ທ່ານ ສົມມາດ ພົລເສນາ ລັດຖະມົນຕີ ກຊສ ເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ.
ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ຈັດພິທີສະເຫຼີມສະຫຼອງວັນສິ່ງແວດລ້ອມໂລກ ວັນທີ 5 ມິຖຸນາ 2018 ຄົບຮອບ 46 ປີ ພາຍໃຕ້ຄຳຂັວນ ຫຼຸດຜ່ອນປລາສະຕິກ ຫຼຸດຜ່ອນມົນລະພິດ ວັນນ້ຳໂລກ ວັນທີ 22 ມີນາ 2018 ພາຍໃຕ້ຄຳຂວັນ ຈົ່ງພ້ອມກັນປົກປັກຮັກສາທຳມະຊາດ ເພື່ອແຫຼ່ງນ້ຳ ແລະ ວັນປູກຕົ້ນໄມ້ແຫ່ງຊາດ 1 ມິຖຸນາ ຂຶ້ນໃນວັນທີ 2 ມິຖຸນາ 2018 ທີ່ສວນເຈົ້າອະນຸວົງ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ສົມມາດ ພົລເສນາ ລັດຖະມົນຕີ ກຊສ ເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ພ້ອມດ້ວຍບັນດາລັດຖະມົນຕີ ຮອງລັດຖະມົນຕີ ຜູ້ຕາງໜ້າຈາກອົງການຈັດຕັ້ງສາກົນ ຄູ່ຮ່ວມພັດທະນາ ອົງການຈັດຕັ້ງມະຫາຊົນ ຕະຫຼອດຮອດພະນັກງານ ທະຫານ ຕຳຫຼວດ ນັກຮຽນ ແລະ ມວນຊົນຊາວນະຄອນຫຼວງເຂົ້າຮ່ວມ.
ທ່ານ ໂລນຄຳ ອາດສະນາວົງ ຫົວໜ້າກົມສົ່ງເສີມຄຸນະພາບສິ່ງແວດລ້ອມ ກຊສ ກ່າວວ່າ: ການສະເຫຼີມສະຫຼອງວັນດັ່ງກ່າວ ກຊສ ໄດ້ສົມທົບກັບທຸກພາກສ່ວນທີ່ກ່ຽວຂ້ອງ ທັງໃນສູນກາງ ແລະ ທ້ອງຖິ່ນ ດຳເນີນກິດຈະກຳຕ່າງໆ ເພື່ອພ້ອມກັນສ້າງຂະບວນການຢ່າງຟົດຟື້ນ ເປັນຕົ້ນ ສ້າງຈິດສຳນຶກໃນການປົກປັກຮັກສາສິ່ງແວດລ້ອມ ໂດຍນຳໃຊ້ສື່ຕ່າງໆ ເຊັ່ນ: ໂທລະພາບ ໜັງສືພິມ ເວບໄຊ ເພື່ອອອກຂ່າວລະດົມທົ່ວສັງຄົມໃນທົ່ວປະເທດ ໃຫ້ເປັນເຈົ້າການໃນການປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ສ້າງຂະບວນການຮ່ວມກັບນະຄອນຫຼວງວຽງຈັນ ອະນາໄມຕາມແຄມທາງຕັດໃໝ່ ດົງນາໂຊກ-ໜອງບຶກ ເນື່ອງໃນໂອກາດເປີດສັບປະດາວຽງຈັນສະອາດ ໄດ້ມອບໝາຍໃຫ້ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ລວມທັງຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງທົ່ວປະເທດ ໂດຍສົມທົບກັບພາກສ່ວນທີ່ກ່ຽວຂ້ອງ ເປັນເຈົ້າການໂຄສະນາເຜີຍແຜ່ ແລະ ສ້າງຂະບວນການ ເພື່ອປຸກລະດົມຂະບວນການໃຫ້ຟົດຟື້ນ ໃນການສະຫຼອງ 3 ວັນດັ່ງກ່າວ ໄດ້ຮ່ວມມືກັບສະຖາບັນການສຶກສາ ມະຫາວິທະຍາໄລ ໂຮງຮຽນໃນການມີສ່ວນຮ່ວມ ໃນການສ້າງບຸຄະລາກອນ ແລະ ວິຊາການຕ່າງໆກ່ຽວກັບສິ່ງແວດລ້ອມ.
