ແຮງງານທີ່ຜິດກົດໝາຍຈຳນວນໜຶ່ງ ອາດຈະລັກລອບເຂົ້າມາທາງເຮືອ ຜ່ານນ້ຳຂອງ

ພາບປະກອບ

ຈຳນວນແຮງງານລາວທັງໝົດ ທີ່ໄປເຮັດວຽກຢູ່ໄທ ໂດຍຜ່ານ ບໍລິສັດຈັດຫາງານ ແຕ່ປີ 2016-2019 ມີທັງໝົດ 213.527 ຄົນ, ຍິງ 110.340 ຄົນ ໃນນີ້ມີຂົງເຂດກະສິກຳ 23.085 ຄົນ, ຍິງ 9.206 ຄົນ, ຂົງເຂດອຸດສາຫະກຳ 42.586 ຄົນ, ຍິງ 17.526 ຄົນ ແລະ ຂົງເຂດການບໍລິການ 147.856 ຍິງ 83.608 ຄົນ. ສໍາລັບແຮງງານລາວ ທີ່ຂ້າມມາແຕ່ປະເທດໄທ ທາງຂົວມິດຕະພາບລາວ-ໄທ 1 ວຽງຈັນ-ໜອງຄາຍ ໃນວັນທີ 23 ມີນາ 2020 ນີ້ ແມ່ນມີຫລາຍກວ່າ 500 ຄົນ ແລະ ຍັງມີອີກຈໍານວນໜຶ່ງກໍາລັງ ທະຍອຍກັນເຂົ້າມາອີກ, ເຊິ່ງໃນນີ້ມີແຮງງານທີ່ຖືກກົດໝາຍປະມານ 95% ແລະ 5% ແມ່ນພໍ່ແມ່ພີ່ນ້ອງ ໄປຢ້ຽມລຸກເຕົ້າ, ໄປທ່ອງທ່ຽວ. ປັດຈຸບັນ ແຮງງານລາວ ທີ່ຜິດກົດໝາຍ ທີ່ເຂົ້າມາທາງດ່ານຂົວມິດຕະພາບ ລາວ-ໄທ 1 ແມ່ນຍັງບໍ່ທັນມີເທື່ອ. ທາງເຈົ້າໜ້າທີ່ ກໍໄດ້ມີມາດຕະການເຂັ້ມງວດ ຖ້າພົບເຫັນ ກໍຈະປະຕິບັດຄືກັນກັບແຮງງານທົ່ວໄປ ໂດຍເອົາໄປຈຳກັດບໍລິເວນ ຢູ່ສະຖານທີ່ ພັກເຊົາໃນແຫ່ງຕ່າງໆ ເພື່ອຕິດຕາມອາການ ເປັນເວລາ 14 ວັນ.

ໃນວັນທີ 20 ມີນາ 2020 ລັດວິສາຫະກິດການບິນລາວ ໄດ້ອອກແຈ້ງການ ກ່ຽວກັບການຢຸດບໍລິ ການຊົ່ວຄາວ ຖ້ຽວບິນໄປຕ່າງປະເທດ ການຢຸດບໍລິການດັ່ງກ່າວ ແມ່ນເພື່ອຮັບປະກັນຄວາມປອດໄພ ແລະ ສະກັດກັ້ນ ການແຜ່ລະບາດຂອງພະຍາດ COVID-19, ເນື່ອງຈາກວ່າ ສະພາບການແຜ່ລະບາດ ຂອງພະຍາດດັ່ງກ່າວ ໃນຫລາຍປະເທດ ໄດ້ແຜ່ຂະຫຍາຍໃນວົງກວ້າງ. ດັ່ງນັ້ນ, ລັດວິສາຫະກິດການບິນລາວ ຈຶ່ງອອກແຈ້ງການປ່ຽນແປງ ແລະ ຢຸດບໍລິການຊົ່ວຄາວຖ້ຽວບິນໄປຕ່າງ ປະເທດ, ເຊິ່ງລວມມີ: ໂຊ (Seoul), ຈາງ​ຊູ (Changzhou), ຊາງ​ໄຮ(Shanghai), ​ເວັນ​ຊູ(Wenzhou), ຈິງ​ຮົງ(Jinghong), ຮ່າ​ໂນ້ຍ(Hanoi), ​​ໂຮ່ຈີ່​ມິງ(Ho Chi Minh), ພະນົມ​ເປັນ(Phnom Penh), ສຽມຣຽບ(Siem Reap) ແມ່ນໄດ້ລົບລ້າງໃນທຸກຖ້ຽວບິນຈົນເຖິງວັນທີ 30 ເມສາ 2020. ​ ສໍາລັບເສັ້ນທາງບິນໄປ ບາງກອກ (Bangkok) ແລະ ຊຽ​ງ​ໃໝ່ (Chiangmai) ລົບລ້າງໃນທຸກຖ້ຽວບິນ ແຕ່ ວັນທີ 22 ມີນາ ຈົນເຖິງວັນທີ 20 ເມສາ 2020.ເສັ້ນທາງບິນໄປ ກວາງ​ຊູ(Guangzhou) ໄດ້ມີການປ່ຽນແປງແຜນບິນ ເປັນບິນທຸກວັນຄານ ແລະ ວັນເສົາ (ຜູ້ໂດຍສານທີ່ຈະເດີນທາງເຂົ້າເສັ້ນທາງນີ້ ແມ່ນຈະໄດ້ຖືກກັກໂຕ 14 ວັນ ທີ່ສະໜາມບິນ ແລະ ຕ້ອງມີເງິນ 2.000 ໂດລາສະຫະລັດ ຈຶ່ງອະນຸຍາດໃຫ້ເດີນທາງເຂົ້າ ສປ ຈີນ ໄດ້).

（ໄຊພອນ）