ຫວຽດນາມ-ລາວ ຍາມໃດກໍຖືເປັນສະຫາຍ ອ້າຍນ້ອງ ເພື່ອນມິດຜູ້ຮັກແພງ ແລະ ຊື່ສັດທີ່ສຸດ
 |
ຫວຽດນາມ-ລາວ ຍາມໃດກໍຖືເປັນສະຫາຍ ອ້າຍນ້ອງ ເພື່ອນມິດຜູ້ຮັກແພງ ແລະ ຊື່ສັດທີ່ສຸດ.(ພາບ: tuyengiao.vn)
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫລວງທີ່ ສສ ຫວຽດນາມ ຍາດມາໄດ້ໃນພາລະກິດປົກປັກຮັກສາ ແລະ ສ້າງສາປະເທດຊາດຕະຫລອດໄລຍະ 74 ປີທີ່ຜ່ານມາພາຍໃຕ້ການນຳພາ ຂອງພັກກອມມູນິດຫວຽດນາມ, ເຊິ່ງເຮັດໃຫ້ວຽກງານດ້ານການເມືອງມີສະຖຽນລະພາບ, ວຽກງານປ້ອງກັນຊາດ-ປ້ອງກັນຄວາມສະຫງົບຢ່າງໜັກແໜ້ນ, ເສດຖະກິດ ມີການຂະຫຍາຍຕົວຢ່າງໄວ, ວັດທະນະທຳ-ສັງຄົມ ມີຄວາມກ້າວໜ້າ, ຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງຢ່າງບໍ່ຢຸດຢັ້ງ, ເຊິ່ງເຮັດໃຫ້ບົດບາດ ແລະ ຊື່ສຽງ ຂອງສາທາລະນະລັດ ສັງຄົມນິຍົມ ຫວຽດນາມ ນັບມື້ນັບສູງເດັ່ນຂຶ້ນໃນພາກພື້ນ ແລະ ສາກົນ. ພິເສດ, ທ່ານທູດລາວ ໄດ້ສະແດງຄວາມຊົມເຊີຍທີ່ຫວຽດນາມ ຖືກເລືອກໃຫ້ເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ແລະ ຮັບໜ້າທີ່ເປັນປະທານອາຊຽນ ໃນປີ 2020.
ໂອກາດດຽວກັນ, ທ່ານ ຫງວຽນ ກວກຢຸ໊ງ ໄດ້ຕາງໜ້າຄະນະນຳ ແລະ ພະນັກງານພາຍໃນກະຊວງການຕ່າງປະເທດ ສະແດງຄວາມຂອບໃຈຢ່າງຈິງໃຈ ຕໍ່ຄຳອວຍພອນຂອງທ່ານ ທູດລາວ ເຊິ່ງເປັນການສະແດງໃຫ້ເຫັນມີຈິດມິໃຈອັນດູດດື່ມແຫ່ງ ສາຍພົວພັນພິເສດ ຫວຽດນາມ-ລາວ, ພ້ອມທັງໄດ້ຕີລາຄາສູງຕໍ່ການພົວພັນສອງຝ່າຍ ລະຫວ່າງຫວຽດນາມ-ລາວ ທີ່ນັບມື້ແຕກດອກອອກຜົນ ແລະ ນຳເອົາຜົນປະໂຫຍດຕົວຈິງມາໃຫ້ປະຊາຊົນສອງຊາດທ ລາວ-ຫວຽດນາມ, ພ້ອມທັງອວຍພອນໃຫ້ສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ຈົ່ງໝັ້ນຄົງທະນົງແກ່ນຊົ່ວກາລະນານ.
ໃນວັນທີ 29 ສິງຫາ ຜ່ານມາ, ສະຖານເອກອັກຄະລັດຖະທູດລາວ ປະຈຳ ສສ ຫວຽດນາມ ນຳໂດຍ ທ່ານ ທອງສະຫວັນ ພົມວິຫານ ກໍໄດ້ນຳພາຄະນະນໍາສະຖານທູດ ເຂົ້າອວຍພອນຄະນະພົວພັນຕ່າງປະເທດສູນກາງພັກ ກອມມຸນິດຫວຽດນາມ ເນື່ອງໃນໂອກາດວັນຊາດ ທີ 2 ກັນຍາ ຄົບຮອບ 74 ປີ ເຊັ່ນດຽວກັນ.