ໃນໂອກາດດຽວກັນນີ້ ທ່ານ ສົມມາດ ພົນເສນາ ຍັງໄດ້ອ່ານສານຂອງທ່ານນາຍົກ ເນື່ອງໃນວັນສິ່ງແວດລ້ອມໂລກ 5 ມິຖຸນາ 2018 ໃຫ້ບັນດາທ່ານທີ່ເຂົ້າຮ່ວມຮັບຟັງ ເຊິ່ງມີບາງເນື້ອໃນສຳຄັນວ່າ: ເນື່ອງໃນໂອກາດສະເຫຼີມສະຫຼອງວັນສິ່ງແວດລ້ອມໂລກ ວັນສິ່ງແວດລ້ອມແຫ່ງຊາດ ວັນນ້ຳໂລກ ວັນປູກຕົ້ນໄມ້ປີນີ້ ສຳລັບ ສປປ ລາວ ຂໍໃຫ້ຖືເອົາໂອກາດທີ່ມີຄວາມໝາຍສຳຄັນດັ່ງກ່າວ ດຳເນີນການໂຄສະນາປູກຈິດສຳນຶກ ແລະ ສ້າງຂະບວນການໃຫ້ສອດຄ່ອງຕາມຄຳຂວັນປີນີ້ ແລະ ພ້ອມກັນຫັນປ່ຽນຈິນຕະນາການໄປພ້ອມໆກັບຂະບວນການເພີ່ມທະວີ ຄຸ້ມຄອງຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມຕາມທິດສີຂຽວ ແລະ ຍືນຍົງຕາມລະບຽບການ ແລະ ກົດໝາຍຢ່າງເຂັ້ມງວດໃຫ້ບັນລຸຕາມວິໄສທັດ ຍຸດທະສາດ ແລະ ແຜນການ 5 ປີຂອງຂະແໜງການ ປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມໃຫ້ມີຄວາມຍືນຍົງ.
ສຳລັບກິດຈະກຳໃນມື້ນີ້ ຈະໄດ້ປູກຕົ້ນໄມ້ດູ່ໃນສວນເຈົ້າອະນຸວົງ ຈຳນວນ 10 ຕົ້ນ ແລະ ຍ່າງເພື່ອສຸຂະພາບ ເລີ່ມແຕ່ຮູບຫຼໍ່ເຈົ້າອະນຸວົງ ຫາສີ່ແຍກໄຟອຳນາດໂຮງຮຽນເຕັກນິກ ລາວ-ເຢຍລະມັນ ແລ້ວຍ່າງກັບຄືນມາສວນເຈົ້າອະນຸວົງ ແລ້ວຍ່າງຊົມບູດວາງສະແດງຮູບພາບ ແລະ ອື່ນໆ ໃນນັ້ນແມ່ນຈະມີກິດຈະກຳຖາມ-ຕອບ ເພື່ອປູກຈິດສຳນຶກໃຫ້ແກ່ປະຊາຊົນເຂົ້າໃຈ ແລະ ມີສ່ວນຮ່ວມໃນການຫຼຸດຜ່ອນການນຳໃຊ້ຢາງປລາສະຕິກ ຄິດກ່ອນຈະໃຊ້ ຄິດກ່ອນຈະຖິ້ມ ແລະ ປົກປັກຮັກສາສິ່ງແວດລ້ອມ ເພື່ອສ້າງຕົວເມືອງສີຂຽວ ສະອາດງາມຕາ ພ້ອມທັງບັນລຸເປົ້າໝາຍພັດທະນາແບບຍືນຍົງ.