ການລົງນາມບົດບັນທຶກ ຄວາມເຂົ້າໃຈ ການຮ່ວມມືເພື່ອທົດລອງ ຈັດຕັ້ງປະຕິບັດ ລະບົບແຈ້ງພາສີປະຕູດຽວ ໃນການຄຸ້ມຄອງການນຳເຂົ້າສິນຄ້າ ປະເພດພາຫະນະ.
ກົມພາສີ ກະຊວງການເງິນ ແລະກົມຂົນສົ່ງ ກະຊວງໂຍທາທິການ ແລະຂົນສົ່ງ, ໄດ້ມີການລົງນາມບົດບັນທຶກ ຄວາມເຂົ້າໃຈ ການຮ່ວມມືເພື່ອທົດລອງ ຈັດຕັ້ງປະຕິບັດ ລະບົບແຈ້ງພາສີປະຕູດຽວ ໃນການຄຸ້ມຄອງການນຳເຂົ້າສິນຄ້າ ປະເພດພາຫະນະ ຂຶ້ນໃນວັນທີ 18 ພຶດສະພາ 2018 ຜ່ານມາ, ໂດຍການລົງນາມ ຂອງ ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າ ກົມພາສີ ກັບ ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ ກະຊວງໂຍທາທິການ ແລະຂົນສົ່ງ, ມີບໍລິສັດຮ່ວມພັດທະນາ ລະບົບແຈ້ງພາສີປະຕູດຽວ, ພະນັກງານ-ລັດຖະກອນ, ເຈົ້າໜ້າທີ່ພາສີ ເຂົ້າຮ່ວມ.
ການເຊັນບັນທຶກ ຄວາມເຂົ້າໃຈໃນຄັ້ງນີ້, ເພື່ອກໍານົດສິດ ແລະ ຄວາມຮັບຜິດຊອບ ກ່ຽວກັບ ການນໍາໃຊ້ລະບົບແຈ້ງພາສີປະຕູດຽວເຂົ້າ ໃນການຄຸ້ມຄອງກວດກາ ແລະ ແລກປ່ຽນຂໍ້ມູນ ກ່ຽວກັບການນໍາເຂົ້າສິນຄ້າປະເພດພາຫະນະ ລະຫວ່າງ ກົມພາສີ ກະຊວງການເງິນ ແລະກົມຂົນສົ່ງ ກະຊວງໂຍທາທິການ ແລະຂົນສົ່ງ, ລະບົບແຈ້ງພາສີປະຕູດຽວ (Lao National Single Window - LNSW) ແມ່ນລະບົບການເຊື່ອມໂຍງ ຂໍ້ມູນແບບລວມສູນ ທີ່ມີຄວາມສະດວກ, ປອດໄພ, ວ່ອງໄວ ແລະໂປ່ງໃສ ໃນຮູບແບບເອເລັກໂຕຣນິກ ລະຫວ່າງ ຜູ້ປະກອບການ ແລະ ຂະແໜງຂອງພາກລັດ ທີ່ກ່ຽວຂ້ອງ ໃນການນຳເຂົ້າ-ສົ່ງອອກ ສິນຄ້າລະຫວ່າງປະເທດ.
ການຈັດຕັ້ງປະຕິບັດ ລະບົບແຈ້ງພາສີປະຕູດຽວ ຈະຊ່ວຍອຳນວຍ ຄວາມສະດວກ ໃຫ້ແກ່ຜູ້ປະກອບການ ໃນການຂໍອອກໃບອະນຸຍາດ ແລະໃບຢັ້ງຢືນຕ່າງໆ ຜ່ານລະບົບອອນລາຍແບບຄົບວົງຈອນ ກັບພາກລັດ, ເຊິ່ງຜູ້ປະກອບການ ສາມາດຮັບ-ສົ່ງຂໍ້ມູນ ຜ່ານລະບົບເອເລັກໂຕຣນິກດັ່ງກ່າວ ກັບພາກລັດ ໂດຍບໍ່ຈຳເປັນຕ້ອງໄປຕິດຕໍ່ພົວພັນ ໂດຍກົງກັບຫ້ອງການ ຫລື ສຳນັກງານລັດດ້ວຍຕົນເອງ ຄືກັບໃນເມື່ອກ່ອນ ແລະເຈົ້າໜ້າທີ່ທີ່ກ່ຽວຂ້ອງ ກໍສາມາດກວດກາຄວາມຖືກຕ້ອງຂອງຂໍ້ມູນ ແລະສາມາດອະນຸມັດເອກະສານ ໄດ້ທາງອອນລາຍເຊັ່ນກັນ.
