ເຢຍລະມັນ ແລະ ສປປ ລາວ ປະສານສົມທົບ ພັດທະນາພື້ນຖານໂຄງລ່າງຊົນນະບົດ

ການຊ່ວຍເຫຼືອລ້າຂອງລັດຖະບານເຢຍລະມັນສຳລັບສອງໂຄງການ ມູນຄ່າ 18 ລ້ານເອີໂຣ ແລະ ລັດຖະບານລາວໄດ້ປະກອບສ່ວນສົມທົບ 9 ແສນເອີໂຣ ເຊິ່ງທັງສອງໂຄງການຄາດວ່າຈະເລີ່ມໃນໄຕມາດສຸດທ້າຍ ປີ 2019 ແລະ ຈະໃຫ້ສຳ ເລັດປີ 2022 ຈັດຕັ້ງປະຕິບັດໂດຍກະຊວງໂຍທາທິການ ແລະ ຂົນສົ່ງ ເຊິ່ງຈະໄດ້ຮັບການສະໜັບສະໜູນທາງດ້ານເຕັກນິກວີຊາການ ຈາກບໍລິສັດທີ່ປຶກສາສາກົນ ນັບຕັ້ງແຕ່ປີ 2003 ປະເທດເຢຍລະມັນສືບຕໍ່ໃຫ້ການສະໜັບສະໜູນ ສຳລັບຂະແໜງ ການພັດທະນາຊົນນະບົດເປັນເວລາດົນນານ ເຮັດໃຫ້ການປະກອບສ່ວນທັງໝົດມີມູນຄ່າຫຼາຍກວ່າ 70 ລ້ານເອີໂຣ.

ທ່ານ ວຽງສະຫວັດ ສີພັນດອນ ແລະ ທ່ານ ຢັນ ວີເກວມັນ ຜູ້ອຳນວຍການທະນາຄານພັດທະນາເຢຍລະມັນປະຈຳລາວ ໃນພິທີເຊັນສັນຍາ. (ພາບ: vientianemai.net)

ທັງສອງໂຄງການໃໝ່ນີ້ ຈະນຳໃຊ້ທຶນຊ່ວຍເຫຼືອລ້າຈາກລັດຖະບານເຢຍລະມັນໃນການຟື້ນຟູ ແລະ ປັບປຸງເສັ້ນທາງຊົນນະບົດ ຂົວຂ້າມນ້ຳ ແລະ ພື້ນຖານໂຄງລ່າງອື່ນໆເພີ່ມຕື່ມ ຢູ່ເມືອງໄຊບົວທອງ ເມືອງບົວລະພາ ແຂວງຄຳມ່ວນ ແລະ ຫຼາຍເມືອງໃນແຂວງພາກໃຕ້ຂອງລາວ ໂດຍສະເພາະ ເມືອງສະໜາມໄຊ ແຂວງອັດຕະປື ໂຄງການຟື້ນຟູພື້ນຖານໂຄງລ່າງຢູ່ພາກໃຕ້ຂອງລາວ ເປັນໂຄງການພິເສດເພື່ອຟື້ນຟູເສັ້ນທາງ ແລະ ກໍ່ສ້າງພື້ນຖານໂຄງລ່າງໃນເຂດທີ່ປະສົບໄພນ້ຳຖ້ວມທາງພາກໃຕ້ຂອງລາວ ແລະ ຍັງສະໜັບສະໜູນລັດຖະບານລາວໃນການຈັດຕັ້ງປະຕິບັດ ຄວາມຕ້ອງການຫຼັງໄພພິບັດຫຼັງຈາກການແຕກຂອງສັນເຂື່ອນໄຟຟ້າເຊປຽນ-ເຊນ້ຳນ້ອຍ ແລະ ຈະປັບປຸງເສັ້ນທາງເພື່ອສະໜອງການເຂົ້າເຖິງຕະຫຼາດ ໂຮງຮຽນຮຽນ ສາທາລະນະສຸກ ແລະ ສະຖານທີ່ອຳນວຍຄວາມສະດວກອື່ນໆ ໂດຍສະເພາະ ໂຄງການຟື້ນຟູພື້ນຖານໂຄງລ່າງຢູ່ພາກໃຕ້ຂອງລາວອາດຈະໃຫ້ການຊ່ວຍເຫຼືອພື້ນຖານໂຄງລ່າງທາງສັງຄົມ ເຊັ່ນ: ກໍ່ສ້າງໂຮງຮຽນ ສຸກສາລາ ຫຼື ການສະໜອງນ້ຳ ແລະ ຊົນລະປະທານ.

（ແຫຼ່ງຂໍ້ມູນ： vientianemai.net）