 |
ກອງປະຊຸມປຶກສາຫາລືລະດັບສູງກ່ຽວກັບທິດທາງການຈັດຕັ້ງປະຕິບັດຍຸດທະສາດການເຕີບໂຕສີຂຽວແຫ່ງຊາດຂອງ ສປປ ລາວ ຮອດປີ 2030
ໂດຍໄດ້ຮັບການສະໜັບສະໜູນຈາກທະນາຄານໂລກ ແລະ ກອງທຶນປົກປັກຮັກສາສິ່ງແວດລ້ອມ ຄະນະຮັບຜິດຊອບສ້າງຍຸດທະສາດ ແລະ ສູນສົ່ງເສີມການເຕີບໂຕສີຂຽວແຫ່ງຊາດໄດ້ຈັດກອງປະຊຸມປຶກສາຫາລືລະດັບສູງກ່ຽວກັບທິດທາງການຈັດຕັ້ງປະຕິບັດຍຸດທະສາດການເຕີບໂຕສີຂຽວແຫ່ງຊາດຂອງ ສປປ ລາວ ຮອດປີ 2030 ຂຶ້ນວັນທີ 5 ມີນາ 2019 ຢູ່ໂຮງແຮມລາວພລາຊາ ໂດຍເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ຫົວໜ້າຄະນະຊີ້ນຳລະດັບຊາດວຽກງານການເຕີບໂຕສີຂຽວ ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ບົວສອນ ບຸບຜາວັນ ຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ຫົວໜ້າຄະນະຮັບຜິດຊອບສ້າງຍຸດທະສາດ ແລະ ສູນສົ່ງເສີມການເຕີບໂຕສີຂຽວແຫ່ງຊາດຂອງ ສປປ ລາວ ມີບັນດາລັດຖະມົນຕີ ຮອງລັດຖະມົນຕີ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບົວສອນ ບຸບຜາວັນ ກ່າວວ່າ: ຂະບວນການສ້າງຍຸດທະສາດດັ່ງກ່າວ ໄດ້ເລີ່ມແຕ່ເດືອນເມສາ 2017 ເປັນຕົ້ນມາ ເຊິ່ງໄດ້ມີການຈັດກອງປະຊຸມປຶກສາຫາລື ເພື່ອລະດົມ ແລະ ປະກອບຄຳຄິດເຫັນທັງຂັ້ນສູນກາງ ແລະ ທ້ອງຖິ່ນຫຼາຍຄັ້ງ ແຕ່ລະຄັ້ງກໍໄດ້ມີຜູ້ຕາງໜ້າຈາກບັນດາກະຊວງ ຂະແໜງການ ພາກວິສາຫະກິດ ອົງການຈັດຕັ້ງສາກົນ ແລະ ຕ່າງປະເທດເຂົ້າຮ່ວມຢ່າງກວ້າງຂວາງ ຍຸດທະສາດການເຕີບໂຕສີຂຽວແຫ່ງຊາດຂອງ ສປປ ລາວ ຮອດປີ 2030 ໄດ້ເລັ່ງໃສ່ຄື: ຊຸກຍູ້ການຂະຫຍາຍຕົວຂອງເສດຖະ ກິດ ແລະ ຫຼຸດຜ່ອນຄວາມທຸກຍາກ ເພື່ອໃຫ້ປະຊາຊົນບັນດາເຜົ່າສາມາດເຂົ້າຮ່ວມ ແລະ ໄດ້ຮັບຜົນປະໂຫຍດຈາກການພັດທະນາເສດຖະກິດ-ສັງຄົມຢ່າງທົ່ວເຖິງ ແລະ ເປັນທຳ ຊຸກຍູ້ການຂະຫຍາຍຕົວຂອງເສດຖະກິດ ແລະ ຫຼຸດຜ່ອນຄວາມທຸກຍາກທີ່ມີປະສິດທິຜົນ ນຳໃຊ້ຊັບພະຍາກອນທຳມະຊາດທີ່ມີຢູ່ໃນປະເທດຢ່າງຈຳກັດ ແລະ ເກີດຜົນປະໂຫຍດສູງສຸດແກ່ປະເທດຊາດ ແລະ ປະຊາຊົນ ຊຸກຍູ້ການຂະຫຍາຍຕົວຂອງເສດຖະກິດທີ່ສະອາດຫຼຸດຜ່ອນສິ່ງເສດເຫຼືອ ແລະ ການປ່ອຍມົນລະພິດ ຫຼຸດຜ່ອນຄວາມສ່ຽງ ແລະ ຄວາມບອບບາງຂອງເສດຖະກິດຕໍ່ໄພພິບັດທາງທຳມະຊາດ ແລະ ການເໜັງຕີງຂອງເສດຖະກິດໂລກ ເຊິ່ງລັດຖະບານໄດ້ປະກາດໃຊ້ຍຸດທະສາດດັ່ງກ່າວ ວັນທີ 31 ມັງກອນ 2019 ໂດຍມອບໃຫ້ກະ ຊວງແຜນການ ແລະ ການລົງທຶນ ແລະ ສະຖາບັນຄົ້ນຄວ້າເສດຖະກິດແຫ່ງຊາດ ເປັນໃຈກາງປະສານສົມທົບກັບຂະແໜງການ ແລະ ທ້ອງຖິ່ນກ່ຽວຂ້ອງ ຈັດຕັ້ງຜັນຂະຫຍາຍໃຫ້ມີປະສິດທິຜົນສູງສຸດ.
ເພື່ອເປັນທິດທາງ ແລະ ບ່ອນອີງໃນການຈັດຕັ້ງຜັນຂະຫຍາຍຍຸດທະສາດການເຕີບໂຕສີຂຽວແຫ່ງຊາດຂອງ ສປປ ລາວ ຮອດ ປີ 2030 ກອງປະຊຸມໄດ້ລົງເລິກປຶກສາຫາລື 3 ບັນຫາສຳຄັນຄື: ທິດທາງການສ້າງຕັ້ງສູນສົ່ງເສີມການເຕີບໂຕສີຂຽວແຫ່ງຊາດຂອງ LSWinErr ສປປ ລາວ ການສ້າງກົນໄກການເງິນ ແລະ ກົນໄກການປະສານງານທີ່ໄດ້ກຳນົດໄວ້ໃນຍຸດທະສາດສະບັບດັ່ງກ່າວການສະໜັກເຂົ້າເປັນສະມາຊິກເຄືອຄ່າຍຮ່ວມມືສົ່ງເສີມເສດຖະກິດສີຂຽວຂອງອົງການສະຫະປະຊາຊາດເຊິ່ງການເປັນສະມາຊິກຈະສາມາດດຶງດູດແຫຼ່ງທຶນ ແລະ ສ້າງຄວາມສາມາດ ໃຫ້ພະນັກງານກ່ຽວກັບວຽກງານເຕີບໂຕສີຂຽວປຶກສາຫາລືກ່ຽວກັບການໄປຖອດຖອນບົດຮຽນການຜັນຂະຫຍາຍ ແລະ ຈັດຕັ້ງປະຕິບັດຍຸດທະສາດເຕີບໂຕສີຂຽວ.
（ແຫຼ່ງຂໍ້ມູນ： vientianemai.net）
