 |
ທີມກູ້ໄພປະເທດໄທກະກຽມອຸປະກອນເພື່ອມຸ້ງໜ້າສູ່ ແຂວງອັດຕະປື.
ທ່ານນາຍົກໄທ ສັ່ງການໃຫ້ຊ່ວຍເຫຼືອປະຊາຊົນລາວ ທີ່ປະສົບໄພພິບັດເຂື່ອນແຕກເປັນການດ່ວນ
ລາຍງານ 24 ກໍລະກົດ 2018, ທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີຂອງໄທ ໄດ້ສັ່ງການດ່ວນໃຫ້ຊ່ວຍເຫຼືອປະຊາຊົນລາວທີ່ປະສົບໄພພິບັດນໍ້າຖ້ວມ ຈາກເຫດເຂື່ອນເຊປຽນ-ເຊນໍ້ານ້ອຍແຕກ ຢູ່ເມືອງສະໜາມໄຊ ແຂວງອັດຕະປື.
ໃນດ້ານຂອງທ່ານ ໄພທູນ ຮັກປະເທດ ຜູ້ວ່າຈັງຫວັດມຸກດາຫານໄດ້ຕັ້ງສູນປະສານງານຊ່ວຍເຫຼືອຜູ້ປະສົບໄພພິບັດເຂື່ອນເຊປຽນ-ເຊນ້ຳນ້ອຍແຕກ ພ້ອມທັງເຊີນຊວນທັງພາກລັດ, ພາກເອກະຊົນ, ພາກປະຊາຊົນ ຮ່ວມບໍລິຈາກເງິນ, ເຄື່ອງນຸ່ງຫົ່ມ, ອາຫານ ແລະ ສິ່ງຂອງຈຳເປັນ ເພື່ອນຳໄປມອບໃຫ້ຜູ້ໄດ້ຮັບຜົນກະທົບຜ່ານທາງສະຖານກົງສຸນໃຫຍ່ແຫ່ງລາຊະອານາຈັກໄທ ປະຈຳແຂວງສະຫວັນນະເຂດ ແລະ ສະຖານກົງສຸນລາວ ປະຈຳຈັງຫວັດຂອນແກ່ນ ໂດຍເລີ່ມຮັບບໍລິຈາກເປັນທາງການໃນວັນທີ 25 ກໍລະກົດນີ້.
ໂຄສົກຂອງທ່ານປະທານາທິບໍດີ ເກົາຫຼີໃຕ້ ທ່ານ ກີມ ອຸຍກີອອມ .
ປະເທດເກົາຫຼີໃຕ້
ສຳນັກງານປະທານນາທິບໍດີ ເກົາຫຼີໃຕ້ ທ່ານມູນ ແຈອິນ ມື້ນີ້ໄດ້ໃຫ້ຮູ້ວ່າ ຜູ້ນຳຂອງ ເກົາຫຼີໃຕ້ ໄດ້ຊີ້ນຳໃນການຈັດຕັ້ງປະຕິບັດ ບັນດາມາດຕະການເພື່ອຊ່ວຍເຫຼືອ ສປປ ລາວ ແກ້ໄຂ-ຫຼຸດຜ່ອນຜົນກະທົບ ພາຍຫຼັງເຫດການອ່າງເກັບນ້ຳ ເຂື່ອນໄຟຟ້າແຮງງານນ້ຳ ແຕກ ເຊປຽນ-ເຊນ້ຳນ້ອຍ ໃນວັນທີ 23 ກໍລະກົດ. ໜື່ງໃນມາດຕະການທີ່ຈະຮີບເຮັ່ງຈັດຕັ້ງປະຕິບັດແມ່ນ ສົ່ງທີມກູ້ໄພໄປຮ່ວມໃນການຊ່ວຍເຫຼືອ ບັນດາຜູ້ປະສົບໄພ ເຂດໄພພິບັດ. “ທ່ານປະທານາທິບໍດີ ໄດ້ຊີ້ນຳໃຫ້ບັນດາມາດຕະການເຮັ່ງດ່ວນ ປະກອບມີ: ສົ່ງທີມກູ້ໄພເຄື່ອນທີ່ໄວ ໃນການສືບຕໍ່ຊອກຫາຜູ້ປະສົບໄພ ພ້ອມນັ້ນຊອກຫາສາຍເຫດທີ່ພາໃຫ້ເກີດມີເຫດການດັ່ງກ່າວ, ຍ້ອນບັນດາບໍລິສັດ ຂອງພວກເຮົາທີ່ເຂົ້າຮ່ວມໃນການກໍ່ສ້າງດັ່ງກ່າວຫຼືບໍ່”, ສຳນັກຂ່າວ Reuters ໄດ້ອ້າງອີງຄຳຖະແຫຼງຂອງໂຄສົກຂອງທ່ານປະທານາທິບໍດີ ເກົາຫຼີໃຕ້ ທ່ານ ກີມ ອຸຍກີອອມ ໄດ້ກ່າວຄຳຖະແຫຼງການດັ່ງກ່າວທີ່ຫ້ອງປະຊຸມມື້ນີ້. ບໍລິສັດ SK Engineering & Construction ຂອງ ເກົາຫຼີໃຕ້, ໜຶ່ງໃນບໍລິສັດທີ່ຮ່ວມໃນການກໍ່ສ້າງ ໂຄງການ ເຂື່ອນໄຟຟ້າພະລັງງານນ້ຳ ເຊປຽນ-ນ້ຳນ້ອຍ ເບື້ອງຕົ້ນຢັ້ງຢືນວ່າ: ສາຍເຫດທີ່ພາໃຫ້ ມີການແຕກຂອງສັນເຂື່ອນ ແມ່ນຍ້ອນຝົນຕົກຕິດຕໍ່ກັນຫຼາຍມື້. ບໍລິສັດນີ້ກໍ່ກຳລັງປະສານສົມທົບກັບ ລັດຖະບານລາວ ໃນການເຮັດວຽກງານອົບພະຍົບພໍ່ແມ່ປະຊາຊົນອອກຈາກພື້ນທີ່ນ້ຳຖ້ວມ.
 |
ນາຍົກລັດຖະມົນຕີສິງກາໂປ.
