ທ່ານນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມ ຕ້ອນຮັບ ທ່ານ ສູນທອນ ຄັນທະວົງ ຜູ້ອໍານວຍການໃຫຍ່ ສໍານັກຂ່າວສານປະເທດລາວ

ທ່ານ ນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມຕ້ອນຮັບທ່ານ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວ. (ພາບ: quochoi.vn)

ທ່ານນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມສະແດງຄວາມຍິນດີຕ້ອນຮັບທ່ານ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວພ້ອມດ້ວຍຄະນະມາຢ້ຽມຢາມ ແລະ ເຮັດວຽກຢູ່ຫວຽດນາມ, ໂດຍສະເພາະແມ່ນລະຫວ່າງສາຍພົວພັນຮ່ວມມື ແລະ ສາມັກຄີມິດຕະພາບອັນພິເສດສອງປະເທດກໍາລັງສືບຕໍ່ພັດທະນາທັງໃນຄວາມກວ້າງ ແລະ ຄວາມເລິກ. ໃນເວລາຜ່ານມາ, ໄດ້ມີການຢ້ຽມຢາມຢ່າງເປັນທາງການລະຫວ່າງບັນດາຜູ້ນໍາຂອງສອງປະເທດ ແລະ ການພົບປະຂອງບັນດາກະຊວງ ແລະ ຂະແຫນງການຂອງສອງປະເທດ, ທັງສອງຝ່າຍໄດ້ຢືນຢັນຄວາມມຸ່ງຫມັ້ນທີ່ຈະສືບຕໍ່ຮັດແໜ້ນສາຍພົວພັນອັນແໜ້ນແຟ້ນແຫ່ງຄວາມສາມັກຄີພິເສດລະຫ່າງລາວ - ຫວຽດນາມ.

ທ່ານ ນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມເນັ້ນໜັກວ່າ: ພັກ ແລະ ລັດ ສສ ຫວຽດນາມ ຖືສໍາຄັນໃນການເພີ່ມພູນຄູນສ້າງການຮ່ວມມືອັນເປັນມູນເຊື້ອ ແລະ ຮອບດ້ານລະຫວ່າງສອງປະເທດຕະຫລອດໄປ; ສ້າງຄວາມສະດວກໃຫ້ແກ່ບັນດາກະຊວງ, ຂະແໜງການເພື່ອປະສົບຜົນສໍາເລັດໃນໜ້າທີ່ການເມືອງທີ່ໄດ້ມອບໝາຍ, ວິສາຫະກິດຂອງສອງປະເທດປະສົບຜົນສໍາເລັດໃນໜ້າທີ່ພັດທະນາເສດຖະກິດ, ຈາກນັ້ນ, ໄດ້ປະກອບສ່ວນເຂົ້າໃນການປະຕິບັດນະໂຍບາຍການຕ່າງປະເທດທີ່ສອດຄ່ອງຂອງສອງປະເທດໃນການເພີ່ມທະວີການພົວພັນສາມັກຄີອັນພິເສດ, ຕິດພັນກັບຄວາມໄວ້ວາງໃຈ ແລະ ການຮ່ວມມືຮອບດ້ານລະຫວ່າງຫວຽດນາມ ແລະ ລາວ.

ທ່ານ ນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມຕີລາຄາສູງຕໍ່ການຮ່ວມມືລະຫວ່າງສໍານັກຂ່າວສານຫວຽດນາມ ແລະ ສໍານັກຂ່າວສານປະເທດລາວ. (ພາບ: quochoi.vn)

