ຜົນປະໂຫຍດຕົວຈິງທີ່ ສປປ ລາວ ໄດ້ຮັບຈາກຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ

ກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 5 ຢູ່ນະຄອນຫຼວງວຽງຈັນ.(ພາບ: vientianemai.net)

ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ກ່າວໃນພິທີ ຖະແຫລງຂ່າວຜົນສຳເລັດຂອງກອງປະຊຸມ ລັດຖະມົນຕີຕ່າງປະເທດ ແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 5 ໃນຕອນແລງຂອງວັນທີ 20 ກຸມພາ 2020 ທີ່ໂຮງແຮມດອນຈັນພາເລດ, ນະຄອນຫລວງວຽງຈັນ. ພ້ອມທັງຊີ້ ໃຫ້ເຫັນວ່າ: ສປປ ລາວ ຕີລາຄາສູງ ແລະ ໃຫ້ຄວາມສຳຄັນ ຕໍ່ຂອບການຮ່ວມມື ແມ່ນ້ຳຂອງ-ແມ່ນ້ຳ ລ້ານຊ້າງ ທີ່ມີການເຕີບໃຫຍ່ຂະຫຍາຍ ຕົວຢ່າງເປັນຮູບປະທຳໂດຍໄວ, ມີກົນໄກການຮ່ວມມືຢ່າງເປັນລະບົບ ແລະ ມີຂອບເຂດການຮ່ວມມືທີ່ສອດຄ່ອງ ກັບສະພາບເງື່ອນໄຂ ຂອງການພັດທະນາເສດຖະກິດ-ສັງຄົມ ຂອງບັນດາປະເທດ ໃນພາກພື້ນແມ່ນ້ຳຂອງ ໂດຍປິ່ນອ້ອມສາມເສົາຄ້ຳການຮ່ວມມື ແລະ 5 ຂົງເຂດບູລິມະສິດ ຄື: ການເຊື່ອມຈອດ, ຄວາມອາດສາມາດ ໃນການຜະລິດ, ການຮ່ວມມືດ້ານເສດຖະກິດຂ້າມຊາຍແດນ, ການຄຸ້ມຄອງຊັບພະຍາກອນນ້ຳ ແລະ ກະສິກຳ, ລວມທັງການຫລຸດຜ່ອນຄວາມທຸກຍາກ.

ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 5 ຢູ່ນະຄອນຫຼວງວຽງຈັນ ໂດຍເປັນປະທານຮ່ວມຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ສປປ ລາວ ແລະ ທ່ານ ຫວັງ ອີ ທີ່ປຶກສາແຫ່ງລັດ ລັດຖະມົນຕີກະຊວງການຕ່າງປະເທດ ສປ ຈີນ ມີຜູ້ແທນຈາກ 6 ປະເທດສະມາຊິກ ເຂົ້າຮ່ວມ. ກອງປະຊຸມຄັ້ງນີ້ ໄດ້ທົບທວນຄືນຜົນການຮ່ວມມືຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ໃນໄລຍະຜ່ານມາ ໂດຍສະເພາະ ການຈັດຕັ້ງປະຕິບັດຖະແຫຼງການຊານຢາ ກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 1 ຖະແຫຼງການພະນົມເປັນ ກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 2 ແລະ ແຜນປະຕິບັດງານ 5 ປີ (2018-2022) ຂອງຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ເຊິ່ງກອງປະຊຸມຕີລາຄາວ່າ ຂອບການຮ່ວມມືດັ່ງກ່າວ ມີທ່າກ້າວຂະຫຍາຍຕົວຢ່າງໄວວາທັງລວງກວ້າງ ແລະ ລວງເລິກ ພາຍໃຕ້ 3 ເສົາຄ້ຳຂອງການຮ່ວມມື ກໍຄື 5 ຂົງເຂດບຸລິມະສິດ (ການເຊື່ອມຈອດ ຄວາມສາມາດດ້ານການຜະລິດ ການຮ່ວມມືດ້ານເສດຖະກິດຂ້າມຊາຍແດນ ການຄຸ້ມຄອງຊັບພະຍາກອນນ້ຳ ແລະ ກະສິກຳ ແລະ ການຫຼຸດຜ່ອນຄວາມທຸກຍາກ) ສະແດງອອກນັບແຕ່ມີການສ້າງຕັ້ງຂອບການຮ່ວມມືດັ່ງກ່າວ ແຕ່ປີ 2016 ເປັນຕົ້ນມາ ປະເທດສະມາຊິກໄດ້ມີການສ້າງຕັ້ງກອງເລຂາປະສານງານ ແລະ ສູນຄົ້ນຄວ້າແມ່ນ້ຳຂອງສາກົນຂຶ້ນ ແລະ ໄດ້ຍົກລະດັບກົນໄກການຮ່ວມມືໃນຂົງເຂດການຄຸ້ມຄອງຊັບພະຍາກອນນ້ຳຈາກໜ່ວຍງານວິຊາການ ໄປສູ່ລະດັບກອງປະຊຸມລັດຖະມົນຕີດ້ານຊັບພະຍາກອນນ້ຳໃນເດືອນທັນວາ 2019 ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ໄດ້ສ້າງຕັ້ງກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງຂຶ້ນປີ 2017 ເຊິ່ງ ສປ ຈີນ ໄດ້ປະກອບສ່ວນໃນກອງທຶນດັ່ງກ່າວ 300 ລ້ານໂດລາ ຫຼື ປະມານ 2.672,8 ຕື້ກີບ ເພື່ອຈັດຕັ້ງປະຕິບັດໂຄງການຮ່ວມມືຕ່າງໆໃນປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ ໄລຍະປີ 2017-2022 ປັດຈຸບັນມີຫຼາຍກວ່າ 300 ກວ່າໂຄງການ (ປີ 2017-2019) ທີ່ໄດ້ຮັບການຈັດຕັ້ງປະຕິບັດຢູ່ 6 ປະເທດສະມາຊິກ ແລະ ໄດ້ປະກອບສ່ວນສຳຄັນໃນການພັດທະນາເສດຖະກິດ-ສັງຄົມ ໃນພາກພື້ນແມ່ນ້ຳຂອງຢ່າງເປັນຮູບປະທຳ ແລະ ມີໝາກຜົນ ໃນນີ້ມີ 36 ໂຄງການ ທີ່ກຳລັງຈັດຕັ້ງປະຕິບັດຢູ່ ສປປ ລາວ ອັນພົ້ນເດັ່ນໂຄງການພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກ ມູນຄ່າ 33 ລ້ານຢວນ ຫຼື ປະມານ 42 ຕື້ກີບ ໂຄງການປິ່ນປົວແກ່ນຕາຂຸ້ນບໍ່ເສຍຄ່າ ໂດຍແພດຊ່ຽວຊານຈາກ ສປ ຈີນ ທີ່ເດີນທາງມາກວດຮັກສາຢູ່ ສປປ ລາວ ແລະ ໂຄງການສ້າງຄວາມສາມາດໃຫ້ພະນັກງານທີ່ຕິດພັນກັບ 5 ຂົງເຂດບຸລິມະສິດຂອງການຮ່ວມມື.

（ໄຊພອນ）