ນະຄອນຫຼວງວຽງຈັນຈັດກິດຈະກຳລ່ອງເຮືອ ສົ່ງເສີມການທ່ອງທ່ຽວຕາມລຳນ້ຳງື່ມ
 |
ນະຄອນຫຼວງວຽງຈັນຈັດກິດຈະກຳລ່ອງເຮືອ ສົ່ງເສີມການທ່ອງທ່ຽວຕາມລຳນ້ຳງື່ມ
ທ່ານ ຄຳປະດິດ ເຂັມມານິດ ຫົວໜ້າພະແນກ ຖວທ ນວ ກ່າວວ່າ: ກິດຈະກຳຄັ້ງນີ້ ແມ່ນສືບຕໍ່ໂຄງການພັດທະນາການທ່ອງທ່ຽວຕາມລຳນ້ຳງື່ມ ຕິດພັນກັບການພັດທະນາແຫຼ່ງທ່ອງທ່ຽວເຂດພູເຂົາຄວາຍ ເຊິ່ງເປັນ 1 ໃນ 15 ໂຄງການ ໃນການດຶງດູດການລົງທຶນຂອງນະຄອນຫຼວງວຽງຈັນ ການພັດທະນາໂຄງການດັ່ງກ່າວ ແມ່ນຈະນອນໃນຮູບແບບອະນຸຮັກ ແລະ ປະຊາຊົນມີສ່ວນຮ່ວມ ປັດຈຸບັນທາງພະແນກ ຖວທ ນວ ແລະ ເມືອງໄຊທານີ ໄດ້ສຳເລັດການສຳຫຼວດຄວາມເປັນໄປໄດ້ເປັນທີ່ຮຽບຮ້ອຍແລ້ວ ດັ່ງນັ້ນ ຈຶ່ງໄດ້ເຊື້ອເຊີນເອົາບັນດາຫົວໜ່ວຍທຸລະກິດທີ່ລົງທຶນຕາມລຳນ້ຳງື່ມ ແລະ ສື່ມວນຊົນນະຄອນຫຼວງວຽງຈັນ ລົງມາສຳຜັດກັບສະພາບຕົວຈິງ ແນໃສ່ເພື່ອໃຫ້ປະກອບເຂົ້າໃນການລົງທຶນ ໃນການດຶງດູດການລົງທຶນໃນເຂດດັ່ງກ່າວ ຜ່ານການລົງສຳຫຼວດມາເປັນຄັ້ງທີ 3 ເຫັນໄດ້ວ່າ ໂຄງການພັດທະນາດັ່ງກ່າວມີຄວາມເປັນໄປໄດ້ ແລະ ພ້ອມທີ່ຈະໄດ້ຮັບການພັດທະນາໃຫ້ເປັນອີກແຫຼ່ງທ່ອງທ່ຽວ ຂອງນະຄອນຫຼວງວຽງຈັນ.
ທ່ານ ບຸນວັນ ຈະສົ໋ວເກົ້າ ຮອງເຈົ້າເມືອງໄຊທານີ ໃຫ້ສຳພາດວ່າ: ກິດຈະກຳຄັ້ງນີ້ ເລີ່ມແຕ່ຂົວທ່າງ່ອນ ໄປຫາບ້ານເວີນແຖ່ນ ມີໄລຍະທາງ 30 ກວ່າກີໂລແມັດ ເຊິ່ງຕະຫຼອດໄລຍະການລ່ອງເຮືອ ແມ່ນໄດ້ສຳຜັດກັບວິຖີຊີວິດຂອງພໍ່ແມ່ປະຊາຊົນ ທີ່ອາໄສລຽບຕາມແຄມນ້ຳງື່ມ ຊົມດົງສະຫງວນ ບ້ານເວີນແທ່ນ ທີ່ມີຕົ້ນໄມ້ອາຍຸຫຼາຍ 100 ປີ ນອກນັ້ນ ກິດຈະກຳຄັ້ງນີ້ ຍັງມີຄະນະວິຊາການລົງມາສຳຫຼວດເກັບກຳຂໍ້ມູນ ເພື່ອສຶກສາຄວາມເປັນໄປໄດ້ໃນການພັດທະນາການທ່ອງທ່ຽວຕາມລ່ອງນ້ຳງື່ມ ເພື່ອໃຫ້ເປັນອີກທ່າແຮງໜຶ່ງ ໃນການພັດທະນາວຽກງານທ່ອງທ່ຽວພາຍໃນເມືອງໄຊທານີ.
ກິດຈະກຳດັ່ງກ່າວ ຈັດຂຶ້ນໃນວັນທີ 20 ມີນາ 2019 ໂດຍມີທ່ານ ຄຳປະດິດ ເຂັມມານິດ ຫົວໜ້າພະແນກ ຖວທ ນວ ທ່ານ ຄຳຄູນ ໃບລາຕີ ຮອງຫົວໜ້າພະແນກ ຖວທ ນວ ທ່ານ ບຸນວັນ ຈະສົ໋ວເກົ້າ ຮອງເຈົ້າເມືອງໄຊທານີ ພ້ອມພາກສ່ວນກ່ຽວຂ້ອງຫົວໜ່ວຍທຸລະກິດ ແລະ ສື່ມວນຊົນເຂົ້າຮ່ວມ.
（ແຫຼ່ງຂໍ້ມູນ： vientianemai.net）