ດ້ວຍຄວາມດີໃຈທີ່ໄດ້ເຫັນວ່າສາຍພົວພັນໃກ້ຊິດລະຫວ່າງສໍານັກຂ່າວສານຫວຽດນາມ ແລະ ສໍານັກຂ່າວສານລາວໄດ້ສືບຕໍ່ຮັບການພັດທະນາເພີ່ມຂື້ນດ້ວຍຫຼາຍກິດຈະກໍາຮ່ວມມືເປັນຮູບປະທໍາ, ທ່ານ ນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມໄດ້ສະເໜີສໍານັກຂ່າວສານຫວຽດນາມ ແລະ ສໍານັກຂ່າວສານລາວກໍ່ຕ້ອງເຮັດໜ້າທີ່ວຽກງານຂອງຕົນທີ່ດີໃນການສະໜອງຂໍ້ມູນຂ່າວສານນຕ້ອງໃຫ້ມີຄວາມຖືກຕ້ອງ, ຊັດເຈນ, ທັນເວລາມາໃຫ້ແກ່ລະບົບສື່ມວນຊົນທ້ອງຖິ່ນ, ພ້ອມກັນນັ້ນກໍ່ຕ້ອງມີການເພີ່ມທະວີການໂຄສະນາເຜີຍແຜ່ແນວທາງ ແລະ ນະໂຍບາຍຂອງສອງປະເທດ; ໂຄສະນາເຜີຍແຜ່ສາຍພົວພັນມິດຕະພາບອັນເປັນມູນເຊື້ອລະຫວ່າງຫວຽດນາມ ແລະ ລາວ ກັບຫມູ່ເພື່ອນຕ່າງປະເທດ. ດັ່ງນັ້ນ, ທັງສອງອົງການຕ້ອງສືບຕໍ່ຮັກສາກິດຈະກໍາການຮ່ວມມືອັນເປັນມູນເຊື້ອກໍ່ຄືຄວາມຕ້ອງການໃນການແລກປ່ຽນ, ປຶກສາຫາລືກ່ຽວກັບບັນດາມາດຕະການເພື່ອຕອບສະຫນອງດ້ານຂໍ້ມູນຂ່າວສານຂອງແຕ່ລະປະເທດໃນສະຖານະການໃຫມ່.

ທ່ານ ນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມເຊື່ອວ່າດ້ວຍການຮ່ວມມືອັນເປັນມູນເຊື້ອ, ສໍານັກຂ່າວສານຫວຽດນາມ ແລະ ສໍານັກຂ່າວສານຂອງລາວຈະສືບຕໍ່ມີການປັບປຸງປ່ຽນແປງໃໝ່, ການປະຕິບັດບັນດາເນື້ອໃນດ້ານການຮ່ວມມືຢ່າງມີປະສິດທິຜົນໃນສະເພາະໜ້າ, ການຮັກສາພາລະບົດບາດເປັນອົງການຂ່າວສານທີ່ສໍາຄັນຂອງຫວຽດນາມ ແລະ ລາວ ກໍ່ຄືການປະກອບສ່ວນໃນການເສີມຂະຫຍາຍສາຍພົວພັນອັນພິເສດລະຫວ່າງປະຊາຊົນຂອງສອງປະເທດ.

ບັນຍາກາດການພົບປະ. (ພາບ: quochoi.vn)

ທ່ານ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວ ສະແດງຄວາມຂອບອົບຂອບໃຈຕໍ່ ທ່ານນາງ ຕ່ອງ ຖີ້ ຝອງ ຮອງປະທານຜູ້ປະຈໍາການສະພາແຫ່ງຊາດຫວຽດນາມ ທີ່ໄດ້ເສຍສະຫຼະເວລາອັນລໍ້າຄ່າໃຫ້ການຕ້ອນຮັບຄະນະ ແລະ ໄດ້ກ່າວວ່າ: ສໍານັກຂ່າວສານປະເທດລາວຫາກໍ່ມີການສະເຫຼີມສະຫຼອງຄົບຮອບ 5 ປີ ຂອງຕົນ. ທ່ານ ສູນທອນ ຄັນທະວົງ ກໍ່ຕີລາຄາສູງໃນການຮ່ວມມື ແລະ ການສະຫນັບສະຫນູນຂອງສໍານັກຂ່າວສານຫວຽດນາມ, ສໍານັກຂ່າວສານປະເທດລາວໄດ້ບັນລຸຜົນສໍາເລັດໃນຫຼາຍດ້ານ, ສະຫນອງຂໍ້ມູນຂ່າວສານທີ່ຖືກຕ້ອງ, ຊັດເຈນ, ທັນເວລາ. ທ່ານ ສູນທອນ ຄັນທະວົງ ກໍ່ໄດ້ສະເໜີໃຫ້ຫວຽດນາມສືບຕໍ່ເອົາໃຈໃສ່ ແລະ ສະຫນັບສະຫນູນໃນການກໍ່ສ້າງແຫຼ່ງຊັບພະຍາກອນມະນຸດ, ຕອບສະຫນອງຄວາມຕ້ອງການໃນການພັດະນາຂອງສໍານັກຂ່າວສານປະເທດລາວ.

（ໄຊພອນ）