ນາຍົກລັດຖະມົນຕີສິງກະໂປ ປະກາດພ້ອມຊ່ວຍເຫຼືອ ສປປ ລາວ
ເມື່ອວັນທີ 24 ກໍລະກົດ 2018 ຫຼ້າສຸດທ່ານ ລີ ຊຽນ ລຸງ ນາຍົກລັດຖະມົນຕີ ປະເທດສິງກະໂປ ກໍ່ໄດ້ລົງຂໍ້ຄວາມຜ່ານເຟສບຸກສ່ວນຕົວ ເຊິ່ງມີເນື້ອໃນສຳຄັນວ່າ “ຮູ້ສຶກເສຍໃຈເປັນຢ່າງຍິ່ງເມື່ອໄດ້ຮັບຊາບຂ່າວວ່າ ເຂື່ອນເຊປຽນ-ເຊນ້ຳນ້ອຍ ໃນ ສປປລາວແຕກ, ພວກເຮົາຍັງບໍ່ຮູ້ຊັດເຈນເຖິງຄວາມເສຍຫາຍທີ່ເກີດຂຶ້ນ ແຕ່ກໍ່ມີຜູ້ສູນຫາຍຫຼາຍຮ້ອຍຄົນ ແລະ ຫຼາຍພັນຄົນບໍ່ມີທີ່ຢູ່ອາໃສ ລວມທັງຜູ້ເສຍຊີວິດຍັງບໍ່ຊັດເຈນ ພວກເຮົາຂໍສະແດງຄວາມເຫັນອົກເຫັນໃຈຢ່າງເລິກເຊິ່ງມາຍັງຜູ້ທີ່ໄດ້ຮັບຜົນກະທົບ ຈາກໄພພິບັດຄັ້ງນີ້ ແລະ ພວກເຮົາໄດ້ຕິດຕໍ່ໄປຍັງທາງການລາວ ແລະ ແຈ້ງໃຫ້ຊາບວ່າສິງກະໂປພ້ອມທີ່ຈະຊ່ວຍເຫຼືອໃນສິ່່ງທີ່ສາມາດຊ່ວຍເຫຼືອໄດ້”
ທ່ານນາຍົກລັດຖະມົນຕີມາເລເຊຍພ້ອມພັນລະຍາ.
ຜູ້ນຳປະເທດມາເລເຊຍ
ໂດຍທ່ານ ນາງ ດ.ຣ ວັນ ອາຊີຊະ ອິສມາອິວ ຮອງນາຍົກລັດ ຖະມົນຕີ ແລະ ເປັນພັນລະຍາຂອງທ່ານ ດຣ. ໂມຮຳໝັດ ມະຫາເທ ລັດຖະມົນຕີມາເລເຊຍ ໃນນາມລັດຖະບານມາເລເຊຍ ໄດ້ລົງຂໍ້ຄວາມໃນ Twitter ສະແດງຄວາມເສຍໃຈຕໍ່ເຫດການເຂື່ອນເຊປຽນ-ເຊນ້ຳນ້ອຍແຕກ ອັນໄດ້ສົ່ງຜົນໃຫ້ມີການສູນເສຍຊີວິດ ແລະ ຊັບສິນ, ຫຼາຍພັນຄົນບໍ່ມີທີ່ພັກອາໄສ ແລະ ຫຼາຍຮ້ອຍຄົນສູນຫາຍ.
 |
ເລຂາທິການໃຫຍ່ສະຫະປະຊາຊາດ.
ອົງການສະຫະປະຊາຊາດ
ທ່ານ ດູຈາຣິກ ໂຄສົກເລຂາທິການໃຫຍ່ອົງການສະຫະປະຊາຊາດກ່າວໃນຖະແຫຼງການວ່າ: ທ່ານ ກູເຕີເຣັສ ຮູ້ສຶກເສົ້າສະຫຼົດໃຈຕໍ່ອຸບັດເຫດເຂື່ອນໄຟຟ້ານ້ຳຕົກແຕກທີ່ເຊິ່ງເຮັດໃຫ້ປະຊາຊົນລາວເສຍຊີວິດ ແລະບາດເຈັບ ເຊິ່ງທ່ານໄດ້ສະແດງຄວາມຢື້ຢາມຖາມຂ່າວຕໍ່ຄອບຄົວຜູ້ເສຍຊີວິດ, ລັດຖະບານ ແລະປະຊາຊົນລາວ.ຖະແຫຼງການລະບຸວ່າ, ຖ້າມີຄວາມຕ້ອງການ, ອົງການສະຫະປະຊາຊາດຍິນດີສະໜອງການຊ່ວຍເຫຼືອໃຫ້ແກ່ວຽກງານກູ້ໄພຂອງລາວ.
ແລະ ຜູ້ນຳອີກຫຼາຍໆທີ່ກຳລັງກະກຽມເພື່ອຊ່ວຍເຫຼືອລາວຮັບມືກັບສະພາບໄພພິບັດນີ້.
（ຫັດທະບູນ）
