ລັດຖະບານ ລົງທຶນໃສ່ການທ່ອງທ່ຽວແບບອະນຸລັກທຳມະຊາດ ຢູ່ແຂວງສະຫວັນນະເຂດ
 |
ພາບກອງປະຊຸມ ປືກສາຫາລື.
ລັດຖະບານກຳລັງ ສົ່ງເສີມການລົງທຶນ ຢ່າງມີຄວາມຮັບຜິດຊອບ ໃນທົ່ວປະເທດ ເພື່ອຮັບ ປະກັນວ່າ ການລົງທຶນທີ່ມີຄຸນນະພາບ ຈະສົ່ງຜົນດີຕໍ່ສັງຄົມລາວ, ຊຸກຍູ້ການ ພັດທະນາສີຂຽວ ແລະ ການ ນໍາໃຊ້ຊັບພະຍາກອນ ທາງທຳມະຊາດ ໃນປະເທດຢ່າງມີຄວາມຍືນຍົງ ໂດຍສອດຄ່ອງກັບແຜນພັດທະນາ ເສດຖະກິດ ແລະ ສັງຄົມແຫ່ງຊາດຄັ້ງທີ 8. ນອກຈາກນີ້, ເພື່ອເພີ່ມບົດບາດຂອງ ສປປ ລາວ ໃນການເປັນເປົ້າໝາຍປາຍທາງ ຂອງນັກທ່ອງທ່ຽວ.
ພະແນກແຜນການ ແລະ ການລົງທຶນ ແຂວງ ສະຫວັນນະເຂດ, ໂດຍການຮ່ວມມື ກັບໂຄງການຄຸ້ມຄອງທີ່ດິນ ແລະ ປ່າໄມ້ແບບຍືນຍົງ ຢູ່ໃນລະບົບນິເວດປ່າໂຄກ ທີ່ຢູ່ພາກໃຕ້ຂອງ ສປປ ລາວ, ເຊິ່ງໄດ້ຮັບການຈັດຕັ້ງປະຕິບັດໂດຍກົມປ່າໄມ້, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມລະດົມແນວຄິດ ເພື່ອສົ່ງເສີມການລົງທຶນ ໃນຂະແໜງການທ່ອງທ່ຽວ ແລະ ຄວາມຮັບຜິດຊອບ ຕໍ່ສັງຄົມຂອງຜູ້ປະກອບ ການໃນຂະແໜງການ ການບໍລິການທ່ອງທ່ຽວຂຶ້ນ ເມື່ອທ້າຍເດືອນທີ່ຜ່ານມາ ຢູ່ເມືອງຊົນນະບູລີ, ເຊິ່ງໄດ້ຮັບການສະໜັບສະໜຸນ ຈາກອົງການສະຫະປະຊາຊາດ ເພື່ອການພັດທະນາ ແລະ ກອງທຶນສິ່ງ ແວດລ້ອມໂລກ, ໂດຍມີບັນດາຕາງໜ້າພາກເອກະຊົນ, ຜູ້ປະກອບການ, ແຂວງ ສະຫວັນນະເຂດ, ກະ ຊວງ ແລະ ກົມກອງທີ່ກ່ຽວຂ້ອງ ເຂົ້າຮ່ວມ.
ທ່ານ ທອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ໄດ້ເນັ້ນໜັກເຖິງຄວາມສຳ ຄັນ ຂອງການສ້າງຂີດຄວາມສາມາດ ຂອງຊຸມຊົນໃນເຂດຊົນນະບົດ ສຳລັບການ ພັດທະນາ ການທ່ອງທ່ຽວ ແລະ ການປັບປຸງຊີວິດການເປັນຢູ່ ຂອງປະຊາຊົນ ເພື່ອບັນລຸການຄຸ້ມຄອງຊັບພະຍາກອນ ທາງທຳມະຊາດໃຫ້ມີຄວາມຍືນຍົງ ໂດຍອີງໃສ່ທ່າແຮງ ຂອງເຂດ ອະນຸລັກສັດປ່າໂອ່ງ-ມັ່ງ ຫລື ແຫ່ງອື່ນໆ ທີ່ໃກ້ກັບນະ ຄອນໄກສອນ ພົມວິຫານ.
ທ່ານ ບາລາຊູບຣາມານຽມ ມູຣາລີ ຮອງຜູ້ຕາງໜ້າອົງການສະຫະປະຊາຊາດ ເພື່ອການພັດທະນາກ່າວວ່າ: ການທ່ອງທ່ຽວອະນຸລັກທຳມະຊາດ ມີທ່າແຮງສຳຄັນ ໃນການສົ່ງເສີມ ການຂະຫຍາຍຕົວ ຂອງເສດຖະກິດຂອງແຂວງ ລວມໄປເຖິງການປ່ຽນແປງຊີວິດ ການເປັນຢູ່ຂອງຫລາຍຄົນ ໃນເຂດຊົນນະບົດ ກໍຄືເມືອງຊົນນະບູລີ. ການທ່ອງທ່ຽວແບບ ອະນຸລັກ ທຳມະຊາດ ເຮັດໃຫ້ຊຸມຊົນໃນທ້ອງຖິ່ນ ມີແຫລ່ງລາຍຮັບ ໃໝ່ ແລະ ໂອກາດສຳລັບການພັດທະນາ. ນອກຈາກນີ້, ຍັງເປັນການກະຕຸ້ນ ໃຫ້ພາກເອກະຊົນດູແລເອົາໃຈໃສ່ ຕໍ່ສິ່ງແວດລ້ອມ ຫລາຍຂຶ້ນ ເນື່ອງຈາກວ່າ ນັກທ່ອງທ່ຽວຫລາຍຄົນ ຕ້ອງການຈ່າຍເງິນເພີ່ມຂຶ້ນ ເພື່ອເຂົ້າທ່ຽວຊົມແຫລ່ງດຶງດູດ ນັກທ່ອງທ່ຽວທີ່ຮັກສາ ແລະ ອະນຸລັກຄວາມຍືນຍົງ.
ໂອກາດດຽວກັນ, ບັນດາຜູ້ເຂົ້າຮ່ວມກອງປະຊຸມ ຍັງໄດ້ຢ້ຽມຢາມແຫລ່ງທ່ອງທ່ຽວ ອະນຸລັກທຳມະຊາດ ທີ່ນະຄອນໄກສອນ ພົມມະວິຫານ ເປັນຕົ້ນ ອ່າງເກັບນໍ້າ ນໍ້າສຸຍ, ດົງລີງ ແລະ ເຂດອະນຸລັກສັດປ່າ ໂອ່ງ-ມັ່ງ ແລະ ໄດ້ພົບປະໂອ້ລົມ ກັບທີມອະນຸລັກທຳມະຊາດ ຂອງບ້ານສະໜາມໄຊ.
（ແຫຼ່ງຂໍ້ມູນ： ຂປລ）