານຢູ່ບັນດາເຂດອຸດສາຫະກຳນະຄອນໂຮ່ຈີມິນໄປຢ້ຽມຢາມດຽນບຽນ.

ໃນຂອບເຂດກອງປະຊຸມ, ພາຍໃຕ້ການເປັນສັກຂີພິຍານຂອງທ່ານ ຫງວຽນ ມິງ ຫວູ, ຮອງລັດຖະມົນຕີຜູ້ປະຈຳການກະຊວງການຕ່າງປະເທດ ແລະ ຜູ້ນຳສາມທ້ອງຖິ່ນ ດຽນບຽນ, ຢຸນນານ ແລະ ຫຼວງພະບາງ, ຜູ້ຕາງໜ້າອຳນາດການປົກຄອງທ້ອງຖິ່ນ, ບັນດາສະມາຄົມວິສາຫະກິດ ແລະ ກຸ່ມບໍລິສັດລົງທຶນພາຍໃນ ແລະ ຕ່າງປະເທດ ໄດ້ລົງນາມໃນບັນດາບົດບັນທຶກຄວາມເຂົ້າໃຈການຮ່ວມມື (MOU).

ບັນດາຂໍ້ຕົກລົງໄດ້ສຸມໃສ່ການພັດທະນາໂຄງລ່າງພື້ນຖານເຂດອຸດສາຫະກຳ, ລະບົບໂລຈິສຕິກທ່າບົກ, ການສ້າງເຂດຜະລິດວັດຖຸດິບທີ່ເຊື່ອມໂຍງກັບການປຸງແຕ່ງຜະລິດຕະພັນກະສິກຳເພື່ອສົ່ງອອກ, ການຝຶກອົບຮົມບຸກຄະລາກອນ ແລະ ການສົ່ງເສີມການທ່ອງທ່ຽວຂ້າມປະເທດ.

ການລົງນາມໃນບັນດາບົດບັນທຶກຄວາມເຂົ້າໃຈໄດ້ສ້າງພື້ນຖານໃຫ້ບັນດາຝ່າຍສືບຕໍ່ດຳເນີນບັນດາໂຄງການຮ່ວມມືທີ່ເປັນຮູບປະທຳ, ຄ່ອຍໆນຳບັນດາທິດທາງການເຊື່ອມໂຍງລະຫວ່າງດຽນບຽນ, ຢຸນນານ ແລະ ຫຼວງພະບາງ ເຂົ້າສູ່ການປະຕິບັດຕົວຈິງ.

ຊຸກຍູ້ຄວາມຜູກພັນທາງຍຸດທະສາດ ຫວຽດນາມ - ລາວ ໃນໄລຍະໃໝ່ ຍສໝ - ແຕ່ວັນທີ 14-16/10, ສະຫາຍ ວິໄລ ຫຼ້າຄຳຟອງ, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກປະຊາຊົນປະຕິວັດລາວ ໄດ້ນຳພາຄະນະຜູ້ແທນຂັ້ນສູງລາວ ຢ້ຽມຢາມຫວຽດນາມຢ່າງເປັນທາງການ ຕາມຄຳເຊີນຂອງສະຫາຍ ເຈິ່ນ ເກິມ ຕູ໋, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ. ການຢ້ຽມຢາມຄັ້ງນີ້ປະກອບສ່ວນເສີມສ້າງຄວາມໄວ້ວາງໃຈທາງການເມືອງ, ເພີ່ມທະວີການຮ່ວມມືລະຫວ່າງສອງພັກ ແລະ ຊຸກຍູ້ສາຍພົວພັນພິເສດ ຫວຽດນາມ - ລາວ ໃຫ້ພັດທະນາຢ່າງເລິກເຊິ່ງ ແລະ ມີປະສິດທິຜົນ.

ຫວຽດນາມ - ລາວ ຊຸກຍູ້ບັນດາໂຄງການຮ່ວມມືຍຸດທະສາດ, ເພີ່ມທະວີການເຊື່ອມໂຍງສອງລະບົບເສດຖະກິດ ຍສໝ - ຕອນບ່າຍວັນທີ 14/10, ທີ່ສຳນັກງານລັດຖະບານ, ທ່ານ ເລ ມິງ ຮຶງ, ນາຍົກລັດຖະມົນຕີ ໄດ້ຕ້ອນຮັບສະຫາຍ ວິໄລ ຫຼ້າຄຳຟອງ, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກປະຊາຊົນປະຕິວັດລາວ ພ້ອມດ້ວຍຄະນະຜູ້ແທນຂັ້ນສູງລາວ ທີ່ພວມຢ້ຽມຢາມຫວຽດນາມຢ່າງເປັນທາງການ. ສອງຝ່າຍໄດ້ຢືນຢັນຄວາມຕັ້ງໃຈທີ່ຈະເສີມຂະຫຍາຍສາຍພົວພັນພິເສດຫວຽດນາມ - ລາວ, ເລັ່ງລັດບັນດາໂຄງການເຊື່ອມຕໍ່ໂຄງລ່າງພື້ນຖານ, ຊຸກຍູ້ການຮ່ວມມືດ້ານເສດຖະກິດ ແລະ ກະກຽມບັນດາກິດຈະກຳລະນຶກເຖິງສາຍພົວພັນລະຫວ່າງສອງປະເທດໃນປີ 2027.