ຮອງລັດຖະມົນຕີກະຊວງປ້ອງກັນປະເທດ ລົງຊີ້ນຳວຽກງານ ຢູ່ ເມືອງສະຫນາມໄຊ

ທ່ານ ພົນຈັດຕະວາ ຜາລົມ ລິນທອງ, ຮອງຫົວໜ້າກົມໃຫຍ່ການເມືອງກອງທັບ ພ້ອມຄະນະ ລົງຕິດຕາມການປະຕິບັດງານ.

ທ່ານ ພົນຈັດຕະວາ ຜາລົມ ລິນທອງ, ຮອງຫົວໜ້າກົມໃຫຍ່ການເມືອງກອງທັບ ແລະ ທັງເປັນກຳມະການໃນຄະນະຮັບຜິດຊອບພາກສະຫນາມໃນການກອບກູ້ຊອກຄົ້ນຜູ້ສູນຫາຍ ແລະ ຊ່ວຍເຫຼືອກູ້ໄພພິບັດທາງທຳມະຊາດນ້ຳຖ້ວມຢູ່ເມືອງສະໜາມໄຊ, ແຂວງອັດຕະປື ໄດ້ລາຍງານວ່າ: ຢູ່ສູນບັນຊາການພາກສະໜາມ, ກຳລັງຂອງພວກເຮົາ ໄດ້ມີການຈັດສັນແບ່ງປັນວຽກງານຢ່າງລະອຽດ ເຊິ່ງໃນແຕ່ລະວັນ ກໍ່ໄດ້ຈັດຕັ້ງກໍາລັງກອງພົນທີ 5, ທະຫານແຂວງອັດຕະປື, ແລະທະຫານເມືອງສະໜາມໄຊ ດໍາເນີນການຊອກຄົ້ນຫາຜູ້ສູນຫາຍ ໂດຍເຂົາເຈົ້າໄດ້ແບ່ງຫນ້າວຽກຄວາມຮັບຜິດຊອບກັນຢ່າງລະອຽດ, ແບ່ງກັນອອກເປັນຈຸ, ເປັນຫມວດ, ແລະ ຕີແຜ່ເປັນຫນ້າກະດານ ແລະ ຂະຫຍາຍຕາໜ່າງຄົ້ນຫາເປັນລັດສະຫມີວົງກ້ວາງອອກໄປ, ເຖິງວ່າປັດຈຸບັນນີ້ ແມ່ນ້ຳລໍາເຊຈະບົກແຫ້ງລົງແລ້ວຕາມລຳດັບກໍ່ຕາມ, ການຊອກຄົ້ນຫາຜູ້ສູນຫາຍ ກໍ່ຍິ່ງພົບຄວາມຫຍຸ້ງຍາກ ເນື່ອງຈາກວ່າສະພາບດິນຟ້າອາກາດບໍ່ເອື້ອອຳນວຍ, ບາງບ່ອນເກີດມີຂີ້ຕົມເລິກພຽງເອິກ, ພຽງແອວ ບວກກັບ ເສດຂີ້ເຫຍື້ອຮາກໄມ້ທັບຖົມ ແລະ ມີເສດແກ້ວ, ຕະປູ ເຕັມໄປຕາມພື້ນທີ່, ເຮັດໃຫ້ ການກອບກູ້ຊອກຄົ້ນຫາ ພົບກັບຄວາມຫຍຸ້ງພໍສົມຄວນ.

ທ່ານ ພົນຈັດຕະວາ ຜາລົມ ລິນທອງ, ຮອງຫົວໜ້າກົມໃຫຍ່ການເມືອງກອງທັບ ພ້ອມຄະນະ ລົງຕິດຕາມການປະຕິບັດງານ.

ແຕ່ເຖິງຢ່າງໃດກໍ່ຕາມ ທາງຄະນະຊີ້ນຳພວກເຮົາ ກໍ່ໄດ້ສຸມທຸກສະຕິປັນຍາເຫື່ອແຮງນຳພາກຳລັງອ້າຍນ້ອງ ສືບຕໍ່ອອກຊອກຄົ້ນຫາເປັນວົງກວ້າງ ແລະ ເລິກຍິ່ງຂຶ້ນ ເຊິ່ງຕໍ່ເນື່ອງຈາກຈຸດມື້ວານນີ້ ເພື່ອກອບກູ້ຊອກຄົ້ນຫາຜູ້ສູນຫາຍຈາກໄພພິບັດໃນຄັ້ງນີ້ໃຫ້ພົບໂດຍໄວ. ຜ່ານການຊອກຄົ້ນຫາຕົວຈິງ, ມາຮອດວັນທີ 7 ສິງຫາ ແມ່ນສາມາດຄົ້ນພົບຜູ້ເສຍຊີວິດໄດ້ 35 ສົບ, ສ່ວນທີ່ຍັງເຫຼືອນັ້ນ, ກຳລັງຂອງພວກເຮົາກໍ່ຈະສຸມໃສ່ຊອກຄົ້ນຫາໃນຂັ້ນຕໍ່ໄປ. ໃນໂອກາດນີ້, ທ່ານຮອງລັດຖະມົນຕີກະຊວງປ້ອງກັນປະເທດ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບ ແລະ ກໍາລັງທະຫານກົມກອງຕ່າງໆ ທີ່ໄດ້ສູ້ຊົນຜ່ານຜ່າຂໍ້ຫຍຸ້ງຍາກ, ດໍາເນີນການຊອກຄົ້ນຢ່າງຕໍ່ເນື່ອງ, ພ້ອມທັງໄດ້ເນັ້ນໜັກໃຫ້ຄະນະຮັບຜິດຊອບພາກສະຫນາມຕະຫລອດຮອດບັນດາພະນັກງານ-ນັກຮົບ ຈົ່ງພ້ອມກັນສືບຕໍ່ສຸມທຸກເຫື່ອແຮງຂອງຕົນເພື່ອປະກອບສ່ວນເຮັດສຳເລັດຫນ້າທີ່ການເມືອງຂອງຕົນ ຕາມທີ່ໄດ້ຮັບມອບໝາຍ ດ້ວຍຄວາມບຸກບືນຫ້າວຫັນ, ພ້ອມທັງປະຕິບັດຫນ້າທີ່ດ້ວຍຄວາມລະມັດລະວັງ, ຫຼີກລ່ຽງການເກີດອຸປະຕິເຫດ ແລະ ການສູນເສຍ, ແລະ ເດັດດ່ຽວເຮັດສຳເລັດທຸກຫນ້າທີ ທີ່ປະເທດຊາດ ແລະ ປະຊາຊົນມອບຫມາຍໃຫ້.

（ຫັດ​ທະ​ບູນ）