ໄລຍະທຳອິດ ລະບົບປະກອບມີ 2 ໂມດູນຫລັກ ຄື: ໂມດູນການອອກໃບອະນຸຍາດ (E-Permit) ແລະ ໂມດູນກັບກັບການຂົ່ນສົ່ງສິນຄ້າ (Manifest). ປັດຈຸບັນການພັດທະນາລະບົບແຈ້ງພາສີປະຕູດຽວ ໄດ້ສຳເລັດຕົ້ນແບບຂອງລະບົບ, ຊຶ່ງໄລຍະທີ່ຜ່ານມາ ກໍໄດ້ມີການລົງນາມ ບົດບັນທຶກຄວາມເຂົ້າໃຈຮ່ວມກັບ ກົມການນຳເຂົ້າ-ສົ່ງອອກ ກະຊວງອຸດສາຫະກຳ ແລະການຄ້າ ເພື່ອທົດລອງອອກ ໃບອະນຸຍາດນຳເຂົ້າພາຫະນະ ໃຫ້ແກ່ຜູ້ປະກອບການຈຳນວນໜຶ່ງ, ຊຶ່ງເຫັນວ່າລະ ບົບມີຄວາມພ້ອມ ແລະສາມາດນຳໃຊ້ໄດ້ໂດຍພື້ນຖານ, ຫລັງຈາກນັ້ນ ຈຶ່ງໄດ້ຜັນຂະຫຍາຍ ໄປສູ່ຂະແໜງການອື່ນໆ ເຊັ່ນ: ກົມເຕັກໂນໂລຊີ-ຂໍ້ມູນຂ່າວສານ, ກະຊວງວິທະຍາສາດ ແລະເຕັກໂນໂລຊີ, ອອກໃບຢັ້ງຢືນເຫັນດີ ແລະຮັບຮູ້ການນຳໃຊ້ລາຍເຊັນດິຈິຕອນ ທີ່ມີການປ້ອງກັນ ຂອງຕ່າງປະເທດທີ່ນຳໃຊ້ໃນລະບົບແຈ້ງພາສີ ປະຕູດຽວແຫ່ງຊາດ ແລະການລົງນາມ ໃນບົດບັນທຶກຄວາມເຂົ້າໃຈ ການນຳໃຊ້ລະບົບ LNSW ລະຫວ່າງ ກົມພາສີ ກະຊວງການເງິນ ແລະກົມຂົນສົ່ງ ກະຊວງໂຍທາທິການ ແລະຂົນສົ່ງ ໃນຄັ້ງນີ້, ກົມຂົນສົ່ງຈະເລີ່ມ ນຳໃຊ້ລະບົບນີ້ເພື່ອອອກໃບອະນຸຍາດ ທາງດ້ານເຕັກນິກການນຳເຂົ້າຍານພະນະ ໃຫ້ມີຄວາມສະດວກ, ວ່ອງໄວ ແລະກະທັດຮັດກວ່າເກົ່າ, ຊຶ່ງຜູ້ປະກອບການສາມາດສົ່ງຄຳຮ້ອງ ເພື່ອຂໍໃບອະນຸຍາດ ຈາກກົມຂົນສົ່ງແບບອອນລາຍ ໄດ້ເຊັ່ນດຽວກັນ.
ການນຳໃຊ້ລະບົບແຈ້ງພາສີປະຕູດຽວ ຖືເປັນໝຶ່ງໃນບາດກ້າວທີ່ສຳຄັນ ເພື່ອແນໃສ່ອຳນວຍຄວາມສະດວກ ໃຫ້ແກ່ທຸກຂົງເຂດຂອງວຽກງານ, ຊຶ່ງຈະເຮັດໃຫ້ລະບົບແຈ້ງພາສີປະຕູດຽວຂອງ ສປປ ລາວ ກ້າວໄປສູ່ຄວາມທັນສະໄໝ ແລະສາມາດການເຊື່ອມໂຍງເຂົ້າກັບລະບົບແຈ້ງພາສີ ປະຕູດຽວຂອງອາຊຽນ ໃນອະນາຄົດ.
(ແຫຼ່ງຂໍ້ມູນ: museum.lak.la/)