ພາບປະກອບ
ໃນປັດຈຸບັນ, ການບໍລິໂພກຂ່າວຜ່ານສື່ອອນລາຍກາຍເປັນກິດຈະວັດປະຈຳວັນຂອງຄົນເຮົາ ໄປແລ້ວ, ໂດຍສະເພາະ ແມ່ນສື່ທາງ ເຟສບຸກ ເຊິ່ງເປັນແຫລ່ງລວມຂ່າວສານຕ່າງໆຈາກທຸກມູມໂລກຢ່າງຫລວງຫລາຍ. ໃນບັນດາຂ່າວເຫລົ່ານັ້ນກໍມີທັງຂ່າວແທ້, ຂ່າວລວງ ຫລື ຂ່າວລື ເນື່ອງຈາກຂໍ້ມູນບາງຢ່າງທີ່ນຳສະເໜີຜ່ານສື່ອອນລາຍຍັງບໍ່ໄດ້ຮັບການກວດສອບ, ກັ່ນຕ່ອງ ຈຶ່ງເຮັດໃຫ້ການສົ່ງສານບໍ່ຖືກຕ້ອງ ແລະ ກາຍເປັນຂ່າວລື ທີ່ບໍ່ມີມູນຄວາມຈິງ ແລະ ສ້າງຄວາມເຂົ້າໃຈຜິດໃຫ້ຜູ້ບໍລິໂພກ, ສົ່ງຜົນເຮັດໃຫ້ຜູ້ອ່ານເກີດຄວາມເຄັ່ງຕຶງ, ຮູ້ສຶກບໍ່ດີກັບຄົນອ້ອມຂ້າງ ແລະ ເບິ່ງສັງຄົມໃນມຸມມອງທີ່ ມີແຕ່ຄວາມເສື່ອມໂຊມ. ແຕ່ຄວາມເປັນຈິງແລ້ວ ສັງຄົມກໍມີ ທັງສິ່ງດີ ແລະ ບໍ່ດີເຈືອປົນກັນໄປ, ຂຶ້ນກັບເຮົາວ່າຈະເລືອກບໍລິໂພກຂໍ້ມູນແບບໃດ.
ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ.(ພາບ:vientianemai.net)
ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໃຫ້ສຳພາດວ່າ: ສູນດາຕາເຊັນເຕີຂອງກະຊວງ ປທສ ສາມາດສ້າງປະໂຫຍດໃຫ້ແກ່ບັນດາກະຊວງ ອົງການຈັດຕັ້ງຕ່າງໆ ກໍຄືຜູ້ຊົມໃຊ້ ເພາະວ່າໄດ້ອຳນວຍຄວາມສະດວກທາງດ້ານສັນຍານໂທລະສັບອິນເຕີເນັດກວມເອົາ 90% ໃນຂອບເຂດທົ່ວປະເທດ ເປັນຕົ້ນ ໂທລະສັບລະບົບ 2G 3G ແລະ 4G ກວມ 70% ສຳລັບລະບົບ 4G ເປັນລະບົບອິນເຕີເນັດເທິງມືຖື ເຊິ່ງລັດຖະບານໄດ້ຮ່ວມມືກັບຕ່າງປະເທດ ເພື່ອອຳນວຍຄວາມສະດວກໃຫ້ຜູ້ຊົມໃຊ້ເຊັ່ນ ວ່ອງໄວ ປະຢັດເວລາ ໂດຍສະເພາະບັນດາສື່ສັງຄົມອອນລາຍຕ່າງໆແມ່ນມີຜົນປະໂຫຍດຫຼາຍຢ່າງເຊັ່ນ ການໂພດຂາຍສິນຄ້າປະເພດຕ່າງໆລົງ ເພື່ອໃຫ້ທຸກຄົນຮັບຮູ້ ແລະ ຈັບຈ່ອງສັ່ງຊື້ສິນຄ້າຜ່ານລະບົບມືຖື ເປັນຕົ້ນ ອາຫານ ເຄື່ອງດື່ມ ເຄື່ອງໃຊ້ໃນຊີວິດປະຈຳວັນ ແລະ ໂຄສະນາສິນຄ້າອື່ນໆ.
(ໄຊພອນ)