 |
ທ່ານເອກອັກຄະລັດຖະທູດ ຫງວຽນບ໊າຮຸ່ງ ກ່າວຄໍາເຫັນທີ່ງານລ້ຽງ. (ພາບ: VOV)
ເມື່ອກ່າວປາໄສຢູ່ງານລ້ຽງ, ທ່ານ ຫງວຽນບ໊າຮຸ່ງ ເອກອັກຄະລັດຖະທູດ ຫວຽດນາມ ປະຈໍາ ລາວ ເນັ້ນໜັກວ່າ ລະດູໃບໄມ້ຫຼົ່ນ ຂອງ ຮ່າໂນ້ຍກ່ອນນີ້ 74 ປີ, ຄືວັນທີ 2 ກັນຍາ 1945, ປະທານໂຮ່ຈີມິນ ໄດ້ກ່າວຖະແຫຼງການປະກາດເອກະລາດ, ສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ, ຫຼັງຈາກນັ້ນ ແມ່ນປະເທດສາທາລະນະລັດ ສັງຄົມນິຍົມຫວຽດນາມ. ແນວຄິດເປັນເຈົ້າພາທາງ, ລຸລ່ວງຂອງຖະແຫຼງການປະກາດເອກະລາດຂອງຫວຽດນາມ ແມ່ນ ປະເທດຊາດເອກະລາດ, ເສລີພາບ, ຍຸຕິທໍາ ແລະ ຄວາມໄຝ່ຝັນຢາກໃຫ້ປະຊາຊົນມີຄວາມຜາສຸກ. ໃນກວ່າ 7 ທົດສະວັດຜ່ານມາ, ປະຊາຊົນຫວຽດນາມ ຍາດໄດ້ເອກະລາດ, ເສລີພາບ, ທ້ອນໂຮມປະເທດຊາດເປັນເອກະພາບ ແລະ ປະສົບຜົນສໍາເລັດໃນພາລະກິດສ້າງສາ ແລະ ປົກປັກຮັກສາປະເທດຊາດ.
ບົດຄຳເຫັນຂອງສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສສ ຫວຽດນາມປະຈຳ ສປປ ລາວ ເນື່ອງໃນໂອກາດສະເຫລີມສະຫລອງວັນຊາດ ສສ ຫວຽດ ນາມ ຄົບຮອບ 74 ປີ(ວັນທີ 02 ກັນຍາ 1945-ວັນທີ 02 ກັນຍາ 2019) ໄດ້ລະບຸວ່າ: ຫວຽດນາມ-ລາວ, ຍາມໃດກໍຖື ສປປ ລາວເປັນສະຫາຍ, ອ້າຍນ້ອງ, ເພື່ອນມິດຜູ້ຮັກແພງ ແລະ ຊື່ສັດທີ່ສຸດ; ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ໄດ້ຮັບການພັດ ທະນາຢ່າງຕໍ່ເນື່ອງ.
ພວກຂ້າພະເຈົ້າມີຄວາມປິຕິຊົມຊື່ນ ແລະ ພາກພູມໃຈເປັນຢ່າງຍິ່ງ ເມື່ອທັງສອງຝ່າຍໄດ້ເຫັນດີເປັນເອກະພາບ ຍົກຂຶ້ນເປັນສາຍພົວພັນມິດຕະພາບອັນຍິ່ງໃຫຍ່ ໂດຍການຢ້ຽມຢາມສັນຖະວະໄມຕີ ສປປ ລາວຢ່າງເປັນທາງການຂອງສະຫາຍເລຂາທິການໃຫຍ່, ປະທານປະເທດ ຫງວຽນ ຝູ ຈ້ອງ ໃນເດືອນ 02/2019 ແລະ ປັດຈຸບັນນີ້, ທັງສອງຝ່າຍພວມພະຍາຍາມຢ່າງສຸດຂີດ ເພື່ອນຳການຮ່ວມມືຮອບດ້ານຫວຽດ ນາມ-ລາວ ເຂົ້າສູ່ລວງເລິກ ແລະ ມີປະສິດທິພາບກວ່າເກົ່າ. ສອງຊາດຫວຽດນາມ ແລະ ລາວ ໄດ້ຈັບມືກັນຢ່າງໜັກແໜ້ນ, ຮ່ວມສູ້ຮົບນຳກັນ, ເສຍສະຫລະເພື່ອຍາດເອົາເອກະ ລາດ, ອິດສະຫລະພາບ, ໂຮມປະເທດຊາດເປັນເອກະພາບ. ມາຮອດປັດຈຸບັນນີ້, ຍັງສືບຕໍ່ຮ່ວມມືກັນເພື່ອພັດທະນາສອງປະເທດ, ປົກປັກຮັກສາສັນຕິພາບ, ຜືນແຜ່ນດິນອັນຄົບຖ້ວນ ແລະ ພື້ນຖານເອກະລາດຂອງຕົນ.
