ລາວ-ໄທ ຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ
 |
ພິທີຕ້ອນຮັບເປັນທາງການຈັດຂຶ້ນຢູ່ກະຊວງກະລາໂຫມ ຣາຊະອານາຈັກໄທ .
ພິທີຕ້ອນຮັບເປັນທາງການຈັດຂຶ້ນຢູ່ກະຊວງກະລາໂຫມ ຣາຊະອານາຈັກໄທ, ໂດຍທ່ານ ພົນເອກ ປຣະວິດ ວົງສຸວັນ ຮອງນາຍົກລັດຖະມົນຕີ ລັດຖະມົນຕີກະຊວງກະລາໂຫມ ຣາຊະອານາຈັກໄທ ປະທານຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປໄທ-ລາວ ພ້ອມຄະນະ.
ຈາກນັ້ນ ກໍ່ໄດ້ມີການພົບປະສອງຝ່າຍ ເຊິ່ງທ່ານ ພົນໂທ ຈັນສະໝອນ ຈັນຍາລາດ ໄດ້ກ່າວວ່າ: ຍາມໃດກອງທັບປະຊາຊົນລາວກໍ່ຕີລາຄາສູງ ແລະ ຢຶດໝັ້ນຕໍ່ການພົວພັນຮ່ວມມືອັນດີງາມກັບປະເທດໃກ້ຄຽງ ໂດຍສະເພາະ ຕໍ່ກອງທັບໄທ, ບົນຈິດໃຈບ້ານໃກ້ເຮືອນຄຽງທີ່ດີ ລາວ-ໄທ ມີຊາຍແດນຕິດຈອດກັນທາງບົກ ແລະ ທາງນ້ຳ ບໍ່ສາມາດຈະຍ້າຍຊາຍແດນອອກຈາກກັນໄດ້. ກອງທັບປະຊາຊົນລາວ ພ້ອມຈະສືບຕໍ່ສົ່ງເສີມ ນຳໃຊ້ກົນໄກຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ, ໄທ-ລາວ ໃນການແກ້ໄຂບັນຫາຕ່າງໆ ແລະ ການຮ່ວມມືໃຫ້ຫຼາຍຂຶ້ນ, ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງປະເທດໃຫ້ນັບມື້ຫຼາຍຂຶ້ນ.
ພ້ອມນີ້ ຈະໄດ້ຮ່ວມມືກັນແກ້ໄຂບັນຫາຢາເສບຕິດຕາມຊາຍແດນ ໂດຍໃຫ້ມີການແຕ່ງຕັ້ງຄະນະປະຕິບັດງານຂອງຝ່າຍລາວ ແລະ ຝ່າຍໄທ ແຕ່ຢູ່ພາຍໃຕ້ຄວາມຮັບຜິດຊອບຂອງຄະນະອະນຸກຳມະການສອງຝ່າຍ ກອງທັບປະຊາຊົນລາວ ຍິນດີທີ່ມີການພົບປະຫາລືໃນລະດັບຕ່າງໆ ເຊັ່ນ: ກົມໃຫຍ່ເສນາທິການກອງທັບປະຊາຊົນລາວ ກັບກອງບັນຊາການທະຫານສູງສຸດ ແລະ ກອງທັບບົກໄທ ກົມສູ້ຮົບກັບບັນດາແມ່ທັບພາກ ເພື່ອສົ່ງເສີມສາຍພົວພັນ ເພີ່ມຄວາມເຂົ້າໃຈຄວາມໄວ້ເນື້ອເຊື່ອໃຈເຊີ່ງກັນ ແລະ ກັນ ເປີດກວ້າງການຮ່ວມມືສ້າງໃຫ້ມີຜົນປະໂຫຍດຮ່ວມກັນຫຼາຍຂຶ້ນກວ່າເກົ່າ ພ້ອມນີ້ ສອງຝ່າຍຍັງໄດ້ສະແດງຄວາມຍິນດີ ແລະ ຕີລາຄາສູງທີ່ເຫັນວ່າສາຍພົວພັນອັນດີງາມລະຫວ່າງລາວ-ໄທ ໄດ້ມີການເພີ່ມພູນຄູນສ້າງໃຫ້ນັບມື້ແຕກດອກອອກຜົນ.
ນອກນີ້ ສອງຝ່າຍໄດ້ສືບຕໍ່ເຂົ້າຮ່ວມກອງປະຊຸມຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ ໄທ-ລາວ ຄັ້ງທີ 25 ເຊິ່ງທ່ານພົນໂທ ຈັນສະໝອນ ຈັນຍາລາດ ໄດ້ຕາງໜ້າໃຫ້ລັດຖະບານ ແລະ ກອງທັບປະຊາຊົນລາວ ສະແດງຄວາມຂອບໃຈມາຍັງພະບໍຣົມວົງສານຸວົງ ລັດຖະບານ ແລະ ປະຊາຊົນໄທ ທີ່ໄດ້ໃຫ້ການຊ່ວຍເຫຼືອດ້ານເຈົ້າໜ້າທີ່ກູ້ໄພ ເຈົ້າໜ້າທີ່ການແພດ ພາຫະນະ ວັດຖຸ-ອຸປະກອນຮັບໃຊ້ ແລະ ເງິນຈຳນວນໜຶ່ງ ໃນກໍລະນີຄູກັນນ້ຳເຂື່ອນເຊປຽນ-ເຊນ້ຳນ້ອຍແຕກຢູ່ແຂວງອັດຕະປື ແລະ ເກີດອຸທົກກະໄພຫຼາຍພື້ນທີ່ຂອງລາວ ເຊິ່ງໄລຍະຜ່ານມາການພົວພັນຮ່ວມມືລະຫວ່າງສອງປະເທດລາວ-ໄທ ໄດ້ຮັບການພັດທະນາໃນຫຼາຍຂົງເຂດ ແລະ ມີຜົນສຳເລັດເປັນຮູບປະທຳຫຼາຍດ້ານ ໂດຍສະເພາະ ການປະຕິບັດດ້ານຄວາມໝັ້ນຄົງຊາຍແດນລາວ-ໄທ ໄທ-ລາວ ເຮັດໃຫ້ຊາຍແດນກາຍເປັນຊາຍແດນແຫ່ງສັນຕິພາບ ມິດຕະພາບ ພ້ອມນີ້ຍັງໄດ້ປຶກສາຫາລືກັນຫຼາຍບັນຫາ ແລະ ບັນລຸຕາມຈຸດປະສົງເປົ້າໝາຍ ພ້ອມທັງໄດ້ລົງນາມບົດບັນທຶກຮ່ວມກັນ ຕື່ມອີກ.
（ແຫຼ່ງຂໍ້ມູນ： vientianemai.net）