 |
ທ່ານເອກອັກຄະລັດຖະທູດ ຫງວຽນບ໊າຮຸ່ງ ພ້ອມດ້ວຍບັນດາຜູ້ແທນທີ່ງານລ້ຽງ. (ພາບ: VOV)
ປະຊາຊົນຫວຽດນາມ ຍາມໃດກໍຈາລຶກໄວ້ໃນສ່ວນເລິກຂອງຫົວໃຈ ຕໍ່ການສະໜັບສະໜູນ, ການຊ່ວຍເຫລືອອັນປະເສີດຂອງບັນດາປະເທດ, ເພື່ອນມິດສາກົນ, ພິເສດແມ່ນການຊ່ວຍເຫລືອອັນໃຫຍ່ຫລວງ, ໝົດຈິດໝົດໃຈຂອງປະຊາຊົນລາວອ້າຍນ້ອງທີ່ໄດ້ມີຕໍ່ພາລະກິດຕໍ່ສູ້ປົດປ່ອຍຊາດ ກໍຄືໃນການສ້າງສາພັດທະນາປະເທດຊາດ. ຕາງໜ້າພັກ, ລັດ ແລະປະຊາຊົນຫວຽດນາມ ສະແດງຄວາມຮູ້ບຸນຄຸນຢ່າງເລິກເຊິ່ງມາຍັງພັກ, ລັດ ແລະ ປະຊາຊົນລາວອ້າຍນ້ອງ ທີ່ຍາມໃດກໍມີຄວາມສາມັກຄີ, ໃຫ້ການສະໜັບສະໜູນ ແລະ ຊ່ວຍເຫລືອແກ່ຫວຽດນາມ. ພ້ອມທັງຂອບໃຈບັນດາປະເທດ, ເພື່ອນມິດສາກົນຍາມໃດກໍໃຫ້ການການສະໜັບສະໜູນ ແລະການຊ່ວຍເຫລືອແກ່ຫວຽດນາມ ກໍຄືສະໜັບໜູນແກ່ການພັດທະນາຂອງສາຍພົວພັນຫວຽດນາມ-ລາວ.
ໃນກວ່າ 7 ທົດສະວັດທີ່ຜ່ານມາ ໂດຍຕອບສະໜອງຄວາມໄຝ່ຝັນອັນແຮງກ້າດັ່ງກ່າວນັ້ນ, ປະຊາ ຊົນຫວຽດນາມສາມາດຍາດເອົາເອກະລາດ, ອິດສະຫຼະພາບ, ທ້ອນໂຮມປະເທດຊາດເປັນເອກະພາບໄດ້ ແລະປະສົບຜົນສຳເລັດໃນພາລະກິດສ້າງສາ, ປົກປັກຮັກສາປະເທດຊາດ. ປີ 2020 ຈະແມ່ນຂີດໝາຍສຳຄັນຕໍ່ຫວຽດນາມ ທີ່ຈະຮັບບົດບາດເປັນປະທານຜັດປ່ຽນຂອງອາຊຽນ ແລະ ເປັນກຳມະການບໍ່ຖາວອນຂອງຂອງສະພາຄວາມໝັ້ນຄົງ ສະຫະປະຊາຊາດ 2020-2021. ພວກຂ້າພະເຈົ້າຈະໃຫ້ ບູລີມະສິດ ຮ່ວມກັບອາຊຽນ ຈັດຕັ້ງປະຕິບັດບັນດາຄາດໝາຍຂອງວິໄສທັດອາຊຽນ 2025, ສ້າງປະຊາຄົມອາຊຽນ ສາມັກ ຄີ, ເຂັ້ມແຂງ, ພັດທະນາ, ວັດທະນາຖາວອນ, ເພີ່ມທະວີບົດບາດ ເປັນແກ່ນກາງຂອງອາຊຽນ ຢູ່ໃນພາກພື້ນ ແລະ ຕັ້ງໜ້າ ຊຸກຍູ້ລັດທິຫລາຍຝ່າຍ, ການຮ່ວມມືສາກົນ, ເຊີດຊູກົດບັດ ສະຫະປະຊາຊາດ ແລະ ກົດໝາຍສາກົນ; ຈະເຮັດຈົນ ສຸດຄວາມສາມາດ ການເປັນ ຄູ່ຮ່ວມມືເພື່ອສັນຕິພາບອັນໝັ້ນຄົງ ຢ່າງແທ້ຈິງ ແລະ ປາຖະໜາວ່າຈະໄດ້ຮັບການສະໜັບສະໜູນ, ການຊ່ວຍເຫລືອ ແລະ ການຮ່ວມມືຈາກບັນດາປະເທດສະມາຊິກທັງໝົດ.
（ໄຊພອນ）